Tic Pa Cwiny Pa Lubanga I Cencwari Me Acel Ki I Kare-ni
Tic Pa Cwiny Pa Lubanga I Cencwari Me Acel Ki I Kare-ni
“Cwiny acel-lu aye ma tiyo tic i mot magi ducu.”—1 KOR. 12:11.
1. Lapeny ango ma wabinyamogi i pwony man?
JAMI ango ma bino i wi ka iwinyo nyig lok ni: Pentekote. (Tic 2:1-4) Cwiny maleng obino i kom lukwena i cencwari me acel dok man okelo alokaloka madit i kit ma Lubanga tiyo kwede ki luticce. I pwony ma man olubo, wanyamo kit ma cwiny maleng okonyo kwede jo ma lugen me kare macon me cobo tic mogo ma tego. Ento apokapoka ango ma tye i kit ma Lubanga otiyo kwede ki cwiny mere maleng i kare ma Lukricitayo pud pe ki i cencwari me acel? Dok adwogi maber ango ma Lukricitayo me kare-ni gitwero nongone ma lubbe ki tic pa cwiny maleng? Kong dong wanenu.
“Nen Angeca pa Rwot [Jehovah]”
2. Maliam onongo dong oneno kit ma cwiny maleng tiyo kwede nining?
2 Maliam bene onongo tye i kicika ma malo i Jerucalem i kare ma cwiny maleng ma kiciko pire-ni obino i komgi. (Tic 1:13, 14) Ento, pi mwaki makato 30 kulu ma man peya otimme, Maliam onongo dong oneno kit ma cwiny pa Jehovah tiyo kwede i yo mamwonya. Jehovah onako kwo pa Wode ki i polo ci omiyo Maliam ogamo ic labongo rwatte ki laco mo keken. Ic ma en ogamo-ni obedo pi teko “pa cwiny maleng.”—Mat. 1:20.
3, 4. Kit cwiny ango ma Maliam onyutu, dok watwero lubo lanenne-ni nining?
3 Pingo Maliam onongo mot man ma lapore pe-ni? I kare ma lamalaika otito pi yub pa Jehovah bot Maliam, Maliam owacci: “Nen, an angeca pa Rwot; wek obed bota kit macalo iwaco.” (Luka 1:38) Lok man ma Maliam oloko-ni onyutu cwiny ma en tye kwede, cwiny ma Lubanga onongo dong ngeyo. Kit ma en ogamo kwede onyutu ka maleng ni en oye me tiyo miti pa Lubanga. Pe openyo kit lapeny mo keken ma lubbe ki kit ma lukin gang binene kwede pi ic ma ebigamo-ni nyo ka man pe bibalo wat i kin en ki laco ma ecikke me nyomme kwede. Maliam onyutu ni eketo genne ducu i kom Jehovah calo laditte ma loye kun lwonge kekene ni en angeca.
4 Tika i kare mo dong iwinyo ni jami mogo nyo tiyo tic pa Lubanga dong onuri woko? Ber ka wapenye ki lapeny magi, ‘Tika aketo genna ducu i kom Jehovah ni en bikonya tiyo jami ducu ma lubbe ki mitine? An tika anyutu cwiny me jalle ken?’ Bed ki gen ni Lubanga miyo cwiny mere maleng bot jo ducu ma giketo gen i kome ki cwinygi ducu dok giye timo miti mere.—Tic 5:32.
Cwiny Maleng Okonyo Petero
5. Ma peya nino me Pentekote 33 K.M oromo, Petero oneno kit ma cwiny maleng tiyo kwede nining?
5 Calo Maliam, lakwena Petero bene obedo ki kare me neno kit ma cwiny pa Lubanga otiyo kwede ma nino me Pentekote 33 K.M. peya oromo. Yecu onongo omiyo twero me ryemo cen bot Petero ki lukwena mukene-ni. (Mar. 3:14-16) Kadi bed ni Ginacoya pe tito kore ki kore, ento nen calo Petero otiyo ki twero meno. Teko pa Lubanga bene onen ka maleng i kare ma Yecu olwongo Petero ni obin bote kun woto ki i wi nam me Galilaya, dok Petero otimo meno. (Kwan Matayo 14:25-29.) Ngene atir ni, Petero oketo genne ducu i kom cwiny maleng me konyo en me timo tic mogo matego adada. Cwiny maleng pud omedde ki konyo Petero ki lupwonnye luwote me timo jami mapol.
6. Ma lubbe ki teko pa cwiny maleng, gin ango ma Petero otimo i nino me Pentekote 33 K.M. ki i nge nino meno?
6 I nino me Pentekote 33 K.M., kimiyo bot Petero ki jo mukene teko me loko leb pa jo ma gubino ka limo Jerucalem. Pi meno, Petero otelo wi luwote i lok ki lwak ma gugure. (Tic 2:14-36) Dong, Petero ma onongo kicel kicel loko ata labongo tam nyo lalworo-ni onongo teko me miyo caden ki tekcwiny kadi bed bura nyo aunauna onongo tye magwar. (Tic 4:18-20, 31) En onongo ngec me lok ki lwak pi teko pa Lubanga. (Tic 5:8, 9) Dok ki mine bene teko me cero dano acel.—Tic 9:40.
7. Pwony mene pa Yecu ma Petero oniang iye i nge wire ki cwiny maleng?
7 Ma peya nino me Pentekote oromo, Petero onongo oniang lok ada mapol ma Yecu opwonyogi kwede. (Mat. 16:16, 17; Jon 6:68) Ento onongo tye but pwony mogo pa Yecu ma en pe oniang iye maber . Me lapore, Petero pe oniang ni Kricito bicer calo cwec me cwiny i nge nino adek nyo ni Kerre bibedo i polo. (Jon 20:6-10; Tic 1:6) Ngec man ni dano twero doko cwec me cwiny kun bedo laloc i Ker me polo onongo obedo gin manyen bot Petero. I nino ma kibatija en ki cwiny maleng kun man miye gen me cito i polo, en ocako niang pwony pa Yecu ma lubbe ki lok meno.
8. Ngec ango ma jo ma kiwirogi ki “romi mukene [-ni]” gitye kwede?
8 Pwony mogo ma onongo lupwonnye pa Yecu pe guniang iye con dong guniang iye i nge bino pa cwiny maleng. Pi teko pa cwiny maleng, Lukricitayo ma gucoyo Ginacoya i leb Grik gutito botwa yub me aura pa Jehovah. (Ep. 3:8-11, 18) I kare-ni, jo ma kiwirogi ki “romi mukene[-ni]” ducu gipwonyo dok giniang lok me ada acel-li. (Jon 10:16) Tika ipwoyo ngec ki niango me ginacoya ma cwiny maleng mini?
Paulo “Opong ki Cwiny Maleng”
9. Jami ango ma Paulo otimo pi teko pa cwiny maleng?
9 Inge Pentekote 33 K.M., ngat mukene dok onongo mic me cwiny maleng. Ngat meno obedo Caulo, ma odoko Paulo. Cwiny maleng okonye me timo jami ma konyowa i kare-ni. Cwiny meno omiyo teko bot lakwena Paulo me coyo bukke 14 me Baibul. Calo Petero, cwiny pa Lubanga okonye me niang dok me coyo lok i kom gen me kwo i polo labongo to. Pi teko pa cwiny maleng, Paulo ocango dano, oryemo cen dok bene ocero dano muto. Ento, teko meno ma en onongo-ni onongo tye me tiyo gin mukene ma pire tek, ma lutic pa Lubanga i kare-ni gimito, kadi bed pe gitimo tango.
10. Cwiny maleng okonyo Paulo nining me lok?
10 Paulo, ma onongo “opong ki cwiny maleng[-ngi]” oloko ki tekcwiny i kom tim tyet. Man okelo adwogi maber i kom gabuna me Caiprac, ma obedo ka winyo lok ducu ma Paulo obedo ka lokone-ni. Gabuna meno oye lok ada, “pien obedo ka uro kit pwony ma gimiyo” i kom Jehovah. (Tic 13:8-12) Paulo onongo ngeyo ni cwiny maleng pire tek ka odok i kom tito lok me ada. (Mat. 10:20) I ngeye, Paulo dok okwayo lwak me kacokke me Epeco ni guleg pire wek ‘Lubanga oyab doge, omiye gin ma myero eloki.’—Ep. 6:18-20.
11. Cwiny maleng otelo Paulo nining?
11 Cwiny maleng pe okonyo Paulo me lok keken, ento bene ogenge pe me lok i kabedo mogo. I kare ma onongo en tye i limone me pwony calo lamiconari, cwiny pa Lubanga aye obedo ka telo Paulo. (Tic 13:2; kwan Tic pa lukwena 16:6-10.) Jehovah pud telo lutit kwena kun tiyo ki cwiny maleng. Calo Paulo, lutic pa Lubanga giyelle me tito lok me kwena ki tekcwiny dok ki mit kom. Kadi bed ni kit ma Lubanga telo ki jone pe nen ka maleng calo i kare pa Paulogi-ca, myero wabed ki gen ni Jehovah pud tiyo ki cwiny mere maleng wek jo ma gimito winyo lok ada guwiny.—Jon 6:44.
“Tiyo i yo mapatpat”
12-14. Cwiny maleng mono tiyo i yo marom i kom lutic pa Lubanga ducu? Tit kong.
12 Tika mot ma Jehovah omiyo bot kacokke me cencwari me acel-li cuko cwiny jo ma gudyere me tiyo tic pa Jehovah i kare-ni? Kadi ningo cuko cwinygi! Nen lok ma Paulo oloko bot kacokke me Korint ma lubbe ki mic pa cwiny maleng i karene: ‘Mot tye ma kitgi patpat, ento cwiny tye acel. Tic ma gitiyo pi Rwot bene tye ma kitgi patpat, ento Rwot tye acel. Tek[o] pa Lubanga tiyo i yo mapatpat, ento Lubanga acel-lu aye ma tiyo i yo ducu ki pi jo ducu.’ (1 Kor. 12:4-6, 11) I ada, cwiny maleng tiyo i yo mapol i kom lutic mapat pat pa Lubanga pi tyen lok moni. Pi meno, cwiny maleng tiyo ki “romi manok” wa ki “romi mukene[-ni]” bene. (Luka 12:32; Jon 10:16) Pe tiyo marom i kom jo ducu me kacokke.
13 Me laporre, luelda ki cimogi pi teko pa cwiny maleng. (Tic 20:28) Ento pe jo ducu ma kiwirogi tiyo calo luelda i kacokke. Dong man tere gonye ningo? Ni cwiny pa Lubanga tiyo i yo mapatpat i kom dano me kacokke.
14 Cwiny ma Lubanga miyo bot jo ma kiwirogi-ni aye “cwiny me bedo litino” pa Lubanga, man obedo cwiny acel ma Jehovah ocero kwede ki Wode me amara me doko cwec me cwiny i polo. (Kwan jo Roma 8:11, 15.) En cwiny acel-li aye Jehovah ocweyo kwede ki jami ducu ma i polo ki lobo. (Acak. 1:1-3) En cwiny acel-li aye Jehovah otiyo kwede i kom Bejalel omiyo en oyubo jami ma mitte i ot me kema, omiyo Samson teko me timo jami me tek kom, dok okonyo Petero me wot i wi pii. Pi meno omyero dong pe watam ni bedo ki cwiny maleng te lokke ni bedo ngat ma kiwiro. Wiro ngat moni ki cwiny maleng obedo tic acel pa cwiny maleng, dok Lubanga aye yero ngat moni ma mito awira-ni, meno obedo ticci.
15. Lubanga mono bimiyo batija ki cwiny maleng bedo pi nakanaka? Tit kong.
15 Teko pa cwiny pa Lubanga obedo ka tic i yo mapatpat i kom lutic ma lugen pa Lubanga wacon, pi mwaki alip mapol ata ma peya wiro dano ocakke. I Pentekote 33 K.M., aye ticce manyen me wiro dano-ni ocakke iye, ento pe bimedde pi naka. Batija ki cwiny maleng bigik, ento cwiny maleng bimedde ki tic wek lutic pa Lubanga omedde ki tiyo miti pa Lubanga.
16. Cwiny maleng tye ka konyo lutic pa Lubanga i kare-ni me timo gin ango?
16 Gin ango ma dong tye ka timme i lobo i kare-ni ma lubbe ki teko pa cwiny maleng? Niyabo 22:17 miyo lagamme ni: “Cwiny maleng kacel ki Nyako ger gitye ka wacci, ‘Bin!’ Ngat ma owinyo lok man bene myero ogam ni, ‘Bin’ Ngat ma orwo neko myero obin, wek ngat ma mito bene omat pii me kwo labongo wel.” Cwiny pa Lubanga miyo Lukricitayo i kare-ni gicwalo lwongo ma Jehovah omiyo pi “ ngat ma mito” mato pii me kwo. Lukricitayo ma kiwirogi gitelo yo itimo man. Ento, romi mukene-ni bene konyo korgi me cwalo lwongo man bot jo ma giwinyo. Dul aryo magi ducu ginote kacel i timo man pi teko pa cwiny maleng acel-li. Dul magi gunyutu dyeregi bot Jehovah ki nongo batija “i nying Won ki Wod ki cwiny maleng.” (Mat. 28:19) Dok gin ducu giye ni cwiny pa Lubanga oti i kwogi, wek onyak nyige i kwogi. (Gal. 5:22, 23) Calo jo ma kiwirogi, romi mukene-ni giye ni cwiny man okonygi. Kun giye konye, giyelle me kwo i yo ma Jehovah mito.—2 Kor. 7:1; Yabo. 7:9, 14.
Medde ki Penyo pi Cwiny Maleng
17. Watwero nyutune nining ni watye ki cwiny pa Lubanga?
17 Kadi bed itye ki mot me kwo i polo nyo i lobo kany pi naka, Jehovah twero mini “teko adwong” wek igwok genne ni pi nongo mot. (2 Kor. 4:7, Baibul me leb Lango) Medde ni ka tito lok me ker-ri bikelo yet i komi. Ento wi myero opo i lok ma Petero owaco ni: “Wutye ki [“yomcwiny,” NW] ka giyetowu pi nying Kricito, pien nongo cwiny me deyo, ma en cwiny pa Lubanga, bedo i komwu.”—1 Pet. 4:14.
18, 19. Jehovah bikonyi nining ki cwiny mere maleng, dok in dong imoko tammi me timo gin ango ma lubbe ki lok man?
18 Cwiny maleng obedo mot me nono ma Lubanga miyo bot jo ma giyenyo cwiny man. Pe medo boti teko keken ento medo bene mitini me tiyo tic pa Lubanga ki cwinyi ducu. “Pien Lubanga aye ma tye ka tic ki i cwinywu, kun miyowu miti ki teko me tic.” Mic mamwonya pa cwiny maleng kacel ki yellewa me mako “lok me kwo dong matek,” biminiwa kare me ‘tiyo tic me cobo larwa kenkenwa ki lworo kacel ki myelkom,’—Pil. 2:12, 13, 16.
19 Ket genni ducu i kom cwiny pa Lubanga, dok i ket cwinyi ducu i ticce. Medde ki nongo ngec i tic ducu ma kimini, dok leg Jehovah pi kony. (Yak. 1:5) En bimini gin ma mitte boti wek iniang Lokke, icir peko me kwo, kun itito kwena maber. “Wulegi, ci gibimiyo botwu; wuyeny, ci wubinongo, wudwong doggola, gibiyabo botwu” man bene kwako nongo cwiny maleng. (Luka 11:9, 13) Medde ki kwayo Jehovah wek okonyi me gwoko genne ni calo lugen ma yam con ki me kare-ni ma cwiny maleng pa Lubanga otelogi-ni.
Tika Iromo Titone?
• Calo Maliam, kit cwiny ango ma watwero nyutone wek wanong mot maber?
• Cwiny maleng otelo Paulo nining i ticce me pwony?
• Cwiny maleng telo lutic pa Lubanga i kare-ni nining?
[Peny me Kwan]
[Cal ma tye i pot karatac 26]
Cwiny pa Lubanga okonyo Paulo me loyo teko pa cwiny maraco
[Cal ma tye i pot karatac 28]
I kare-ni, cwiny maleng tye ka konyo Lukricitayo, kadi bed gitye ki gen me kwo ka mapat pat
