Pingo Cwiny Pa Lubanga Aye Myero Otelwa?

“In aye Lubangana! Wek cwiny meri maber-ri otela.”​—JAB. 143:10.

1. Tit kong pingo pire tek pi ngat mo me telo yo ka itye ka wot ka mo ma pe ingeyo.

 GO KONG ni itye ka wot me cito i kabedo mo ma peya io iye matwal i kwoni. Ci ngat mo ma igeno dok ingeyo ma kong yam oo i kabedo meno aye kombeddi dong tye ka teri kunnu. Kit ma en ngeyo kabedo meno maber adada-ni, en bitelo yo. Pe ibirweny ka ce ilubo kore labongo ngak.

2, 3. (a) Teko mene ma Jehovah otiyo kwede mwaki mapol mukato angec? (b) Pingo myero wagen ni cwiny pa Lubanga bitelowa i kare-ni?

² Tye teko mo ma pire tek adada ma myero otelwa ento pe nen. Man mono obedo gin ango? En aye gin ma kiloko iye i tyeng me acel ki aryo i acakki me Baibul. Buk me Acakki onyuto jami ma Jehovah otimogi mwaki mapol mukato angec kit man: “I acakki piny Lubanga [“ocweyo,” NW] polo ki lobo.” I kare ma en tye ka cwec, en otiyo ki tekone, pien Baibul waco ni: “Cwiny pa Lubanga obedo ka twago wi pii.” (Acak. 1:1, 2) Teko ango ma Lubanga obedo ka tic kwede? Cwiny maleng—ma obedo tekone. Wakwo pien Jehovah otiyo ki cwiny mere maleng me cweyo jami ducu.​—Yubu 33:4; Jab. 104:30.

³ Calo dano adana, omyero wagen ni cwiny pa Lubanga bikelo alokaloka i kwowa. Wod pa Lubanga onongo ngeyo ni myero wabed ki gen, pien en owaco bot lupwonnyene ni: “Cwiny [maleng] . . . bitelowu i ada ducu.” (Jon 16:13) Cwiny man obedo gin ango dok pingo myero wawek otelwa?

Cwiny Maleng Obedo Gin Ango?

4, 5. (a) Jo ma giye pwony me Triniti gitamo ni cwiny maleng obedo gin ango? (b) Itwero titone ni cwiny maleng obedo gin ango?

⁴ Jo mogo ma waloko kwedgi i ticwa me pwony tamgi i kom cwiny maleng pe rwatte ki gin ma ginacoya waco. Jo ma giye i kom Triniti gitamo ni cwiny maleng tye gin ma kwo dok bene rom aroma ki Lubanga Won. (1 Kor. 8:6) Ento pwony me Triniti pe rwatte ki pwony ma tye i Ginacoya.

⁵ Ento cwiny maleng kono dong obedo gin ango? Lok ma tye i tere piny i Acakki 1:2 i Baibul me New World Translation of the Holy Scriptures—With References waco ni nyig lok me leb Ibru ni ruʹach kigonyo ni “cwiny” i Acakki 1:2, i tyeng mukene kigonyo ni “yamo.” (Acak. 8:1) Dong kit macalo yamo pe nen ento tye ki teko-ni, cwiny maleng bene tye kumeno pien kor ticce nen. Cwiny man aye teko ma a ki bot Lubanga dok tiyo i kom dano nyo gin moni me cobo mitti pa Lubanga. Tika tek tutwal me ye ni teko ma kit meno a ki bot Lubanga  Won Twero Ducu? Pe wacel!​—Kwan Icaya 40:12, 13.

6. Kwac ango ma pire tek ma Daudi okwayo bot Jehovah?

⁶ Tika Jehovah twero medde ki tic ki cwiny maleng me konyowa? En ocikke bot Daudi ni: “Abipwonyi dok abicimmi yo ma myero ilubi; abimiyi ryeko.” (Jab. 32:8) Tika Daudi onongo mito kony meno? Tye kumeno kikome pien en owaco bot Jehovah ni: “Pwonya wek ati gin ma imito, pien in Lubangana! Wek cwiny meri maber-ri otela.” (Jab. 143:10) Wan myero bene wabed ki mitti acel-lu kun waweko cwiny pa Lubanga telowa. Pingo kono? Kong wanenu tyen lok angwen ma pigi tego.

Wan Pe Wapore me Lone Kenwa

7, 8. (a) Pingo wan pe watwero kwo labongo kony pa Lubanga? (b) Mi lapore ma nyuto ni myero pe wacere me lone kenwa i lobo man marac-ci.

⁷ Tyen lok me acel aye ni omyero kong wabed ki mitti ni cwiny pa Lubanga otelwa pien wan pe wapore me lone kenwa. Telo ngat moni tere ni nyuto yo matir ma myero en olubi. Ento, Jehovah pe ocweyowa ni myero watim gin ma kit meno, pien watye ki roc. Lanebi Jeremia ocoyo ni: “Ai  Rwot, angeyo ni dano pe loyo kwone kene nio i agikkine; pe tye ngat mo ma tye ki twero me loyo kwone.” (Jer. 10:23) Pingo wan pe watwero lone kekenwa? Lubanga otito bot Jeremia gin mumiyo pe wapore me lone kenwa. Jehovah owaco ni: “Cwiny dano aye gin ma bwolo dano ma kato gin mukene-gu ducu, opong ki gin marac adada; anga ma twero niang iye?”​—Jer. 17:9; Mat. 15:19.

⁸ Pe itamo ni obedo twon mingo mada ka ngat mo ma pe ngeyo piny maber ocere me wot kene i dye tim mo ma en pe ngeyo, labongo ngat mo me tele? Kit ma en pe ngeyo kit me gwokke i tim dok bene pe tye ngat mo ma tye ki ngec ma twero tere kunnu-ni, en keto kwone ka mading. I yo acel-lu, ngat ma tamo ni etwero loyo kwone i lobo man marac-ci labongo ye ni Lubanga otel en i yo matir nongo tye ka keto kwone ka marac adada. Calo Daudi, omyero waleg bot Jehovah pi okonywa. En owaco ni: wek “kare ducu abed ka lubo yoni, ma pe angak woko ki iye.” (Jab. 17:5; 23:3) Wan mono watwero nongo kony ma kit meno nining i kare-ni?

9. Kit ma kinyuto kwede i pot karatac 19, cwiny pa Lubanga twero telowa nining?

⁹ Ka ce wamwolle dok wajenge i kom  Jehovah ci en bimiyowa cwiny maleng wek otelwa. Teko man bikonyowa nining? Yecu owaco bot Lupwonnyene ni: “Ento akony, ame en cuny acil, ame Papo bino oro inyinga, en bino pwonyowu i kop lung, en bino poyo wiwu i kop ducu ame rik akobiwu.” (Jon 14:26, Baibul me leb Lango) Ka kare ki kare wakwano Lok pa Lubanga, medo i kom lok ducu ma Yecu owaco, ci cwiny maleng bikonyowa me niang ryeko pa Lubanga kun walubu mitine. (1 Kor. 2:10) Medo i kom meno, i kare mo keken, cwiny maleng binyuto botwa yo ma myero walubi. Bimiyo wiwa po i kom ngec mogo ma lubbe ki cik me Baibul kun konyowa me moko tam mabeco.

Cwiny pa Lubanga Otelo Yecu

10, 11. Yecu onongo geno ni cwiny maleng bitimme gin ango? Cwiny maleng okonye nining?

¹⁰ Tyen lok mukene me aryone mumiyo omyero waye ni cwiny pa Lubanga otelwa aye ni, Lubanga otiyo ki cwiny maleng me telo Yecu. Ma peya Wod pa Lubanga obino i lobo, en onongo ngeyo lok pa lanebi ma waco ni: “Cwiny pa Rwot [Jehovah] bibedo i kome, cwiny me ryeko ki me niang, cwiny me poro lok ki me tek, cwiny me ngec ki me lworo Rwot.” (Ic. 11:2) Kwo onongo pe obibedo yot bot Yecu i lobo kany. Tam kong kit ma onongo en mito kwede kony pa cwiny pa Lubanga.

¹¹ Lok pa Jehovah ocobbe i wange litap labongo goba. Jiri pa Luka wacciwa gin mutimme cutcut inge batija Yecu: “Yecu odwogo ki i Jordan kun opong ki cwiny maleng, cutcut cwiny maleng otere wa i tim.” (Luka 4:1) I tim kunnu, i kare ma Yecu tye ka rii kec, lega ki dok lwodo lok, Jehovah nen calo otito bote jami mapol ma bitimme i anyim. Cwiny pa Lubanga onongo tye ka tic i tam ki cwiny Yecu. Man omiyo Yecu onongo ngeyo jami ducu ma myero etim, dok en otimo miti pa Wonne kikome.

12. Pingo pire tek ni waleg pi cwiny pa Lubanga wek otelwa?

¹² Yecu onongo ngeyo kit ma cwiny pa Lubanga pire tek kwede i kwone, pi meno en ocuko cwiny lupwonnyene me penyo pire wek otelgi (Kwan Luka 11:9-13.) Pingo man pire tek botwa i kare-ni? Pienni twero tiro tamwa wek wabed ki tam pa Kricito. (Rom. 12:2; 1 Kor. 2:16) Ka waye ni cwiny pa Lubanga otelwa, ci wabitamo calo Kricito kun walubo lanene.​—1 Pet. 2:21.

Cwiny me Lobo-ni Rwenyowa Woko

13. Cwiny me lobo-ni obedo gin ango, dok kelo adwogi ango?

¹³ Tyen lok me adekke mumiyo cwiny  pa Lubanga myero otelwa aye ni, wabirweny woko pi cwiny marac ma tye ka tic i kwo pa dano mapol i kare-ni. Lobo bene tye ki tekone ma ywayo dano dok weko gitimo gin mapat ki gin ma cwiny maleng mito ni watim. Ma ka miyo dano bedo ki tam pa Kricito, cwiny me lobo-ni weko tamgi ki timgi bedo calo pa Catan lalo lobo man. (Kwan Jo Epeco 2:1-3; Tito 3:3.) Ka ngat moni oye cwiny me lobo-ni dok ocako timo jami ma lubo kom ma ginywale kwede, man kelo adwogi maraco dok gengo en nongo mot me Ker pa Lubanga.​—Gal. 5:19-21.

14, 15. Watwero lweny ki cwiny me lobo-ni nining?

¹⁴ Jehovah dong otyeko miniwa gin me lweny i kom cwiny me lobo-ni. Lakwena Paulo owaco ni: “Wubed tek i Rwot ki twero me tekone. . . . Wek wucung matek inino marac.” (Ep. 6:10, 13) Kun tiyo ki cwiny maleng, Jehovah miniwa teko me cung matek i kom diro ducu ma Catan tiyo kwede me bwolowa. (Yabo. 12:9) Cwiny me lobo-ni gire tek dok bwoyowa woko. Ento pe myero wawek odony i kwowa. Cwiny maleng tek dok bikonyowa me lweny ki cwiny me lobo-ni!

¹⁵ Lakwena Petero oloko i kom jo ma gukwero lok me ada i cencwari me acel ni: “Gubwoto yo ma atir, gurwenyo woko ata.” (2 Pet. 2:15) Omyero wabed ki pwoc ni “pe gimiyowa cwiny me lobo man, ento gimiyowa cwiny ma oa ki bot Lubanga.” (1 Kor. 2:12) Pi kony pa cwiny maleng ki bene ka watiyo maber ki jami ma Jehovah miniwa me gwoko wat i kinwa ki en, ci watwero lweny ki cwiny me lobo-ni.​—Gal. 5:16.

Cwiny Maleng Nyako But Nyig Mabeco

16. But nyig mabeco ango ma cwiny maleng twero nyakone i kwowa?

¹⁶ Tyen lok me angwenne mumiyo omyero waye ni cwiny pa Lubanga otelwa aye ni cwiny man nyako but nyig mabeco i kwo pa jo ma cwinynyi telogi. (Kwan Jo Galatia 5:22, 23.) Anga ma pe mito bedo ngat ma lamar, layomcwiny ki dong lakel kuc? Anga i kinwa ma pe mito ni ebed dano ma diyo cwinye, lakica dok ngat ma kite ber? Anga ma tamo ni niye matek, mwolo ki dong gwokke ken pe twero konye? But nyig magi mabeco-ni konyowa kacel ki jo me odiwa ki dong kacokke. Tute me dongo but nyig magi mito tic matek pien wamitogi kare ducu dok mitte ni wanyakgi.

17. Wan watwero dongo but nyig mo acel ma nyak pi cwiny maleng nining?

¹⁷ Bedo me ryeko ka wangine kekenwa wek waniang ka ce lokwa ki ticwa ginyuto ni cwiny maleng tye ka telowa dok watye ka dongo but nyig magi. (2 Kor. 13:5a; Gal. 5:25) Ka wamito ni wadong but nyig ma nyak pi cwiny maleng, ci omyero waye cwiny maleng wek onyak but nyig magi i kwowa. Watimo man ka wakwano lok i kom but nyig magi ki acel acel ki i Baibul ki dong bukkewa, waneno kit ma waromo tic kwede i kwowa me nino ducu ci watute matek me dongone. * Ka waneno adwogi me tic pa cwiny maleng i kwowa ki dong pa Lukricitayo luwotwa, ci waniang gin mumiyo cwiny maleng aye myero otelwa.

 Tika Itye ka Yeni Cwiny pa Lubanga Oteli?

18. Lanen ango ma Yecu oweko botwa i lok me ye tela pa cwiny pa Lubanga?

¹⁸ Baibul tittiwa ni i kare ma Yecu tye i lobo kany, en onongo ngeyo kit ma cwiny maleng tek kwede pien otiyo i kwone. En ojolo ki cwinye ducu tic pa cwiny maleng i kwone, en oye dok otimo gin ducu ma rwatte ki kare moni. (Mar. 1:12, 13; Luka 4:14) Calo Yecu in mono iye tic ma cwiny maleng tiyo i kwoni?

19. Ngo ma myero watim wek cwiny maleng odor kwowa?

¹⁹ I kare-ni, cwiny pa Lubanga aye pud doro tam ki cwiny jo ma giye telane. Ci dong, ngo ma myero itim wek cwiny pa Lubanga oteli i yo matir? Leg kare ki kare bot Jehovah ni omini cwiny maleng dok bene okonyi wek oti i kwoni. (Kwan Jo Epeco 3:14-16.) Tim jami ducu ma lubbe ki legani kun i medde ki kwano Baibul ma kicoyo pi teko pa cwiny maleng-ngi. (2 Tem. 3:16, 17) Ye tira me ryeko ma a ki iye kun ilubu tela pa cwiny maleng ma nongo cwinyi yom. Bed ki niye ni Jehovah twero telo in maber adada i lobo man mupong ki jami maraco-ni.

[Lok ma tye piny]

Tika Iniang Lok ma Pigi Tego?

• Cwiny maleng twero gudo kwowa nining?

• Tyen lok angwen mene ma pigi tego mumiyo myero waye ni cwiny pa Lubanga otelwa?

• Wan watwero timo gin ango wek wanong adwogi maber ki i tela pa cwiny maleng?

[Peny me Kwan]

[Cal ma tye i pot karatac 17]

Cwiny pa Lubanga aye odoro kwo pa Yecu

[Cal ma tye i pot karatac 19]

Cwiny pa Lubanga aye doro tamwa ki cwinywa