Pingo Myero Wakwo ma Lubbe ki Cik me Baibul?

TAM ma Baibul miyo ma lubbe ki buto mono dong pe tiyo i kare-ni? Pe kumeno. Ma ka meno, tamme konyowa me gwokke ki:

▪ Two ma kobo i yo me buto

▪ Nongo ic ki ngat ma pe inyomme kwede

▪ Arem ma bino pi ket keny

▪ Cwiny ma ngoliwa kop

▪ Lewic ma bino pien ngati moni onywari mere anywara pi cobo mitine keken

Jehovah Lacwecwa, * mito ni wanong yomcwiny ki adwogi mabeco ma bino pi tic ki mic ma en ominiwa. Lubanga tye ka “pwonyowu wek wubed maber.” (Icaya 48:17) Ngat ma lubo cik me Baibul i kom buto nongo:

▪ Cwak pa Lubanga

▪ Wic ma opye mot

▪ Wat maber ki jo me otgi

▪ Nying maber

▪ Woro

Ento ngo ma myero itim i kare-ni ka ipe ka kwo ma lubbe ki cik me Baibul? Tika iromo loko yo me kwoni? Lubanga mono bingolo kop i komi pi bal ma itimo wacon?

Tam kong lok man: Lukricitayo mukene i cencwari me acel onongo gubedo lukwele, lutim abor, ki jo ma buto ki co wadgi. Gin guyero me loko yo me kwogi, ci gunongo iye adwogi mabeco. (1 Jo Korint 6:9-11) I kare-ni, dano miya ki miya i twok lobo-ni bene guyero me loko kwogi. Dong gua woko ki i lubo kwo ma cilo, dok gunongo adwogi mabeco  ma bino pi kwo i yo ma rwatte ki cik me Baibul. Me labolle, tam kong i kom gin mutimme i kwo pa Sarah, ma kitito i pwony mukwongo-ni.

“Anongo Yweyo Cutcut”

Sarah onongo ni yo me kwo atata ma eyero-ni pe okelo bedo agonya ki yomcwiny ma onongo en tye ka mitone-ni. En owacci, “Awinyo calo cwiny ma ngola kop onongo dong pe tye ka tic.” En omedo ni, “onongo atye ki lworo ki par ni abiyac nyo abinongo two mo marac adada. Pe arwenyo niyena i kom Lubanga, dok aniang ni yo me kwona omine cwercwiny malit ma pe wacce. Awinyo calo koma cilo dok iya obedo ka cwer mada.”

I ngeye, Sarah onongo kero me loko yo me kwone. En openyo pi kony ki bot lunyodone, ma gin Lucaden pa Jehovah. En bene openyo pi kony ki bot Luelda me kacokke. Sarah owacci, “kica ki mar ma lunyodona ki luelda gunyuto obedo me ur ki yomcwiny. Omiyo anongo yweyo cutcut.”

Sarah dong tye ka gwoko lutinone aryo. “Atito ka maleng bot lutinona, lok i kom yo me kwo ma ayero wiati. Amito ni guniang kit ma cac i kom yo matir pa Lubanga omiyo akoko ange. Gin ma amito aye me konyogi wek gubed ki pwoc pi adwogi mabeco ma wanongo i komwa, tamwa, ki cwinywa pien i lok me buto walubo tam matir pa Lubanga. Labongo akalakala mo, angeyo ni Lubanga miniwa pwony matir pien pe mito ni cwinywa ocwer.”

In bene itwero nongo adwogi mabeco pi lubo tira me mar pa Lubanga. Baibul ociko ni: “Pwony pa Rwot [Jehovah] tye atir, yomo cwiny dano; cik pa Rwot tye maleng, miyo dano niang maber. . . . ngat ma ogwoko cikki limo mot madit.”​—Jabuli 19:8, 11. *

[Lok ma tye piny]

[Boro Buk i pot karatac 8]

Jo ma gicayo cik me Baibul, pol kare gikelo cwercwiny

[Boro Buk i pot karatac 9]

Jo ma gikwo kun gilubo cik me Baibul cwinygi pe ngoligi kop, dok gibedo ki wat maber i kwogi me ot