Jo mapol gitamo ni jo ma gukwano i rwom ma lamal nyo lulonyo gitye ki anyim maber. Giye ni kwan wa i univaciti twero konyo dano me bedo lutic mabeco, jo me odi mabeco, ki anywali me lobogi mabeco. Gitamo bene ni kwan i rwom ma lamal bikonyogi me nongo tic ma culle lamal dok ni jo ma gitye ki cente madwong gibedo ki yomcwiny.

Tam kong i kom lok pa laco mo ma nyinge Zhang Chen, ma a ki i lobo China. En owaco ni, “Onongo atamo ni labongo nongo digiri i univaciti pe atwero a woko ki i can dok ni tic ma culle lamal aye biweko abedo ki yomcwiny dok ma ayeng ki kwo.”

Me nongo kwo maber, jo mapol gimito kwan i univaciti mogo ma gingene adada, gwok nyo i lobe mukene. Man gin ma obedo ka timme adada nio wa i kare ma two Korona ojuko wi lobo kulu ki wot. Mwaki ma romo 10 angec, dul mo otimo kwed dok omiyo ripot ni wel makato nucu pa lutino ma gikwano i lobo ma woko gia ki i Asia.

Lunywal pol kare gijalo jami mapol me cwalo lutinogi i univaciti ma i lobo ma woko. Laco mo ma nyinge Qixiang, ma a ki lobo Taiwan, wiye po ni: “Lunywala onongo pe gubedo lulonyo ento gucwalo wan lutino angwen ducu ka kwan i univaciti i lobo Amerika.” Me culo pi kwan ma kit meno, jo ganggi, calo jo me gangi mukene bene, gudonyo i den madit adada.

Kwan i rwom ma lamal twero yubo kwowa i yo mogo, ento pol kare pe kelo adwogi ma lutino kwan gugeno. Me labolle, i nge tic matek pi mwaki mapol kacel ki deno cente madwong pi culo pi kwangi, jo mapol pe ginongo tic ma gimito. Lacoc mo ma nyinge Rachel Mui ocoyo kit man i gajeti me Business Times me lobo Singapore: “Jo mapol ma gukwano wa i univaciti pe gitwero nongo tic.” Laco mo ma nyinge Jianjie, ma tye ki digiri mapol me univaciti dok bedo i lobo Taiwan, owaco ni, “Jo mapol pe gitwero nongo tic ma rwatte ki digiri ma gukwano.”

Jo ma gitwero nongo tic ma rwatte ki digiri ma gukwano, pud ginongo ni kwogi pe tye ka wot kit ma gugeno kwede. I nge dwogo ki i univaciti i lobo Ulaya, laco ma nyinge Niran, ma a ki i lobo Thailand, onongo tic ma en okwano. En owaco ni, “Kit ma onongo abyeko kwede, digiri man okonya me nongo tic ma culle bup. Ento, onongo mitte ni ati matek pi cawa malac wek anong mucara madit meno. I agikkine, kampuniwa oryemo pol pa luticce, kadi wa an. Aniang ni pe tye dog tic mo keken ma twero weko wabedo ki anyim ma genne.”

Kadi wa jo ma lulonyo nyo ma ginen calo gitye maber pud gitye ki pekki i odigi, giyelle ki two, dok gitye ki par i lok kom cente. Laco mo ma nyinge Takashi, ma a ki i lobo Japan, owaco ni, “Onongo atye ki cente madwong, ento onongo cwinya pe yom pien jo mukene onongo ginyek i koma dok gitera marac.” Dako mo ma nyinge Lam, ma bedo i lobo Vietnam, owaco ni, “Jo mapol giyelle me nongo cente madwong pien gitamo ni biweko gibedo maber, ento pol kare man keligi par mapol kacel ki two.”

Calo Franklin, jo mapol dong gumoko ni tye jami mapol ma pigi tego i kwo makato kwan i rwom ma lamal ki yenyo lonyo. Me ka keto cwinygi i yenyo jami me kom, jo mogo giyenyo anyim maber ki tute me bedo jo mabeco kacel ki timo jami mabeco bot jo mukene. Tika kwo i yo ma kit meno biweko ibedo ki anyim maber? Pwony ma lubo man bimiyo lagamme.