Watwero winyo calo pe tye gin mo keken ma waromo timo ka laremwa mo tye ka lweny ki peko me two wic. Ento watwero nyuto kit ma waparo kwede pi laremwa ka wakonye me lweny ki two wic meno. I yo ma nining?

“Dano acel acel myero owiny lok oyotoyot.”—YAKOBO 1:19.

Yo acel maber adada me konyo laremi aye me winyo lokke ka en mito lok. Pe itam ni omyero ibed ki lagam pi jami ducu ma en waco. Wek en onge ni itye ka winyo lokke dok ni iparo pire. Tute me niang kit ma en winyo kwede dok pe ingol kop i wiye. Wi opo ni en twero waco jami labongo tam iye ma weko en lacen koko ange.—Yubu 6:2, 3.

“Wucuk cwiny jo ma cwinygi odoko [goro].”—1 JO TECALONIKA 5:14.

Laremi twero bedo ki lworo nyo nongo lwenyo ki tam ni konye pe. Ka inyutte ni iparo pire, ci man bikweyo cwinye adada kadi bed pe ingeyo gin ango kikome ma omyero iwacci.

“Ngat ma larem bedo ki mar i kare ducu.”—CAROLOK 17:17.

Jalle me konyo ngat meno. Me ka byeko ni ingeyo gin me atima, penye wek otitti gin ma en mito ni itimme. Ka ngat ma itye ka konyo-ni nongo tek me titti ngo ma en mito, tem  mine tam i kom gin mo ma wutwero timone kacel, calo cito ka rwene. Nyo itwero jalle me cito ka wille jami, konye ki gwoko lengo, nyo tic mukene.—Jo Galatia 6:2.

“Wudi cwinywu.”—1 JO TECALONIKA 5:14.

I kare mogo laremi pe twero bedo ki miti me lok. Cuk cwiny laremi ni ibibedo ki yomcwiny me winyo lokke ka en winyo ni emito lok ki ngat mo. Pi peko me two ma en tye kwede, laremi twero waco nyo timo jami ma cwero cwinyi. En twero ngolo yub ma nongo wuyubo kacel nyo twero keco atura. Di cwinyi dok iniang kit ma en winyo kwede ka iwoto ki mine kony ma en mito.—Carolok 18:24.

“Atute matek me neno ni en twero lok kweda kare ducu. Kadi bed pe atwero cobo pekone, kare ducu atemme me winyo ngo ma en mito wacca. I kare mogo, en nongo mito ngat mo me ciko ite me winyo lokke dok man weko en winyo maber.”—Farida, a ma lareme tye ki two wic mapatpat.

“Larema mo acel obedo lakica adada dok cuko cwinya. En olwonga i gange ka camo dek mo mamit. En otimo jami ma nyuto mar pira, dok man oweko obedo yot bota me titte kit ma awinyo kwede. Meno ocuko cwinya adada!”—Ellen, ma tye ki two par.

“Diyo cwiny pire tek adada. Ka dakona otimo gin mo ma ocwero cwinya, apoyo wiya ni twone aye oweko en tye ka timme kit meno. Man konya weko pe akeco dok weko anyutte ni aparo pire.”—Jacob, ma dakone tye ki two par.

“Dakona konya dok cuko cwinya adada. Ka awinyo ni par odiya adada, en pe diya me timo gin ma awinyo calo pe amito timone. Meno tyen lokke ni, i kare mogo en nongo pe twero timo jami ma iye mito. En obedo ngat ma pire tek adada bota pien obedo dano ma jalle dok paro pi jo mukene.”—Enrico, ma tye ki two par.