“Kweyo Cwiny Jo Ma Kumo”
“Kweyo Cwiny Jo Ma Kumo”
“[Jehovah] dong owira woko . . . pi kweyo cwiny jo ma kumo.”—IC. 61:1, 2.
1. Gin ango ma Yecu otimo bot jo ma kumo, dok pingo?
YECU KRICITO owaco ni: “Camma en tiyo gin ma ngat ma oora mito, ki cobo ticce.” (Jon 4:34) I kare ma tye ka tiyo tic ma Lubanga omiye, Yecu onyutu kit mabeco pa Wonne. I kine tye mar madit ma Jehovah tye kwede pi dano. (1 Jon 4:7-10) Lakwena Paulo oniang yo acel ma Lubanga nyutu kwede marre i kare ma en olwongo Jehovah ni “Lubanga ma kweyo cwiny dano ducu.” (2 Kor. 1:3) Yecu onyutu mar ma kit meno i kare ma en ocobo jami ma kicoyo i buk pa lanebi Icaya. (Kwan Icaya 61:1, 2.) I kare ma Yecu tye i kacokke i Najaret, en okwano ki i buk pa lanebi Icaya ci otiyo ki lokke i kome kekene. (Luka 4:16-21) I ticce me pwony lung, Yecu okweyo cwiny jo ma kumo i yo me mar, ocuko cwinygi dok ominigi yomcwiny.
2, 3. Pingo mitte ni lulub kor Kricito gulub lanene me kweyo cwiny jo mukene?
2 Dano ducu ma gilubu kor Yecu myero bene gulub lanenne kun gikweyo cwiny jo ma kumo. (1 Kor. 11:1) Paulo owaco ni: “Wucuk cwinywu kekenwu, . . . ngat acel acel okony lawote me dongo.” (1 Tec. 5:11) Mitte tutwal ni myero wakwe cwiny jo mukene, pien dano tye ka kwo i kare ma ‘piny tye marac.’ (2 Tem. 3:1) Jo mapol ma cwinygi tye atir i wi lobo-ni lung gikwo i kin jo ma lokgi ki jami ma gitimo kelo kumo, arem cwiny, ki par.
3 Kit ma Baibul otito kwede con, i kare man me agikki me lobo-ni, jo mapol “[gi]maro komgi kekengi kun gibedo lumar lim, luwakke, lucac, lunywar jo mukene. Pe giwinyo lunyodogi, pe gimiyo pwoc mo, gibedo jo ma pe leng. Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitigi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubanga.” Kodi kit magi dong tye marac i kare-ni kato kare mukato angec, pien ‘jo maraco ki jo ma lugoba gumedde gudoko rac mukato kare.’—2 Tem. 3:2-4, 13.
4. Wi lobo me karewa-ni tye nining?
4 Jami magi ducu pe myero omi wabed ki ur, kit macalo Lok pa Lubanga nyutu ka maleng ni “lobo ducu tye i te loc pa Larac.” (1 Jon 5:19) “Lobo ducu” kwako lok me loc lobo, dini, cato wil kacel ki yo mapol mapat pat me poko ngec ma pe tye kakare-gu. Labongo akalakala, Catan Larac-ci kilwongo ni “lalo lobo” ki bene “lubanga me lobo man.” (Jon 14:30; 2 Kor. 4:4) Wi lobo-ni lung tye ka doko rac medde ameda pien Catan tye ki akemo madit, pien en ngeyo ni karene odong manok. (Yabo. 12:12) Pud dong kweyo cwiny adada me ngeyo ni kare ma Lubanga okanyo kwede ki tim pa Catan kacel ki yubbe maraco-ni dong cok o i agikkine, dok pyem ma Catan okelo i kom twero me loc pa Jehovah bigik woko!—Acak., cura 3; Yubu, cura 2.
Kwena Maber-ri Kitye ka Titone i Wi Lobo Ducu
5. Lok ma kiloko con ma lube ki tito kwena tye ka cobbe nining i kare man me agikki-ni?
5 I kare man ma pud dong kwo tye matek loyo i tekwaro pa dano-ni, gin ma Yecu owaco-ni tye ka cobbe. En owaco ni: “Dong lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Mat. 24:14) Tic me miyo caden i kom Ker pa Lubanga i wi lobo ducu-ni tye ka medde ameda. I kare-ni Jehovah tye ki Lucadenne ma welgi kato 7,500,000 kulu, ma ginonge i kacokke makato 107,000 i wi lobo ducu dok gitye ka tito kwena me Ker pa Lubanga, kit ma Yecu oketo Ker-ri obedo wi lokke madit me pwony ki tito kwena. (Mat. 4:17) Macalo adwogi me tito kwena i kare-ni, kwe cwiny madit kitye ka miyone bot jo ma kumo. Wangeyo man pien mwaki aryo mukato cokcok-ki, wel dano 570,601 gunongo batija me doko Lucaden pa Jehovah!
6. Itamo ningo i kom kit ma ticwa me tito kwena tye ka dongo kwede?
6 Ka ma rwom me tic man me tito kwena-ni dong odongo oo iye twero miyo wabedo ki pwoc, pien Lucaden pa Jehovah i kare-ni gigonyo dok gipoko bukke ma jenge i Baibul i leb makato 500 kulu. Gin ma kit man peya kineno i tekwaro pa dano! Kadi bed gikwo i lobo ma tye i te loc pa Catan, jo pa Jehovah gitiyo ki mit kom Bote dok welgi tye ka medde ameda. Labongo tira ki kony pa cwiny pa Lubanga, onongo gin macalo man pe twero timme. Pien lok me kwena maber-ri dong kitye ka titone i wi lobo ducu, kwe cwiny ma Ginacoya miyo tye ka yomo wa cwiny jo ma kumo ma gijolo kwena me Ker-ri ento pe luye luwotwa keken.
Kweyo Cwiny Luye Luwotwa
7. (a) Pingo omyero pe watam ni i kare-ni Jehovah bikwanyo jami ducu ma kelo par? (b) Wan watwero ngeyone nining ni twere botwa me ciro can ki aunauna?
7 I lobo man mupong ki jami maraco ki deno can-ni, kadi ningo wang ma wawok ki i kwo mogo ma kelo par. Omyero pe watam ni i kare-ni Jehovah bikwanyo jami ducu ma kelo cwer cwiny nyo kumo, ento nio wang ma en ojwero yub me lobo-ni. Kitungcel, ka watye kawok ki i auna ma kitito pire con, ci gwoko genewa macalo lucwak twero me loc pa Jehovah bene bedo ka mading. (2 Tem. 3:12) Ento kikony kacel ki kwe cwiny ma Wonwa me polo miniwa, wan bene watwero bedo calo Lukricitayo ma kiwirogi i kare macon i Tecalonika ma gudeno can ki aunauna ento guciro ki niye.—Kwan 2 Tecalonika 1:3-5.
8. Labol mene ma gitye i Ginacoya ma gimoko ni Jehovah kweyo cwiny luticce?
8 Wangeyo labongo akalakala ni Jehovah kweyo cwiny luticce i kare ma mitte. Me labolle, i kare ma kwo pa lanebi Elia onongo tye ka mading pi tim pa Daker Jejebel, lanebi-ni orwenyo tekcwinye dok oringo woko, owaco bene ni emito ni eto woko. Ento ma ka juko Elia, Jehovah okweyo cwinye dok omine tekcwiny me medde ki ticce macalo lanebi. (1 Luker 19:1-21) Gin mukene ma konyowa me niang ni Jehovah kweyo cwiny jone twero nen i kwo pa Lukricitayo me kacokke me cencwari me acel. Me labolle, wakwano pi kare mo ma “lwak muye Yecu ma i Judaya ducu ki Galilaya ki Camaria dong gubedo ki kuc, gudongo gucung matek.” Man otimme, “kun gilworo Rwot [Jehovah] i kwogi me nino ducu. Cwiny Maleng obedo ka jingo [kweyo] cwinygi, welgi bene medde ameda.” (Tic. 9:31) Watye bene ki pwoc ni wan watwero nongo ‘kwe cwiny pa cwiny maleng’!
9. Pingo pwonyo lok i kom Yecu twero kweyo cwinywa?
9 Macalo Lukricitayo wan dong kikweyo cwinywa pien wapwonyo lok i kom Yecu Kricito kun bene walubu lanenne. Yecu owaco ni: “Wubin bota, jo ducu muol ki ma yec onurowu, ci abimiyo wuywe. Wuting yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu. Pien yatta yot, ki yecca bene pe pek.” (Mat. 11: 28-30) Pwonyo kit ma Yecu otero kwede dano i yo maber ki dong lubu lanene tye me kony tutwal ma weko wawinyo maber ber olo ki i cwer cwiny ma gwok nyo watye kwede.
10, 11. I kacokke, angagi ma gitwero kweyo cwiny dano?
10 Lukricitayo luwotwa bene gitwero kweyo cwinywa. Me labolle, tam kong kit ma luelda ma i kacokke gikonyo kwede jo ma gitye ki cwer cwiny. Lakwena Yakobo ocoyo ni: “Tye ngat mo i kinwu ma kome lit [i yo me cwiny]? Myero en olwong ludongo me lwak pa Lubanga, wek guleg Lubanga pire.” Adwogine bibedo ningo? “Lega ma niye tye iye bicango latwo, Rwot [Jehovah] bitinge malo; ka ce onongo yam otimo bal mo, ci gibitime iye kica.” (Yak. 5:14, 15) Jo mukene me kacokke bene gitwero kweyo cwiny.
11 Pol kare mon ginongo yot tutwal me tito pekogi bot mon luwotgi. Tutwalle lumege ma guteggi i mwakagi ki dong i yo me cwiny gimiyo tam mabeco bot lumege matino. Mon magi ma guteggi dok gitye Lukricitayo-ni mogo nongo dong guwok ki i peko ma kit meno. Kica ma gitye kwede kacel ki kit mogo mabeco ma mon tye kwede twero bedo me kony. (Kwan Tito 2:3-5.) Luelda ki jo mukene bene myero ‘gucuk cwiny jo ma cwinygi otur’ ma gitye i kinwa. (1 Tec. 5:14, 15) Omyero wiwa opo bene ni Lubanga “kweyo cwinywa i can ducu ma walimo, wek wan bene wabed ki twero me kweyo cwiny jo ma tye ki can mo mapatpat.”—2 Kor. 1:4.
12. Pingo pire tek ni myero wabed tye i cokke pa Lukricitayo?
12 Yo acel ma pire tek me nongo kwe cwiny aye me bedo tye i cokke pa Lukricitayo, ka ma nyamo lok me Baibul cuko iye cwinywa. Wakwano ni Juda gin ki Cira “gucuko cwiny utmego ki lwak lok mapol ma miyogi teko.” (Tic. 15:32) Ma peya cokkewa ocakke nyo i nge tyekone, boko lok ma dongowa i yo me cwiny nongo okur ma pe twere i kin jo me kacokke. Pi meno, kadi bed watye ka deno can, pe myero wakwer o i kin dano, pien ka watimo kumeno ci bakacic mo pe ma wanongo. (Car. 18:1) Ma ka meno, ber ka walubo tira ma cwiny maleng oweko Lakwena Paulo ocoyo ni: “Myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, kit macalo jo mogo dong guloko odoko kitgi-ni, ento myero wacuko cwinywa kekenwa, makatone kit macalo waneno Nino maca dong tye ka nyiko cok-ki.”—Ibru 10:24, 25.
Nong Kwe Cwiny ki i Lok pa Lubanga
13, 14. Tit kong kit ma Ginacoya twero kweyo kwede cwinywa.
13 Kadi kono bed ni watye Lukricitayo ma dong wanongo batija nyo pud watye ka cako pwonyo lok i kom Lubanga ki yubbe, watwero nongo kwe cwiny madit ki i Lok pa Lubanga. Paulo ocoyo ni: “Gin ducu ma yam gicoyo i kare macon ca onongo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.” (Rom. 15:4) Ginacoya twero kweyo cwinywa dok miyo wabedo jo ‘muteggi, ma bene wayubbe i yo ducu, ma waromo tiyo kit tic mo ducu maber.’ (2 Tem. 3:16, 17) Ngeyo lok ada i kom yub pa Lubanga kun wabedo ki gen matir pi kare me anyim bikeliwa kwe cwiny. Pi meno, omyero dong wati maber ki Lok pa Lubanga kacel ki bukke ma gijenge i Baibul ma gitwero kweyo cwinywa dok gikeliwa adwogi mabeco i yo mapol.
14 Yecu onyutiwa lanen maber i tic ki Ginacoya me miyo ngec ki dong kweyo cwiny jo mukene. Me labolle, i kare ma en onyute i nge cerre, en ‘oyabo ginacoya’ bot lupwonnyene aryo. I kare ma en tye ka lok kwedgi, lokke odonyo matut i cwinygi. (Luka 24:32) Pi lubu lanen maber pa Yecu, lakwena Paulo ‘olaro lok ki dano i kom lok ma i ginacoya.’ I Berea, jo ma gubedo ka winyo lokke “gujolo lok ma gitito botgi ki cinggi aryo, kun gingiyo ginacoya ma yam gicoyo nino ducu.” (Tic. 17:2, 10, 11) Pud dong tye gin mupore ya ka wakwano Baibul nino ducu, kun wanongo adwogi maber ki i bukke ma kiyubogi pi Lukricitayo, wek okeliwa kwe cwiny ki gen i kare man mupong ki ayelayela-ni!
Yo Mogo Mapat me Kweyo Cwiny Jo Mukene
15, 16. Jami mene ma watwero timogi me konyo ki dok kweyo cwiny Lukricitayo luwotwa?
15 Watwero miyo kony kun wakweyo cwiny Lukricitayo luwotwa i yo mapol ma konyo. Me labolle, watwero konyo jo muteggi nyo Lukricitayo luwotwa ma komgi lit ka wacito wawilo botgi cam i cuk. Watwero konyo jo mukene ki timo tic mapat pat, man nyutu ni wan ki acel acel watamo pigi. (Pil. 2:4) Gwok nyo bene watwero pwoyo luye luwotwa pi kit mabeco ma gitye kwede calo mar, tekcwiny ki dong niyegi.
16 I tutewa me kweyo cwiny jo muteggi, watwero limogi kun watero itwa me winyo ka gititiwa gin mutimme i kwogi i kare mukato angec ki mot ma gunongo i tic pa Jehovah. Lokgi-ni bicuko dok kweyo cwinywa bene! Watwero kwano Baibul nyo bukke ma gijenge i Baibul bot jo ma walimogi. Watwero bene kwano kacel kwedgi pwony ma kibinyamo i cokke me Kwano Wi lubele pi cabit moni nyo Cokke me kwano Baibul. Watwero neno kacel kwedgi DVD ma wi lokke kikwanyo ki i Ginacoya. Dok bene, waromo tito lok ma cuko cwiny i kom jami mogo mutimme dok ginonge i bukkewa.
17, 18. Macalo lutic ma lugen pa Jehovah, pingo watye ki gen ni en bityelo korwa dok kweyo cwinywa?
17 Ka wangeyo ni omego nyo lamego mo mito kwe cwiny, waromo lega pire kun walwongo nyinge. (Rom. 15:30; Kol. 4:12) Ka watute ki peko dok wayelle ki tekowa ducu me kweyo cwiny jo mukene, waromo bedo ki tekcwiny kacel ki niye calo pa laco jabuli ma owero ni: “Kel pekoni ducu bot Rwot [Jehovah], ci en bikonyi; en pe biye ni myero gidir dano ma kite atir woko wacel.” (Jab. 55:22) Ki lok ada, Jehovah bibedo tye kare ducu me kweyo cwinywa dok tyelo korwa macalo wan luticce ma lugen.
18 Lubanga owaco bot jo ma onongo giwore i kare macon kit man: ‘An—aye abedo ngat ma kweyo cwinywu.’ (Ic. 51:12) Jehovah bitimo kit meno bene botwa dok bimiyo cwake i kom jami mabeco ma watimogi kacel ki lok dogwa ka wakweyo cwiny jo ma kumo. Kadi bed watye ki gen me kwo i polo nyo i lobo, wan ducu ki acel acel watwero nongo kwe cwiny ki i lok pa Paulo bot Lukricitayo luwote ma kiwiro ni: “Kombeddi Rwot Yecu kikome, ki Lubanga Wonwa ma marowa dok okweyo cwinywa matwal ki gen maber ma bino pi kica, okwe cwinywu, omokwu matek i tic ki i lok ducu mabeco.”—2 Tec. 2:16, 17.
Wi Tika Po?
• Ticwa me kweyo cwiny jo ma kumo dong odongo oo lakwene?
• Jami mene ma watwero timogi me kweyo cwiny jo mukene?
• Labol mene ma gitye i Ginacoya ma gimoko ni Jehovah kweyo cwiny luticce?
[Peny me Kwan]
[Cal ma tye i pot karatac 26]
In tika inywako i tic me kweyo cwiny jo ma kumo?
[Cal ma tye i pot karatac 28]
Jo matino wa ki madito gitwero bene cuko cwiny
