2 Lubanga Pe Paro pi Dano Tika Man Tye Lok Ada?
2 Lubanga Pe Paro pi Dano Tika Man Tye Lok Ada?
Gin ma gwok nyo iwinyo: “Ka Lubanga paro pi dano, ci onongo myero en ojwa tim maraco kacel ki deno can ma tye i lobo-ni. Dok kadi bed ni en paro pi wan ducu, ento en pe paro pi gin ma timme i kom dano ki acel acel.”
Gin ma Baibul pwonyo: Lubanga Jehovah aye pe kelo tim maraco. (Yakobo 1:13) Kadi bed ni en romo kwanyo jami maraco i cawa mo keken, en oye ni jo maraco kong gubed tye pi tutunu me cobo pyem ma ocakke ki i poto me Eden, pyem madok i kom twero me loc pa Lubanga kacel ki gwoko genne pa dano. Ento i agikkine, en bilaro dano kun kwanyo pekki ducu ma jo ma gikwero locce gukelo.—Acakki 3:1-6; Icaya 65:17. *
Kadi bed ni en paro pi wan ducu, Lubanga nyuto mar matek ma en tye kwede pi dano acel acel. Matayo 10:29-31 nyuto ni en tye ki ngec matut i komwa ma loyo ngec ma wan watye kwede i komwa kekenwa: “Ojwinyojwiny aryo pe gicato pi cente apar? Ento mo acel pe poto piny i ngom ma Wonwu pe ngeyo. Kadi bed wa yer wiwu dong gikwanogi woko liweng. Pi meno, pe wulwor; pien piwu tek twatwal makato pi ojwinyojwiny mapol.”
Kit ma ngeyo lok me ada konyi kwede: Pol kare wakwero bedo kacel ki jo mager nyo ma pe giparo pi dano. Pe tye me ur ni, lok goba ma kiwaco ni Lubanga pe paro pi dano-ni oweko jo mapol pe gimito ngeyo lok kome kulu nyo gilego bote keken ka inen jami odiyogi ma yo mo dong pe. Ngeyo ni Lubanga Jehovah paro piri romo weko ibedo ki miti me pwonyo lok mapol i kome dok bene i dongo wat macok kwede.
Me laporre, romo bedo ni ilego bot Lubanga ento i kalakala ka en owinyo nyo obigamo lega ni. Baibul cuko cwinywa ni Ngat ma ‘gamo lega’ tye atera cawa ducu me winyo lega pa jo ma gilego bote ki cwinygi ducu.—Jabuli 65:2.
Lubanga cuko cwinywa me ‘miyo parwa ducu bote, pien en tamo piwa.’ (1 Petero 5:7) Watwero geno en kadi bedi peko odiyowa matek, pien Lokke wacciwa ni: “Rwot [Jehovah] tye cok ki jo ma cwinygi goro, en laro jo ma gitye ki arem madwong i cwinygi.”—Jabuli 34:18.
[Lok ma tye piny]
^ para. 3 Pi ngec mukene ma lubbe ki gin mumiyo Lubanga oweko dano deno can, nen dul me 11 i buk me Baibul Mono Ada Pwonyo Gin Ango?
[Boro buk i pot karatac 5]
Pingo Lubanga cuko cwinywa ni waleg bote, ka en pe paro piwa?
