Lok me Ada Romo Loko Kwoni

TWERO bedo ni iwinyo nyo kipwonyi lok goba acel i kin abic magi madok i kom Lubanga, kit ma kinyutogi kwede ka maleng i pwony ma gukato-ni. Kadi bed kit meno, pud iromo bedo ki akalakala ka myero i lok niyeni, tutwalle ka ibedo ka ye lok goba magi pi kare malac.

Bedo ki akalakala me loko niyeni-ni gire niange. Dini mogo pe giye tam man me poro pwony ma gipwonyo ki gin ma Baibul pwonyo. Mukene gigengo nge pwonygi kun giwacci Baibul opong ki lanywen, dok ni pe dano ducu myero guniang jami ma tye i iye. Kitungcel, pol pa lupwonnye pa Yecu onongo gitye jo mogo ata ma pe gukwano, ento guniang oyot jami ma Yecu opwonygi kwede.​—Tic pa Lukwena 4:13.

Itwero bene kwero ngiyo pwony ma i ye i komgi pien ilworo ni timo meno nyuto ni niyeni goro. Ento pore mono pi Lubanga me keco i komi pienni i kwano Baibul, lokke ma en omiyo bot dano, wek iniang gin ma en mito ki boti? Pe kumeno, Lokke cuko cwinyi me kwano Ginacoya in kikomi, kun waco ni: ‘Niang i gin ma Lubanga mito, gin maber, ma yomo cwinye, ma roc mo pe iye.’​—Jo Roma 12:2.

Pwonyo lok me ada madok i kom Lubanga pe obedo temo ngecci​—romo loko kwoni wek obedo maber. (Jon 8:32) Deanne, ma kiloko i kome i pwony me acel-li, dong odongo niyene i kare-ni i Lok pa Lubanga. Lamego man owacci: “Onongo atamo ni niang Ginacoya tek adada nio ka acako kwano Baibul. Man dong angeyo Jehovah, pe calo ngat ma kite tek, ento calo Wonwa ma lamar ma tye i polo. Atyeko dong nongo tyen lok me kwo.”

Temo niang Baibul ka onongo kong kipwonyi ki goba madok i kom Lubanga bedo calo iwacci yubo jami kom macin mo kun itiyo ki buk ma pe mege me nyuto kit me yubone. Itwero yubo bute mogo ento pienni pe iromo yubone ducu, cwinyi twero cwer ci iweko woko. Ti ki buk ma rwatte me yubone, ci ibiyubo macin-ni labongo ayela. Tika imito tic ki buk ma rwatte kun ipwonyo lok me ada madok i kom Lubanga?

Tika imito pwonyo lok me ada madok i kom Lubanga? Wacuko cwinyi me penyo ngat mo keken ma nonge i kabedoni ma tye Lacaden pa Jehovah nyo coo kun itiyo ki adrec ma tye i pot karatac 4 i i magajin man kun ipenyo pi kwano Baibul me nono labongo cul mo ki paco.

[Boro buk i pot karatac 9]

‘Niang i gin ma Lubanga mito, gin maber, ma yomo cwinye, ma roc mo pe iye.’​—JO ROMA 12:2