Lok Mo ma Pire Tek pa Lanebi

“Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”​—MATAYO 24:14.

LUKWAN matego giye ni tyeng man pire tek adada. Pire tek pien tic ma tyeng man loko i kome-ni kwako wi lobo ducu. Dok bene pire tek pien ni nyutu gin ma Lukricitayo myero gubed ka timone, tito lok me kwena ma en aye tic ma myero obed mukwongo dok tye lanyut me timme pa gin mo madit atika ma Yecu olwongo ni “agikki piny.”

Tyeng meno tye ka cobbe i kare-ni. Lokke gudo in bene pien lok me kwena maber-ri tye iye lok me lwongo ki ciko dano. Miyo boti gin ma myero iyer. Itwero ye Ker pa Lubanga nyo i kwero woko. Kit ma iyero kwede gudo kwo-ni kikome.

Nen kong lok murumo ka nget tyeng man. Nino mapol mukato angec ma onongo peya kiguru Yecu, lupwonnyene gubino bote gupenye pi gin ma anyim. Gin onongo gimito ngeyo lok i kom keto Ker pa Lubanga ma Yecu obedo ka lok pire kare ducu-ni. Gin onongo bene gimito ngeyo pi “agikki piny,” nyo Baibul mukene gonyo ni, “agikki pa lobo.”​—Matayo 24:3, American Standard Version, King James Version.

Me gamone, Yecu owaco ni lweny madongo, kec laparanat, two gemo, ki dong oyengyeng bibedo tye. En owaco bene ni turo cik bimedde ameda, lupwonye dini ma lugoba gibirwenyo jo mapol, dok Lukricitayo me ada kibidagogi dok kiunogi. Magi ducu gubedo kwena maraco.​—Matayo 24:4-13; Luka 21:11.

Ento lok me kwena maber onongo tye. Ingeye Yecu owaco lok ma kikwanyo ki ginacoya ma tye malo-ni, lok magi dano gubedo ka yenyo tyene pi cencwari mapol ata. Kadi bed dano giye ni lok pa Yecu-ni pire tek, ento tamgi tye mapat pat i kom tyen lok meno. Kwena maber-ri obedo gin ango? Ker-ri obedo gin ango? Lok pa lanebi-ni bicobbe awene dok i kom angagi? “Agikki piny” obedo gin ango? Kong dong wanenu.

 [Cal ma tye i pot karatac 2]

Kopi me buk me Washington ma Loko i kom Jiri Angwen-ni. Kiloko i kom Matayo 24:14

[Ka ma cal oa ki iye]

Kikwanyo ki i buk Facsimile of the Washington Manuscript of the Four Gospels in the Freer Collection 1912