Lapeny pa Lukwan Bukkewa

Ngo ma myero atim ka atye ki lapeny i kom gin mo ma akwano i Baibul nyo amito nongo tam mupore ma romo konya ki i pekona?

Carolok 2:1-5 cuko cwinywa ki acel acel me ‘medde kiyenyo’ niango ki ngec kit macalo wayenyo kwede “lonyo ma gikano.” Man tere ni omyero waket cwinywa ki kerowa ducu kayenyo lagam pi lapeny ma wanongo ki i Baibul. Watwero timo man nining?

Buk me Benefit From Theocratic Ministry School Education, pot karatac 33 nio wa 38, nyutiwa kore ki kore “Kit me Kwedo Lok” kun watiyo ki bukke ducu ma “lagwok ot ma lagen dok maryek” ocoyo. (Mat. 24:45) Pot karatac 36 nyutu kit me tic ki Watch Tower Publications Index, kopi acel acel nongo kipoko iye i pwony mapat pat ki ginacoya ma kiryeyogi. Man miyo itiyo ki nyig lok ma pigi tego nyo tyeng me Baibul, dok itwero nongo iye bukke mapol ma kireyogi i te pwony ma myero iti kwedgi. Myero pe irune ka itye ka yenyo lagam nyo tira ma imito. Wi myero opo ni itye ka yenyo “lonyo ma gikano,” man tero cawa dok mito tute.

Ngene bene ni, tye wi pwony mogo ki ginacoya ma bukkewa pe loko i komgi. Dok bene ka waloko i kom ginacoya moni, pe tere ni nongo wagamo lapenyi kikome. Bene dul mogo i Baibul twero kelo lapeny i wiwa pien nongo pe kiketo gin mutimme kore ki kore i Ginacoya. Pi meno, pe watwero gamo oyot lapeny ducu ma kipenyo. Ka tye kit meno, omyero pe wabed ka tamo pi jami ma pe ki twero miyo lagamme, man gengowa pe me “kelo tam atata, [ma] pe konyo yub pa Lubanga ma ocung i kom niye.” (1 Tem. 1:4; 2 Tem. 2:23; Tito 3:9) Kadi wa jang gang kal nyo gang kal madit pe romo miyo lagam pi lapeny ducu ma pe kinyamogi i bukkewa. Myero cwinywa obed yom ni Baibul tye ki ngec muromo ma twero konyowa me kwo, ento pe miyo ngec ducu i kom gin moni wek wabed ki niye matek i kom Lubanga.​—nen pot karatac 185 nio wa i 187 i buk me Draw Close to Jehovah.

Ngo ma itwero timone ka dong i yenyo lagam ducu ma itwero pi gin mo ma gudo kwoni dok pe inongo ma twero konyi? Bed agonya me penyo Lakricitayo mo keken muteggi i yo me cwiny, tutwalle luelda. Gitye ki ngec maber i kom Baibul ki jami ma gukato ki iye i kwogi calo Lukricitayo. Kony mupore ma gimini twero rwatte ki pekoni nyo tam ma imito mokone, pien gingeyi maber, gicok kwedi dok bene gingeyo kit me kwoni. Dok wi myero pe owil me lega bot Jehovah pi pekoni kun ipenyo pi tira ma aa ki bote wek en okonyi me moko tammi kun tiyo ki cwiny mere maleng, pien “Rwot [Jehovah] aye ma miyo ryeko; . . . ki niang.”​—Car. 2:6; Luka 11:13.