Yecu Gin Mumiyo En Oto

“Wod pa dano . . . obino pi miyo kwone me lakok lwak dano mapol.”​—MARAKO 10:45.

YECU onongo ngeyo gin ma bitimme i kome. En oniang ni pe ebikwo ki kuc. Ma ka meno, en onongo ngeyo ni kwone bigik macek i yo marac i mwaka me 30, dok en oyubbe maber me kemme ki tone.

Baibul nyutu ni to pa Yecu pire tek adada. Lok mo ma kikwedo waco ni kitito ka maleng i Baibul tyen ma romo175 kulu pi to pa Yecu i Cik Manyen. Ento pingo onongo mitte ni Yecu oden can dok bene oto? Mitte ni wange tyen lok me to pa Yecu, pien twero kelo adwogi madit i kwowa.

▪ Gin ma Yecu ongeyo ni bitimme I mwaka me agikki me kwone, Yecu opoyo wi lupwonnyene tyen mapol pi deno canne ki tone ma tye anyim. I kare ma gicito i Jerucalem i kwer me Kato, en owaco bot lukwenane 12 kuman ni: “Wod pa dano dong gibimiye i cing [lulamdog] madito pa Lubanga ki lupwony-cik, gibingolle kop me to, ci gibimiye i cing Lurok; gingale, gingulo laa i kome dok gipwode ki del, ci gibineke.” * (Marako 10:33, 34) Pingo en onongo ngeyo labongo akalakala gin ma bitimme i kome?

Yecu onongo ngeyo maber lok mogo pa lunebi ma ginonge i Ginacoya me leb Ibru, ma ginyutu kit ma kwone bigik kwede. (Luka 18:31-33) Nen kong lok mogo pa lunebi kacel ki Ginacoya ma gitito kit ma lok meno gucobbe kwede kakare.

Meciya myero . . .

▪ Gimiye i cing lumonene pi lim ryal 30.​—JEKARIA 11:12; MATAYO 26:14-16.

▪ Gigoye dok kingul laa i kome.​—ICAYA 50:6; MATAYO 26:67; 27:26, 30.

▪ Gigure i kom yat.​—JABULI 22:16, MARAKO 15:24, 25.

▪ Gingale ma nongo kigurre i kom yat.​—JABULI 22:7, 8; MATAYO 27:39-43.

▪ Kineke labongo turo cogone mo keken.​—JABULI 34:20; JON 19:33, 36.

Jami magi ducu kacel ki lok mukene mapol pa lunebi Yecu ocobogi. Pe tye yo mo keken ma Yecu onongo twero timo ki jami magi kene. Cobbe pa lok pa lunebi magi i kom Yecu omoko ka maleng ni ada Lubanga aye kara ocwalo Yecu. *

Ento pingo onongo mitte ni Yecu oden can dok oto?

▪ Yecu oto me cobo lok ma pigi tego Yecu onongo ngeyo lok ma pigi tek ma kwako cwec ducu ma ocakke con i poto me Eden. Adam ki Kawa guweko cwec mo me cwiny ma lajemo obwologi pe me bedo ki winy bot Lubanga. Jemo pa luot man okelo pyem i kom twero me loc pa Lubanga nyo yo me locce. Balgi-ni bene okelo akalakala ka ce ngat mo twero gwoko gennene i kare me atematema.​—Acakki 3:1-6; Yubu 2:1-5.

 Yecu omiyo lagam maber loyo pi lok aryo magi​—twero me loc pa Jehovah ki dong gwoko genne pa dano. Yecu omiyo cwak i kom twero me loc pa Lubanga ki i ‘bedo lawiny nio wa i tone . . . i kom yat.’ (Jo Pilipi 2:8) Yecu onyutu bene ni dano ma pe ki roc twero gwoko gennene bot Jehovah wa i kare me atematema matek pud dong loyo.

▪ Yecu oto pi laro wan dano Lanebi Icaya otito con ni deno can pa Meciya ma kiciko pire bikoko dano ki i bal. (Icaya 53:5, 10) Yecu ongeyo maber lok man, dok omiyo “kwone me koko jo mapol.” (Matayo 20:28) Tone macalo gitum oyabo yo ki wan dano ma luroc-ci me bedo ki wat maber ki Jehovah dok olaro wan ki i bal kacel ki to. To pa Yecu omiyo botwa kare me nongo gin ma Adam ki Kawa gurwenyo​—gen me kwo pi naka i lobo ki kuc labongo roc. *​—Niyabo 21:3, 4.

▪ Gin ma itwero timone I pwony adek magi, watyeko ngiyo gin ma Baibul tito madok i kom Yecu​—Kwene ma en oa ki iye, kit ma en okwo kwede, ki dong gin mumiyo en oto. Ngeyo lok ada magi i kom Yecu pe kwanyo niango manok keken madok i kome. Ento tiyo gin ma rwatte ki lok ada meno twero kelo mot mapol​—kwo maber i kareni ki dong kwo ma pe tum i anyim. Baibul tito botwa gin ma myero watim wek wanong adwogi ma kit meno.

▪ Pwony jami mapol madok i kom Yecu Kricito kacel ki ticce i yub pa Jehovah.​—JON 17:3.

▪ Ket niye i kom Yecu, kun inyutu i yo me kwoni ni en Lalarri.​—JON 3:36; TIC 5:31.

Lucaden pa Jehovah gibibedo ki yomcwiny me konyo in pwonyo jami mukene madok i kom Yecu Kricito, ‘Wod acel keken’ pa Lubanga ngat ma miyo wanongo mic me “kwo ma pe tum.”​—Jon 3:16.

[Lok ma tye piny]