Tero Tic Pi Jehovah Calo Gin Ma Pire Tek
Tero Tic Pi Jehovah Calo Gin Ma Pire Tek
‘Wuket tamwu i kom, . . . gin ducu ma pigi tego.’—PIL. 4:8.
1, 2. Ngo ma oweko dano mapol i lobo-ni gineno kwo i yo me mingo, dok man kelo peny ango?
WATYE ka kwo i lobo ma opong ki jami maraco ma loyo kare mo keken i tekwaro pa dano. Lweny ki ‘piny marac-ci’ pe bibedo yot bot jo ma gipe ki wat macok ki Jehovah. (2 Tem. 3:1-5) Jo magi giyelle ki kerogi kengi ento pol kare cobo pekki magi loyogi woko. I yellegi me wilo wigi, jo magi pol kare gilungo wigi i yenyo yomcwiny ma a ki i galowang manyen ma lobo man tiko kelone.
2 Dano pol kare giketo mitigi me nongo yomcwiny bedo mukwongo pi lweny ki lyeto me kwo. Ka pe gugwokke, Lukricitayo bene giromo cako timo en gin acel-lu. Wan watwero gwokke ki i iye nining? Man mono tere ni myero wakwer yomcwiny ducu? Watwero weko nongo yomcwiny ki dong tic ma watye kwede bedo ma moni pe diyo lawote nining? Ginacoya mene ma myero otirwa, wek kadi bed ni mitiwa i lok me kwo jenge i kom jami ma pigi tego, ento pe dok obed ma okato kare woko?
Tero Jami i Yo ma Pire Tek i Lobo ma Maro Yomcwiny
3, 4. Ginacoya twero konyowa nining me tero jami i yo ma pire tek?
3 Lobo-ni tero “maro yomcwiny” calo gin ma pire tek loyo. (2 Tem. 3:4) Kit ma lobo-ni tero kwede nongo yomcwiny keto kwowa me cwiny ka mading. (Car. 21:17) Pi meno, i waraga ma lakwena Paulo ocoyo bot Temceo ki Tito, en omiyo tira i kom gin ma pire tek. Keto tira meno i tic bikonyowa me lweny ki neno me mingo me lobo-ni i kom kwo.—Kwan Jo Roma 12:8.
4 Cencwari mapol mukato angec, Solomon ocoyo ni bedo ber ka waweko camo kuc okatowa i kare mogo pi cobo gin ma pire tek i kwo. (Latit. 3:4; 7:2-4) Ada, kit ma kwo cek-ki, omyero “waket tek” wek wanong larre. (Luka 13:24) Pi meno, myero wamedde ki tam i kom ‘gin ducu ma pigi tego.’ (Pil. 4:8, 9) Man te lokke ni omyero wangi yo me kwowa ducu macalo Lukricitayo.
5. Kabedo mene i kwowa ma myero water calo gin ma pire tek?
5 Me laporre, Lukricitayo gilubo lanen pa Jehovah gin ki Yecu ki tiyo ticgi matek kun gineno calo gin ma pire tek. (Jon 5:17) Macalo adwogine, dano pol kare gipako Lukricitayo me ada pi bedo lutic ma gigene. Luwi odi tutwalle myero gunen ni gitiyo matek me konyo jo me odigi. Pien ngat ma kwero miyo jami me kom bot jo me ode nongo ‘okwero Jehovah woko’!—1 Tem. 5:8.
Neno Worowa Calo Gin ma Pire Tek Kun Wabedo ki Yomcwiny
6. Wangeyo nining ni myero water woro Jehovah calo gin ma pire tek?
6 Jehovah tero woro me ada calo gin ma pire tek. Me laporre, i Cik pa Moses, ka Luicrael gungak ki i woro Jehovah, gin onongo ginongo adwogi marac adada. (Yoc. 23:12, 13) I cencwari me acel me kare man onongo mitte ni lulub kor Kricito gulweny matek wek pwony goba ki cwiny maraco pe odony i woro me ada. (2 Jon 7-11; Yabo 2:14-16) I kare-ni, Lukricitayo me ada gimedde ki tero worogi calo gin ma pire tek.—1 Tem. 6:20.
7. Paulo oyubbe pi ticce me pwony nining?
7 Ticwa me pwony kelo yomcwiny. Ento, wek wabed ki yomcwiny i ticwa me pwony, myero kong watam iye matut dok wayubbe con. Paulo otito kit ma etamo kwede pi jo ma epwonyogi. En ocoyo ni: ‘Alubo kit ducu ma dano gitye kwede, wek omiya alar jo mogo i yo ducu. Meno ducu atiyo pi lok me kwena maber, wek an bene anywak mot mo ma a iye kacel kwedgi.’ (1 Kor. 9:22, 23) Paulo onongo yomcwiny i konyo dano i yo me cwiny, en otamo matut pi kit ma etwero cobo kwede miti pa jo ma winye. Pi meno, en ocuko cwinygi me woro Jehovah.
8. (a) Cwiny ango ma myero wabed kwede i kom jo ma wapwonyogi? (b) Kwano Baibul ki dano kelo yomcwiny i ticwa me pwony nining?
8 Tic me pwony onongo pire tek ma rom mene bot Paulo? En onongo tye atera me bedo “opii” pa Jehovah ki pa jo mukene ma gibiwinyo kwena me ada. (Rom. 12:11; 1 Kor. 9:19) Ka watye ka pwonyo dano ki Lok pa Lubanga—man twero bedo i cawa me kwano Baibul ki dano ki i gangigi, i cokke, nyo i cawa me Woro pi Jo me Ot—tika wiwa po i kom tic ma watye kwede ma lubbe ki jo ma watye ka pwonyogi? Gwok nyo wawinyo ki i cwinywa ni kwano Baibul ki dano kare ki kare obedo twon yec mapek ma myero wating. Tye kono ni, pol kare cawa ma watiyo kwede me yenyo kit me kwo aye myero wakwany me tic kwede pi konyo jo mukene. Ento meno mono pe rwatte ki lok ma Yecu owaco ni “miyo mot kelo yomcwiny makato gamo agama”? (Tic 20:35, NW) Pwonyo jo mukene me ngeyo yo me larre bikeliwa yomcwiny ma pe kiromo porone ki tic mo keken.
9, 10. (a) Tero jami i yo ma pire tek mono te lokke ni omyero pe dong wanong yomcwiny i bedo ki dano? Tit kong. (b) Ngo ma bikonyo laelda me bedo ma en cuko cwiny kun lok kwede yot?
9 Tero jami i yo ma pire tek pe te lokke ni omyero wabed labongo nongo yomcwiny i bedo ki jo mukene. Yecu omiyo lanen maber me kwanyo cawa pe me pwony keken ento me bedo ki yomcwiny ki dong dongo wat ki jo mukene. (Luka 5:27-29; Jon 12:1, 2) Kitungcel bene, tero jami i yo ma pire tek pe te lokke ni omyero kare ducu wabed ma nongo wajinyo wangwa. Ka onongo Yecu obedo kumeno, kono dano pe gunyikke cok bote. Kadi wa lutino onongo ginongo kwo kwede yot. (Mar. 10:13-16) Waromo lubo lanen pa Yecu nining wek jami owot marom?
10 I lokke i kom laelda mo, omego acel owacci, “En keto gingi i kome kekene ento pe keto gingi i kom jo mukene-ni pi mito ni gutim jami labongo roc mo.” In bene mono itye kumeno? Pore me nyuto niango i kom kero pa dano me timo gin moni. Me laporre, lutino gijolo lok me timo jami ma nongo pore pigi ka lunyodogi konyogi me cobogi. I yo acel-lu, luelda giromo cuko cwiny jo mukene i kacokke me dongo i yo me cwiny kun gimiyo botgi tam i kit ma giromo dongo kwede. Medo i kom meno, ka laelda moni pe kette malo, ci en cuko cwiny dok weko lok kwede bedo yot. (Rom. 12:3) Lamego mo acel owacci: “Pe amito ni laelda mo oter jami ducu i yo me tuko. Ento ka cawa ducu en tero jami i yo ma pe me tuko, ci lok kwede bedo tek.” Mukene dok owacci etamo ni luelda mogo “gimiyo lworo i cwiny dano pien gibedo ma nongo gujinyo wangi.” Luelda omyero pe guwek yomcwiny ma luye ducu gitye kwede okwe woko i woro Jehovah, “Lubanga ma layomcwiny.”—1 Tem. 1:11, NW.
Bedo ma Wapore me Tic i Kacokke
11. “Mito tic” i kacokke te lokke ngo?
11 I kare ma Paulo ocuko cwiny co ma i kacokke me tute wek gubed ma gupore pi tic, mitine onongo pe obedo me cuko cwiny ngat mo me cobo mitine pire kene. Ma ka meno, en ocoyo ni: ‘Lok man lok ada: ka ce dano mo mito tic macalo laneno, nongo en mito tic maber.’ (1 Tem. 3:1, 4) “Mito tic” te lokke ni Lukricitayo ma co myero gudong miti me tic matek ma miyo gibedo ki kit mupore wek guti pi utmegigi. Ka omego mo onongo batija mwaka acel angec, dok olo cobo jami mogo ma kiryeyogi i Ginacoya i 1 Temceo 3:8-13 pi bedo lakony kor tic, ci kiromo cimo en. Nge ni tyeng 8 waco tutwalle ni: ‘Lukony kor tic myero bene gubed jo ma tero jami i yo ma pire tek.’
12, 13. Tit yo ma omege matino giromo kwanyone me bedo mupore.
12 In mono itye omego me mwaka pyeraryo ki wiye dok itero jami i yo ma pire tek? Tye yo mapol ma iromo medo ki ticci. Yo acel aye me ilo malo ticci me pwony. In mono itye dano ma maro tiyo ticwa me pwony ki omege ma mwakagi patpat? Tika itye ka tute me yenyo ngat mo ma iromo kwano Baibul kwede? Ka ikwano Baibul ki dano kun ilubo tam ma kimiyogi i cokkewa, ci ibidongo dironi me pwony. Medo i kom meno, ibibedo ki kica i kom jo ma gitye ka nongo pwony i kom yo pa Jehovah. Ka latin kwanni me Baibul neno ni myero etim alokaloka i kwone, ibipwonyo kit me konye mot ki diro wek en oket cik me Baibul i tic.
13 Wun omege matino wutwero mine me konyo jo muteggi ma i kacokke i yo mo keken ma twere. Wuromo bene nyuto miti i kom Ot me Ker, ki miyo kony me gwokone wek obed maleng dok maber. Ka wumine me miyo kony i yo ducu ma wutwero, ci cwiny me minnewu binyuto ni wutero ticwu me pwony calo gin ma pire tek. Calo Temceo, wuromo pwonyo kit me cobo jami ma mitte i kacokke ki cwinywu ducu.—Kwan Jo Pilipi 2:19-22.
14. Kiromo ‘temo’omege matino me tic i kacokke nining?
14 Wun luelda, wubed ma wangwu twolo me miyo tic bot omege matino ma gitye ka yelle me ‘weko miti me awobe’ kun giketo tamgi i “kit ma atir, niye, mar ki kuc,” ki dong kit mukene mabeco. (2 Tem. 2:22) Kiromo “temogi” ka giromo tiyo tic ki minigi tic me atima i kacokke wek ‘dongogi onen bot dano ducu.’—1 Tem. 3:10; 4:15.
Nyutu ni Itero Kacokke ki Kwo me Ot Calo Gin ma Pire Tek
15. Ma lubbe ki 1 Temceo 5:1, 2, waromo nyutune nining ni watero jo mukene calo pigi tek?
15 Tero jami i yo ma pire tek kwako nyuto woro bot omege ki lumege. Nen kong tira ma Paulo omiyo bot Temceo ma lubbe ki kit ma pire tek kwede me nyuto woro bot jo mukene. (Kwan 1 Temceo 5:1, 2.) Man pire tek tutwalle ka watye ka timo gin mo ki ngat ma pe obedo laco nyo dako calo wan. Lanen pa Yubu me nyuto woro bot mon, tutwalle bot dakone, pore mada me aluba. En otute ki kerone pe me neno dako mukene ki wang me miti. (Yubu 31:1) Tero omegiwa ki lumegiwa i yo ma kit man konyo me gengo ore me mingo ma tugo mitigi nyo timo gin mo ma weko omego nyo lamego moni nongo kwo tek ka tye kwedwa. Nyutu woro man pire tek tutwalle ka jo aryo moni-ni gitye ka winye ki cwiny me nyomme. Lakricitayo ma tero jami i yo ma pire tek pe tuko ki miti pa omego nyo lamego mo.—Car. 12:22.
16. Por kong kit ma jo me lobo-ni gineno kwede laco ki wego ki kit ma Baibul loko kwede i kom ticce.
16 Omyero bene wagwokke me neno ni watero tic ma Lubanga omiyo botwa i kwo me ot calo gin ma pire tek. Lobo pa Catan-ni tye ka loko tic pa laco ki wego doko me tuko. Jo ma giyubo jami me galowang ginongo yomcwiny i dwoko rwom pa lawi ot piny me anywar. Ento, Ginacoya miyo twon tic madit bot laco, miyo bote tic me bedo “lawi dakone.”—Ep. 5:23; 1 Kor. 11:3.
17. Tit kong kit ma nywako kacel i woro pi jo me ot twero nyutu ni watero ticwa calo gin ma pire tek.
17 Laco romo miyo jami me kom bot jo me ode. Ento ka en pe miyo tira i yo me cwiny, nongo pe nyutu kwiri ki dong ryeko. (Nwo. 6:6, 7) Pi meno, 1 Temceo 3:4 waco ni ka ce itye lawi ot dok itye ka mito ni ibed ma ipore me tic i kacokke, omyero kong ibed laco ma “loyo ode maber, gwoko litinone miyo gibedo ki winy bot jo madito, ma giworo dano i yo ducu.” Ma lubbe ki lok man, penye kekeni ni, ‘Tika kare ki kare akwanyo cawa me bedo ki woro pi jo me ot i pacona?’ Mon mukene ma Lukricitayo gibako dogi bot coggi me doro otgi i yo me cwiny. Won ot acel acel myero otam matut i kom kit ma en neno kwede tic man. Ngene kene ni dako ma Lakricitayo omyero ocwak yub me Woro pi Jo me Ot kun konyo kor cware wek man ocobbe maber.
18. Lutino giromo pwonye me tero jami i yo ma pire tek nining?
18 Lutino bene kicuko cwinygi me tero kwo calo gin ma pire tek. (Latit. 12:1) Bal mo peke ka ce lutino matino gipwonye me tic matek, timo tic me paco ma nongo rwatte ki mwaka kacel ki kerogi. (Koko 3:27) I Kare ma Kabaka Daudi onongo pud tye awobi matidi, en opwonye me bedo lakwat maber. En bene opwonye me bedo lago wer ki laco wer—ngec man omiyo kitero en me tic pi laloc me Icrael. (1 Cam. 16:11, 12, 18-21) Labongo akalakala mo, Daudi macalo awobi matidi onongo ngeyo tuko, ento en bene onongo ngec mabeco ma lacen en otiyo kwede me pako Jehovah. Ngec ma mege macalo lakwat okonye me diyo cwinye i telo rok me Icrael. Wun jo matino, diro adi ma konyo ma wutye ka pwonyone—diro ma bikonyowu me tic pi Lacwecwu dok bene yubowu pi ticwu i kare me anyim?
Bed ki Neno Mupore
19, 20. Neno mupore ango ma i moko tammi me bedo kwede i komi kekeni ki dong i kom woroni?
19 Wan ducu watwero bedo ki neno mupore i komwa kekenwa—ma pe dok watere kekenwa mukato kare woko. Pe wamito ni wabed jo ma kitgi “atir twatwal.” (Latit. 7:16) Lok mogo ma yomo ic twero kweyo lyeto me kwo, kadi ki i paco, i gang tic, nyo itimo jami mogo ki omege ki lumegiwa. Jo me ot myero gugwokke wek pe gubed jo ma neno bal keken ma miyo kuc bedo pe i paco kit ma nongo myero obed kwede. I kacokke, wan ducu watwero nyero ki luwotwa ki yomcwiny, waweko boko lokwa ki pwonywa bedo me cuko cwiny dok maber.—2 Kor. 13:10; Ep. 4:29.
20 Watye ka kwo i lobo ma tero Jehovah nyo cikke calo gin ma pire pe tek. Ento jo pa Jehovah dok gipat pien giparo tutwal lok me bedo ki winy kacel ki gwoko gennegi bot Lubangagi. Pud dong cwinywa yom ya me bedo i kin lwak jo mapol ma giworo Jehovah “i yo ducu”! Omyero wamok tamwa me tero kwowa ki worowa calo gin ma pire tek.
In Iromo Gamone Ningo?
• Pingo omyero walweny ki cwiny me lobo man me neno kwo i yo me mingo?
• Watwero nongo yomcwiny kun watero ticwa me pwony calo gin ma pire tek nining?
• I yo ma nining ma kit ma waneno kwede bedo mupore me tic nyutu ni watero calo gin ma pire tek nyo pe?
• Tit gin mumiyo nyutu woro bot utmegiwa ki dong jo me odiwa pire tek.
[Peny me Kwan]
[Cal ma tye i pot karatac 16]
Laco myero omi jami me kom ki me cwiny bot jo me ode