Lagam me Lapeny Man Mono Pire tek?

“Acako rwene ki awobe ma onongo pud atye mwaka apar keken. Wacako ki mako cingwa kun wadoto dogwa. I nge kare manok keken, wacako gudo dul komwa mogo ma myero pe wagudi dok man omiyo miti me buto odongo i cwinywa. Ma dong aromo mwaka 15, acako tic dok co mapol ki i dog tic gupenya pi buto kweda. Onongo amito atem jami ducu manyen kun aribbe ki lutic luwota i gin mo keken ma gitye ka timone. Amito ni lurema pe gutam ni an kita rac, man oweko amedde ki temo jami mapol i kom tim me buto.”​—SARAH, mwakane tye 36 * dok en dano me lobo AUSTRALIA.

LOK man tika bicungo wi ka iniang ni Sarah odongo i paco ma danone gitye ludini? Lunyodone gutute me pwonye wek okwo ma rwatte ki cik me Baibul. Ento Sarah okwanyo yo mapat.

Dano mapol giye ni yo ma Sarah okwanyo ni ber. Gin gitamo ni cik me Baibul i kom buto pe dong tiyo i kare-ni. Jo mukene gineno ni ber me bedo twon ladini adada ento pe rac ka itye agonya me donyo i tim me buto kit ma cwinyi mito kwede.

Tika pire tek me ngeyo ki dok kwo i yo ma rwatte ki gin ma Baibul pwonyo i kom buto? Lok ma i Baibul “gicoyo pi teko pa cwiny pa Lubanga. Konyo me pwony.” (2 Tem. 3:16) Kadi bed iye ni Lubanga aye ocweyo dano dok bene Baibul tye Lokke nyo pe, gin ma Baibul waco i kom buto myero wange.

Ento ka racce tye ni, dano mapol wigi onywene woko pe gingeyo gin ma Baibul pwonyo i kom buto. Lutela dini ma giwaco ni giworo Baibul-li gipwonyo dano kilong. Ki lok ada, pwony madok i kom buto opoko i kin dini mapol.

Ma ka lubo gin ma jo mukene giwaco, pingo pe i kwany kare me kwedo lok man in kikomi? Pwony ma lubo man binyamo lapeny apar ma dano gimaro penyone i kom cik me Baibul ma lubbe ki buto. I pwony meno ibinongo lagam ma kimiyo atyer ka maleng dok jenge i kom gin ma Baibul ada pwonyo. Pwony me agikki i dul man.

[Lok ma tye piny]