KADI bed ni kwero bedo luwiny pa lunyodowa mukwongo, Adam ki Kawa okelo bal ki to i kom dano ducu, ento man pe oloko yub pa Lubanga pi dano. I kabedo mapol i Baibul, Lubanga omoko ni yubbe pe olokke.

• “Jo ma kitgi atir gibicamo lobo, dok gibibedo iye matwal.”​—Jabuli 37:29.

• “[Jehovah] Lubanga dong bimwonyo to woko matwal, dok en bidunyo pig wang dano woko ducu.”​—Icaya 25:8.

• “Lakwor ma gibityeko woko me agikki en aye to.”​—1 Jo Korint 15:26.

• “To bene dong bibedo pe, kadi kumo nyo koko, nyo arem.”​—Niyabo 21:4.

Lubanga “bimwonyo to” kun giko woko nining? Kit ma waneno kwede, Baibul tito ka maleng ni “jo ma kitgi atir gibicamo lobo, dok gibibedo iye matwal.” Ento, Baibul waco bene ni “pe tye dano mo ma kite atir i lobo man, ma timo gin maber keken.” (Latitlok 7:20) Tika man tyen lokke ni Lubanga dong pe bimito ni dano olub cikke, wek dano ma tye ki roc ma gubedo lubalo gukwo pi naka? Man pe twere! En pe bitimo meno pien “Lubanga . . . pe loko lok goba.” (Tito 1:2) Ci dong Lubanga bitimo gin ango wek yubbe pi dano ocobbe kakare?

Lubanga Jehovah oketo yub me mar madit adada me kwanyo to woko ki i kom dano​—ki culo ginkok. Ginkok obedo wel ma kiculo ma rwatte ki jami muballe nyo me cobo ngol ma atir. Kit macalo dano ducu gubedo lubalo dok kingolo kop me to i wigi, Baibul tito atyer ka maleng ni: “Adada, pe tye dano mo ma twero kokke kekene, nyo ma twero miyo wel mo bot Lubanga pi wilo kwone, pien gin kok me kwo pa dano welle dit mada, dok pe twero romo.”​—Jabuli 49:7, 8.

Ka dano ma tye ki roc oto, en twero culo pi balle keken; en pe twero koko kwone, dok pe twero culo pi bal pa ngat mukene. (Jo Roma 6:7) Wamito ngat ma pe ki roc dok pe obalo wek odyer kwone pi balwa ento pe pi balle.​—Jo Ibru 10:1-4.

Meno aye gin ma Lubanga oyubo me timone kikome. En ocwalo wode, Yecu ki i polo wek kinywale i lobo macalo dano ma pe ki roc dok pe ki bal. (1 Petero 2:22) Yecu owaco ni en ebino pi “miyo kwone me lakok lwak dano mapol.” (Marako 10:45) En oto me culo pi balwa ki pi larowa ki i to wek wabed ki kwo ma pa tum.​—Jon 3:16.

I kare-ni, ma lubbe ki lok pa lunebi me Baibul, watye ka kwo i kare ma ‘piny tye marac,’ nyo “i kare me agikki” me lobo man. (2 Temceo 3:1) Kare me agikki man bigik “ka nino me ngolo kop ki tyeko dano ma pe gilworo Lubanga oromo.” (2 Petero 3:3, 7) Ento jo ma gimaro Lubanga pe kibityekogi dok gibinongo mot me “kwo ma pe tum.”​—Matayo 25:46.

Dano milion mapol gibibedo ki kare me nongo kwo ma pe tum ka kicerogi. Yecu ocero dano i kare ma olimo boma me Nain. Wod pa dato mo onongo oto, ci Yecu “kica omake i kome,” omiyo en ocero awobi-ni. (Luka 7:11-15) Lakwena Paulo ocoyo ni: “Pi niyena i kom Lubanga atye ki gen ni dano gibicer woko, jo ma kitgi atir wa ki jo ma kitgi pe atir.” Gen man ma tye ma kome-ni obedo lanyut me mar madit adada pa Lubanga pi dano.​—Tic pa Lukwena 24:15.

 Dano bilion mapol gibibedo ki mot me kwo pi naka. Baibul waco ni, “Jo ma kitgi atir gibicamo lobo, dok gibibedo iye matwal.” (Jabuli 37:29) I kare meno, gibibedo ki yomcwiny madit adada dok gibinongo cuko cwiny me neno cobbe pa lok ma lakwena Paulo ocoyo mwaki 2,000 angec ni: “In to, locci dong tye kwene? In to, aremmi kono tye kwene?” (1 Jo Korint 15:55) Lakwor pa dano marac adada, to, nongo dong kiloyo woko!