Miyo Gityerwa Ki Cwinywa Ducu Bot Jehovah

“Tic mo keken ma wutiyo, wuti maber ki cwinywu ducu, macalo wutiyo bot Rwot [Jehovah].”​—KOL. 3:23.

NEN KONG KA ITWERO GAMONE:

Watwero woro Jehovah i kwowa me nino ducu nining?

Gityer ango ma wamiyogi i worowa bot Jehovah?

Wamiyo jami me kom ma watye kwede bot Jehovah nining?

1-3. (a) Pi to pa Yecu mono dong weko Jehovah pe mito gityer mo keken ki botwa? Tit kong. (b) Lapeny ango ma bino ma lubbe ki gityer me kare-ni?

 JEHOVAH otito bot lwakke i Cencwari me acel K.M. ni, ginkok pa Yecu dong otyeko juko woko tic pa Cik ma en omiyo bot Moses. (Kol. 2:13, 14) Gitum me awanga ducu ma onongo Lujudaya gubedo ka miyone pi mwaki mapol ata-ni pe mitte pien ticce dong pe tye. Cik-ki otyeko tiyo gin ma onongo mitte me bedo macalo lagwokgi “nio ka Kricito obino”—Gal. 3:24.

² Man pe te lokke ni Lukricitayo pe gitye ki mitti i kom gitum. Ento Lakwena Petero otito ni myero watyer “gitum me cwiny ma Lubanga pwoyo, pi Yecu Kricito.” (1 Pet. 2:5) Medo i kom meno bene, lakwena Paulo onongo dong otito atir ka maleng ni kwo pa Lakricitayo ma odyere tye macalo “gitum.”​—Rom. 12:1.

³ Pi meno, Lakricitayo miyo gityer bot Jehovah ki miyo jami mogo bot Lubanga nyo jalo gin mo pi en. Ma lubbe ki ngec ma watye kwede i kom jo Icrael, wan watwero ngeyone nining ni gityerwa i kare-ni tye gin ma Jehovah cwako?

I KWOWA ME NINO DUCU

4. Gin ango ma myero wiwa pe owil iye madok i kom tic ma watimo nino ducu?

⁴ Kit ma wakwo kwede nino ducu weko bedo tek botwa me neno tic ma watimogi calo miyo gityer bot Jehovah. Tic me i ot, cukul, dog tic ma watye kwede, wilo wil, ki mukene mapol ata gitwero nen calo pe gudo watwa ki Jehovah. Ento, ka ce in dong idyero kwoni bot Jehovah nyo itye ki mitti me timone ma cokcok-ki, ci kit ma itero kwede jami ma itimo nino ducu pe obedo gin me tuko. Wan watye Lukricitayo  dyeceng ki dyewor lung. Omyero wati ki cik me Ginacoya i yo me kwowa ducu. Man aye omiyo Paulo ocuko cwinywa ni: “Tic mo keken ma wutiyo, wuti maber ki cwinywu ducu, macalo wutiyo bot Rwot, ento pe pi dano”​—Kwan Jo Kolocai 3:18-24.

5, 6. Lok mene me Baibul ma gudo kwowa ki rukkewa me nino ducu?

⁵ Tic ma Lakricitayo timo nino ducu pi kwone pe tye but ticce pi Lubanga. Ento, kit ma Paulo ocuko kwede cwinywa ni myero wati ‘ki cwinywa ducu macalo watiyo bot Jehovah-ni,’ miyo watamo i kom kit yo me kwowa ducu. Dong wan watwero tic ki lok man i kwowa nining? Tika jami ma watimogi kacel ki rukkewa kelo deyo cawa ducu? Nyo gwok ka watye ka timo jami me nino ducu, tika wanongo tek me nyutte ni wan Lucaden pa Jehovah pi kit ma watye kwede nyo kit ma warukke kwede? Pe omyero wawek gin ma kit meno otimme i komwa! Jo pa Jehovah pe gimito timo gin mo keken ma balo nying Lubanga.​—Ic. 43:10; 2 Kor. 6:3, 4, 9.

⁶ Kong dong wanenu kit ma mitti me tic ‘ki cwinywa ducu, macalo watiyo bot Jehovah’ gudo kwede kwowa i yo mapat pat. Ka wamedde ki nenone, wi opo ni gityer ducu ma Luicarel gumiyo bot Jehovah onongo kadi ningo myero obed maber loyone ki i kin jami ma gitye kwede.—Nia 23:19.

KIT MA GUDO KWEDE KWONI

7. Dyere pa Lukricitayo kwako gin ango?

⁷ I nino ma idyere kwede bot Jehovah, imiyo kwoni ducu, pe kumeno? Meno dong rom aroma ma iwacci i kwoni ducu ibiketo Jehovah bedo mukwongo. (Kwan Jo Ibru 10:7.) Meno obedo moko tam maber atika. Labongo akalakala mo keken in dong olo to ineno ni, ka itute me timo mitti pa Jehovah i kom gin moni, adwogine bedo maber adada. (Ic. 48:17, 18) Jo pa Lubanga gitye jo maleng dok cwinygi yom pien meno aye kit ma Ngat ma minigi pwony tye kede.​—Levi. 11:44; 1 Tem. 1:11.

8. Ngeyo ni Jehovah otero gitum i kare macon calo gin maleng gudowa nining?

⁸ Gityer ma Luicrael gimiyo bot Jehovah onongo kineno ni obedo gin maleng. (Levi. 6:25; 7:1) Nyig lok me leb Ibru ma kigonyo tere ni “gin maleng” te lokke tye ni pokke woko ken, nyo lonyo gin moni pi Lubanga. Wek Lubanga ojol gitum ma wamine, omyero wanen ni obedo mupoke woko pat ma pe ocide ki jami me lobo-ni. Omyero pe wamar gin mo keken ma Lubanga dagi. (Kwan 1 Jon 2:15-17.) Nen ka maleng ni omyero wagwokke ki gin mo keken ma twero miyo wanen marac i wang Lubanga.  (Ic. 2:4; Yabo. 18:4) Te lokke bene tye ni omyero wagwokke pe me moro wangwa ka neno jami macilo nyo me goyo cal jami ma kit meno i wiwa.​—Kol. 3:5, 6.

9. Kit ma Lakricitayo tero ki jo mukene pire tek lakwene, dok pingo?

⁹ Paulo ocuko cwiny Lukricitayo luwote ni: “Pe omyero wiwu owil ka timo gin maber, ki poko jami ma wutye kwede bot jo mukene; pien gitum macalo meno yomo cwiny Lubanga.” (Ibru 13:16) Pi meno bedo ma cingi yot bot jo mukene tye gin ma Jehovah neno calo gityer mupore pire. Paro pi jo mukene obedo alama ma nyuto Lukricitayo me ada.​—Jon 13:34, 35; Kol. 1:10.

GITYER MA WAMIYO I WOROWA

10, 11. Jehovah mono neno ticwa me pwony ki dong worowa nining, dok man omyero owek watim ngo?

¹⁰ Yo acel ma ngene adada ma wan macalo Lukricitayo watwero timo kwede gin maber bot jo mukene aye “gen ma watuco.” Tika itiyo ki kare ducu ma onen me miyo caden? Paulo olwongo tic man ma pire tek ma Lukricitayo tiyo-ni ni obedo “pakwa bot Lubanga macalo gitum ma gityero bot Lubanga.    .pwoc ma wamiyo ki dogwa ka watuco nyinge [Lubanga]” (Ibru 10:23; 13:15; Koc. 14:2) Pud waromo loko jami mapol madok i kom cawa malac ma wacwalo i tito kwena me Ker-ri, dok Cokke mapol me ticwa kiyubogi me konyo tugo tamwa i kom lok meno. Me ketone macek, kit ma ticwa me pwony kacel ki miyo caden ma pe wayubbe iye gitye i kin “pakwa bot Lubanga i kare ducu macalo gitum ma gityero bot Lubanga,” but worowa, gityer meno myero obed gin maber loyo ducu ma myero wami bote. Kadi bed kit ma watye kwede tye pat pat, cawa ma wacwalo i tito kwena nyuto pwocwa i kom tic ma Lubanga ominiwa.

¹¹ Kare ki kare Lukricitayo gicwalo cawa i woro Lubanga kekengi nyo i gurup. Jehovah mito ni watim meno. Tye ni pe dong mitte ni myero waket gingi me bedo ka lubo yweyo me Cabat nyo wot kare ki kare me cito ka kwero kwer i Jerucalem. Ento kwer macon ca gitye ki jami ma leyo ka wanggi i kwo pa Lakricitayo. Lubanga pud mito ni wakwany kare ma watimo ki jami mukene wek wakwan Lokke, waleg lega ki dong wanywak i cokke pa Lukricitayo. Dok bene  luwi odi i gangi pa Lukricitayo myero gudor yub me woro pi jo me ot. (1 Tec. 5:17; Ibru 10:24, 25) Ma lube ki tic ma watimogi macalo Lukricitayo, bedo ber mada ka wapenye kekenwa ni, ‘Tika mono aromo ilo malo rwom me worona?’

12. (a) Odok eceta ma onongo kitiyo kwede i woro me kare macon ca kitwero porone ki ngo i kare-ni? (b) Kit ma kiporo kwede ni myero owek waleg nining?

¹² Kabaka Daudi owero bot Jehovah ni: “Wek legana obed i nyimi macalo odok eceta ma giwango ma duny makur.” (Jab. 141:2) Kong itam manok i kom legani ma ilego​—tyen adi ma ilego nino ki nino ki dok ka a ki i cwinyi. Buk me Niyabo poro “lega pa jo pa Lubanga” ki odok eceta pien ni lega ma Jehovah jolo duny malo ma ngwecce kur. (Yabo. 5:8) I kare macon i Icrael, odok eceta ma onongo ki wango kare ki kare i keno tyer pa Jehovah onongo kiyubo maber. Jehovah onongo jolo gityer awanga meno keken ka jamine ducu kitimo ma lube ki cikke ma en oketo. (Nia 30:34-37; Levi. 10:1, 2) I yo acel-lu, ka walega kun a ki i cwinywa, ci waromo bedo labongo akalakala ni Jehovah winyo legawa.

MIYONE KI GAMONE

13, 14. (a) Gin ango ma Epaprodito ki kacokke me Pilipi gutimo pi Paulo, dok lakwena Paulo owinyo nining? (b) Wan watwero lubo lanen pa kacokke-ni ki pa Epaprodito nining?

¹³ Mot me cente ma wabolo me konyo ticwa i wi lobo ducu twero bedo rom aroma ki gityer, kadi bed wamiyo madit nyo matidi. (Mar. 12:41-44) I cencwari me acel K.M., kacokke me Pilipi gucwalo Epaprodito i Roma wek ocit omi kony ki Paulo. Lawangi meno ma gin gucwalo ni otero cente ma jo me kacokke gucwalo macalo micgi. Man pe obedo tyen mukwongo ma jo me Pilipi gunyuto kwede yot cinggi bot Paulo. Gin gunyuto mar man pien mitgi onongo tye ni myero gikony Paulo wek pe obed ka paro pi lok me lim wek omiye kare malac me tito kwena. Paulo owinyo ningo i kare ma onongo mic meno? En olwongo ni meno obedo calo “gin ma ngwecce kur ma gityero bot Lubanga, ma en opwoyo.” (Kwan Jo Pilipi 4:15-19.) Paulo gin ki Jehovah gupwoyo matek tutwal gin ma jo Pilipi gutimo-ni.

¹⁴ I yo acel-lu i kare-ni, Jehovah bene pwoyo tutwal mot me lim ma wabolo me kony ticwa me pwony i wi lobo lung. En ocikke ni ka wamedde ki keto jami ma lube ki Ker-ri bedo mukwongo i kwowa, ci en bigwokowa kun miniwa gin ducu ma mitte.​—Mat. 6:33; Luka 6:38.

NYUT PWOCCI

15. Jami ango ma miyo ibedo ki pwoc bot Jehovah?

¹⁵ Bitero botwa kare ma lac ka ni wacak tito tyen lok madwong ma watye kwede me bedo ki pwoc bot Jehovah. Nino ducu omyero wapwoye pi miniwa mic me kwo. En miniwa jami ducu ma mitte pi kwowa calo cam, ginaruka, kabedo ki dong yamo ma waywe kwede-ni. Medo i kom meno, niyewa ma jenge i kom ngec matir ma watye kwede miyo wabedo ki gen. Obedo gin mupore atikatika ni wawor Jehovah dok wamiye gityer me pak pi ngat ma en obedo ki pi gin ducu ma en timo piwa.​—Kwan Niyabo 4:11.

16. Omyero wanyut pwoc pi ginkok pa Kricito-ni ningo?

¹⁶ Kit ma waneno kwede ipwony mukato, mic ma pire tek ma Lubanga omiyo botwa aye ginkok pa Kricito. Man aye yo madit loyo ma Lubanga onyuto kwede marre piwa. (1 Jon 4:10) Watwero  dok i kom marre ni nining? Paulo owaco ka maleng ni: “Mar pa Kricito loyo kwowa, pien dong wangolo kop kit man ni, ngat acel oto pi jo ducu, meno mumiyo jo ducu dong guto. En yam oto pi dano ducu, wek jo makwo pe gumedde ki bedo kwo pigi kengi, ento gubed ki kwo pi ngat ma yam oto ka ocer pigi ca.” (2 Kor. 5:14, 15) I yo ma yot, Paulo onongo tye ka waco ni ka wapwoyo kica pa Lubanga ma pe lokke-ni, ci wabitic ki kwowa me woro Lubanga gin ki Wode. Wanyuto mar ki pwocwa pi Lubanga ki Kricito ki miyo woro kacel ki bedo ki miti me tito lok me kwena kun waloko dano me lubo kor Yecu.​—1 Tem. 2:3, 4; 1 Jon 5:3.

17, 18. I yo ango ma jo mukene gumedo kwede ticgi ma tye macalo gityer me pak bot Jehovah? Mi labol acel.

¹⁷ Tika itwero medo malo rwom me tyer me pak ma imiyo bot Lubanga? I nge lwodo lok i kom jami ducu mabeco ma Jehovah otimo pigi, jo mapol guketo yub i kwogi kun gikwanyo kare me medo cawa me ticgi me tito kwena me Ker-ri nyo timo tic mukene ma lubbe ki Ker-ri. Jo mukene gutiyo macalo painia pi tutuno pi dwe acel nyo makato, mukene gudoko painia ma rii. Mogo gumiyo kony i gedo Odi ma kwako lok me Ker-ri. Magi mono pe gitye yo mabeco mada ma ngat moni twero nyuto kwede pwocce? Ka ce kitimo ki cwiny matir—me nyuto pwoc—ci tic magi Lubanga jologi.

¹⁸ Lukricitayo mapol guwinyo calo gitye ki banya me nyuto pwoc bot Jehovah dok man otugo cwinygi me tic. Ngat acel i kin jo meno obedo Morena. Anyaka-ni obedo ka yenyo lagam me lapeny mapol ma tye kwede madok i kom Lubanga i dinine me Katoli ma en odongo iye, ki dok oyenyo i lok pa latam matut me lobo me Acia. Ento i kabedo aryo magi ducu en pe omedo ki nongo lagam ma mine yengo. Nikwanyo i kare ma en ocako kwano Baibul ki Lucaden pa Jehovah ka dong en onongo lagam ma miye yengo. Morena owinyo ni myero emi pwocce bot Jehovah pi lagam mamwonya magi ki dok kit ma oyubo kwede kwone me bedo maber omiyo en onongo mito ni enyut pwocce i tic me pwony ki tekone ducu. Lamego ni ocako tic calo painia pi tutuno i nge nongo batija dok omedde me timone kare ki kare, ci i nge kare manok en odoko painia ma rii. Meno obedo mwaki 30 angec, ento Morena pud tye ka medde ki tic pi Jehovah pi kare malac.

19. I yo ango ma itwero medo kwede ticci ma tye macalo gityer-ri bot Jehovah?

¹⁹ Wangeyo gire ni Jehovah tye ki luticce mapol ma gin lugen dok kit me kwogi pe minigi kare me bedo calo painia. Gin mo keken ma watwero tiyone i tic pa Lubanga, wan ducu waromo miyo bote gityer ma en jolo. I kitwa, omyero walubu kit matir, ma wiwa po ni wan Lucaden pa Jehovah cawa ducu. I niye, waketo genwa ducu i kom cobbe pa yub pa Lubanga. Madok i kom tic, wakonyo me yaro lok me kwena maber. Pi meno dong wamedde wunu ki miyo gityer ki cwinywa ducu bot Jehovah.

[Peny me Kwan]

[Boro buk i pot karatac 27]

Tika ber pa Jehovah tugo cwinyi me medo ticci ma tye macalo gityer me pak?

[Cal ma tye i pot karatac 25]

Tika i tiyo ki kare ducu ma onen me miyo caden?