Cako Goyo Wi Lubele i Leb Muno ma Niang Iye Yot

CWINYWA yom me niangowu ni cakke ki Wi Lubele me anyama eni, wabibedo ka goyo magajin man dwe ki dwe i Leb Muno ma niang iye yot dok wabitemone pi mwaka acel. Bibedo ki pwony me anyama, dok ka ce ka coc pud tye, ci kibimedo pwony mogo macego cego ma nongo kiyerogi. Wageno ni man bicobo i yo me cwiny miti pa Lucaden pa Jehovah. Pingo wawaco kumeno?

Leb Muno tye leb ma utmegiwa giloko jwi i lobbe calo Fiji, Ghana, Kenya, Liberia, Nigeria, Papua New Guinea, ki Solomon Islands. Kadi bed utmegiwa ma i lobbe magi bene giloko lebgi mapat pat, ento inongo ni nino ducu giloko Leb Muno ka gitye i cokke ki dong i ticwa me pwony. Kitungcel, Leb Muno ma giloko-ni niang iye yot loyo ma watiyo kwede i bukkewa. Ki bene, tye jo pa Jehovah ma gucito i lobbe mukene ento myero gulok Leb Muno kadi bed pe gingeyo maber tutwal. Ki kunnu, pe giromo bedo tye i cokke pienni nongo pe kidoro i lebgi.

Pwony ma wanyamogi i cokke me Kwano Wi Lubele cabit ki cabit-ti gitye yo ma pigi tego ma wanongo iye cam me cwiny i karene kikome. Pi meno, Leb Muno man ma niang iye yot-ti bikonyo jo ducu ma gibedo tye i cokke me nongo adwogi maber, pien leb muno ma kitiyo kwede-ni pe tek. Magajin man manyen-ni pok ngeye bibedo pat. Wi lok matino, paragraf, bok me nyamo wi lok ma pigi tego, cal ma gitye i pwony me anyama birwatte ki ma gitye i magajin me akwana pi kacokke. Pi meno, dano ducu gibilubo ki i magajin aryo magi kun ginywako i cawa me Kwano Wi Lubele. Magajin man ma niang Leb Munone yot-ti kibigoyo i leb muno keken.

Wageno ni magajin man manyen-ni bigamo lega pa jo mapol ma gulego bot Jehovah ni: “Miya niang matut wek apwony lok me cikki.” (Jab. 119:73) Watye ki gen bene ni jo ma pe gingeyo Leb Muno, kacel ki lutino mogo ma giloko Leb Muno, gibibedo ki kare me yubbe maber adada pi Kwano Wi Lubele cabit ki cabit. Pwocwa ducu cito bot Jehovah pien pi ‘marre pi utmegiwa ma i lobo ducu,’ en tye ka tic ki “lagwok ot ma lagen dok maryek” me miyo cam me cwiny muromo.​—1 Pet. 2:17; Mat. 24:45.

Lukiko Madit pa Lucaden pa Jehovah