Lweny ki Peko ma Poto Atura

Dong kit macalo peko ma poto atura tye ka timme teretere dok racce tye ka medde ameda-ni, gin ango ma ngat moni twero timone me lweny ki peko man? Nen kong jami ma itwero timogi ma lubbe ki peko man.

A woko ki ka ma peko man bitimme iye. Baibul waco ni, “Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada.” (Carolok 22:3) Man obedo tira mo me ryeko dok tiyo ma lube ki peko ma poto atura. Ka ce kitye ka poyo wi dano i kom peko mo ma cok timme calo oyengyeng, pii aluka nyo yamo magwar ma tye ka bino, bedo me ryeko ka jo ma gibedo ka ma gin meno cok timme iye-ni gua woko ki kunnu. Kwo pire tek kato ot nyo jami me kom.

Jo mukene ginongo ni ber me a woko ki i kabedo ma peko man twero timme iye. Ripot mo acel pa dul me UN i 2009 waco ni: “Tye kabedo mogo manok keken i wi lobo-ni ma peko ma poto atura twero timme iye kare ki kare. Pol pa peko man dok maditone bitimme i kabedo magi i anyim.” Man twero bedo lok ada pien me lapore, kabedo ma gitye i dog nam nyo kabedo ma nongo jo ma pimo piny gunongo-ni tye ma goro ki i te ngom. Ka itwero kwero ka ma kit meno nyo a woko cito ka mupore, itwero dwoko piny adwogi me peko man ma onongo myero inong.

Bed ki pulan. Ento kadi bed igwokke i yo magi ducu, pud itwero nongo ni peko man opoto i komi. Lweny ki peko man bedo yot ka onongo dong igoyo pulan woko con. Man rwatte bene ki tam ma nonge i Carolok 22:3 ma wakwano-ni. Tika dong i yubo jami mogo ma bikonyi ka gin ma kit man otimme? Buk mo acel waco ni omyero wabed ki jami ma kit magi: Jami mogo calo yatgi-ni, pii ma tye i cupa, cam ma pe balle oyot, ki dong karatac mogo ma pigi tego calo me beng nyo waraga pa LC. Bedo me ryeko ni myero wungi kacel macalo jo me ot peko mogo ma twero timme ki dong kit ma wutwero lweny kwede ki acel acel.

Bed ki wat macok ki Lubanga. Man bikonyi i kare mo keken. Baibul waco ni “Won ma lakica, Lubanga ma kweyo cwiny dano ducu. En kweyo cwinywa i can ducu ma walimo.” Tyeng mukene waco ni Lubanga “kweyo cwiny jo ma can obwoyogi.”​—2 Jo Korint 1:3, 4; 7:6.

Ki lok ada Lubanga ngeyo maber adada peko ma bino i kom jo ma giwore. En tye Lubanga ma lamar dok cuko cwiny dano i yo mapat pat. (1 Jon 4:8) Pe myero kileg pi tango  ento pi cwiny maleng ma en aye teko ma konyo i kare mo keken. Cwiny maleng poyo wic i kom wang Baibul mogo ma kweyo cwiny jo ma nongo gitye i kwo matek. Man miyo giwinyo calo Daudi ma obedo kabaka macon me Icrael, ma owaco ni: “Kadi bed awot i nota me tipo to, pe abilworo gin marac mo; pien in itye kweda; tongngi ki odooni me kwat gimiyo cwinya bedo tek.”​—Jabuli 23:4.

Lukricitayo gikonyo luwotgi. I cencwari mukwongo, lanebi mo ma nyinge Agabo otito ni “wang mo kec bipoto i lobo ducu; ci otimme i kare pa Kalaudio.” Kec man ogudo jo mapol ma gubedo lupwonnye pa Yecu i Judaya. Lukricitayo ma gibedo ka mukene gutimo gin ango i kare ma guwinyo pi peko man? Lok ma kicoyo i Baibul nyuto ni: “Lupwonnye gumoko ni ngat acel acel omi kony ki utmego ma gibedo i Judaya macalo twero.” (Tic pa Lukwena 11:28, 29) Gin gumiyo kony bot Lukricitayo luwotgi pi mar ma gitye kwede.

Ka peko mo madit opoto i kare-ni, lutic pa Lubanga gimiyo kony bot luwotgi i yo acel-lu. Lucaden pa Jehovah kingeyogi pi konyo luye luwotgi. Me labolle, i kare ma oyengyeng otimme i lobo Chile i Febuari 27, 2010, Lucaden pa Jehovah gumiyo kony oyotoyot bot luwotgi. Dako mo ma nyinge Karla, ma gange pii ma tinge malo pi oyengyeng obalo woko, owaco ni: “Abedo ki kwe cwiny mada i kare ma aneno Lucaden luwotwa ma gua ki i kabedo mukene guo orwone me konyowa. Wangeyo maber ni Jehovah okweyo cwinywa kun tiyo ki jo magi ma gudyere-ni. Awinyo ni an kara kimara dok kigwoka.” Kwaro pa lamego man, oketo wange mot ka neno kony ma kitye ka miyone-ni kadi bed en pe tye Lacaden. En owaco ni: “Man pud dong pat adada ki gin ma aneno i dinina pi mwaka mapol.” Gin man ma en oneno ki wange-ni, oweko en openyo Lucaden pa Jehovah ni gukwan Baibul kwede.

Bedo kacel ki jo ma gimaro Lubanga twero bedo me kony i kare ma peko opoto i kom ngat moni.

[Cal ma tye i pot karatac 6]

Tika dong iyubo jami mogo ma bikonyi ka peko man otimme?

[Cal ma tye i pot karatac 7]

Pe myero kileg pi tango ento pi cwiny maleng ma en aye teko ma konyo i kare mo keken

[Cal ma tye i pot karatac 7]

Lukricitayo gikonyo luwotgi me lweny ki adwogi me peko ma poto atura

[Cal ma tye i pot karatac 7]

“Awinyo ni an kara kimara dok kigwoka”