Tam Me Ryeko I Kom Nyom Ki Bedo Labongo Nyomme

“Awaco lok man . . . wek omi gin ducu owot kakare, cwinywu bene obed i kom Rwot, ma gin mo pe ywayo tamwu tero woko cen.”​—1 KOR. 7:35.

1, 2. Pingo myero iyeny tira me Baibul i kom nyom ki bedo labongo nyomme?

 TYE jami manok keken aye ma kelo yomcwiny, cwercwiny nyo par, makato kit ma watero kwede ngat ma pe obedo laco nyo dako calo wan. Mitte ni omyero watii ki tira pa Lubanga wek water lok man i yo mupore, ento bene tye tyen lok mukene ma weko watimo man. Lakricitayo ma nongo ber bote me bedo ma pe enyomme twero nongo ni jo me pacogi nyo luwote gitye ka diye me nyomme. Twero bedo ni ngat mukene mito nyom ento nongo peya onongo ngat mupore pire. Mogo gimito tira ma twero konyogi wek giyubbe me cobo ticgi macalo wegi odi nyo megi odi. Lukricitayo ma gibedo labongo nyomme ki ma gunyomme ducu giwok ki i atematema me tim me buto.

² Lok man pe gudu bedowa ki yomcwiny kenken, ento gudu wa watwa ki Lubanga Jehovah. I cura me 7 i waragane bot jo Korint, Paulo omiyo tira i kom nyom ki bedo labongo nyomme. Mitine onongo tye me cuko cwinygi ‘wek gumi gin ducu owot kakare, cwinygi bene obed i kom Rwot, ma gin mo pe ywayo tamgi tero woko cen.’ (1 Kor. 7:35) Ka kinyamo tira pa Paulo i kom lok magi ma pigi tego-ni, temme me neno kit kwo ma itye iye​—kono inyomo nyo pe​—macalo yo me medo ticci pi Jehovah.

Tam ma Tek ma Myero Ngat Acel Acel Omoki

3, 4. (a) Peko ango ma twero bino ka dano gitamo tutwal i kom laremgi nyo watgi mo ma peya onyomme? (b) Tira pa Paulo-ni twero konyo ngat moni nining me bedo ki neno mupore i lok me nyom?

³ Calo Lujudaya me cencwari me acel, i kare-ni tekwaro mapol keto pi nyom malo calo gin ma pire tek loyo dok maber me atima. Ka latin awobi nyo anyaka okato mwaka moni me nyom, luwote ki wadine gitwero cako tamo ni myero gimiye tam. I lokgi, gitwero mine tam ni obed ki mit kom i yenyo ngat mo me anyoma. Gitwero wacce ngat mupore me anyoma. Gitwero bene tic ki diro me kubo jo aryo ma peya gunyomme wek gucak winye. Kodi tim man pol kare kelo lewic, balo lirem, dok cwero cwiny dano.

⁴ Paulo pe odiyo jo mukene me nyomme nyo me bedo labongo nyomme. (1 Kor. 7:7) Kadi bed dakone pe, en onongo yomcwiny i tic pi Jehovah, dok en oworo twero pa jo mukene ma gimito nyomme. I kare-ni, Lakricitayo acel acel tye ki twero me moko tamme me nyomme nyo pe. Jo mukene pe myero odigi me timone.

Tii ki Kwoni Maber ma Peya i Nyomme

5, 6. Pingo Paulo owaco ni bedo ma peya inyomme ber makato?

⁵ Gin ma pire tek i lok pa Paulo bot jo Korint obedo tam maber ma en omiyo i kom  bedo labongo nyomme. (Kwan 1 Jo Korint 7:8.) Kadi bed ni Paulo onongo pe onyomo, en pe okette malo bot jo ma gunyomme, kit ma padi me dini pa Lukricitayo ata-ni gikette kwede. Ma ka meno, lakwena Paulo otito pi mot mapol ma lutit kwena ma peya gunyomme gitye kwede. Mot ango?

⁶ Lakricitayo ma peya onyomo twero ye me timo tic mogo i tic pa Jehovah, ma nongo twero bedo tek bot ngat ma onyomme. Paulo onongo mot me tic calo ‘lakwena bot lurok.’ (Rom. 11:13) Kwan Tic pa lukwena cura 13 nio i 20, ci inen tic ma en otimo ki lumiconari luwote kit ma gucako kwede tito kwena i wang tic mapol kun gicako kacokke mapol ka patpat. I ticce me pwony, Paulo ociro peko mapat pat ma jo manok keken i kare-ni gitwero kato ki iye. (2 Kor. 11:23-27, 32, 33) Ento pekki ma en ociro i konyo jo mukene me doko lupwonnye-ni pe oto nono. (1 Tec. 1:2-7, 9; 2:19) Paulo onongo pe romo timo jami ma en otimo-ni ka onongo en onyomme.

7. Mi kong lanen pa Lucaden ma peya gunyomme ma gutiyo ki karegi me tiyo tic mapol i tic me Ker-ri.

⁷ Lukricitayo mapol ma peya gunyomo gitiyo ki karegi me tiyo tic mapol i tic me Ker-ri. Cara gin ki Limbania gitye painia ma peya gunyomme dok gikwo i lobo Bolivia, gucito i caro mo ma jone onongo pe guwinyo lok me kwena maber pi mwaki mapol. Tika pe pa mac alektwic obedo peko botgi? Guwaco ni: “Redio ki TV-gu pe, man oweko pe tye gin mo ma kwanyo tam pa dano ki i kwan.” Jo mogo me caro man gukelo bukke ma onongo pud gitye ka kwanone ma Lucaden pa Jehovah gugoyo wacon, ci gunyutu bot painia magi. Lumege-ni onongo pe giromo wot i doggola ducu i wang tic meno pien gunongo-ni dano gimito winyo lok me kwena maber-ri i odi ducu. Dako mo ma dong otii owaccigi ni “agikki nen calo dong cok tutwal pien Lucaden pa Jehovah tin dong guo botwa.” I nge kare manok keken jo mogo me caro meno gucako wot i kacokke.

8, 9. (a) Ngo ma onongo tye i tam pa Paulo i kare ma en oloko i kom bedo labongo nyomme? (b) Mot ango ma Lukricitayo ma peya gunyomme gitye kwede?

⁸ Jo ma gunyomme bene ginongo adwogi mabeco ka gitye ka tito kwena maber-ri i wang tic mogo ma tic iye tek. Ento mot mogo me tic ma twere bot painia ma peya  gunyomme twero bedo tek bot jo ma gunyomme nyo ma gitye ki lutino. Paulo otamo pi yo ma jo ma i kacokke gitwero medo kwede ticgi me tito kwena maber-ri. En onongo mito ni jo ducu gubed ki yomcwiny calo en. Pi meno, en oloko maber ma lube ki tic pi Jehovah calo ngat ma peya onyomme.

⁹ Lamego mo ma peya onyomme ma tye painia i lobo Amerika ocoyo ni: “Jo mukene gitamo ni jo ma peya gunyomme pe gitwero nongo yomcwiny. Ento dong atyeko neno ni bedo ki yomcwiny marii cung ibedo ki wat maber ki Jehovah. Bedo labongo nyomme kono obedo jalle madit, tye mic mamwonya ka ce itiyo kwede maber.” Ma lube ki nongo yomcwiny, en ocoyo ni: “Bedo ma peya inyomme pe gengo bedo ki yomcwiny. An angeyo ni Jehovah maro dano ducu, kadi bed onyomme nyo pe.” I kare-ni lamego man tye ka tic ki yomcwiny ka ma can lutit kwena me Ker-ri tye iye. Ka itye ngat ma peya onyomme, tika itwero tic ki kareni me pwonyo jo mukene ki lok me ada? In bene itwero nongo ni bedo ma peya inyomme tye mic ma pire tek mua ki bot Jehovah.

Jo ma Peya Gunyomme Ento Gimito Nyom

10, 11. Jehovah konyo jo ma mito nyom ento peya gunongo ngat mupore nining?

¹⁰ I nge tero kare mo labongo nyomme, lutic mapol ma gin lugen bot Jehovah gimoko tamgi me yenyo ngat mo me anyoma. Pien giniang ni nongo tira pire tek, gipenyo Jehovah pi kony me nongo ngat mupore me anyoma.​—Kwan 1 Jo Korint 7:36. *

¹¹ Ka imito nyomo ngat mo ma tamme rwatte ki megi me woro Jehovah ki cwinye ducu, ket man i lega bot Jehovah. (Pil. 4:6, 7) Kadi bed mitte ni ikur ma romene, pe myero iol. Ket genni i kom Lubanga ma lamar-ri calo lakony ma meri, ci en bikweyo cwinyi ma lubbe ki gin ma imito-ni.​—Ibru 13:6.

12. Pingo Lakricitayo myero kong otam matut ka ngat mo openye me nyom?

¹² Ngat ma tye ki wat ma goro ki Lubanga nyo pe i niye twero penyo Lakricitayo ma peya onyomme ento mito nyom wek ginyomme. Ka meno otimme, ci nge ni cwercwiny ma bibino macalo adwogi me yero ngat marac me anyoma bikelo twon arem ma kato miti me nyom ma ngat moni bedo kwede ka peya onyomme. Tekki dong inyomme, kadi bed ber nyo rac, myero wukwo kacel labongo gonyo nyom pi kwowu lung. (1 Kor. 7:27) Pe irune imoko tam me nyom ma weko ikoko ange lacen.​—Kwan 1 Jo Korint 7:39.

Yubbe pi Jami Ducu ma Bino ma Lubbe ki Kwo me Nyom

13-15. Kodi jami ango ma gitwero kelo ayelayela i nyom ma jo aryo moni myero gulok iye i kare me winyegi?

¹³ Kadi bed Paulo owaco ni ber me tic pi Jehovah ma ngat moni peya onyomme, en pe obedo ki cac i kom jo ma gumoko tamgi me nyom. Ma ka meno, tirane konyo lunyom me yubbe pi jami ducu ma bino ma lubbe ki kwo me nyom kun gibedo kacel pi kwogi ducu.

¹⁴ Jo mukene myero gulok tamgi pi kit ma gigoyo kwede kwo me anyim. Ka pud gitye ka winye, jo aryo moni gitwero neno margi calo kite dok pat ma pe gude ma dong gibibedo atena ki yomcwiny. Gidonyo i nyom ki lek goba ma gitamo ni pe tye gin mo keken ma twero balo yomcwinygi. Tam ma kit meno obedo twon mingo. Mitti me kom i nyom mwonya atika, ento eno-ni keken pe miyo laco ki dako gicung matek ka ayelayela ocako yengo otgi.​—Kwan 1 Jo Korint 7:28. *

 ¹⁵ Jo mapol ma pud gunyomme nyen gibedo ki ur, dok cwinygi balle ka tamgi pe rwatte i jami mogo ma pigi tego. Jo aryo-ni gitwero nongo ni pe girwatte i kit ma gitiyo kwede ki cente, lok me mato yamo, kwene ma myero gibed iye ki dong kit ma myero gilim kwede wadigi. Dok ngat acel acel tye ki gorone ma twero cwero cwiny lawote. I kare me winye, yot mada me tero jami magi tuko tuko, ento lacen gitwero kelo peko madit i nyom. Bedo ber ka jo ma gimito nyomme kong gunyamo lok ma kelo peko con ma peya gunyomme.

16. Pingo luot myero gumok tamgi i kom kit ma gibicobo kwede pekki ma bino i nyom?

¹⁶ Ka gimito bedo maber dok ki yomcwiny, luot myero gucir pekkigi kacel. Myero gumok kit ma gibipwonyo kwede lutinogi ki kit ma gibigwoko kwede lunyodogi muteggi. Lyeto ma bino pi pekki me ot myero pe opok jo aryo magi. Ka giketo tira me Baibul i tic ci bikonyogi me cobo pekki mapol, ciro mogo, kun gibed kacel ki yomcwiny.​—1 Kor. 7:10, 11.

17. Paro jami ango “me lobo” ma luot myero gunge ni bibedo tye?

¹⁷ Paulo dok otito gin mukene ma bino ma lubbe ki nyom i 1 Jo Korint 7:32-34. (Kwan.) Jo ma gunyomme ‘giparo mere lok me lobo’ calo cam, bongo, ot, ki jami mukene ma pe obedo jami me cwiny. Pingo? Ka omego moni peya onyomo, en twero keto cwinye i ticwa me pwony. Ento macalo lawi ot, en nongo ni myero eti ki but cawane ki kerone me gwoko dakone wek omarre. Dako bene myero otim kumeno bot cware. Pi ryekone, Jehovah ngeyo ni meno mitte. En ngeyo ni wek nyom obed maber, omyero laco ki dako guti ki but cawa ki kero ma onongo gitiyo kwede i Ticce ma peya gunyomme pi lok me ot.

18. I nge nyom, jo aryo-ni myero gulok kwogi i lok madok i kom mato yamo nining?

¹⁸ Ento pwony man pud medde. Ka luot  myero gutii ki but cawa ki kero ma onongo gitiyo kwede i tic pa Lubanga pi cobo lok me komgi, pe itamo ni myero gutim gin acel-lu i jami madok i kom mato yamo ma onongo gibedo kwede ma peya gunyomme? Dako romo winyo nining ka laco pud medde ameda ki lungo wiye i tuku kacel ki luwote? Nyo laco romo winyo nining ka dakone pud medde ki tero cawa malac i galowange ki luwote macon? Laco nyo dako ma dong kene-ni twero cako bedo kic kic, ma cwinye cwer ni mar pe i kome. Man twero genge ka jo ma gunyomme gitimo jami ducu ma gitwero, wek ojing wat i kingi macalo laco ki dako.​—Ep. 5:31.

Jehovah Mito ni Wabed Leng i Kitwa

19, 20. (a) Pingo jo munyomme pe gitye agonya ki i atematema me tim tarwang? (b) Jo munyomme giketo nyomgi ka mading nining ka gicwalo cawa malac ma pe gibedo kacel?

¹⁹ Lutic pa Jehovah gumoko tamgi me bedo leng i kitgi. Mukene gimoko tamgi me nyomme wek pe gipot i tim tarwang. Nyom kono gire pe gengo tim tarwang. I kare me Baibul, cel murumo gang onongo konyo dano keken ka gubedo i i cel. Ka ngat mo okato woko i nge cel ma nongo luyak ki lutim aranyi gitye i nge cel, ci gitwero yakke nyo neke woko. Kit meno bene, jo munyomme gibwot ki i tim tarwang ka pe gikato woko i lok me buto ento gimoko i kom luotgi kit ma Ngat ma Ocako yub me nyom oketo kwede.

²⁰ Paulo oloko i kom lok man i 1 Jo Korint 7:2-5. I lok me buto, dako myero ocob miti pa cware keken; laco bene myero otim kumeno bot dakone. Ngat acel acel myero ocob “miti” pa lawote, nyo ni miti me buto, pien ngat munyomme tye ki twero meno. Ento, co ki mon mukene gicwalo kare malac ma pe gibedo kacel—gicito ka yweyo ka mapat pat nyo pi dog ticgi weko ngat acel acel bedo patpat, pi meno gitwono lawotgi miyo “miti” ma gitye kwede pe cobbe. Tam kong peko ma bino ka “pi miti” ma gitye “kwede ma pe jukke” oweko ngat acel odonyo i tim me abor pi lyeto ma catan kelo. Jehovah goyo laa i kom luwi odi ma giyelle me miyo jami me kom bot jo me odigi labongo keto kwo me nyomgi ka mading.​—Jab. 37:25.

Adwogi Maber ma Bino pi Lubo Tira me Baibul

21. (a) Pingo moko tam me nyom nyo bedo labongo nyomme tek tutwal? (b) Pingo tira ma tye i 1 Jo Korint cura 7 tiyo?

²¹ Moko tam ma madok i kom nyom ki bedo ma labongo nyomme tye i kin tam ma mokone tek loyo ma ngat moni romo mokone. Gin ma kelo peko i kin dano aye roc ma wan ducu watye kwede. Pi meno, kadi bed jo ma Jehovah genogi dok minigi mot pe gitwero bwot ki i cwercwiny, kadi bed gunyomme nyo pe. Ka itiyo ki tira me ryeko ma nonge i 1 Jo Korint cura 7, ci itwero dwoko peko meno piny. I wang Jehovah nongo ‘itimo ber’ kadi bed inyomme nyo pe. (Kwan 1 Jo Korint 7:37, 38.) Bedo ma itye ki cwak pa Lubanga obedo mot madit loyo ma itwero nongone. Ka inongo cwakke, ibimedde ki wot i yo me kwo ma teri i lobone manyen. Wat i kin co ki mon i lobo manyen-ni pe bibedo ki lyeto calo i kare-ni.

[Lok ma tye piny]

In Mono Itwero Gamone?

• Pingo myero pe wadi jo mukene me nyomme?

• Itwero tic ki cawani i yo maber nining, macalo latic pa Jehovah ma peya onyomme?

• Jo ma gitye ka winye gitwero yubbe pi peko ma bino i nyom nining?

• Pingo nyom pe gengo ngat moni ki i tim tarwang?

[Peny me Kwan]

[Cal ma tye i pot karatac 16]

Lukricitayo ma peya gunyomme gibedo ki yomcwiny ka gitiyo ki karegi me medo ticgi me pwony

[Cal ma tye i pot karatac 18]

Jo mogo myero gulok kwogi nining i nge nyom?