Yweyo Pa Lubanga​—Tika Dong Idonyo Iye?

“Lok pa Lubanga obedo gin makwo, dok tiyo matek.”​—IBRU 4:12.

1. Yo mene me acel ma watwero donyo kwede i yweyo pa Lubanga i kare-ni, ento pingo wacone twero bedo yot ma ka timone?

 IPWONY mukato angec, waneno ni watwero donyo i yweyo pa Lubanga ka wabedo luwiny kun wanote kwede i ticce pi cobo yubbe. Waco meno twero bedo yot ma ka ketone i tic. Me lapore, ka wapwonyo ni Jehovah pe ye gin ma wamaro, watwero kwero winyone pi tyen me acel. Man nyutu ni myero wabed ka dongo kun wayubbe me ‘bedo luwiny.’ (Yak. 3:17) I pwony man, wabingiyo kabedo mogo manok nok ma kwo i yo ma rwatte ki yub pa Lubanga—kun wabedo luwiny ki i cwinywa​—twero kelo atematema.

2, 3. Yelle ango ma myero wamedde kwede wek wabed calo lonyo inyim Jehovah?

² Iwinyo nining ka oo i lok me ye tira ma a ki i Baibul? Ginacoya wacciwa ni obedo miti pa Lubanga me coko bote “lonyo me rok ducu.” (Ag. 2:7) Ki lok ada, polwa onongo pe kikwanowa ni wabedo calo lonyo ma peya wapwonyo lok me ada. Ento, mar  pi Lubanga gin ki Wode me amara miyo watimo alokaloka i tamwa ki kitwa wek wayom cwiny Lubanga. Me agikkine, i nge lega pi kare malac kun wayelle matek, nino me yomcwiny o kun wamine me nongo batija macalo Lakricitayo.​—Kwan Jo Kolocai 1:10.

³ Ento, lweny ki roc ma watye kwede pe gik inge nongo batija. Lweny man medde ameda ka pud watye ki roc. Watye ki gen ni, ka wamedde ki lweny man kun wamoko tamwa me bedo calo lonyo i wang Lubanga, Jehovah biminiwa mot pi yellewa.

Ka Tira Mitte

4. Yo adek mene ma watwero nongo kwede tira ma a ki i Ginacoya?

⁴ Ma peya wacako lok i kom roc ma watye kwede, omyero kong wangegi. Pwony ma tugo cwiny ma kimiyo i Ot me Ker nyo pwony mo ma i bukkewa ma gudu cwinywa twero nyutu ka maleng bal marac ma watimo. Ki tungcel, ka pe waniang iye maber ki i pwony ma kimiyo i kacokke, nyo pe waketo i tic tira man ma kicoyo piny-nyi, Jehovah twero tic ki Lakricitayo lawotwa me nyutu ka ma balwa tye iye.​—Kwan Jo Galatia 6:1.

5. Tit kong kit mogo maraco ma waromo nyutugi ka kiminiwa tira, dok tit gin mumiyo Lukricitayo ma gitye lukwat i yo me cwiny myero gudi cwinygi me konyowa.

⁵ Pe yot tutwal me ye tira ma a ki bot dano ma tye ki roc, kadi bed ni en omi kiryeko dok i yo me mar. Ento, kit ma Jo Galatia 6:1 nyutu kwede, Jehovah ociko jo ma gitye ki niang matut i yo me cwiny ni ‘gukonywa,’ kun gitimo man “ki cwiny me mwolo.” Ka wajolo i yo maber, ci wabibedo calo lonyo i wang Lubanga. Ka walego, omyero waye ni wan lubalo. Ento, ka ngat mo onyutiwa bal moni ma watye kwede, pol kare watemo gengo ngewa, waweko nen calo bal matidi, nyo wapenyo miti pa ngat ma omiyo tira meno, nyo wakwero yo ma en omiyo kwede tira meno. (2 Luker 5:11) Ka tira man ogudu ka mo ma pire tek i kwowa​—kwo pa dano me ot moni, rukwa ki kit ma wanen kwede, lengowa, nyo yo me mato yamo ma wamaro ento Jehovah dag​—watwero kwero winyone woko, meno twero weko ngat ma omiyo tira-ni bedo ki ur! Ka cwinywa dong opye, pol kare waye ni tira meno onongo opore.

6. Lok pa Lubanga “poko par ki tam mabecone ki maracone ma tye i i dano” nining?

⁶ Ginacoya ma tye ite wi lok madit me pwony man poyo wiwa ni lok pa Lubanga “tiyo matek.” Ada, lok pa Lubanga tye ki teko ma twero loko kwo pa dano. Tye ki teko ma weko watimo alokaloka i kwowa inge nongo batija calo kit ma watimo kwede ma peya wanongo batija. I waragane bot Jo Ibru, Paulo bene ocoyo ni lok pa Lubanga “tuco iwa pil” dok “poko par ki tam mabecone ki maracone ma tye i i dano.” (Ibru 4:12) Paulo onongo tye ka wacone ni ka waniang ki i Baibul gin ma Lubanga mito ni watim, ticwa binyutu nga ma wabedo ki i iwa. (Kwan Matayo 23:27, 28.) Tam kong kit ma onongo in ibidok kwede i lok magi.

Wot Kacel ki Dul pa Jehovah

7, 8. (a) Ngo ma onongo oweko Lujudaya mogo gumoko ka lubo but Cik pa Moses? (b) Tutegi ni gudo medde pa yub pa Jehovah nining?

⁷ Polwa waromo waco lok ma i Carolok 4:18 ki wiwa: “Ento yo pa jo ma kitgi atir bedo calo tar me rupiny, ma tarre medde ameda o wang ma piny dong leng, Baibul pa Katoli.” Meno terre ni yo me kwowa ki niangowa i kom yub pa Lubanga bimedde ameda inge kare mo.

⁸ Kit ma wanyamo kwede ipwony  mukato angec, onongo tek tutwal pi Lujudaya mapol ma Lukricitayo me weko lubo Cik pa Moses inge to pa Yecu. (Tic. 21:20) Kadi bedi Paulo onyamo kiryeko ni Lukricitayo dong gipe ite Cik, jo mogo gukwero kit ma en onyamo kwede lok man woko. (Kol. 2:13-15) Nen calo gutamo ni ka gimedde ki lubo but Cik mogo, ci gibibwot ki i aunauna. Ento, Paulo dok ocoyo bot Lukricitayo me Ibru kun waccigi atir ni, pe gibidonyo i yweyo pa Lubanga ka gukwero tic i yo ma lubbe ki medde pa yub pa Lubanga. * (Ibru 4:1, 2, 6; kwan Jo Ibru 4:11.) Me nongo cwak pa Jehovah, omyero guye lok ada ni En tye ka telo jone i yo mapat.

9. Cwiny ango ma myero wabed kwede ka alokaloka otimme i niangowa i jami mogo ma i Ginacoya?

⁹ I kare ni, ngec omedde i kom kit ma waniang kwede pwony mogo me Baibul. Man myero pe obal cwinywa; myero ojing genwa i kom lagwok ot ma lagen dok maryek. Ka luwang “lagwok ot” guniang ni ngecwa i kom lok me ada moni mito kitim iye alokaloka, gin pe gikwero timone. Miti pa lagwok ot tye me tic ma lubbe ki yub pa Lubanga ma ka gengo ngegi i kom cac ma bino pi alokaloka i kom niango moni. Ka alokaloka otimme i niangowa i kom Ginacoya moni, in idok iye nining?​—Kwan Luka 5:39.

10, 11. Ngo ma watwero pwonyo ki bot jo mogo i kare ma kititigi yo mogo manyen me tito kwena maber?

¹⁰ Kong wanenu lapor mukene. I agikki me cencwari me 19 nio i acakki me cencwari me 20, lutino kwan mogo me Baibul ma onongo gimiyo pwony mamit adada i wi abam gutamo ni gitwero tito kwena kun gimiyo pwony ma guyubo maber bot lwak ma gijolo ki pwoc. Gimaro miyo pwony i wi abam, dok bene mogo gideng pi pwoc ma a ki bot jo ma winyo pwonygi. Ento, lacen onen ka maleng ni Jehovah mitine tye ni jone gutit kwena i yo mogo mapat pat, ma tye iye pwony i ot ki ot. Jo mogo ma onongo gitye ki mot me pwony i wi abam gukwero adada temo yo mo keken manyen. Ki woko, onongo ginen calo co ma gimaro jami me cwiny, co ma gudyere bot Rwot. Ento, i kare ma gukemme ki yub pa Lubanga ma lubbe ki tito kwena ma onen ka maleng-ngi, tamgi, cwinygi, ki mitigi kikome ongene. Jehovah onenogi nining? En pe ominigi mot. Guweko dul pa Jehovah woko.​—Mat. 10:1-6; Tic. 5:42; 20:20.

¹¹ Man pe terre ni obedo yot bot jo ducu me tito kwena kun gimedde kigwoko gennegi i kom dul pa Jehovah. Jo mapol gunongo tek adada, tutwalle i acakkine. Ento gubedo luwiny. Lacen, lworo man oa woko, ci Jehovah ominigi mot madwong adada. Ka kilwongi me tito kwena i yo mo mapat ki ma imaro, in i dok iye nining? Tika itye atera me temo yo mo manyen?

Ka Danowa me Amara Oweko Jehovah

12, 13. (a) Ngo ma weko Jehovah ye ni kiryem labal ma pe ngut ki i kacokke? (b) Atematema ango ma lunyodo mogo ma Lukricitayo giwok ki iye, dok ngo ma weko man tek tutwal?

¹² Labongo akalakala wan weng waye cik ma igi lac ma waco-ni myero wabed leng i komwa, i yo me kwowa, ki i yo me cwiny wek wa yomcwiny Lubanga. (Kwan Tito 2:14.) I kare mogo, watwero wok ki i atematema matek adada macalo man ma lubbe kigwoko genewa i kom yub pa Lubanga. Me labolle, ket kong ni lunyodo mo ma  Lukricitayo ma gitye lanen maber wodgi acel keken ma gitye kwede oweko ada woko. Pien mito “bedo ki yomcwiny me bal ma ri pi kare manok mo keken-ni” ma ka bedo ki wat maber ki Jehovah kacel ki lunyodone ma gilworo Lubanga, latin awobe man kiryemo woko ki i kacokke.​—Ibru 11:25.

¹³ Cwiny lunyodone otur adada! Ma lubbe ki ryemo dano ki i kacokke, gingeyo gin ma Baibul waco i kom lok man ni “pe wuribbe ki ngat mo ma gilwongo ni dano pa Kricito, ka otimo tim kwele, nyo ka en obedo laworo me jami, nyo ka en obedo dano ma woro cal jok, gwok nyo layet dano, lamero nyo layak, pe wunywak cam kacel ki kodi dano-nu.” (1 Kor. 5:11, 13) Gin bene gingeyo ni ka kiwaco ni “ngat mo” i tyeng man, nongo kwako jo me ot ma pe gibedo i paco acel. Ento gimaro latingi matek adada! Pi mar matek ma gitye kwede twero miyo gicako tamo ni: ‘Wan watwero konyo latinwa nining me dwogo bot Jehovah ka pe waribbe kwede? Mono pe watwero bedo me kony tutwal ka waribbe kwede?’ *

14, 15. Tam maber ango ma lunyodo ma kiryemo lutinogi ki i kacokke omyero gumoki?

¹⁴ Kica makowa i kom lunyodo ma jami magi otimme i komgi-ni. Kadi bed kumeno, latingi aye oyero me lubo kit mogo maraco ma ka ribbe ki Lunyodone kacel ki luye luwote. Kany, lunyodo onongo gipe ki gin mo ma myero guwac i kom lok man. Man aye gin mumiyo giwinyo marac atika!

¹⁵ Ento lunyodo ma lumar-ni gibitimo gin ango? Tika gibiwinyo tira pa Jehovah? Nyo gibitemme me ribbe ki latingi ma kiryemo ki i kacokke-ni kare ki kare kun giwacci meno “lok me pacogi”? Ka gitye ka moko tamgi, wigi myero pe owil i kom kit ma Jehovah winyo kwede ma lubbe ki gin ma gitye ka timone. Yubbe tye me gwoko dulle wek obed maleng, dok bene ka twere wek labalo meno ongut i kom balle. Lunyodo ma Lukricitayo gitwero konyo kor yub meno nining?

16, 17. Ngo ma wapwonyo ka walwodo lok i kom lanen pa Aron?

¹⁶ Aron, omin Moses, owok ki i kwo matek pi lutino awobene aryo. Tam kong kit ma en owinyo kwede i kare ma awobene Nadab ki Abiu, gutyero mac mapat bot Jehovah, ci En onekogi woko. Meno ogiko ribbe mo keken ma co magi onongo gitwero bedo kwede ki lunyodogi. Ento pud tye lok mukene. Jehovah ociko Aron ki lutinone ma lugen-ni: “Pe wugony yer wiwu oket ata lijayi, dok pe wuyec ginarukawu [pi kumo], weko pe wuto, dok wek kiniga [pa Jehovah] pe opot i kom lwak ducu.”  (Levi. 10:1-6) Tira man kiwaco ka maleng. Marwa pi Jehovah myero obed makato pi jo me paciwa ma gin pe lugen.

¹⁷ I kare-ni, Jehovah pe neko jo ma gukwero lubo cikke cutcut. Pi mar, en minigi kare me ngut i kom balgi. Jehovah biwinyo nining ka lunyodo pa labal ma pe nguti gitemo En kun giribbe ki wodgi nyo nyargi ma kiryemo ki i kacokke-ni i yo ma pore?

18, 19. Mot ango ma twero bino bot jo me ot ka giketo tira pa Jehovah i tic ma lubbe ki jo ma kiryemogi ki i kacokke?

¹⁸ Dano mapol ma onongo kiryemogi ki i kacokke giye ni cung matek ma luremgi ki jo me pacigi gucung okonyogi me ngut i kom balgi. Me ye ni myero kidwok lamego mo ma kiryemo, luelda gucoyo ni en dong oloko kwone dok man otimme “bene pi woro ma omine kikome obedo ka nyutu ma lubbe ki yub me ryemo dano ki i kacokke.” Lamego-ni owaci “gin ma okonye me dwogo i kacokke aye ni omine obedo lagen i lubo cik me Ginacoya.”

¹⁹ Tam ango ma watwero mokone? Mitte ni walweny ki cwiny ma weko wakwero lubo tira me Ginacoya. Myero waye ki cwinywa ducu ni yo ma Lubanga cobo ki pekowa-ni keken aye tye atir kare ducu.

“Lok pa Lubanga Obedo Gin Makwo”

20. I yo aryo mene ma watwero niang kwede Jo Ibru 4:12? (Nen lok ma tye i tere piny.)

²⁰ I kare ma Paulo ocoyo-ni “lok pa Lubanga obedo gin makwo,” en onongo pe tye ka lok tutwalle i kom Baibul, Lok pa Lubanga. * Lok ma orumu nget tyeng man nyutu ni en onongo tye ka lok i kom cikke pa Lubanga. Paulo onongo tye ka waco ni Lubanga pe cikke ka dok wiye wil woko i ye. Jehovah omoko man kun tiyo ki lanebi Icaya me wacci: “Lokka . . . pe bidwongo bota nono ma nongo pe otim gin mo, bicobo gin ma acwale pire.” (Ic. 55:11) Dong, pe tye gin mo keken ma myero ogengwa kuro ka jami pe tye ka wot oyot kit ma wamito kwede. Jehovah “tye ka tic” wek yubbe ocobbe mapwot.​—Jon 5:17.

21. I yo ango ma Jo Ibru 4:12 twero cuko cwiny jo ma lugen ma guteggi i kin “lwak dano mapol ata”?

²¹ Jo muteggi i yo me cwiny ma gin lugen i kin “lwak dano mapol ata” gutiyo pi Jehovah pi mwaki mapol. (Yabo. 7:9) Polgi onongo pe gutamo ni gibitii i lobo-ni. Ento kadi bed gutii woko, gin pe guye ni cwinygi otur. (Jab. 92:14) Gin giniang ni cikke pa Lubanga pe obedo lok goba​—obedo gin makwo, Jehovah tye ka tic me cobone. Kit macalo Lubanga maro yubbe-ni, wakelo yomcwiny bote ka waketo yub man bedo mukwongo i tamwa. I kare me nino abiro-ni, Jehovah pud tye ka yweyo, omoko liking i ryekone ni yubbe bicobbe dok ni macalo gurup, jone gibicwako kor yub meno. In kono? Tika dong idonyo i yweyo pa Lubanga?

[Lok ma tye piny]

Myero Iniang Maber

• Ngo ma mitte wek wadony i yweyo pa Lubanga i kare-ni?

• Kubbe ango ma tye i kin yub pa Lubanga ki dong ye lubu tira me Ginacoya?

• I kabedo mene ma bedo lawiny i lubo tira me Ginacoya twero doko tek, ento pingo pire tek me lubone?

• Yo aryo mene ma watwero niang kwede Jo Ibru 4:12?

[Peny me Kwan]

[Cal ma tye i pot karatac 31]

Lunyodo-ni cwinygi otur!