“Wukwa Romi Pa Lubanga Ma Tye Botwu”
“Wukwa Romi Pa Lubanga Ma Tye Botwu”
“Wukwa romi pa Lubanga ma tye botwu, kun wunenogi maber, pe pi dic, ento pi mitiwu kenwu.”—1 PET. 5:2.
1. Kwo ango ma Lukricitayo gubedo iye i kare ma Petero ocoyo waragane mukwongo?
IKARE ma peya Nero ocako uno Lukricitayo ma i Roma, lakwena Petero ocoyo waragane mukwongo. En onongo mito jingo cwiny luye luwote. Larac-ci obedo ka “wirre,” kun yenyo Lukricitayo me amwoda. Wek gucung matek i kome, onongo mitte ni ‘gugwokke’ kun ‘gimwolle kengi i te twero pa Lubanga.’ (1 Pet. 5:6, 8) Onongo bene mitte ni gubed ma ginote. Pe onongo porre botgi me bedo ‘ka kane kekengi ki lakgi, kun gitimo dano wadgi calo guci,’ meno onongo twero weko ‘gitum woko kekengi.’—Gal. 5:15.
2, 3. Anga ma myero walweny kwede, dok ngo ma wabinyamo i pwony ma lubo man?
2 Kwowa i kare-ni rom arom ki pa Lukricitayo me Roma. Larac-ci tye ka yenyo kare mo keken ma nonge wek emwodwa woko. (Yabo 12:12) Ento i nyimwa “twon can madit atika bitimme iye, ma yam peya onen i lobo, nia wa i acakki lobo nio kwede wa onyoo.” (Mat. 24:21) Kit macalo onongo mitte ni Lukricitayo me cencwari me acel gugwokke pe me bedo ka daa kekengi-ni, wan bene myero wagwokke. Wek man ocobbe, cawa mukene myero wanong kony ki bot luelda.
3 Kong dong wanenu kit ma luelda gitwero dongo kwede pwocgi pi mot me kwayo ‘romi pa Lubanga ma tye botgi.’ (1 Pet. 5:2) I nge meno, wabineno yo mupore me kwayo romi. I pwony ma lubo man, wabinyamo kit ma kacokke twero ‘woro jo ma tye ka tic i kingi ma gicanne pigi kun gipwonyo’ romi. (1 Tec. 5:12) Nyamo lok man bikonyowa me cung matek i kom Lamonewa madit, kun wangeyo ni en aye watye ka lweny kwede.—Ep. 6:12.
Wukwa Romi pa Lubanga
4, 5. Luelda myero gunen romi nining? Mi lapor.
4 Petero ocuko cwiny luelda ma onongo gitye i kin Lukricitayo me cencwari me acel me neno romi ma tye botgi kit ma Lubanga nenogi kwede. (Kwan 1 Petero 5:1, 2.) Kadi bed onongo kineno Petero calo pagi i kacokke, en pe oloko bot luelda macalo rwomme dit kato meggi. Ento, en ominigi tira macalo laelda lawotgi. (Gal. 2:9) Ma lubbe ki kodi cwiny pa Petero-ni, Lukiko Madit bene i kare-ni cuko cwiny luelda ma i kacokke me yelle matek me cobo ticgi me kwayo romi pa Lubanga.
5 Lakwena Petero ocoyo ni luelda myero ‘gukwa romi pa Lubanga ma tye botgi.’ Pire onongo tek adada ni myero gunge ni romi-ni gitye pa Jehovah gin ki Yecu Kricito. Luelda myero gumi lagam pi kit ma gubedo ka gwoko kwede romi pa Lubanga. Ket kong ni lawoti mo ma wumarre kwede adada owacci igwok lutinone ka ebibedo pe. Mono pe ibigwokogi maber kun iminigi cam? Ka latin acel kome lit, mono pe ibinenone ni en onongo yat? I yo acel-lu, luelda ma i kacokke myero bene ‘gukwa lwak pa Lubanga ma en owilogi ki remo me wel madit pa Wode.’ (Tic 20:28) Giketo bene i tamgi ni romo acel acel kiwilo ki remo me wel pa Yecu Kricito. Pien kibipenyogi, luelda myero gupit, gugwok dok gupar pi romi.
6. Tic ango ma lukwat onongo gitye kwede i kare macon?
6 Tam kong i kom tic ma lukwat kikome-ni onongo gitye kwede i kare me Baibul. Omyero gukany lyeto piny i dyeceng ki dong koyo i dyewor ka gitye ka gwoko romi. (Acak. 31:40) Giketo kwogi ka mading pi romi. I kare ma Daudi tye ka kwat, en olaro romine ki i dog lee tim ma giger, calo labwor ki nguu. Ma lubbe ki lee acel acel, Daudi owacci “apoto amako yer tike, agoyo aneko woko.” (1 Cam. 17:34, 35) Man pud dong nyuto tekcwiny ya! En onongo tye cok ki dog nguu adada! Kadi bed kit meno, en pe obedo lwor me gwoko romi.
7. Luelda gitwero mayo romi ki i dog Catan i yo me cwiny nining?
7 I kare-ni, luelda myero gugwokke ki i owic pa Larac-ci ma tye calo diro ma labwor mako ki lee. Man romo kwako tic me tekcwiny me mayo romi ki i dog Larac-ci i yo me cwiny. Ka gimako lee tim mager-ri ki yer tike, luelda giromo laro romi. Gitwero leyo tam ki utmego ma gipe ki ngec i kom owic ma Catan tiyo kwede me temogi. (Kwan Juda 22, 23.) Luelda kono, pe gitwero timo man labongo kony pa Jehovah. Gikonyo romo ma owanne i yo me mar, giboyo dok gioonyo yat ma obedo Lok pa Lubanga i wang burre.
8. Luelda gitero romi kwene, dok gitimo man nining?
8 Lakwat kikome-ni bene tero romine i olet ki i wang pii maber. I yo acel-lu, luelda bene gitero romi i kacokke, gicuko cwinygi me bedo tye i cokke kare ki kare wek guyeng maber kun ginongo “camgi i kare ma mitte.” (Mat. 24:45) Luelda myero guter cawa malac me konyo jo ma komgi lit i yo me cwiny me ye cam me Lok pa Lubanga. Romo ma ongak kare mukene nongo tye ka yelle me dwogo i kin romi. Ma ka miyo lworo bot omegigi, luelda gitito i yo me mar cik ma igi lac ma i Ginacoya kun ginyutte kit ma en twero tic kwedgi i kwone.
9, 10. Luelda myero gukony jo ma komgi lit i yo me cwiny nining?
9 Ka komi lit, imito ni dokto mene aye oti i komi? Mono imito en ma winyo lokki pi cawa manok keken ci coyo boti yat oyotoyot wek omine kare me neno latwo mukene? Nyo iyero dokto ma tero cawa me winyo lokki ma cwinye opye mot kun tito boti twoni, ci coyo boti yat ma rwatte ki twoni-ni?
10 I yo acel-lu, luelda bene gitwero winyo lok pa ngat ma kome lit i yo me cwiny dok gikonye wek burre ocang kun “giwire ki moo i nying Rwot [Jehovah]” i yo me cwiny. (Kwan Yakobo 5:14, 15.) Lok pa Lubanga twero cango ngat ma kome lit i yo me cwiny calo yat me cango dano ma a ki i Gilead. (Jer. 8:22; Ejek. 34:16) Ka kiketo i tic, cik ma igi lac ma i Baibul twero konyo ngat ma goro me moko tamme me tic pi Jehovah. Ada, luelda gimiyo kony ka giwinyo peko pa romo moni dok gilego kacel kwede.
Pe pi Dic, Ento pi Mitiwu Kenwu
11. Ngo ma cuko cwiny luelda me kwayo romi pa Lubanga pi mitigi kengi?
11 Petero dok opoyo wi luelda i kom gin ma myero gutim ki ma pe gutim i tic me kwayo romi. Luelda myero gukwa romi pa Lubanga, ‘pe pi dic, ento pi mitigi kengi.’ Ngo ma cuko cwiny luelda me tic pi mitigi kengi pi omegigi? Ngo ma ocuko cwiny Petero me kwayo ki dok pito romi pa Yecu? Gin ma pire tek ma ocuko cwinye aye marre pi Rwot. (Jon 21:15-17) Pi mar, luelda ‘pe gikwo pi cobo mitigi kengi, ento gikwo pi cobo miti pa ngat ma yam oto pigi.’ (2 Kor. 5:14, 15) Mar man, ka kimedo i kom margi pi Lubanga ki pi utmegigi, miyo luelda gitiyo pi romi, kun gidyero kerogi, jamigi, ki dong cawagi me kwayo romi. (Mat. 22:37-39) Gin gimine kengi, pe pi dic, ento pi mitigi kengi.
12. Lakwena Paulo omine marom mene?
12 Luelda mono myero gumine marom mene? Ka gitye ka gwoko romi, gin gilubo lanen pa lakwena Paulo, kit ma en olubo kwede lanen pa Yecu. (1 Kor. 11:1) Pi margi i kom utmego ma i Tecalonika, cwiny Paulo gin ki luwote obedo yom pe me minigi ‘lok me kwena maber keken ma oa ki bot Lubanga, ento wa kwogi bene.’ I timo meno, gin gumwolle calo “toto a gwoko itino mere.” (1 Tec. 2:7, 8, Baibul me Leb Lango) Paulo oniang kit ma mego ma lamar paro kwede pi lutinone. En twero timo gin mo keken pigi, medo ki aa malo i cwiny dyewor me minigi cam.
13. Luelda myero guter ticgi i yo mupore nining?
13 Luelda myero gugwokke wek kit ma gitero ki ticgi me kwayo romi ki gwoko jo me odigi obed i yo mupore. (1 Tem. 5:8) Cawa ma luelda gitiyo kwede pi kacokke tye but cawa ma onongo myero gubed kwede ki jo me odigi. Yo acel me timo tic aryo magi i yo mupore aye me lwongo kicel kicel jo mukene i Worogi me otyeno pi Jo me Ot. Pi mwaki mapol, Masanao, laelda mo i Japan, obedo ka lwongo jo ma peya gunyomme ki dong luot ma laco pe iye dok ma gitye ka dongo i yo me cwiny i kwangi macalo jo me ot. I nge kare mo, jo ma gikonyogi-ni gudoko luelda ci gulubu lanen maber pa Masanao.
Wukwer Miti me Lim —Ento Wukwa Romi ki Mit Kom
14, 15. Pingo luelda myero gugwokke ki ‘maro lim,’ dok gitwero lubo lanen pa Paulo nining?
14 Petero bene ocuko cwiny Luelda me kwayo romi ‘pe pi maro lim, ento ki mit kom.’ Tic pa luelda cwalo cawa mapol atika, ento pe giketo cwinygi ni kibiculogi. Petero oneno ni mitte me ciko luelda luwote pe me kwayo romi pi ‘maro lim.’ Man nen ka maleng i kit ma lutela dini goba me ‘‘Babilon Madit’’ gikwo kwede i rwom ma lamal kun jo mapol gikwo kwo me can. (Yabo 18:2, 3) Luelda i kare-ni gitye ki tyen lok me gwokke ki i kodi miti macalo man.
15 Paulo omiyo lanen maber bot Lukricitayo ma luelda. Kadi bed ni en obedo lakwena dok onongo twero bedo ‘yec mapek’ bot Lukricitayo me Tecalonika, en pe ‘ocamo cam pa ngat mo labongo culone.’ Ma ka meno, en ‘ocanne i tic dyeceng ki dyewor.’ (2 Tec. 3:8) Luelda mapol i kare-ni, ma bene tye iye luneno me adwol, gimiyo lanen maber me aluba i yo man. Kadi bed giye kony ma a ki bot luye luwotgi, gin pe giketo ‘yec mapek’ i kom ngat mo keken.—1 Tec. 2:9.
16. Kwayo romi ki ‘mit kom’ te lokke ngo?
16 Luelda gikwayo romi ki ‘mit kom.’ Mit komgi-ni nen i cwiny me dyere ma gitye kwede me konyo romi. Ento man pe te lokke ni myero gudii romi adiya me tic pi Jehovah; dok bene luelda ma lumar pe gicuko cwiny jo mukene me tic pi Jehovah ki cwiny me pyem. (Gal. 5:26) Luelda giniang ni romi ducu pe girom. Gin gitye ki miti me konyo omegigi me tic ki yomcwiny pi Jehovah.
Pe Wulo Romi Tektek Ento Wubed La Maber
17, 18. (a) Pingo i kine mukene lukwena onongo ginongo tek me niang pwony pa Yecu i kom mwolo? (b) I yo mene ma wan bene watero bedo ki kodi miti meno?
17 Kit ma dong wanyamo kwede, luelda myero gunge ni romi ma gikwayo-ni pe meggi ento pa Lubanga. Omyero gugwokke pe me ‘loyo jo pa Lubanga ki tek.’ (Kwan 1 Petero 5:3.) I kine mukene, lukwena pa Yecu onongo gibedo ki miti marac. Gin onongo gimito bedo ludito calo luloc me lobo.—Kwan Marako 10:42-45.
18 I kare-ni, omege ma ‘gimito tic me bedo luneno’ omyero kong gunen ni gingine kekengi pingo gitye ki miti man. (1 Tem. 3:1) Jo ma gitye luelda i kare-ni omyero gupenye kekengi ki cwiny me ada ka gitye ki miti me bedo ki twero nyo dito calo pa lukwena ca. Ka lukwena guyelle ki i kodi miti man, luelda myero gutii matek me gwokke ki cwiny me lobo-ni ma weko gikete malo me bedo ki twero i kom jo mukene.
19. Wi Luelda myero opo i kom gin ango ka gitye ka gwoko romi?
19 I kare mogo, luelda myero gucung matek i tamgi, calo ka gitye ka gwoko romi ki bot “orudi mager.” (Tic 20:28-30) Paulo owaco bot Tito ni obed ka ‘cuko cwiny dok ojuk juk ki twer ducu ma en tye kwede.’ (Tito 2:15) Kadi bed mitte ni omyero gungol kop, luelda gitero jo ma gitye i peko i yo me woro. Gibedo ki pwoc ma ka tero ngat moni i yo me gero, lok i yo maber pol kare gudo cwiny dano weko ngat moni lubo yo matir.
20. Luelda gitwero poro Yecu kun ginyuto lanen maber nining?
20 Lanen maber pa Kricito cuko cwiny luelda me maro romi dok me lubo lanenne. (Jon 13:12-15) Cwinywa bedo yom ka wakwano kit ma en opwonyo kwede lupwonnyene i tito kwena ki dok tic me loko dano doko lupwonnyene. Kwone me mwolo ogudo cwiny lupwonnyene, dok ocuko cwinygi me kwo i yo me “mwolo, kun dano acel acel woro lawote macalo ngat madit loye.” (Pil. 2:3) Luelda i kare ni bene gilubo lanen pa Yecu, dok gin bene gibedo “lanen maber bot romi.”
21. Mot ango ma luelda giromo keto cwinygi me kurone?
21 Petero odolo te lokke bot luelda kun loko i kom mic ma tye anyim. (Kwan 1 Petero 5:4.) Luneno ma kiwirogi ‘gibinongo mot, lalukana me deyo ma pe balle’ kacel ki Kricito i polo. Lukwat ma piny ma gikwayo ‘romi mukene-ni’ gibedo ki mot me kwayo romi pa Lubanga ma gitye i lobo kany i te loc pa “Lakwat madit.” (Jon 10:16) Pwony ma bilubo man binyamo yo mapat pat ma jo ma gitye i kacokke gitwero konyo kwede co ma kicimogi me telo kacokke.
Me Poyo Wic
• Pingo onongo pore pi Petero me ciko luelda luwote me kwayo romi pa Lubanga ma tye botgi?
• Luelda gitwero konyo jo ma komgi lit i yo me cwiny nining?
• Ngo ma cuko cwiny luelda me kwayo romi pa Lubanga ma tye botgi?
[Peny me Kwan]
[Cal ma tye i pot karatac 25]
Luelda i kare-ni myero gugwok “romi” ma tye botgi calo lukwat me kare macon