Nyikke Cok Bot Lubanga

“[Jehovah] Aye Lakwat ma Kwayo An”

NEN cal ma tye i pot karatac kanyi. Tika itwero winyo ki i cwinyi gwok ma latin romo ma lakwat otingo i kore-ni tye kwede? I Jabuli 23, Baibul otiyo ki lapor pa lakwat ki romone me nyuto gwok ma Jehovah miyo bot jo ma wore. En mito ni wawiny ki i cwinywa gwok ma bino bot jo ma gitye calo laco jabuli, Daudi, ma owaco ki tekcwiny ni: “[Jehovah] aye lakwat ma kwayo an.” *​—Tyeng 1.

Daudi, ma ocoyo jabuli man, onongo tye lakwat i kare me bulune. En onongo ngeyo pekki pa romi kacel ki tic pa lakwat. Daudi, ma Lubanga obedo ka gwokke-ni, ocoyo gin ma kilwongo ni “jabuli ma miyo tekcwiny nyo gen.” Nying Lubanga Jehovah, tye nonge i acakki ki dong agikki me jabuli man. (Tyeng 1, 6) Tyeng 2 me o i 5 tito yo adek mapat pat ma Jehovah gwoko kwede ki jone kit macalo lakwat gwoko kwede romine.​—Jabuli 100:3.

Jehovah telo romine. Romi pol kare girweny woko ka lakwatgi pe. I yo acel-lu, wan bene wamito kony wek wange yo matir ma myero walub i kwowa. (Jeremia 10:23) Daudi otito ni Jehovah tero jone i “olet maber” ki “wang pii mangic.” En telogi i ‘yo ma atir.’ (Tyeng 2, 3) Lok magi ma dok i kom lakwat-ti miniwa tekcwiny ni waromo geno Lubanga. Ka walubo tira pa Lubanga kit ma Baibul waco kwede, ci wabilubo yo ma keliwa yomcwiny, miyo wawinyo agonya, ki dong kuc.

Jehovah gwoko romine. Labongo lakwat, romi gibedo lwor dok nongo gipe ki gwok. Jehovah waco bot jone ni pe myero gubed ki lworo, kadi bed ‘giwoto i nota me tipo to’​—kare ma kwo nongo tek adada. (Tyeng 4) Jehovah gwokogi, dok bene nongo tye atera me konyogi. En romo miyo ryeko ki kero bot jo ma wore wek gucung matek i atematema.​—Jo Pilipi 4:13; Yakobo 1:2-5.

Jehovah pito romine. Romi gijenge i kom lakwatgi pien en myero oyeny botgi cam. Wamito kony i yo me cwiny ma Lubanga keken aye romo konyowa me cobone. (Matayo 5:3) Cwinywa yom ni Jehovah cinge lac i Miyo jami, pien keto meja ma opong ki cam bot luticce. (Tyeng 5) Baibul ki jami ma konyowa kwano Baibul, calo magajin man ma itye ka kwanone-ni, gitye cam me cwiny ma konyowa cobo mitiwa me cwiny me ngeyo tyen lok me kwo ki dong yub ma Lubanga tye kwede piwa.

Daudi owinyo ni etye kigwok, pien ngeyo ni ka ebedo cok ki Lakwat-te me polo, ci ebinongo gwok pa Jehovah pi ‘kare me kwone ducu.’ (Tyeng 6) In tika imito gwok ma kit man? Ka tye kumeno, ci pwony kit ma iromo nyikke kwede cok bot Jehovah. Man bimiyo iwinyo ni itye kigwok icing Lakwat Madit, ma telo, gwoko, dok pito jo ma gibedo lugen bote.​—Icaya 40:11.

[Lok ma tye piny]