Pe Tye Ngat Mo ma Twero Bwot ki i To
GO KONG ni itye ka neno filim i kom dano mo ma oywek, gwok nyo lago wer mo ma imaro adada. Filim man cakke ki nyuto kwone i kare ma en pud tidi, kit ma en obedo i kilaci me pwonyo goyo piyano, ki yellene me bedo ka goyo piyano nino ki nino. I nge meno, ineno ka en tye ka goyo wer i ka namo madongo, kun woto wa i bor piny, ci odoko dano ma oywek i wi lobo ducu. Ma pe orii, ineno ka en dong otii woko, ci i agikki me filim man, en oto woko.
Filim man nyuto gin mutimme ada i kwo pa ngat ma dong oto woko. Kadi bed dano-ni onongo obedo lawer, lacayan, latuku, nyo ngat mukene ma oywek, kwone onongo bigik marom. Twero bedo ni dano-ni ocobo jami mapol, ento tam kong i kom jami mukene ma onongo en twero cobone ka onongo pe pi peko me tiyo ki to.
Ki cwercwiny madit, man aye gin ma tye ka kuro wan ducu. (Latitlok 9:5) Kadi bed watemme ningo, pe watwero bwot ki i tiyo ki to. Pe meno keken, two nyo can ma guduwa twero giko kwowa atura. Kit ma kiporo kwede i Baibul, wan wabedo calo lupu ma “nen pi kare manok mo keken, ci lacen ke woko.”—Yakobo 4:14.
Kit macalo watwero to i cawa mo keken, jo mukene gitye ki cwiny ni “wacamu, wamatu, pien diki wabito woko.” (1 Jo Korint 15:32) Ento dano gikwo kit man pien gingeyo ni pe gitye ki gen mo pi anyim. Kadi ki ngo—tutwalle ka watye ka wok ki i kwo matek—watwero pennye kekenwa ni, ‘Kwo mono dong ducu kite ene?’ Itwero nongo lagam me lapeny man ki kwene?
I kare-ni, jo mapol giketo gengi i kom cayan. Diro manyen ma lucayan gukatti kwede ki yadi me cango two omedo kare me kwo pa dano olo manok. Dok lucayan mukene gitye ka tic matek me temo medo kare me kwo pa dano. Kadi bed tutegi onyak nyige nyo pe, lapeny magi pud dong: Pingo wati dok wato? Tika gen mo tye ni kibiloyo lamonewa to? Pwony ma lubo man bilok iye dok bigamo lapeny man, Kwo mono dong ducu kite ene?