Jehovah Tika Ngeyo In?
Jehovah Tika Ngeyo In?
“Rwot [Jehovah] ngeyo jo ma gin jone kikome.”—2 TEM. 2:19.
1, 2. (a) Ngo ma onongo Yecu paro matek? (b) Lapeny mene ma myero wapenye kwede?
I NINO mo acel Laparicayo mo openyo Yecu ni: “Cik mene madit makato cik duc?” Yecu odok iye ni: ‘Mar Rwot Lubangani ki cwinyi ducu, ki kwoni ducu, ki tammi ducu.’ (Mat. 22:35-37) Yecu onongo tye ki mar madit adada pi Wonne me polo dok okwo ma lubbe ki lok ma en owaco-ni. Yecu onongo bene paro pi wat ma tye i kin en ki Jehovah, dok onyutu man kun gwoko gennene. Ma en dong cok to, Yecu owaco ni Lubanga ngeyo en calo ngat ma gwoko Cikke. Pi meno, Yecu obedo i mar pa Jehovah.—Jon 15:10.
2 Jo mapol i kare-ni giwaco ni gimaro Lubanga. Labongo akalakala mo wan bene watye i kingi. Ento, lapeny ma pigi tego ma myero wapenye kwede aye: Lubanga tika ngeyo an? Jehovah mono neno an nining? Tika kingeyo an calo danone? (2 Tem. 2:19) Pud dong tye mot madit atika me bedo ka lwodo lok i kom wat man macok ma watye kwede ki Ngat ma loyo polo ki lobo-ni!
3. Pingo jo mukene gibedo ki akalakala ka ada gitye dano pa Lubanga, dok ngo ma bikonyowa me lweny ki kodi tam man?
3 Ento, jo mukene ma margi dit i kom Jehovah pud ginongo tek tutwal me ye ni Lubanga twero ngeyogi maber. Jo mukene gitamo ni konygi pe, pi meno gibedo ki akalakala ka ada gitye dano pa Jehovah. Cwinywa yom atika pien Lubanga nenowa i yo mapat. (1 Cam. 16:7) Lakwena Paulo owaco bot Lukricitayo luwote ni: “Ka ngat mo maro Lubanga, ci Lubanga bene ngeye.” (1 Kor. 8:3) Marri pi Lubanga tye gin ma pire tek ka ce imito ni en onge in. Tam kong: Pingo in i kwano magajin man? Pingo itye ka temme ki tekki me tic pi Jehovah ki cwinyi, kwoni, tammi, ki dong tekoni ducu? Ka ce dong idyere dok bene inongo batija, ngo mumiyo itimo jami magi? Baibul tito ni Jehovah ma ngiyo cwiny dano ducu-ni, aye ye ni jo ma myero gubin bote. (Kwan Aggai 2:7; Jon 6:44.) Pi meno, iromo moko ni itye ka tic pi Jehovah pien en aye onyiki cok bote. En pe bibwoto jone ma en onyikogi cok bote ka ce gumede ki bedo lugen. Lubanga nenogi ni pigi tek, dok marogi atika.—Jab. 94:14.
4. Pingo omyero wamedde ki tamo i kom ngec ma Lubanga ngeyowa kwede-ni?
4 Ka dong Jehovah onyikowa cok bote, omyero waket cwinywa me bedo i marre. (Kwan Juda 20, 21.) Wi opo ni, Baibul nyuto ni watwero a woko ki bot Lubanga. (Ibru 2:1; 3:12, 13) Me labolle, ma peya lakwena Paulo ocoyo lok ma i 2 Temceo 2:19, en oloko i kom Kumenayo gin ki Pileto. Co aryo magi kong gubedo jo pa Lubanga, ento lacen gungak woko ki i lok me ada. (2 Tem. 2:16-18) Wi opo bene ni i kacokke me Galatia, jo mogo ma onongo Lubanga ngeyogi gua woko ki i dero me cwiny ma onongo yam gitye iye-ni. (Gal. 4:9) Omyero water wat ma tye i kin wa ki Lubanga calo gin ma pire tek.
5. (a) Kit ango ma pigi tego bot Lubanga? (b) Labol mene ma wabinenogi?
5 Tye kit mogo kacel ki yo me kwo ma pigi tego bot Jehovah. (Jab. 15:1-5; 1 Pet. 3:4) Niye ki mwolo giweko jo mogo ma Lubanga ngeyogi ginen pat. Kong wanyamu labol pa co aryo wek wanenu yo ango ma kit magi okonyogi kwede me maro Jehovah. Wabineno bene lok i kom laco mo ma otamo ni Lubanga ngeyo en ento pi awaka, opo ni Lubanga dong okwere woko. Watwero nongo pwony mabeco ki i kom lanen magi.
Kwaro Dano ma Gitye ki Niye
6. (a) Abraim onyutu niyene nining i kom cikke pa Jehovah? (b) Jehovah onongo ngeyo Abraim macalo anga?
6 Abraim obedo laco ma “oye lok pa Rwot [Jehovah].” Ki lok ada, en kilwonge ni “kwaro [pa] dano ducu ma giye.” (Acak. 15:6; Rom. 4:11) Pi niye, Abraim oweko pacone, lureme ki dong jamine ci ocito i lobo pa lurok. (Acak. 12:1-4; Ibru 11:8-10) I nge mwaki mapol, niye pa Abraim onongo pud tye matek. Man onen ka maleng i kare ma en “otyero Icaka macalo gitum” pi winyo cik pa Jehovah. (Ibru 11:17-19) Abraim onyutu niyene i kom cikke pa Jehovah, pi meno Lubanga oneno en calo ngat ma pire tek; Lubanga onongo ada ngeyo Abraim. (Kwan Acakki 18:19.) Jehovah onongo pe ngeyo keken ni Abraim tye ento en omaro Abraim macalo larem.—Yak. 2:22, 23.
7. Ngo ma myero wange ma lubbe ki cobbe pa cikke pa Jehovah, dok man ogudo Abraim nining?
7 Omyero wange ni pi kare me kwone ducu, Abraim pe obedo ki ginaleya i lobo ma kicikke pire. En bene pe oneno ka likwayone nya doko “ma rom ki kweyo ma i dog nam.” (Acak. 22:17, 18) Kadi bed cikke magi pe gucobbe i kare pa Abraim, en obedo ki niye matek i kom Jehovah. En onongo ngeyo ni ka Lubanga ocikke, nongo dong rom ma ocobo. Ada, Abraim otyeko kwone ducu ma lubbe ki niyene. (Kwan Ibru 11:13.) Jehovah tika ngeyowa ni watye ki niye calo pa Abraim-mi?
Kuro Jehovah Tye Lanyut me Niye
8. Miti ango mupore ma jo mukene gimito ni ocobbe?
8 Twero bedo ni watye ki miti mogo ma wamito ni gucobbe. Nyom, nywalo lutino, ki dong yot kom gitye miti me anywali dok gupore. Ento bot jo mapol inongo ni mitigi mogo pe twero cobbe. Ka ce tye kit meno botwa, ci kit ma watero kwede miti meno twero bedo lapim me niyewa.
9, 10. (a) I yo ango ma jo mukene gitemme kwede me cobo mitigi? (b) In itamo ningo i kom cobbe pa cikke pa Lubanga?
9 Tye tim me mingo me temo cobo miti magi i yo ma pe nyutu ryeko ma a ki bot Lubanga. Man balo kwo pa ngat moni i yo me cwiny. Me labolle, jo mukene guyero yo me cango two ma pe rwatte ki tira pa Jehovah. Jo mogo gunongo dog tic ma terogi ka mabor ki jo me odigi nyo kacokke. Nyo mito ngat mo ma pe tye lakricitayo kono? Ka Lakricitayo mo yero kodi kwo magi, tika ada en nongo tye ka tute wek Jehovah onge en? Jehovah mono onongo biwinyo nining ka Abraim ool woko ki kuro cobbe me Cikkene? Ka Abraim onongo ocak timo jamine mogo kun miyo nyinge ywek ma ka kuro cikke pa Jehovah kono? (Por ki Acakki 11:4.) Onongo kono Jehovah omedde ki ngeyo Abraim?
10 Miti ango ma itye ka kuro ni gucobbe? Niye ni mono tye matek me kuro Jehovah, ngat ma cikke me cobo mitini ducu i yo mupore? (Jab. 145:16) Kit macalo otimme kwede i kom Abraim, cikke mogo pa Lubanga pe twero cobbe oyot kit ma wamito kwede. Ento pud inongo ni pire tek bot Jehovah ka wadongo niye macalo pa Abraim dok watimo tic ma rwatte ki niye meno. Ka watimo kumeno wabinongo bakacic maber atika.—Ibru 11:6.
Apokapoka i Kin Mwolo ki Awaka
11. Mot ango ma Kora obedo kwede, man onyutu ni cwinye onongo tye nining i kom Lubanga?
11 Apokapoka madit tye i kin Moses ki Kora ma lubbe ki lok me nyutu woro pi yub pa Lubanga ki dong moko tamme. Kit ma gin gutimo kwede jami ogudu kit ma Jehovah onongo nenogi kwede. Kora obedo Lalevi ma a ki i doggola pa Kokat, dok olimo mot mapol, i kin mot magi nen calo tye iye neno kit ma kilaro rok me Icrael ki i Nam Makwar, miyo cwak bot Jehovah pi ngolo kop i kom Luicrael ma gin pe luwiny ite Got Cinai, ki dong bedo ki tic me tingo canduk me gicikke. (Nia 32:26-29; Wel 3:30, 31) En onongo obedo lagen bot Jehovah pi mwaki mapol dok bene i kema pa Luicrael, dano mapol onongo gilubo lanene.
12. Kit ma kinyutu kwede i pot karatac 31, awaka ogudu kit ma Lubanga ngeyo kwede Kora nining?
12 Ento, i kare ma rok me Icrael onongo gitye i yo me cito i Lobo ma Kiciko Pire, Kora owinyo gin mo ma en otamo ni nen calo tye bal i yub pa Lubanga. Lacen co 250 ma gin lutel i kin rok meno gukati ka tyelo kor Kora wek gikel alokaloka. Kora ki jo mukene-ni nen calo onongo gitye agonya pi wat ma tye i kingi ki Jehovah. Gin guwaco bot Moses ni: “Mewu dong okato kare! Pien jo magi ducu gin lwak maleng, gin ducu ki acel acel Rwot [Jehovah] bene tye i kingi.” (Wel 16:1-3) Man pud dong obedo awaka ki tekcwiny marac ya! Moses owaco botgi ni: “Rwot [Jehovah] aye binyuto danone.” (Kwan Wel 16:5.) Ma peya orwone otum, Kora ki jo ducu ma gutyelo kore i jemo meno guto woko.—Wel 16:31-35.
13, 14. I yo mene ma Moses onyutu kwede mwolone?
13 Pat mada ka i poro ki Moses ma onongo “mwol makato dano ducu ma onongo yam gitye i wi lobo-ni.” (Wel 12:3) En onyutu mwolone kun moko liking i lubu tira pa Jehovah. (Nia 7:6; 40:16) Pe tye gin mo ma nyutu ni Moses obedo ki akalakala i kom kit ma Jehovah timo ki jami nyo cwinye ocwer pi lubu yo pa Jehovah. Me labolle, Jehovah omiyo cik ma lubbe ki yubo ot me kema paka wa i jami mogo matino calo, rangi kom uci ki wel wang jarara ma myero obed i kom kema. (Nia 26:1-6) Ka ce laneno i dul pa Lubanga mini ngec me timo jami i yo matut mukato kare woko, i cawa mukene twero cwero cwinyi. Jehovah kono ki tungcel tye laneno ma pe ki roc, miyo tic dok geno luticce. Ka en miyo ngec matut, en timo meno pi tyen lok matir. Myero inge ni Moses pe okeco i kom Jehovah pi miyo bote ngec matut, calo iwacci Lubanga tye ka diye nyo genge me tic ki dirone nyo bedo agonya. Ma ka meno, Moses oneno ni lutic “gutimo kit meno” i lubu tira pa Lubanga. (Nia 39:32) Man pud dong onyuto mwolo ya! Moses oniang ni meno obedo tic pa Jehovah dok ni en etye gin tic mamwa ma kitye ka tic kwede wek tic meno ocobbe.
14 Mwolo pa Moses bene onen i kare ma en okemme ki kare mogo maraco ma ogudu kwone. I nino mo acel, Moses pe obedo ki cwiny me jukke ken dok bene pe oketo deyo i kom Lubanga i kare ma lwak gitye ka nguru. Macalo adwogine, Jehovah owaco bot Moses ni pe bitero lwak i Lobo ma Kiciko Pire. (Wel 20:2-12) Moses gin ki ominne Aron onongo dong guciro lok mapol pa Luicrael pi mwaki mapol. Pien Moses obalo i nino meno, en pe dong bineno gin ma en obedo ka kurone pi kare malac! Moses odok iye nining? Kadi bed wangeyo ni Moses nen calo cwiny ocwer, en oye ki mwolo tam ma Jehovah omoko. En ongeyo ni Jehovah tye Lubanga ma kite atir dok pe ngolo kop alenga. (Nwo. 3:25-27; 32:4) Ka itamo i kom Moses, mono pe ineno en calo ngat ma Jehovah ngeyo?—Kwan Nia 33:12, 13.
Minne Bot Jehovah Mito Mwolo
15. Ngo ma watwero pwonyone ki i cwiny me awaka pa Kora ni?
15 Kit ma watero alokaloka ma timme i kacokke pa Lukricitayo i lobo ducu kacel ki tam ma luelda gimoko gudo kit ma Jehovah ngeyowa kwede. Kora ki jone-ni gupokke woko ki bot Lubanga pi tekcwiny mukato kare, awaka, ki dong bedo labongo niye. Kadi bed Kora onongo neno ni Moses aye moko tam nino ki nino, Jehovah gire aye onongo tye ka tiro rok meno. Kora pe obedo ki neno mupore i kom ada meno ci dong ingeye en okwero nyutu gennene bot jo ma Lubanga onongo tye ka tic kwedgi. Onongo twero bedo me ryeko bot Kora me kuro Jehovah wek omi niango matir nyo alokaloka ka onongo ada mitte. I agikkine, Kora orwenyo rekod ducu me gwoko gennene pi ticce me awaka!
16. Lubu lanen me mwolo pa Moses twero gudu kit ma Jehovah ngeyowa kwede nining?
16 Labol man tye me ciko luelda kacel ki jo me kacokke i kare-ni. Kuro Jehovah ki lubu tirane ma wok ki bot jo ma kicimogi me konyo tela mito mwolo. Tika watye ka nyutu ni wamwol dok wawor calo Moses? Mono waromo nyutu ni waniang tic ma jo ma tye ka konyo tela i kinwa gitye kwede, kun wajolo tira ma giminiwa? Tika watwero loyo tamwa kekenwa ka gutimo jami mogo ma pe wamito? Ka tye kit meno, ci Jehovah bene bingeyowa. Mwolo kacel ki minne ken bikonyowa me maro Jehovah.
Jehovah Ngeyo Jone Kikome
17, 18. Ngo ma twero konyowa wek wamedde ki bedo ma nongo Jehovah ngeyowa?
17 Adwogi mabeco bino ka watamo i kom jo ma Jehovah nyikogi cok bote dok ngeyogi maber. Abraim gin ki Moses gubedo ki roc dok onongo gitimo bal marom arom kwedwa. Ento man pe ogengo Jehovah me ngeyogi macalo jone kikome. Kitungcel lanen pa Kora nyutiwa ni watwero a woko ki bot Jehovah, dok bene wakeng cwak ma mege ma miyo en pe ngeyowa. Omyero wan ki acel acel wapenye ni: ‘Jehovah mono neno an nining? An atwero pwonyo gin ango ki i lanen magi me Baibul?’
18 In itwero nongo kwe cwiny madit atika i nge ngeyo ni Jehovah kara neno jo ma gin lugen ma en oye ni gubin bote calo jone kikome. Omyero i medde ki dongo niye, mwolo, ki dongo kit mogo ma gikonyi me moko liking i kom Lubangani. Bedo ma Jehovah ngeyowa tye mot mo maber atika dok miyo wayeng ki kwo i kare-ni, kun wakuro kwede mot mapol mamwonya i anyim.—Jab. 37:18.
Wi Tika Po?
• Wat ango ma itwero bedo kwede i kin in ki Jehovah?
• In itwero lubu lanen me niye pa Abraim nining?
• Gin ango ma watwero pwonyo ki bot Kora gin ki Moses?
[Peny me Kwan]
[Cal ma tye i pot karatac 29]
Calo Abraim, wan tika watye ki niye ni Jehovah bicobo cikkene ducu?
[Cal ma tye i pot karatac 31]
Kora pe ominne ki mwolo me lubu tira
[Cal ma tye i pot karatac 32]
Jehovah tika ngeyo in calo ngat ma minne ki mwolo ka lubu tira?
