Myero Watute Pi Kelo Kuc

“Dong watamu pi gin ma kelo kuc.”​—ROM. 14:19.

1, 2. Pingo Lucaden pa Jehovah gitye ki kuc i kingi?

 KUC me ada pe i kin dano i kare-ni. Kadi bed dano ma gia ki i lobo acel dok giloko leb acel pol kare pe ginote. Gipokke pi lok me dini, lok me wibye, cente ki dong pwonye. Jo pa Jehovah gunote i twok lobo-ni, kadi bed gia “ki i rok ducu, ki i kaka ducu, ki dano ducu me wi lobo, ki leb ducu.”​—Yabo. 7:9.

² Tye tyen lok mapol matir mumiyo watye ki kuc i kinwa. Tyen lok ma pire tek aye ni watye ki “kuc i nyim Lubanga.” Kuc man obino pien waketo niyewa i kom Wode, ma omiyo kwone piwa. (Rom. 5:1; Ep. 1:7) Ki bene, Jehovah miyo cwiny maleng bot jone ma gin lugen, dok i kin nyig ma nyak pi cwiny meno tye iye kuc. (Gal. 5:22) Tyen lok mukene mumiyo watye ki kuc aye ni ‘wan pe jo me lobo.’ (Jon 15:19) Man te lokke ni pe wanywako i lok me wibye nyo lweny me lobo. Kit ma Baibul owaco kwede, jo pa Jehovah “gibiteto pala lucwangi doko lak kweri dyang.”​—Ic. 2:4.

3. Kuc ma watye kwede-ni miniwa kare me timo gin ango, dok gin ango ma wabineno i pwony man?

 ³ Wan ‘wamarre kekenwa’ i kacokke kadi bed ni pe wa a ki i kabedo acel dok tamwa kacel ki tekwarowa tye mapat pat. (Jon 15:17) Kuc ma watye kwede-ni pe obedo gwokke ma mwa ki i cwero cwiny omegiwa keken. Ento man miniwa kare me ‘tiyo gin maber bot dano ducu, makato ducu myero watiyu bot utmegiwa ma guye Kricito.’ (Gal. 6:10) Kuc ma tye i kinwa ki Jehovah kacel ki omegiwa ki lumegiwa-ni pire tek adada. Mitte ni omyero wagwok maber. Kombeddi wabineno kit ma waromo gwoko kwede kuc i kacokke.

Ka Wapoto i “Roc”

4. Ngo ma myero watim me gwoko kuc ka wacwero cwiny ngat mo?

⁴ Lakwena Yakobo ocoyo ni: “Wan ducu ngat acel acel timo lwak roc mapol, ento ka ce inen ngat mo pe roco i gin ma en loko, ci dano-nu nongo dano maber twatwal, twero loyo kome ducu.” (Yak. 3:2) Tye kare mukene ma dano aryo i kacokke gitwero bedo ma pe giwinye nyo gitye ki peko i kingi. Ento ka peko tye, gin myero gucob dok gugwok kuc me kacokke. Me laporre, kwan gin ma Yecu owacci myero watim ka wacwero cwiny ngat mo.​—Kwan Matayo 5:23, 24.

5. Ngo ma myero watim me gwoko kuc ka ngat mo ocwero cwinywa?

⁵ Ka ngat mo otimo gin mo ma ocwero cwinywa kono? Omyero mono watam ni ngat meno aye myero obin botwa ci okwa kica? 1 Jo Korint 13:5 waco ni mar pe keto cwinye i kom gin marac ma kitimo i kome. Ka ngat mo ocwero cwinywa, wanyuto ni wamito kuc ka watimme kica kun wiwa wil woko i kom peko meno. (Kwan Jo Kolocai 3:13.) Man aye gin maber loyo me atima ka ce watye ki peko mo matidi. Timo meno konyowa me bedo ma wanote ki utmegiwa. Dok wawinyo maber pien nongo watimo gin matir. Carolok mo acel wacci ber ka wacayo bal ma ngat moni otimo i komwa.​—Car. 19:11.

6. Ka ngat mo otimo gin mo marac i komwa ma wiwa pe twero wil iye oyot kono?

⁶ Ka ngat mo otimo gin mo marac i komwa ma wiwa pe twero wil iye oyot kono? Pe nyuto ryeko ka wacako titone bot jo mukene. Kwoto nying ma kit man balo kuc me kacokke. Ngo ma waromo timone me cobo peko man? Matayo 18:15 wacci: “Ka ce omeru obalo bal mo boti, cit bote inyutte balle, i kin in ki en keken. Ka owinyo lokki, ci dong inongo omeru.” Kadi bed Matayo 18:15-17 loko i kom bal marac, waromo tic ki pwony ma tye i tyeng 15 ma lubbe ki peko mapat. Pi meno, ka peko tye i kin in ki ngat mo, bedo ber ka wuloko iye wun aryo keken. Omyero walok bot omegiwa i yo me kica kun wabedo ki kuc i kinwa. *

7. Pingo omyero wacob peko oyotoyot?

⁷ Lakwena Paulo ocoyo ni: “Ka kiniga omakowu, pe wupot i bal; ceng pe myero opoti ma nongo pud wujul wutye ki kiniga i cwinywu, dok bene pe wumi kare ki Catan.” (Ep. 4:26, 27) Yecu bene owacci: ‘Mak larem woko oyotoyot ki ngat mudoti i kot.’ (Mat. 5:25) Pi meno, me gwoko kuc ki jo mukene, omyero wacob peko oyotoyot. Ka pe watimo meno ci peko nya doko dit dok marac adada, kit macalo ka wawanne myero waket yat i wang bwurwa oyotoyot wek pe odet odok dit. Omyero pe wawek awaka, nyeko, nyo maro cente ogengwa cobo peko mo keken ma tye i kinwa ki omegiwa.​—Yak. 4:1-6.

Ka Peko Moni Kwako Dano Mapol

8, 9. (a) Tele ango ma onongo tye i kacokke me Roma? (b) Paulo otiro tam pa Lukricitayo magi ma i Roma-ni nining?

⁸ Peko mogo ma tye i kacokke romo kwako dano mapol. Man otimme i kom Lukricitayo mukene i Roma. Tele onongo tye i kin Lujudaya ki Lurok ma Lukricitayo. Jo mogo  cwinygi ma ngoligi kop-pi onongo goro. Tye jami mapol ma onongo jo ma cwinygi ma ngoligi kop-pi pe yenigi me timone, kadi bed Ginacoya pe owaco ni jami magi giraco. Jo mukene i kacokke cwinygi ma ngoligi kop-pi onongo pe goro. Gin onongo gitamo ni gitye maber kato jo ma cwinygi ma ngoligi kop-pi goro. Dok jo ma cwinygi ma ngoligi kop goro-ni gucako lok marac i kom jo ma cwinygi ma ngoligi kop-pi pe goro. Ento tele man onongo tye ma lubbe ki jami ma ngat moni oyero. Gin ango ma Paulo owaco bot kacokke man?​—Rom. 14:1-6.

⁹ Jo ma cwinygi ma ngoligi kop pe goro-ni onongo giniang ni pe myero gilub Cik pa Moses. Jo ma cwinygi ma ngoligi kop goro-ni gutamo ni onongo rac me camo jami ma Cik pe ye. Paulo otiro tam pa gurup pa Lukricitayo magi. Paulo owaco bot jo ma cwinygi ma ngoligi kop pe goro ni pe myero gutam ni gitye maber kato jo ma cwinygi ma ngoligi kop-pi goro. (Rom. 14:2, 10) Kodi tam ki tim ma kit man romo weko jo ma cwinygi ma ngoligi kop goro-ni gibalo wat ma tye i kingi ki Jehovah. Paulo omedo ni: ‘Pe wubal tic pa Lubanga pi lok me cam mamwa.’ En bene owaco ni: “Bedo ber mada ka pe icamo ringo, nyo kadi ki mato kongo, nyo tiyo gin mo ma bimiyo omeru poto.” (Rom. 14:14, 15, 20, 21) Paulo owaco bot jo ma cwinygi ma ngoligi kop goro-ni ni myero gugik ngolo kop i kom jo ma tamgi opokke ki megi. (Rom. 14:13) En owaco botgi ni: “Atito botwu ni, dano acel acel myero pe opar pi ditte mukato kare.” (Rom. 12:3) Inge tiro tam pa gurup pa Lukricitayo magi, en owacci: “Myero dong watamu pi gin ma kelo kuc ki gin ma dongo niyewa i kinwa kekenwa.”​—Rom. 14:19.

10. Calo Lukricitayo me Roma, gin ango ma jo ma gitye ki tele i kingi myero gutim me cobo peko meno?

¹⁰ Wageno ni kacokke me Roma guye lok ma Paulo owaccigi-ni ci gutimo alokaloka ma mitte. I kare-ni bene waromo cobo tele ma tye i kinwa ki omegiwa nyo lumegiwa i yo me mar ka watimo gin ma Baibul wacciwa. Calo Lukricitayo me Roma, ka peko mo tye i  kacokke i kare-ni, jo ducu ma peko man kwakogi omyero gutim alokaloka ma mitte wek ‘gubed ki kuc i kingi.’​—Mar. 9:50.

Kit ma Luelda Giromo Miyo Kony

11. Ka ngat mo mito tito peko ma tye i kin en ki Lakricitayo lawote mo, gin ango ma myero laelda otim?

¹¹ Ka ngat mo tye ki peko i kin en ki dano me ode nyo Lakricitayo mukene ento mito tito lokke bot laelda mo kono? Carolok 21:13 waco ni: “Ngat ma dingo ite woko ka winyo koko pa lucan, en bene ka bikok pi kony, ngat mo pe biwinyo kokone wacel.” Laelda mo romo “dingo ite” ka pe winyo lok pa ngat mo ma tye ka mito kony. Ento carolok mukene dok wacci: “Dano ma kwongo tito lokke i kot nen calo tye atir, nio ka lawote ma gipido kwede ocako penye.” (Car. 18:17, New English Translation) Laelda myero owiny lok ki cwiny me kica, ento en myero ogwokke pe me moko tam mo keken labongo ngec muromo i kom peko meno. Inge winyo lok pa ngat meno, laelda-ni romo penye ka en dong oloko ki lawote ca ma lubbe ki pekogi-ni. Laelda-ni bene romo nyutte wiye wiye gin ma Baibul waco ni myero watim me gwoko kuc i kinwa ki omegiwa nyo lumegiwa.

12. Labol adek mene ma nyuto ni rac tutwal me rune ka moko tam inge winyo peko moni.

¹² Rac tutwal me rune ka moko tam inge winyo lok pa ngat acel keken ma lubbe ki peko moni. Labol adek ma nonge i Baibul nyuto man. Me acel aye gin mutimme i kom Potipar. Dakone owacce lok goba kun wacci Yucepu otemo buto kwede tektek. En oye lokke. Kiniga omako Potipar ci otweyo Yucepu i buc. (Acak. 39:19, 20) Labol mukene aye gin ma Kabaka Daudi otimo. Jiba, latic pa Mepibocet, owaco bot Daudi ni Mepibocet tye ka konyo lumone pa Daudi. Daudi oye lokke dok owaco labongo tamone ni: “Nen ba, jami ma yam pa Mepibocet ducu tin dong gudoko meri.” (2 Cam. 16:4; 19:25-27) Labol me adekke aye gin mutimme i kom Kabaka Aritakcec. Lumone pa Lujudaya guwaco bot kabaka ni Lujudaya dok gucako gedo cel me gang me Jerucalem pienni gimito jemo i kom kabaka. Kabaka oye lok goba man ci owacci Lujudaya gugik tic me gedogi-ni woko. Pi tyen lok man, Lujudaya gugiko tic me gedo ot pa Lubanga. (Ejira 4:11-13, 23, 24) Luelda ginyuto ryeko ka gitimo gin ma Paulo owaco bot Temceo dok pe gingolo kop mo keken labongo bedo ki ngec muromo.​—Kwan 1 Temceo 5:21.

13, 14. (a) Ka tele tye i kin jo aryo moni, gin ango ma myero wiwa opo iye? (b) Ngo ma romo konyo luelda me ngolo kop atir?

¹³ Baibul waco ni: “Dano ma tamo kekene ni engeyo gin mo, nongo pe ngeyo gin mo kit ma onongo myero enge kwede.” (1 Kor. 8:2) Waromo tamone ni wangeyo gin mutimme i kare ma tele obedo tye i kin jo aryo moni. Ento wiwa myero opo ni pe wangeyo jami ducu mutimme. Ki bene, pe waromo ngeyo jami ducu madok i kom jo aryo moni ma gitye ki peko i kingi-ni. Luelda myero gugwokke adada ka gitye ka ngolo kop dok pe myero guye goba ki lok awinya i kom gin mutimme. Gin bene pe myero guye lok pa ngat moni pienni en lalonyo. Yecu, langol kop ma Lubanga aye oyero-ni, pe “bingolo kop pi gin ma en neno anena ki wange, nyo kadi ki ngolo kop pi lok ma en winyo awinya ki ite.” (Ic. 11:3,4) Cwiny pa Lubanga aye telo Yecu. Cwiny pa Lubanga bene myero otel luelda.

¹⁴ Mitte ni luelda myero guleg pi cwiny pa Jehovah ma peya gungolo kop ma lubbe ki peko moni. Gin giye ni cwiny pa Lubanga aye otelgi kun gitiyo ki Baibul kacel ki bukke pa “lagwok ot ma lagen dok maryek.”​—Mat. 24:45.

Omyero Wagwok Kuc i Kinwa ki Lubanga

15. Ka Lakricitayo ongeyo pi bal madit mutimme, awene ma en myero otit bot luelda?

¹⁵ Baibul wacciwa ni myero wagwok kuc i  kinwa ki jo mukene. Ento bene waco ni: “Ryeko ma oa ki malo, mukwongo bedo leng, dok bedo me kuc.” (Yak. 3:17) Baibul wacci mukwongo omyero kong wabed leng. Me bedo leng, te lokke ni waye ni Lubanga owacciwa gin maber ki marac kun nongo wakwo i yo ma yomo cwinye. Ka Lakricitayo mo ngeyoni omego nyo lamego mo otimo bal madit atika, en myero ocuk cwiny ngat meno me tito balle bot luelda. (1 Kor. 6:9, 10; Yak. 5:14-16) Ka ngat meno pe otito balle, ci Lakricitayo ma ngeyo bal meno-ni myero otit bot luelda. Ka Lakricitayo meno oling woko pienni mito gwoko kuc i kingi gin ki labal-li, ci en bene nongo tye ka timo bal.​—Levi. 5:1; kwan Carolok 29:24.

16. Gin ango ma wapwonyo ma lubbe ki gin ma Yeko otimo i kom Kabaka Joram?

¹⁶ Yeko otimo gin mo ma nyuto ni timo gin matir pire tek kato gwoko kuc ki ngat mo ma timo bal. Lubanga ocwalo Yeko me miyo pwod bot jo me ot pa Kabaka Akab. Wod pa Akab gin ki Jejebel obedo Kabaka Joram, ma onongo kite rac adada. En oito i gadigadine ocito orwatte ki Yeko ci openye ni: “Ibino ki kuc bo?” Yeko ogamo ni: “Kit kuc ango ma dok bedo tye-ni, ma kun kono tim kwele kwele pa meni Jejebel, ki tim jokjokke dong dwong twatwal[-li]?” (2 Luker 9:22) Ingeye Yeko otelo atumme ci ocelo Joram i adunune. Calo Yeko ma otiyo i kom Joram-mi, luelda bene myero guti i kom labal moni ma pe mito ngut. Gin pe myero guye jo ma pe gimito ngut i kom balgi me bedo tye i kacokke kun gigwoko kuc kwedgi. Luelda ryemogi woko wek kacokke omedde ki bedo ki kuc ki Lubanga.​—1 Kor. 5:1, 2, 11-13.

17. Gin ango ma Lukricitayo ducu myero gutim me gwoko kuc?

¹⁷ Pol kare, bal ma bedo tye i kinwa nongo pe dito. Pi meno, bedo ber ka wanyuto mar kun wiwa wil woko i kom bal matino tino ma utmegiwa gitimo. Baibul waco ni: “Dano ma timo kica bot jo ma gitime marac nongo mito gimare, ento ngat ma wiye bedo ka po i kom bal ma lawote obalo bote keto larem woko ki i kingi.” (Car. 17:9) Ka watimo gin ma Baibul waco, ci wabigwoko kuc i kacokke dok wagwoko wat i kinwa ki Jehovah.​—Mat. 6:14, 15.

Lubanga Miyo Mot Bot Jo ma Gwoko Kuc

18, 19. I yo ango ma Jehovah miniwa mot ka watute me gwoko kuc?

¹⁸ Jehovah miniwa mot ka watute me gwoko kuc. Man oweko watye ki wat macok ki Jehovah dok ki tic me atima me gwoko note me kacokke. Ka wagwoko kuc i kacokke, ci wapwonyo kit me gwoko kuc ki jo ma watito botgi kwena “maber me kuc.” (Ep. 6:15) Watye atera me ‘bedo lukica bot dano ducu’ kun wabedo jo ma ‘diyo cwinygi.’​—2 Tem. 2:24.

¹⁹ Tutewa me gwoko kuc i kare-ni pwonyowa pi anyim. Baibul waco ni Jehovah bicero jo ma kitgi atir wa ki jo ma kitgi pe atir. (Tic. 24:15) Man tere ni Jehovah bicero dano milion mapol. Gibicerogi ki i kabedo mapat pat i but lobo ducu dok nongo gukwo i kare mapat pat, nia i acakki piny. (Luka 11:50, 51) Bibedo twon mot madit atika me pwonyo jo ma kicerogi wek gumar kuc. Pwonye ma watye ka nongone i kare-ni bikonyowa adada i kare meno!

[Lok ma tye piny]

Gin Ango ma Ipwonyo?

• Ngo ma myero watim me gwoko kuc ka wacwero cwiny ngat mo?

• Ngo ma myero watim me gwoko kuc ka ngat mo ocwero cwinywa?

• Ka tele tye i kin jo aryo moni, gin ango ma myero wiwa opo iye?

• Pingo timo gin matir pire tek kato gwoko kuc ki ngat mo ma timo bal?

[Peny me Kwan]

[Cal ma tye i pot karatac 25]

Jehovah maro ngat ma timo kica bot lawote