Nicakke ma kicwe dano, Lacwecwa obedo ka kubbe ki dano kun tiyo ki lumalaika kacel ki lunebine. Medo i kom meno, en bene oyero ni kico cikkene kacel ki mot ma en bimiyo. Cikke magi ma oa ki bot Lubanga gudo anyim ma megi. Dong itwero nongo cikke pa Lubanga ki kwene i kare-ni?

Kwena pa Lubanga piwa tye nonge i Coc Maleng. (2 Temceo 3:16) I yo ma nining ma Lubanga otiyo ki lunebi me coyo kwenane? (2 Petero 1:21) Lubanga oketo tamme i wi lucoc magi, ci gin gucoyo piny. Man aye gin ma timme i kare-ni bene. Ka latim biacara mo otiyo ki karanne me coyo waraga pire, pud wawaco ni kwena meno oa ki bot labiacara man. I yo acel-lu, kadi bed Lubanga otiyo ki dano me coyo kwenane, kwena ma tye i Coc Maleng oa ki bote.

Lok pa Lubanga pire tek adada ma oweko en mito ni jo ducu gukwan dok guniang maber. I kare-ni, “lok me kwena maber” pa Lubanga tye nonge bot jo me “rok ducu ki kaka ki leb-gu” ducu. (Niyabo 14:6) Lubanga ogoyo laane oweko Coc Maleng tye nonge olu nyo bute keken i leb makato 3,000 kulu, ma man loyo buk mo keken i wi lobo-ni.