Delphine, ma waloko i kome i pwony mukato-ni, owinyo ni meno peko ma onongo en tye ka wok ki iye onongo tere i mato kongo matek adada. Baibul pe gengo mato kongo i yo mupore, ento waco ni: “Pe ibed i kin jo ma gin lumero ki kongo.” (Carolok 23:20) Kinongo ni mato kongo i yo marac balo yotkomwa, balo wat i kin jo me ot, dok neko dano mapol mwaka ki mwaka. Pol pa peko magi kitwero gwokke ki iye ka dano gulubo tira me Baibul.

Meno en aye gin ma Delphine otimo. En owaco ni: “Aniang ni meno mato kongo onongo pe tye ka cobo pekona. Atiyo ki tira me ryeko ma i Jo Pilipi 4:6, 7, ma waco ni: ‘Pe wubed ki par i kom gin mo, ento . . . wumi Lubanga onge gin ma wumito.’ I dyewor weng ka awinyo ni tam ki par gitye ka bwoya woko, alego bot Jehovah. Atito cwercwinya, par ki jami ducu ma nyweno wiya dok abako doga bote i lega wek en okonya me bedo ma cwinya opye mot. I odiko, aneno ni meno atute ki tekka ducu me weko par meno woko ducu. Lega bot Jehovah konya me keto tamma i kom jami ma atye kwede ma ka jami ma ape kwede. Amoko tamma pe me mato kongo doki. Pe onongo amito rwenyo kuc ma anongo pien pire onongo tekka adada.”

Tim me carocaro aye tye ka kelo turcwiny ki par ma loyo jami ducu. Ento cik ma igi lac me Baibul twero konyowa me gwokke ki i jami ma gikelo peko magi​—me labolle, lok oree ki neno jami ma tugo miti me buto. Awobi mo matidi ma nyinge Samuel owaco ni: “Tim me oree onongo yot adada, i cawa mukene nongo cwinya pe i kom anyaka moni, ento atwero neno ni en tye ki miti i koma​—dok meno weko loko lok oree bedo mit adada.” Samuel onongo ni meno pol kare gikok i kome pi tim me oree​—kadi bed ni pe etimo akaka man oweko en ocako timone akaka. Ento man oweko cwinye obedo ka pide adada. En owaco ni, “man onongo rac adada pien weko itamo pi gin ma yomo cwinyi keni.”

Samuel okwano pwony mo ma onongo kiyubo pi jo matino ma okati i jw.org. Dok otamo i kom Carolok 20:11 ma waco ni: “Kadi wa latin nyuto kit ma etye kwede i gin ma en tiyo, ka gin ma en tiyo-ni ber nyo tye atir.” Meno okonye nining? Samuel oniang ni meno loko lok oree pe obedo gin maber. En bene owaco ni: “Aniang ni meno bulu ma maro loko lok oree dongo kit mogo maraco ma weko en bedo laco marac ka en onyomo. Acako tamo i kom kit ma dakona biwinyo kwede ka en ononga ka loko lok oree ki dako mukene. Meno oweka aniang ni tim man kelo adwogi marac i kwo pa dano. Kadi bed ni loko lok oree yot ento meno pe weko bedo tim mupore.” Samuel oweko tim man woko. Juko oree bene okonye me gwokke ki i tim me carocaro.

Antonio onongo tye ka kemme ki peko madit loyo ma twero tere i tim me carocaro: En onongo dong odoko opii pa jami ma tugo miti me buto. Kadi bed ni en onyomme ki dako ma en maro adada, en pud obedo ka neno ki winyo jami ma tugo miti me buto kare ki kare. En owaco ni, tam i kom 1 Petero 5:8 okonye adada. Wang Baibul meno waco ni: “Wugwokke, wuki piny, pien lakworwu Catan tye ka wire macalo labwor ma kok kun yenyo dano me amwoda.” Antonio owaco ni: “Cal ma tugo miti me buto tye orumowa dyere, dok cal meno twero moko i wiwa adada. Tyeng meno okonya me niang ka ma atematema magi a ki iye. Onongo mitte ni wiya opo oyotoyot adada ni cal magi gua ki bot Catan. Kombeddi dong aniang ni Jehovah keken aye ma twero konya me ‘gwokke ki dok me bedo ma akiyo piny’ wek atute matek me jwayo cal magi ki i wiya, i cwinya ki dok gwoko nyoma.” Antonio onongo kony ma mitte dok oweko tim magi woko. Dok meno okonye me gwokke ki i peko mogo maraco makato.

Ki lok ada, Baibul miniwa tira ma gikonyowa me gwokke ki i peko mogo maraco adada. Ento peko ma dong gurwako lwitgi i kwowa dok ginen calo pe gitwero gik kono? Kong dong wanenu kit ma Lok pa Lubanga twero konyowa kwede me cobo peko magi.