Nong Pwony Ki I ‘Guti Me Lok Ada Kikome’
Nong Pwony Ki I ‘Guti Me Lok Ada Kikome’
“I cik itye ki ngec ki lok ada kikome.”—ROM. 2:20.
YENY LAGAM PI LAPENY MAGI:
Gityer ma onongo kimiyo ma lubbe ki Cik ma kimiyo bot Moses-ni gicung pi gin ango?
Gityer ma Luicrael gubedo ka miyone i kare ca ni rom aroma ki pa Lukricitayo i kare-ni nining?
Gin ango ma pire tek ka ni Jehovah ojol gityer moni nyo pe?
1. Pingo mitte ni waniang kit ma Cik ma kimiyo bot Moses onongo pire tek kwede?
PIRE tek ni waraga ma lakwena Paulo ocoyogi-ni gikonyowa me niang Cik mapol mapat pat ma kimiyo bot Moses. I waragane ma ocoyo bot Luibru, en otito kit ma Yecu, macalo ‘lalamdog ma lagen’ otyero kicel keken ginkok me ‘kwanyo bal’ pa jo ma giketo niyegi i gityer man wek gunong ‘larre matwal.’ (Ibru 2:17; 9:11, 12) Paulo otito ni ot me kema onongo tye macalo ‘lanyut me jami ma tye i polo’ dok Yecu ocung pi “gicikke” maber makato ma Moses Ocung pire-ni. (Ibru 7:22; 8:1-5) I kare pa Paulogi ca, gonyo tyen lok me Cik-ki onongo pire tek adada bot Lukricitayo dok wa i kare-ni bene. Cik-ki konyowa me niang maber mic ma Lubanga omiyo piwa.
2. Pingo Lujudaya ma gin Lukricitayo onongo gingeyo Cik-ki makato Lurok?
2 I kare ma Paulo ocoyo waragane bot Lukricitayo me Roma, lokke mukene onongo okemo jo mogo ma i kacokke ma gin Lujudaya dok kipwonyogi ki Cik ma kimiyo bot Moses. En owaco ni jo ma kit meno, pienni gingeyo Cik-ki ki wigi, “ngec ki lok ada kikome” madok i kom Jehovah kacel ki cikke matir ma igi lac onongo tye tung cinggi. Niang “lok ada kikome” kacel ki woro okonyo Lujudaya ma gin Lukricitayo kun tirogi, pwonyogi, dok omiyo gupwonyo jo ma onongo gin luming ma pe gingeyo Cik ma Jehovah omiyo bot jone.—Kwan Jo Roma 2:17-20.
LANYUT ME GITYER PA YECU
3. Adwogi maber ango ma wanongo ka wakwano lok i kom gityer pa Lujudaya?
3 Guti me lok ada kikome ma Paulo oloko iye-ni pire tek botwa i kare-ni wek waniang yub pa Jehovah. Pwony ma Lubanga omiyo ki jone kun wok ki i Cik ma kimiyo bot Moses pire pud tek wa i kare-ni. Kun waweko man bedo i wiwa, kong dong wanenu but Cik acel—kit ma gityer mapat pat okonyo Lujudaya nio ka Kricito obino kun miyo giniang gin ma Lubanga mito ki botgi. Dok kit macalo jami ma Jehovah mito ki bot luticce pe lokke-ni, wabineno bene kit ma cik ma Lubanga omiyo bot Luicrael ma lubbe ki gityer romo konyowa me ngiyo kit ma watiyo kwede pire.—Mal. 3:6.
4, 5. (a) Cik ma kimiyo bot Moses onongo poyo wi jo pa Lubanga i kom gin ango? (b) Ngo ma cik ma Lubanga omiyo pi gitum-mi onongo nyuto?
4 Lujudaya me kare macon onongo wigi pe twero wil i kom Cik ma kimiyo bot Moses, pien poyo wigi ni gin lubalo. Me laporre, onongo mitte ni ngat mo keken ma ogudo dano muto myero olonnye. Dok omyero kinek roya makwar maberre ma kome yot ci kiwang. Burune onongo kigwoko pi yubo “pii me lwoko kwer,” dok kikiro i kom ngat ma tye ka lonnyene-ni i nino me adek ki abiro i nge gudo kom dano muto. (Wel 19:1-13) Man onongo bene poyo wic ni bal kacel ki roc kobo i kare me nywal, ma oweko dako ma onywal onongo kome bedo keni pi kare mo, ka dong ingeye miyo gitum me kwanyo bal.—Levi. 12:1-8.
5 Gitum me lee onongo mitte nino ki nino dok pi tyen lok mapat pat wek okwany bal. Kadi bed lami gitum meno onongo ngeyo nyo pe—gitum meno med ki ma kimiyo i ot pa Jehovah—ducu onongo gitye “lanyut” me gitum pa Yecu ma roc pe iye.—Ibru 10:1-10, Baibol pa Katoli.
CWINY ME MIYO GITYER
6, 7. (a) Gin ango ma wi Luicrael onongo myero opo iye ka giyero lee me gitum, dok man onongo nyuto gin ango? (b) Lapeny mene ma myero wapenye kwedgi?
6 Gin ma onongo pire tek ma lubbe ki lee ducu ma kimiyo me gitum bot Jehovah aye ni omyero gubed lee ma “komgi becone”—pe ma wanggi oto, owanne, ongol nyo ongwalo, nyo komgi lit. (Levi. 22:20-22) Ka Luicrael gimiyo nyig yadi nyo bel me wi mwaka bot Jehovah, omyero gumi me “wi mwaka” dok “maberre.” (Wel 18:12, 29) Jehovah onongo pe mito gityer ma rwomme lapiny. Gitum me lee-ni onongo tye lanyut me gityer pa Yecu ma bal nyo roc pe iye dok Jehovah onongo bimiyo gitum ma wele dit dok pire tek bote me kwanyo bal pa dano.—1 Pet. 1:18, 19.
7 Ka ngat ma tye ka miyo gitum-mi onongo tye ki pwoc pi ber pa Jehovah, ci en mono onongo pe bibedo ki yom ic me yero lee maber loyone? Ngat meno onongo romo yero me miyo gitum maber-re nyo pe. Ento, en onongo ngeyo ni gityer ma pe mabecone pe yomo cwiny Jehovah, pien meno nongo nyuto ni miyo gityer-ri obedo yec mapek adada dok me dic. (Kwan Malaki 1:6-8, 13.) Man myero omi wapenye kekenwa ni: ‘Pingo atye ka tic pi Jehovah? Mono mitte ni alok kit ma atiyo kwede pi Jehovah? Tika atye ka tic pire ki cwinya ducu?’
8, 9. Ngo ma wapwonyo ma lubbe ki cwiny me miyo gityer ma Luicrael gunyuto-ni?
8 Ka gityer ma Laicrael moni miyo bot Jehovah onongo miyo labongo dic dok ki pwoc, me laporre, gitum awanga nyo me kwac pi nongo cwak, ci yero lee me atyera onongo pe bedo tek. Laicrael-li onongo cwinye bedo yom me miyo gityer maber loyone. Lukricitayo i kare-ni pe gityero lee kit ma tye kwede i Cik ma kimiyo bot Moses, ento gimiyo gityer ka gitiyo ki cawagi, kerogi kacel ki jamigi i tic pi Jehovah. Lakwena Paulo oloko i kom “pwoc ma wamiyo ki dogwa” pi gen ma watye kwede kun ‘watimo gin maber, ki poko jami ma watye kwede bene bot jo mukene’ macalo gityer ma yomo cwiny Lubanga. (Ibru 13:15, 16) Cwiny ma jo pa Jehovah gitye kwede i timo jami macalo magi nyuto pwoc kacel ki yomcwinygi pi jami ducu ma Lubanga otimo pigi. Calo jo Icrael me kare ca, wan bene i kare-ni omyero wangi kit ma watiyo kwede pi Lubanga ki dok gin mumiyo watye ka tic pire.
9 Ento ngo ma Laicrael myero otim ka Cik ma Lubanga omiyo bot Moses mito ni ngat moni otyer gitum me bal nyo gitum me tingo alii? Kit macalo gityer magi onongo mitte-ni, itamo ni onongo bibedo tek tutwal pi jo Icrael me miyo gityer magi labongo dic? (Levi. 4:27, 28) Onongo pe romo bedo tek botgi ka ngat ma tye ka miyo gityer-ri tye ki cwiny me gwoko wat maber i kin en ki Jehovah.
10. Me yubo wat ma oballe, “gityer” ango ma Lakricitayo myero omi?
10 I kare-ni bene, iromo nongone ni icwero cwiny Lakricitayo lawoti labongo tamone. Cwiny ma ngoli kop-pi romo miyo cwinyi bedo ka poto ni itimo bal. Mono pe itamo ni ngat ma tero ticce pi Jehovah calo gin ma pire tek tute ki kerone ducu me yubo balle? Meno te lokke ni kwayo kica ki bot ngat ma i tono cwinye-ni, ento ka balle dit, ci omyero wanong kony ki bot luelda. (Mat. 5:23, 24; Yak. 5:14, 15) Dok roco wat i kinwa ki lawotwa nyo Lubanga pi bal ma watimo mito ni watim gin mo olo iye. Kadi bed kumeno, ka wamiyo “gityer” ma kit meno, wayubo wat i kinwa ki Jehovah ki dong omegiwa dok weko cwinywa pe ngoliwa kop. Man miniwa gen ni yo pa Jehovah aye ber loyo ducu.
11, 12. (a) Gin ango ma onongo timme i kare me miyo gityer lakwecwiny? (b) Ngec i kom gityer lakwecwiny konyowa i woro me ada i kare-ni nining?
11 Gityer mukene ma kiketo i Cik ma kimiyo bot Moses obedo gityer me lakwecwiny. Man onongo lanyut me kuc i kin ngat moni ki Jehovah. Ngat moni kacel ki jo me ode ma gimiyo gityer-ri onongo gimwodo ringo lee meno, oromo bedo ni gimwodo ki i rum mo ma tye i ot pa Lubanga. Lalamdog ma tyero gityer-ri bene kimine ringo kit ma kimiyo bot lulamdog mukene ma gitiyo i ot pa Lubanga-ni. (Levi. 3:1; 7:31-33) Laicrael moni onongo miyo gityer-re pi tyen lok acel keken, mito ni ebed ki wat maber ki Lubanga. Meno bedo calo iwacci Laicrael-li, jo me ode, lulamdog, medo ki Jehovah gitye ka camo dek kacel ma cwinygi yom dok ki kuc.
12 Pi meno, miyo gityer lakwecwiny obedo calo lwongo Jehovah ka camo dek. Obedo twon mot madit atika bot Laicrael ka Jehovah oye lwongo ma kit meno. Ngene kene ni, pol kare lupaco meno gitedo dek mamit adada pi welo me awora ma kit meno. Gityer me lakwecwiny onongo tye but guti me lok ada kikome ma kiketo i Cik ma kimiyo bot Moses, dok onyuto ni gityer madit pa Yecu bimiyo jo ducu ma gimito bedo ki wat macok ki Lacwecgi gitwero bedo kwede. I kare-ni, watwero bedo ki wat macok ki Jehovah ka watyero jami kacel ki kerowa labongo dic i ticce.
GITYER MA LUBANGA OKWEROGI
13, 14. Pingo Jehovah okwero gitum ma Kabaka Caulo onongo mito tyerone bote-ni?
13 Jehovah onongo ye gityer pa dano moni ka en onongo tyero ki cwiny matir dok i yo mupore. Ento, Baibul bene tye ki labol me cikowa ma lubbe ki gityer mogo ma Lubanga pe oyegi. Gin ango ma oweko Jehovah okwero gityer magi? Kong dong wanenu labol aryo.
14 Lanebi Camuel owaco bot Kabaka Caulo ni kare dong otyeko romo pi Jehovah me ngolo kop i kom jo Amalek. Onongo mitte ni Caulo otyek jo Amalek kacel ki leyigi ducu. Ento i nge loyogi, Caulo owaco ni lumonye pe myero gunek Agag, kabaka pa jo Amalek. Caulo bene oyero leyi mabeco ma onongo myero kijwergi woko wek kimigi calo gitum bot Jehovah. (1 Cam. 15:2, 3, 21) Gin ango ma Jehovah otimo? En okwero Caulo woko pien pe obedo ki winy. (Kwan 1 Camuel 15:22, 23.) Pwony ango ma wanongo ki kany? Gin ma wapwonyo aye ni wek Lubanga oye gityerwa, omyero wabed luwiny kun walubo cikke.
15. Kwo marac ma Luicrael mogo ma gumiyo gitumgi i kare pa Icaya obedo kwede onyuto gin ango?
15 Labol marom ki pa Caulo-ni bene nonge i buk pa Icaya. I kare pa Icayagi ca, jo Icrael onongo gubedo ka miyo gitum bot Jehovah wek otimigi kica pi balgi. Ento pien kit me kwogi onongo pe ber, man onyuto ni pe gumiyo gitumgi ki i cwinygi ducu. Jehovah openyogi ni: “Gitumwu ma wutyero mapol kit meno-ni kono, konnye ngo ki bota?” “Nyogi romiwu ma wutyero me gitum awanga-ni dong oroma woko, kacel ki moo dwolo me limwu makwo ma gucwene; cwinya pe mito remo twoni, kadi remo nyogi romi nyo remo nyogi dyegi. . . . Pe wumedde ki kelo gitum ma konnye pe bota, yito odok eceta ma ngwecce kur odoko gin me kwer mada ki tung bota.” Pekogi onongo tye kwene? Lubanga owaco botgi ni: “Ka wutango cingwu, abiumo wanga woko pe anenowu; kadi bed wulega tyen mapol ata, pe abiwinyo legawu wacel; pien cingwu obedo remo keken. Kong wulwokke woko, wubed maleng, wubol timwu maraco woko cen ka mabor wek pe dok obed ka nen i nyima; wuwek dong timo gin marac.”—Ic. 1:11-16.
16. Gin ango ma pire tek ka ni Jehovah ojol gityer moni nyo pe?
16 Jehovah cwinye dag gityer pa ngat ma pe ngut. Ento, Lubanga jolo lega kacel ki gityer pa jo ma gitute ki cwinygi ducu me kwo ma lubbe ki cikke. Guti me lok ada kikome ma onongo tye i Cik ma kimiyo bot Moses-ni pwonyo jo ma kit meno ni gubedo lubalo dok mitte ni kitimigi kica pi balgi. (Gal. 3:19) Ngec ma kit meno onongo miyo gibedo ki cwiny me ngut. I kare-ni bene, omyero wange ni wamito ginkok pa Yecu pien tye ki kero me kwanyo balwa. Ka waniang dok wanyuto pwoc pi ginkok-ki, ci Jehovah ‘cwinye bibedo yom’ pi gityer ducu ma wamiyo i tiyo ticce.—Kwan Jabuli 51:17, 19.
NYUT NIYE I KOM GINKOK PA YECU!
17-19. (a) Watwero nyutu pwocwa bot Jehovah pi ginkok pa Yecu nining? (b) Gin ango ma wabinyamone ipwony ma lubo man?
17 Gin mumiyo karewa-ni ber kato pa jo ma gukwo con ma kare pa Lukricitayo pudi en aye ni pe watye ki “lanyut keken” me yub pa Lubanga. (Ibru 10:1, Baibul pa Katoli.) Cik ma lubbe ki miyo gityer onongo cuko cwiny Lujudaya me dongo wat maber ki Lubanga—bedo ki pwoc, miti me miyo gityer maberre, ki dong ngeyo ni myero ginong larre. Cwinywa yom ni Ginacoya me leb Grik omiyo waniang ni Jehovah bikwanyo adwogi me bal ducu dok kombeddi bene watye ki cwiny ma pe ngoliwa kop pi ginkok pa Yecu. Gityer me ginkok pa Yecu-ni tye mot mamwonya atika!—Gal. 3:13; Ibru 9:9, 14.
18 Mitte ni myero wabed ki niango matut i kom ginkok-ki wek wanong adwogi maber ki i iye. Lakwena Paulo ocoyo ni: “Cik aye obedo lagwokwa ma myero olowa nio ka Kricito obino, ka dong gicako kwanowa ni kitwa atir pi niye.” (Gal. 3:24) Dok niye meno omyero kiket i tic. (Yak. 2:26) Pi tyen lok man, Paulo ocuko cwiny Lukricitayo me cencwari me acel ma gitye ki ngec i kom guti me lok ada kikome-ni ma gupwonyo ki i Cik ma kimiyo bot Moses me keto ngec meno i tic. Ka gutimo meno, ci kit me kwogi birwatte ki cik ma igi lac ma gipwonyo-ni.—Kwan Jo Roma 2:21-23.
19 Kadi bed ni i kare-ni pe mitte ni Lukricitayo gulub Cik ma kimiyo bot Moses, ento gin pud myero gumi gityer ma Jehovah jolo. Man aye gin ma wabinyamo ipwony ma lubo man.
[Peny me Kwan]
[Boro buk i pot karatac 19]
Jami ma Jehovah mito ki bot luticce pe lokke
[Cal ma tye i pot karatac 20]
Romo mene ma onongo ibityero bot Jehovah?
[Cal ma tye i pot karatac 21]
Jo ma Jehovah jolo gityergi ginongo cwakke
