Dano mapol i twok lobo-ni giniang ni karama obedo kwero nino me nywalle pa Yecu Kricito. Ento tika dong itamo ka ce Lukricitayo me cencwari me acel, jo ma onongo gicok ki Yecu gukwero karama? Tika ingeyo gin ma Baibul waco i kom kwero nino me nywale? Nongo lagam pi lapeny magi twero konyowa me ngeyo kace opore pi Lukricitayo me kwero karama me nywale pa Yecu.

Mukwongo, Baibul pe loko gin mo keken i kom kwero nino me nywal pa Yecu nyo pi latic mo keken ma obedo lagen bot Lubanga. Ginacoya loko ka i kom jo aryo keken ma gukwero nino nywalgi. Gin ducu onongo pe giworo Jehovah, Lubanga me ada me Baibul, dok kwero nino nywalgi okelo adwogi marac. (Acakki 40:20; Marako 6:21) Ma lubbe ki Encyclopædia Britannica, Lukricitayo macon onongo gidag “kwer mogo me goba calo kwero nino nywale.”

Baibul pe waco awene kikome ma kinywalo iye Yecu. Cyclopedia pa McClintock gin ki Strong waco ni: “Cik Manyen nyo buk mo keken pe tito awene kikome ma kinywalo iye Kricito.” Ki lok ada, ka Yecu onongo mito ni lulub kore gukwer nino nywalle, kono onongo en owaccigi ninone.

Me aryo, Baibul pe waco-ni Yecu nyo lupwonyene gukwero karama me nywale pa Yecu. Ma lubbe ki New Catholic Encyclopedia, kiloko pi tyen me acel i kom Karama me nywale pa Yecu “i Chronograph pa Philocalus, lacoc me Roma ma ocoyo i kine ka mwaka 336 [K.M.].” Ki lok ada, meno obedo i nge cencwari mapol ma Yecu obedo kwede i lobo dok bene onongo kityeko coyo Baibul woko. Man aye gin muweko McClintock gin ki Strong guwacci “Lubanga aye pe owaco ni myero kikwer karama me nywale pa Yecu, dok bene pe kicoyo pire i Cik Manyen.” *

Macalo Lapwony Madit, Yecu otito jami ducu ma en mito ni lulub kore gutim dok bene tye kicoyo i Baibul. Karama pe tye i kin jami ma Yecu owaco ni kikwer. Kit macalo lapwony mito ni lutino kwanne gulub cikke, Yecu bene mito ni lulub kore ‘gulub gin ma yam gicoyo’ i Ginacoya.​—1 Jo Korint 4:6.

Kitungcel tye kwer mo acel ma lulub kor Yecu onongo gingeyo maber adada​—Nipo me to pa Yecu. Yecu kikome aye owaco ki lupwonyene awene ma myero gukwer iye kwer meno ki dok bene kit ma myero gukwer kwede. Kit ma myero gukwer kwede ki nino dwene bene tye i Baibul.​—Luka 22:19; 1 Jo Korint 11:25.

Kit ma waneno kwede-ni, Karama obedo kwer me nino nywal, dok bene Lukricitayo macon pe gukwero karama. Medo i kom meno, Baibul pe waco ni Yecu nyo ngat mo keken okwero karama me nywale pa Yecu. Pi tyen lok magi, Lukricitayo milion mapol gumoko ni kwero karama me nywale pa Yecu pe tye atir.