Baibul nyuto ni lamalaika mo ma lajemo, ma lacen kilwonge ni Catan Larac, ojemo i kom twero me loc pa Lubanga. En owaco ni dano gibibedo maber labongo tira ki loc pa Lubanga. Ki cwercwiny, lunyodowa mukwongo, Adam ki Kawa, guwinyo goba pa Catan ci guribbe kwede i jemo i kom Lubanga.​—Acakki 3:1-6; Niyabo 12:9.

Pien Adam ki Kawa gukwero Lubanga macalo lalocgi, gurwenyo ganggi ma i Paradic kacel ki gen me kwo pi naka labongo two mo. (Acakki 3:17-19) Tam ma gumoko-ni ogudo wa lutinogi ma lacen gunywalo. Baibul waco ni pien Adam obalo, “bal yam obino i lobo . . . ka dong to obino pi bal.” (Jo Roma 5:12) Bal bene oyabo doggola pi peko mukene: “Dano ma tye ki twero loyo jo mukene ki tek.” (Latitlok 8:9) Lok ada tye ni, ka dano loyo lawote, ci wang ma peko obino.

Nimulodi aye laloc ma ocako loc i tekwaro pa dano ma Baibul oloko i kome. Dok en ojemo i kom loc pa Jehovah. Nicakke i kare pa Nimulodi, luloc gubedo ka tic ki twerogi i yo marac. Mwaki ma romo 3,000 angec, Kabaka Solomon ocoyo ni: “Nen, jo ma giunogi gikok akoka ki pig wanggi, pien pe gitye ki ngat mo ma myero okwe cwinygi! Pe gitye ki ngat mo ma konyogi, pien jo ma unogi onongo gitye ki twero.”​—Latitlok 4:1.

Wan bene watye ki peko acel-li i kare-ni. Buk mo me mwaka 2009 pa United Nations, owaco ni dong tye ka nen ka maleng ni loc marac aye “tye ka kelo pol pa pekki ma i kin lutedero.”

Lobo-ni mito luloc mabeco kacel ki yo me loc matir. Dok meno aye gin ma Lacwecwa ocikke pire!

Lubanga otyeko keto Kerre nyo gamentene ma bileyo kaka gamente pa dano, dok “bicung bedo matwal.” (Daniel 2:44) Man aye Ker ma dano milion mapol gilego pire. (Matayo 6:9, 10) Ento, pe Lubanga kikome aye bibedo laloc me gamente man. Me ka meno, en ocimo ngat mo ma kong okwo calo dano me bedo Laloc. Anga ma Lubanga ocimo-ni?