LUZIA OBEDO LANGOLO MA KOMO KI TYENNE MA LACAM. I kare ma en latin matidi, two polio omake. Man obedo two marac ma kobo oyotoyot dok neko ler kom dano. I kare ma en tye ki mwaka 16, dako mo acel ma Luzia onongo tiyo bote owacce ni, “Lubanga opwodi ki two ngolo pien onongo ibedo latin ma oding dok pe iwinyo lok pa mamani.” Mwaki mapol lacen, Luzia pud wiye po kit ma man oturo kwede cwinye.

I KARE MA DAMARIS ONIANG NI ETYE KI TWO KANCA ME ADAM, wonne openye ni: “Itimo ngo wek gin ma kit man otimme i komi? Nen calo itimo bal mo madit adada. Man aye oweko Lubanga tye ka mini pwod.” Lok pa won Damaris man oturo cwinye adada.

Tam man ni two obedo pwod ma a ki bot Lubanga-ni ocakke wa con. Buk me Manners and Customs of Bible Lands waco ni jo mapol i kare pa Kricito onongo giye ni “two bino i kom ngat moni pi bal pa latwo, nyo bal pa wadine, dok two obedo pwod pi bal.” Dok buk me Medieval Medicine and the Plague waco ni cencwari mapol i nge to pa Yecu “dano mogo onongo gitamo ni Lubanga okelo two gemo ma kilwongo ni plague macalo pwod pi balgi.” Pi meno, i kare ma dano milion mapol i Ulaya guto ki two gemo man i kine ka cencwari me 14, tika ada Lubanga aye onongo tye ka ngolo kop i wigi pien gubedo jo maraco? Nyo kece two man obino macalo adwogi me kobo pa kwidi ma kelo two-ni, kit ma lucayan lacen guniang? Jo mukene giromo pennye ni, Lubanga tika tiyo ki two me pwodo dano pi balgi? a

TAM KONG: Ka onongo Lubanga tiyo ki two kacel ki peko me pwodo dano, ci dok pingo Wode, Yecu ocango lutwo? Tika tic pa Yecu-ni nongo pe tye ka cayo ngolo kop ki kit matir pa Lubanga? (Matayo 4:23, 24) Yecu matwal pe twero gengo yub pa Lubanga. En owacci: “Nino ducu atiyo gin ma iye mito,” dok “atiyo macalo Won ocika.”​—Jon 8:29; 14:31.

Baibul nyuto ka maleng ni: Lubanga Jehovah “pe ngolo kop alenga.” (Nwoyo Cik 32:4, NW) Me labolle, Lubanga kulu pe twero miyo dege wang, kun neko dano mia mapol, pien ni mito miyo pwod bot ngat acel ma tye i dege meno! Ma lubbe ki kit ma atir pa Lubanga, Abraim, latic pa Lubanga ma lagen, owaco ni Lubanga matwal pe ‘bityeko jo ma kitgi atir kacel ki jo maraco.’ En owaco ni pe twero bedo ‘kumeno!’ (Acakki 18:23, 25) Baibul bene waco ni “Lubanga pe timo gin mo marac” nyo “ma pe tye atir.”​—Yubu 34:10-12.

Pekki ma wakato ki iye pe tye calo pwod ma Lubanga miyo pi balwa. Yecu kikome otito ka maleng lok man i kare ma en ki lupwonnyene guneno laco mo ma kinywalo ma wange oto. “Lupwonnyene gupenye ni, ‘Lapwony, anga ma obalo, laco man, kece nyo jo ma gunywale, ma omiyo ginywale ma wange oto?’ Yecu ogamo ni, ‘Laco man pe obalo, kadi jo ma gunywale, ento man otimme wek tic pa Lubanga onen i kome.’”​—Jon 9:1-3.

Kit macalo dano mapol i kare meno onongo gitye ki tam marac, lupwonnye pa Yecu nen calo gubedo ki ur i kare ma Yecu owaccigi ni laco-ni ki lunyodone pe gubalo ma oweko okelo peko man i kome. Yecu pe ocango laco-ni keken ento i timo  meno en onyuto ni tam ni peko obedo pwod ma a ki bot Lubanga pe tye kakare. (Jon 9:6, 7) Jo ma gitye ka canne ki two malit i kare-ni gitwero nongo kwe cwiny ki i ngeyo ni pe Lubanga aye ma tye ka kelo two i komgi.

Ginacoya cuko cwinywa ni

• “Lubanga pe gibito ki tiyo gin marac, en bene pe bito ngat mo.” (YAKOBO 1:13) Ki lok ada, “gin marac” magi ma dong oolo dano pi mwaki mia mapol ma i kine tye iye two, arem, ki to, dong kicok tyekogi woko.

• Yecu Kricito “ocango jo ducu ma onongo komgi lit.” (MATAYO 8:16) I kare ma Wod pa Lubanga ocango lutwo ducu ma gubino bote, en onongo tye ka nyuto gin ma Ker pa Lubanga bitimone i wi lobo ducu.

• “En [Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—NIYABO 21:3-5.

Dong, pingo dano tye ka kato ki i arem ki pekki mapol ata? Dano dong gubedo ka tam i kom lagam me lapeny meno pi cencwari mapol. Ka omyero pe wakok i kom Lubanga, ci dong anga ma omyero wakok i kome? Lagam pi lapeny magi kibinyamogi i pwony ma lubo man.