Jo Me Ot Ma Lukricitayo​—“Wuyubbe”

“Wuyubbe, pien Wod pa dano bibino i cawa ma pe wutamo.”​—LUKA 12:40.

1, 2. Pingo myero water lok pa Yecu ni ‘wayubbe-ni’ calo lok ma pire tek?

 “IKARE ma Wod pa dano bidwogo ki deyo” en bipoko ‘kin dano woko patpat,’ ngo ma bitimme i kom in ki jo me ot meri? (Mat. 25:31, 32) Pien man bitimme i cawa ma pe wangeyo, pud dong pire tek ni waket cwinywa i lok pa Yecu ma cikowa ni myero wabed ma ‘wayubbe’!​—Luka 12:40.

² Pwony mukato-ni onyamo kit ma ngat acel acel me ot twero konyo jo ducu me ot me bedo ma gigwokke i yo me cwiny kun gitero ticgi calo gin ma pire tek. Kong wanenu yo mogo ma watwero konyo kwede ki jo me otwa wek gukwo maber i yo me cwiny.

Bed ki Wang ma ‘Pe Wor’

3, 4. (a) Gin ango ma Jo me ot ma Lukricitayo myero gugwokke ki iye? (b) Bedo ki wang ma ‘pe wor’ te lokke ngo?

³ Me bedo ma wayubbe pi dwogo pa Kricito, jo me ot myero gugwokke wek gin mo pe odwo tamgi woko ki i kom woro me ada. Myero gugwokke ki jami ma wiro tamgi ki i kom worogi bot Jehovah. Pien miti me jami me kom tye owic ma omako jo me ot mapol, nen kong gin ma Yecu owaco i kom bedo ki wang ma ‘pe  wor.’ (Kwan Matayo 6:22, 23.) Calo tara ma menyo yo botwa wek pe wapoti, gin ma waneno ki ‘wang me cwiny’ twero miyo waniang yo matir kun pe watagge.​—Ep. 1:18.

⁴ Wek wangwa kikome-ni onen piny maber, omyero otii dok bene onen gin ma tye ka nenone-ni maber atika. Man rom aroma ki wang me cwiny. Bedo ki wang ma pe wor tere ni waketo tamwa i kom yub acel keken. Ma ka keto cwinywa i kom jami me kom kun wabedo ki par me miyogi bot jo me otwa, omyero wacik wangwa i kom jami me cwiny. (Mat. 6:33) Man tere ni wayeng ki jami ma watye kwede dok waketo miti pa Lubanga bedo mukwongo i kwowa.​—Ibru 13:5.

5. I yo ango ma latin anyaka mo me mwaka apar ki wiye onyutu kwede ni en ociko ‘wange’ me tic pi Lubanga?

⁵ Lutino pud dong ginongo adwogi maber adada ka kipwonyogi me bedo ki wang ma pe wor! Nen kong lanen pa latin anyaka mo me mwaka apar ki wiye i lobo Etiopia. En okato maber atika i kare ma otyeko kwanne, ci gimine mic me medde ki kwan me nono. Pien onongo mitine tye me tic pi Jehovah, en okwero mic me medde ki kwan woko. I nge meno, ki minne tic ma onongo kibicule dolla 4,200 dwe ki dwe​—mucara madit ka i poro ki pa lutic mukene ma i lobone. Ento latin anyaka-ni onongo ociko ‘wange’ me tic calo painia. En pe openyo lunyodone wek gumine tam me kwero tic meno woko. Lunyodone guwinyo nining i kare ma guniang gin ma nyargi otimo? Cwinygi obedo yom, dok guwacce kit ma gitye kwede ki awaka i kome!

6, 7. Ngo ma myero ‘wagwokke ki i iye’ me gengo adwogi marac?

⁶ Gin mukane i lok pa Yecu ma kicoyo i Matayo 6:22, 23 aye ciko dano i kom woro me jami. Wang me “bal” bene twero niange ni bedo ki kwang ma ‘wor,’ ma en aye obedo mitti pi jami pa ngat mukene nyo bedo ngat ma wany. (Mat. 6:23.) Jehovah winyo nining ka wabedo ki mitti i kom jami pa ngat mukene nyo luwanya? Baibul wacci: “Dong pi meno tim kwele ki tim caro caro ducu, ki woro me lim pe myero gilwong nyinggi i kinwu; meno aye gin ma myero bot jo pa Lubanga.”​—Ep. 5:3.

⁷ Kadi bed ngeyo woro yot ka ngat moni tye laworo me jami, ento ngeyone pe yot i komwa kekenwa. Pi meno, bedo me ryeko ka walubo lok pa Yecu ni: “Wunen, wugwokke i paro lim.” (Luka 12:15) Wek watim meno, mitte ni kong wangine kekenwa ma lubbe ki gin ma waketo cwinywa iye. Jo me ot ma Lukricitayo myero gutam matut ma lubbe ki kit ma gitiyo kwede ki cawa kacel ki centegi i lok me galowang, mato yamo, ki wilo jami me kom.

8. Ka odok i lok me wilo jami, ‘watwero gwokke’ nining?

⁸ Ma peya iwilo gin moni myero kong itam ka itye ki cente muromo me wilone nyo pe. Nen kong lapeny magi: ‘Tika abibedo ki cawa me tic ki gin meno nino ducu kun agwoko maber? Bitero kare marom mene wek ange tic kwede maber?’ Wun jo matino, pe wuye kwena me cato wil ma bwolo dano me wilo jami acata kun wupenyo pi bongngi nyo jami mukene ma welgi tek. Bed ngat ma jukke kene. Tam kong ka ce wilo gin moni bikonyo jo me ot meri me bedo ma guyubbe kun gikuro dwogo pa Wod pa dano. Bed ki niye i kom cikke pa Jehovah ma waco ni: “Pe abiboli, pe abibwoti ata.”​—Ibru. 13:5.

 Medde ki Cobo Yub me Cwiny

9. Cobo yub me cwiny twero kelo adwogi ango pi jo me ot?

⁹ Yo mukene ma jo me ot gitwero jingo kwede niyegi ki ber bedo pa jo ducu ma i ot aye me keto yub me cwiny kun gicobo. Timo meno twero konyo jo me ot me niang kit ma gitye ka medde kwede i ticgi me yomo cwiny Jehovah dok bene konyogi me ngiyo kit ma tic acel acel pire tek kwede.​—Kwan Jo Pilipi 1:10.

10, 11. Calo jo me ot, yub ango me cwiny ma wutye ka cobone, dok yub mene me cwiny ma wumito ketone pi anyim?

¹⁰ Keto yub matino tino mupore me cwiny ma cobogi yot bot ngat acel acel me ot twero kelo adwogi mabeco atika. Me lapore, keto yub me kwano ginacoya me nino ducu. Lagam ma jo me ot gimiyo twero konyo lawi ot me niang ka ce gitye ka dongo i yo me cwiny. Yub me kwano Baibul nino ducu calo jo me ot tye kare maber pi lutino me dongo dirogi me kwan ki kit ma giniang kwede lok ma i Baibul. (Jab. 1:1, 2) Dong pingo pe waket ilo malo rwom me legawa obed calo gin ma wamito cobone? Ka wadongo but nyig ma nyak pi cwiny maleng, man twero bedo yub maber atika. (Gal. 5:22, 23) Mono watwero yenyo yo mogo me nyutu mar ki kica bot jo ma warwatte kwedgi i ticwa me pwony? Yelle me timo meno calo jo me ot twero konyo lutino me bedo lukica, kun gidongo miti me tic calo painia nyo lumiconari.

¹¹ Pingo pe itam i kom yub mogo ma in ki jo me ot meri wutwero cobogi? Tika jo me ot meri gitwero keto yub ma miyo gicwalo cawa malac i ticwa me pwony? Tika itwero lweny ki cwiny me lworo ma gengi miyo caden ki i cim, i teng gudo ki dong ka cato wil? Tic ka ma can lutit kwena tye iye kono? Ngat acel i kin jo me ot meri mono twero pwonyo leb mukene wek en onywak kwena maber-ri ki jo me rok mukene?

12. Ngo ma luwi ot gitwero timone me konyo jo ma i odigi wek gudong i yo me cwiny?

¹² Macalo lawi ot, nen kabedo mogo ma jo me ot meri gitwero dongo iye i yo me cwiny. Ci ket yub ma konyogi cobone. Yub ma wuketo macalo jo me ot myero obed mupore dok ma rwatte ki kit me kwo kacel ki kerowu. (Car. 13:12) Tye bene ni, cobo yub mabeco tero kare. Dong jal cawa ma kineno ki telebijon ci iti kwede i yenyo ki cobo jami me cwiny. (Ep. 5:15, 16) Tii matek me cobo yub ma iketo pi jo me ot meri. (Gal. 6:9) Jo me ot ma gicobo yub me cwiny dongogi ‘binen ka maleng bot dano ducu.’​—1 Tem. 4:15.

Medde ki Otyeno me Woro pi Jo me Ot

13. Alokaloka ango ma kitimo i yub me cokkewa i dye cabit, ki lapeny ango ma myero wapenye kwede?

¹³ Yo maber atika me gwoko jo me odi wek gubed ma ‘guyubbe’ pi dwogo pa Wod pa dano tye macalo adwogi me alokaloka ma obedo i Januari 1, 2009, i yub me cokkewa ma bedo i dye cabit. Cokke kacel i nino mapat ma onongo kilwongo ni Cokke me Kwano Buk kikwanyo ci kiribo ki Cukul me Tiokraci ki dong Cokke me Ticwa. Alokaloka man kitimo wek omi kare bot jo me odi ma Lukricitayo me medde ki dongo i yo me cwiny kun giyero otyeno mo acel i cabit ducu me Woro pi Jo me Ot. Man ma dong kare otyeko kato nicakke ma kitim kwede alokaloka-ni, watwero penye kekenwa ni: ‘Tika atye ka tic ki kare ma kimiyo pi otyeno me Woro pi  Jo me Ot nyo me kwan pira kena? Tika anongo adwogi maber ma lubbe ki yub man?’

14. (a) Tyen lok ango mumiyo omyero wamedde ki otyeno me Woro pi Jo me Ot nyo kwan piwa kenwa? (b) Pingo pire tek me yero otyeno mo acel me kwan?

¹⁴ Tyen lok mumiyo omyero wamedde ki otyeno me Woro pi Jo me Ot nyo cawa me kwan piwa kenwa aye me nyikki cok bot Lubanga. (Yak. 4:8) Ka wabedo ka kwano Baibul kare ki kare ci ngecwa i kom Lacwec bimedde, wat i kinwa ki en bene dongo. Ka wanyikke cok bot Jehovah, ci mitiwa me maro en ‘ki cwinywa ducu, ki kwowa ducu, ki tamwa ducu, ki tekowa ducu’ bimedde dok dongo. (Mar. 12:30) Ada, watye ki mitti me bedo luwiny bot Lubanga kun walub kite. (Ep. 5:1) Bedo ka lubu yub me otyeno me Woro pi Jo me Ot kare ki kare pire tek me konyo jo ducu me pacowa me ‘yubbe’ i yo me cwiny, ka nongo wakuro cobbe pa lok ma kiwaco pi “twon can madit atika.” (Mat. 24:21) Man pire tek me bwot.

15. Adwogi ango ma otyeno me Woro pi Jo me Ot kelo i kom kit ma dano acel acel me ot tamo kwede i kom lawote?

¹⁵ Yub me Woro pi Jo me Ot bene tye ki tyen lok mukene​—me konyo jo me ot wek gubed ki wat maber i kingi. Cwalo cawa me nyamo lok me cwiny kacel cabit ki cabit tye ki adwogi madit i kom kit ma dano acel acel me ot tamo kwede i kom lawote. Jo munyomme pud dong gibedo ki wat macok adada ka giwinyo ngat acel acel loko ki yomcwiny pi lonyo me cwiny ma ginongo ka gikwano Baibul! (Kwan Latitlok 4:12.) Lunyodo ki lutino ma gibedo kacel i cawa me woro ginotte i mar, pien mar “aye tweyo jami ducu.”​—Kol. 3:14.

16. Tit kong kit ma lumege adek gitye ka nongo adwogi maber ma lubbe ki otyeno mo acel ma guketo me kwano Baibul.

¹⁶ Nen kong adwogi ma lumegiwa adek gunongo pi keto otyeno mo me kwano Baibul. Kadi bed ni onongo pe giwat, mon too adek magi onongo gibedo i taun acel, onongo bene gubedo lurem matek atika pi mwaki mapol. Pien onongo gitye ki miti me medo lirem i kingi, kun gimito ni okonygi i yo me cwiny, gin gumoko tamgi me yero otyeno mo acel wek girwatte kun gikwano Baibul. Gucako timo man kun gitiyo ki buk me “Bearing Thorough Witness” About God’s Kingdom. Ngat acel i kingi owaco ni: “Wabedo ki yomcwiny atika ma oweko kwanwa rii makato cawa acel woko.” “Wabedo ka tamo kodi kwo ma omegiwa ma i cencwari me acel gukato ki iye, ci wanyamo gin ma wabitimone ka wan bene wawok ki i kodi kwo meno. Ci dong wayelle me keto i tic lok ma pigi tego ma wanongo ki i kwanwa i ticwa me pwony. Man oweko tito lok me kwena me Ker-ri ki tic me loko dano me doko lupwonnye pa Yecu mit atika dok tye ka kelo adwogi maber loyo kare mukato angec.” Medo i kom dongogi i yo me cwiny, yub man bene ojingo wat i kin lurem adek magi. Gin guwaco ni: “Watero yub man calo gin ma pire tek adada.”

17. Gin ango ma kelo adwogi maber i otyeno me Woro pi Jo me Ot?

¹⁷ In kono? I yo ma nining ma itye ka nongo kwede adwogi maber ma lubbe ki otyeno ma kiketo me woro pi jo me ot nyo me kwan piri keni? Ka i keng timone teretere, ci yub man pe binyako nyigge. Ngat acel acel i kin jo me ot myero obed ma oyubbe me kwan i cawa ma kiketo. Jami mogo matino tino myero pe obal yub man me otyeno-ni. Gin ma kiyero me  akwana myero obed ma jo me ot meri giromo ketone i tic i kwogi me nino ducu. Ngo ma itwero timone wek kwan man obed mit? Tii ki yo me pwony mucwiny, wek obed i yo me woro dok ma nongo kuc tye.​—Yak. 3:18. *

‘Wubed ma Wangwu Twolo’ kun “Wuyubbe”

18, 19. Ngeyo ni dwogo pa Wod pa dano dong cok myero ogud in ki jo me ot meri nining?

¹⁸ Kit ma lobo tye ka balle medde ameda cakke wa i 1914, weko wabedo labongo akalakala ni lobo marac pa Catan-ni oo i kare me agikkine. Armagedon dong tye cok. Kare dong cok romo ma Wod pa dano bidwogo ka ngolo kop i kom dano ma kitgi raco. (Jab. 37:10; Car. 2:21, 22) Ngeyo lok meno mono pe myero ogud in ki jo me ot meri?

¹⁹ Tika itye ka lubo tam pa Yecu ni myero ibed ki wang ma ‘pe wor-ri’? Ka dano me loboni nongo giyelle adada me yenyo lonyo, yweka nyo teko, tika jo me ot meri gitye ka cobo yub me cwiny? Tika yub me otyeno me Woro pi jo me Ot nyo kwan piri keni tye ka wot maber? Tika itye ka nongo adwogi mumiyo kiketo yub man? Kit ma kinyamo kwede i pwony ma okato angec, tika in itye ka cobo ticci kit ma Ginacoya ocimo kwede macalo lawi ot, dako, nyo latin, me konyo jo ducu me otwu wek wubed ‘ma wangwu twolo’? (1 Tec. 5:6) Ka tye kumeno, ci nongo “wuyubbe” pi dwogo pa Wod pa dano.

[Lok ma tye piny]

Ngo ma i Pwonyo?

• Tit kong kit ma jo me ot ma Lukricitayo gitwero ‘yubbe’ kwede kun . . .

gibedo ki wang ma ‘pe wor.’

giketo dok gicobo yub me cwiny.

gimedde ki otyeno me Woro pi Jo me Ot.

[Peny me Kwan]