Kwena Maber-ri Obedo Gin Ango?

“Kwena maber . . .”​—MATAYO 24:14.

LUKRICITAYO myero gutit pi “kwena maber me ker” kun gitito pire bot jo mukene, gitito ni Ker-ri aye gamente ma biloyo lobo i kit ma atir i anyim. Ento, ‘kwena maber-ri’ bene kitiyo kwede i yo mukene i Baibul. Me lapore, waromo nongo ngec mukene ma loko i kom ‘kwena maber me larre’ (Jabuli 96:2); “kwena maber ma oa ki bot Lubanga” ( Jo Roma 15:16); ki “kwena maber i kom Kricito Yecu.”​—Marako 1:1.

Kiromo waco ni kwena maber-ri kwako ada ducu ma Yecu owaco pire ci lupwonnyene gucoyo. Ma peya en odok i polo, Yecu owaco bot lulub kore ni: “Pi meno dong wuciti wucilok jo me rok ducu gudok jo ma luba,kun wubatijagi i nying Won ki Wod ki cwiny maleng, wupwonygi me gwoko gin ducu ma dong atyeko cikowu kwede.” (Matayo 28:19, 20) Pi meno tic pa Lukricitayo me ada pe tye me poyo wi jo mukene keken, ento me pwonyogi lok i kom Ker-ri; omyero bene gulok dano me lubo kor Yecu.

Kanica mapol gitye ka timo man nining? Dano mapol pe giniang gin ma Ker-ri obedo dok bene pe giromo pwonyo lok kome i yo matir bot jo mukene. Ma ka meno, gipwonyo lok mogo ma winyone mit i it dano kun giloko tutwalle i kom timo kica ki bedo ki niye i kom Yecu. Giyelle bene me yubo kwo pa jo ma gulokke botgi kun gigero odi yadi, cukul, ki odi pi lucan. Kadi bed tute man medo wel dano i kanicagi, pwonygi pe miyo gibedo calo Lukricitayo me ada ma giyelle me kwo i yo ma Yecu opwonyo

Lapwony mo me University of Southern California School of Philosophy ocoyo ni: “Pol pa lukwan madongo ki ludito dini gingeyo ni myero walok dano wek gulub kor Yecu kun wapwonyogi me timo jami ducu ma Yecu ociko.  . . Cik ma Yecu omiyo ma lube ki lok man nen ka maleng. Ento pe wamito timo gin ma en owaco akaka. Dok pe watero calo gin ma pire tek. Ki dong bene nen calo pe wangeyo kit me timone.”

I yo acel-lu, kwedo lok mo ma kitimo i kom dini katoli i Amerika nyuto ni pacen 95 giye ni tito kwena maber-ri obedo gin ma myero gitim ma lube ki niyegi. Ki tungcel, gin ducu ginongo ni yo maber aye pe me lok iye, ento me kwo i yo ma nyutu lanen maber bot jo mukene. Dako mo acel ma kipenye owacci: “Tito Kwena Maber-ri pe obedo lok aloka keken. Mitte ni myero wanyut lanen maber i titone.” Magajin ma kilwongo ni U.S. Catholic, ma okwedo lok man owaci dano mapol pe gimito tito pi niyegi pien “nying dinigi onongo dong oballe woko i lok me tim tarwang ki pwony maraco.”

Ka mukene, bicop me Methodist owacci kanicane opokke woko dok wigi onywene ata ma pe gitye ki tekcwiny me tiyo ticgi dok kit ma gikwo kwede pe nyutu lanen maber. En oloko ki cwer cwiny kun penyo ni: “Angagi ma myero gutit pi jiri me Ker-ri?”

Bicop-pi pe omiyo lagam pi lapenye-ni. Ento lagamme tye. Ibinongone i pwony ma lubo man.

[Boro buk i pot karatac 6]

Kwena maber-ri loko i kom Ker pa Lubanga ki dok keto niye i kom Yecu Kricito pi nongo larre