Tika Tye Ngat Mo ma Tye i Nge Tim Maraco?

“A MOTO cing catan.” Laco mo ma onongo telo wil mony me United Nations i lobo Rwanda en aye owaco lok meno, i kare ma tye ka lok i kom gin mumiyo juko nek i kin kaki aryo me Rwanda i 1994 pe otwere. Laco mukene ma oneno nek mutimme-ni oloko i kom nek alany ki gero me kare meno ni: “Ka ngat mo pud pyem ni Catan pe, owek warwatte kwede ka ma kiyiko iye lwak dano i bur acel i Rwanda.” Tika tim aranyi man ada obedo tic pa Larac-ci?

Dano mapol pe giye ni nek ki tim gero obedo tic pa cwec maraco me cwiny ma pe ginen. Jo mapol gitamo ni kodi tim magi tye calo adwogi me kit mo marac ma dong tye i remowa dok ni gin ma kelo tim maraco man en aye kwowa marac me anywali. Jo mukene gitamo ni gurup pa lulonyo ma gitye ki teko ento gitiyo lapiny piny, aye gubedo ka doro tam pa dano pi mwaki mapol wek gilo lobo. Ki dok bene tye jo mukene ma gikok i kom gamente ki luloc pi ngolo kop alenga ki deno can ma gitye ka nenone.

Ngo ma in iye? Pingo tim maraco, gero, tim alany, ki deno can tye mapol tutwal i wi lobo kadi bed dano tye ka tute me gikone? Pingo dano nen calo gitye ka kwanyo yo ma terogi oyot tutwal i neke kekengi, kun gidingo itgi woko i kom cik ma kibedo ka cikogi kwede teretere? Tika tye ngat mo ma tye inge tim magi ducu? Anga mono kikome ma loyo lobo-ni? Lagamme twero bedo me ur boti.