Paradic! Bukke mogo ma kigoyo cal kabedo mogo mamwonya adada kiketo iye kwena me cato wil me cito ka galowang i “paradic” ka mabor ka ma itwero yweyo iye wii dok wii wil woko i kom par ducu ma itye kwede. Ento kit ma wangeyo kwede, ka wadwogo gang, jami dwogo weng i wii kit ma onongo tye kwede.

Kadi bed kit meno, dano mapol gitye ki miti matek pi paradic. Man weko wabedo ki lapeny ni: ‘Tika “paradic” pe obedo mere lek mo ata? Ka ada, ci pingo dano gibedo pi miti pire kit meno? Dok tika twero bedo lok ada?’

Cencwari mapol mukato, dano mapol gubedo ki miti me ngeyo lok i kom paradic. Ki bot dano mapol, mitigi ocakke pi kit ma Baibul owaco kwede ni tye “poto ma tye i Eden, tung wokceng.” Gin ango ma oweko poto man onongo mwonya adada? Baibul tito ni: Lubanga Jehovah “omiyo yadi gutwi i ngom, kwa yadi ducu mamwonya ma neno ber, ki mabeco me acama.” Poto meno onongo yomo cwiny dok ber adada. Gin mukene ma oweko poto man onongo ber kit meno aye pien ni Lubanga bene “dok oketo yat me kwo i dye poto” meno.​—Acakki 2:8, 9.

Medo i kom meno, buk me Acakki waco lok i kom kulu angwen ma gimol ki i poto meno. Kulu aryo i kingi pud wangeyo wa i kare-ni​—kulu Taigric ki Euprate. (Acakki 2:10-14) Kulu aryo magi gimol wa i Persian Gulf ma i kare-ni kilwongo ni Iraq, ma onongo con obedo but Percia macon.

Ki lok ada, paradic ma onongo tye i lobo kany obedo tye i tekwaro pa jo me Percia. I ka gwoko jami me tekwaro pa jo Percia ma tye i Philadelphia Museum of Art i Pennsylvania, U.S.A., tye cal mo ma nyuto poto mo ma kigengo ki cel, ma kipito iye ature ki yadi. I leb pa jo Percia “poto ature ki yadi ma gigengo ki cel” gonye ni “paradic,” dok cal ma kigoyo-ni rwatte ki kit ma Baibul tito kwede poto me Eden.

Ki lok ada, ododo madok i kom paradic kitito i leb mapol i but lobo lung. Ka dano gidak i kabedo mukene gicito ki lok magi i wigi, ento ka kare woto ki kato gicako medo kado i kom lok ada meno kun ginywene ki tekwaro kacel ki lok mogo ma dano giloko. Kadi wa i kare-ni, dano mapol giloko i kom kabedo mo keken mamwonya ni obedo paradic.

Lungi piny mogo guwaco ni dong ginongo ka ma paradic murweny-nyi tye iye. Me Labolle, i kare ma latela wi mony mo pa jo Britain ma nyinge Charles Gordon olimo Seychelles i 1881, en oneno kit ma Vallée de Mai mwonya kwede​—i kare ni dong kilwongo ni World Heritage site, man oweko en olwongo kabedo meno ni poto me Eden. I cencwari me 15 dok langi piny mo ma a ki i lobo Italy ma nyinge Christopher Columbus, obedo ki tam ni ecok nongo poto me Eden i kare ma oo i cula nam me Hispaniola, ma i kare-ni dong obedo lobo me Dominican Republic ki lobo Haiti.

Buk mo ma tito lok me tekwaro i kare-ni, ma kilwongo ni Mapping Paradise tye ki cal makato 190 ma polle kigoyo cal Adam gin ki Kawa i poto me Eden. I kin cal magi tye iye cal mo ma kikwanyo ki i buk me Beatus of Liébana ma kicoyo i cencwari me 13. I cal man kiketo cal paradic i dyere. Dok kulu angwen magi, “Tigris,” “Euphrates,” “Indus,” ki dong “Jordan,” gimol i twokke angwen mapatpat ma nyuto kit ma Dini onya kwede i lobo. Kodi cal magi ginyuto ni kadi bed ni dano dong pe gingeyo ka ma Paradic obedo iye, ento gingeyo ni Paradic onongo mwonya adada.

John Milton, laco lwod mo me cencwari me 17, ngene pi lwod ma en ocoyo ma wiye tye ni Paradise  Lost ma okwanyo lokke ki i buk me Acakki ma loko i kom bal pa Adam ki kit ma kiryemogi kwede ki i poto me Eden. Man dok onongo loko i kom kit ma dano gibibedo ki kwo ma pe tum i lobo, en owaco ni: “Lobo ducu bidoko paradic.” Medo i kom meno Milton dok ocoyo lwod mukene ma wiye tye Paradise Regained.

Ki lok ada, lok i kom kit ma paradic orweny kwede ki i lobo aye tam ma dano onongo gimaro lok iye loyo nicakke wa con. Ento pingo dong pe gimaro i kare-ni? Kit ma buk me Mapping Paradise onyuto kwede, tyen lokke tye ni pien “jo ma gikwano lok kom dini . . . pe gimito lok mo keken madok i kom kabedo ma gitamo ni paradic obedo iye.”

Jo mapol ma gicito i lega kipwonyogi i kanica ni ganggi tye i polo, ento pe ni gibikwo i paradic i lobo kany. Ento Baibul waco i Jabuli 37:29 ni: “Jo ma kitgi atir gibicamo lobo, dok gibibedo iye matwal.” Ci dong kit macalo lobo pe tye paradic i kare-ni, watwero bedo ki gen nining ni cikke pa Lubanga bicobbe kakare? *

Lubanga Jehovah, lacwe Paradic macon-ni, ocikke me dwoko Paradic murweny-nyi. En bitimo meno nining? Wi opo ni Yecu opwonyowa ni myero waleg ni: “Ker meri obin; giti gin ma imito i lobo kit ma gitiyo i polo.” (Matayo 6:10) Ker meno obedo gamente ma biloyo lobo-ni i te loc pa Yecu Kricito dok locce bileyo ka wang loc pa dano ducu. (Daniel 2:44) I te Ker meno, miti pa Lubanga me loko lobo ducu me doko paradic bicobbe kakare.

Con kong lanebi Icaya otito kit ma kwo bibedo kwede i Paradic ma kiciko pire-ni, ka ma peko ma dano gitye ka kemme kwede i kare-ni ducu bibedo pekke. (Icaya 11:6-9; 35:5-7; 65:21-23) Wacuko cwinyi me kwanyo dakika manok wek ikwan ginacoya meno ki i Baibulli. Ka itimo meno, ci bijingo genni i kom jami mabeco ma Lubanga oyubo pi jo ma luwiny. Jo ducu gibinongo mit pa kwo i paradic i lobo kacel ki cwak pa Lubanga, jami ma Adam orwenyo-ni.​—Niyabo 21:3.

Pingo watwero bedo ki gen ni paradic ma kiloko pire-ni pe obedo lek mamwa ento lok ada? Pien Baibul wacciwa ni: “Polo obedo jami pa Rwot [Jehovah] kene, ento omiyo lobo bot dano, ni gubed iye.” Gen me kwo i Paradic i lobo kany obedo gin ma “Lubanga ma pe loko lok goba yam ociko pire i acakki piny.” (Jabuli 115:16; Tito 1:2) Watye ki gen mamwonya adada ma kiciko pire i Baibul​—Kwo i Paradic bibedo pi naka!