3 Lubanga Culo Kwor Tika Man Tye Lok Ada?

Gin ma gwok nyo iwinyo: “Lubanga gwoko rekod me bal ducu dok culo dano pi balgi kun wangogi pi naka i mac me kapiny.”

“Lubanga pwodo lubalo kun tiyo ki peko ma poto atura.”

Gin ma Baibul pwonyo: 2 Petero 3:9 waco ni Jehovah “pe mito ni ngat mo orweny woko matwal, ento mito ni jo ducu guo i ningut.” Ma ka keto cwinye i kom bal ma watimo, en neno jami mabeco ma watimogi. Pien ‘wang Jehovah neno lobo ducu, me nyuto tekone bot jo ma cwinygi leng i kome.’​—2 Tekwaro 16:9.

Mac me kapiny pe obedo pwony ma tye i Baibul​—tam man me wango dano i mac pi naka-ni cwero cwiny Lubanga. Pwod madit ma en miyo bot lutim bal aye to matwal. (Jeremia 7:31; Jo Roma 6:7) Dok bene pekki ma poto atura ma gibalo jami-ni, pe gubedo pekki ma Lubanga aye kelogi, pien jami ma gitimme atura gudo ngat mo keken.​—Latitlok 9:11.

Kit ma ngeyo lok me ada konyi kwede: Watwero nyikke cok bot Lubanga ka wangeyo ni en tye ‘atera me weko bal’ ento pe rune me miyo pwod. (Jabuli 86:5) Omyero pe wati pi Lubanga pienni cwinywa ngoliwa kop nyo walworo ni en bipwodowa. Ma ka meno, watwero dongo niyewa pi tyen lok matir​—mar pi Jehovah. Mar ma kit meno miniwa yomcwiny ma weko watimo jami ducu ma mitte me yomo cwinye.​—Matayo 22:36-38; 1 Jon 5:3.

Kadi bed Lubanga mito ni dano ducu gutim gin matir, en ngeyoni jo mapol pe gibitimo meno. Ka en pe otimo gin mo i kom jo ma gumoko tamgi me timo bal, ci en bedo calo laloc mo ma moko cik ento pe keto i tic, kun weko ngolo kop alenga ki deno can medde labongo gikone. (Latitlok 8:11) Bedo ma wangeyo ni Lubanga bijwayo tim maraco woko-ni miyo wabedo ki gen matek pi kare me anyim. Lubanga ocikke me tyeko jo ma pud gumoko ka timo jami maraco, wek “jo mamwol” gunong mit pa kwo pi naka kit ma Lubanga oyubo kwede con.​—Jabuli 37:10, 11, 29. *

[Lok ma tye piny]

[Boro buk i pot karatac 6]

Lubanga tika mito ni wawor en pien walworo ni en bipwodowa?

[Ka ma cal oa ki iye i pot karatac 6]

Engravings by Doré