“Bed Oteka Ma Cwinyi Nwang”
“Bed Oteka Ma Cwinyi Nwang”
“Bed oteka ma cwinyi nwang; . . . Rwot Lubangani tye kwedi.”—YOC. 1:7-9.
IN IROMO GAMONE NINGO?
I yo ango ma Enoka gin ki Nua gunyuto kwede tekcwiny?
Mon mogo me kare macon gunyuto lanen maber me niye ki dong tekcwiny nining?
Lanen me tekcwiny pa lutino mene ma keli yomcwiny?
1, 2. (a) Gin ango ma i kine mukene mitte me kwo kwo matir? (b) Gin ango ma wabicito ka nenone?
TEKCWINY obedo olungtuke pa lworo. Wan watwero tamo ni ka ngat moni cwinye nwang, nongo en tye twon oteka. Ento i kine mukene tekcwiny ma pe nen kiwoko mitte ka ni ngat moni okwo kwo matir nino ducu.
2 Jo mukene ma kicoyo lok komgi i Baibul gunyuto tekcwiny i kare me atematema matego. Mogo i kingi gunyuto tekcwiny i kare me atematema ma lutic pa Jehovah giwok ki iye kare ki kare. Pwony ango ma watwero nongo ki i lanen me tekcwiny pa jo magi ma kicoyo lok komgi i Baibul? Wan watwero bedo ki tekcwiny nining?
LUCADEN MA CWINYGI TEK I LOBO MA PE LWORO LUBANGA
3. Gin ango ma Enoka otito ni bitimme i kom jo ma pe gilworo Lubanga?
3 I kare pa Nuagi ma Pii Aluka pud pe opongo lobo, tekcwiny onongo mitte tutwal me bedo Lacaden pa Jehovah i kin jo ma kitgi raco. Ento Enoka, “dano me abiro nia i kom Adam,” oloko lok macalo lanebi ki tekcwiny ni: “Wunen, Rwot [Jehovah] bibino ki lwak jone maleng mapol ata, ka ngolo kop i kom jo ducu, ki ka miyo kop wek olo jo ducu ma pe gilworo Lubanga pi timgi ma pe gilworo kwede Lubanga.” (Juda 14, 15) Enoka obedo ki niye ni lok meno kadi ningo wang ma ocobbe. Ki lok ada jo meno ma pe gilworo Lubanga-ni gityekogi woko i pii aluka mupongo lobo.
4. I kare ma ‘Nua obedo ka wot ki Lubanga-ni,’ onongo pinye tye nining?
4 Pii Aluka meno otimme i mwaka 2370 K.M.P., i nge mwaki 650 ma Enoka otito kwede lok man. Ma peya gin meno otimme, kinywalo Nua, odongo ci onyomo dako odoko won gang dok en kacel ki litinone guyubo yeya. Lumalaika maraco guruko kom macalo pa dano dok bene gubedo ki anyira mabeco pa dano ci gunywalo jo Nepil. Adwogine oweko bal pa dano onongo odoko dit dok lobo opong ki tim gero. (Acak. 6:1-5, 9, 11) Labongo paro pi kit ma pinye tye kwede, “Nua obedo ka wot kacel ki Lubanga” kun bedo ki tekcwiny macalo “latit lok me kit ma atir.” (Kwan 2 Petero 2:4, 5.) Tekcwiny macalo man mitte tutwal botwa i kare man me agikki-ni.
GIN GUNYUTO NIYE KACEL KI TEKCWINY
5. Moses onyuto tekcwiny kacel ki niye nining?
5 Moses onyuto lanen maber adada me niye kacel ki tekcwiny. (Ibru 11:24-27) Nicakke i mwaka 1513 nio i 1473 K.M.P., Lubanga otiyo kwede me kwanyo jo Icrael woko ki i Ejipt wek otergi i dye tim. Moses obwonne kekene ni pe etwero timo tic man, ento lacen en oye gire. (Nia 6:12) Moses gin ki omine Aron gudok teretere i nyim Parao laloc aconya dok gutito ki tekcwiny pi pwod apar ma Jehovah onywaro kwede ki lubange me Ejipt ci olaro Jone. (Nia cura 7 nio i 12) Calo wan bene i kare-ni, gen ma pe tur pi nongo cwak pa Lubanga omiyo Moses onyuto niye ki tekcwiny.—Nwo. 33:27.
6. I kare ma nongo luloc lobo gitye ka olo wiwa ki lapeny, wabimiyo caden ki tekcwiny nining?
6 Wan wamito tekcwiny macalo pa Moses, pien Yecu owaco ni: “Gibiywayowu giterowu i nyim luloc ki luker-gu pira, wubitito lok ma bedo caden botgi ki bot Lurok bene. Ka giterowu i lukiko, pe wubed ka tamo kit ma myero wulok kwede, nyo kit lok ango ma wubilokone; pien lok ma myero wuloki gibimiyowu i cawa meno; pien pe wun aye wubilok, ento cwiny maleng pa Wonwu aye bilok ki i iwu.” (Mat. 10:18-20) I kare ma nongo luloc me lobo gitye ka olo wiwa ki lapeny, cwiny pa Jehovah bikonyowa me miyo caden ki woro ma wanyuto niye kacel ki tekcwiny.—Kwan Luka 12:11, 12.
7. Gin ango ma omiyo Yocwa obedo ki tekcwiny dok ocobo ticce mapwot?
7 Bedo ka kwano Cik pa Lubanga kare ki kare okonyo Yocwa me dongo niye ki tekcwiny i nge leyo dog tic pa Moses. I mwaka 1473 K.M.P., Icrael onongo tye atera me donyo i Lobo ma Kiciko Pire. Lubanga ociko Yocwa ni, “bed oteka ma cwinyi nwang.” Ka ce Yocwa olubo cik man onong en bitimo jami kiryeko dok cobogi bene. Lubanga owacce ni, “pe komi omyel, cwinyi pe oryangnge, pien Rwot Lubangani tye kwedi ka ma i woto iye ducu.” (Yoc. 1:7-9) Labongo akalakala mo, lok man ocuko cwiny Yocwa matek adada! Dok ki lok ada, Lubanga onongo tye kacel kwede pien tic matego me mayo Lobo ma Kiciko Pire-ni otum i mwaka 1467 K.M.P., i nge mwaka abicel keken.
MON MA CWINYGI NWANG DOK BENE GUNYUTO KA CUNGOGI
8. Labol me niye ki tekcwiny ango ma wanongo ki bot Rakab?
8 Pi mwaki miya mapol ata, mon mapol ma cwinygi tek gunyuto ka maleng ka cungogi calo luwor Jehovah. Me labolle Rakab, dako ma lakwele ma obedo i boma me Jeriko onyuto niyene i kom Lubanga, obedo ki tekcwiny me kano lurot piny ma Yocwa ocwalogi ci obwolo lugwok kabaka me boma meno kun nyutigi yo mapat. I kare ma dong Luicrael gumayo Jeriko, en kacel ki jo me pacone pe kinekogi. Rakab oweko tic me malayane-ni, odoko lawor Jehovah pi kwone ducu, lacen obedo i kin mege madito pa Meciya. (Yoc. 2:1-6; 6:22, 23; Mat. 1:1, 5) Niyene-ni kacel ki tekcwinye okelle twon mot madit!
9. Debora, Barak ki Yayeri gunyuto tekcwiny nining?
9 I nge to pa Yocwa i kine ka mwaka 1450 K.M.P., lungol kop gutiyo matek i Icrael. Jabin Kabaka pa jo Kanaan onongo dong ouno Luicrael pi mwaki 20 i kare ma Lubanga omiyo Debora lanebi ma dako otugo cwiny Barak langolkop wek ocak tic. Barak ocoko co 10,000 i wi Got Tabor dok onongo tye atera me lweny ki Cicera ladit wi mony pa Jabin ma odonyo i nota me Kicon ki lumonye 900 ma gitye ki gadigadi lweny. I kare ma Luicrael gudonyo i nota meno, Lubanga obango lulweny pa jo Kanaan dok omiyo pii opong ci bar lweny odoko coto. Lumony pa Barak guloyo lweny ci “mony pa Cicera ginekogi woko ducu ki pala lucwan.” Cicera oringo olaro i kema pa Yayeri, ento Yayeri oneke woko ma en tye ka nino. Ma lubbe ki lok pa lanebi Debora bot Barak, ‘deyo’ me loyo lweny man obedo pa dako ma nyinge Yayeri. Pi tekcwiny pa Debora, Barak, ki dong Yayeri, lobo Icrael “oywe pi mwaka pyerangwen.” (Lungol. 4:1-9, 14-22; 5:20, 21, 31) Lwak mon medo ki co mapol ma gulworo Lubanga bene gunyuto niye kacel ki tekcwiny macalo man.
LOKWA TWERO KELO TEKCWINY
10. Pingo watwero waco ni lokwa romo kelo tekcwiny?
10 Gin ma waloko twero kelo tekcwiny bot luwotwa ma giworo Jehovah. I cencwari me 11 K.M.P., Kabaka Daudi owaco bot wode Solomon ni: “Bed laco ma cwinye nwang, wek itim woko. Pe ilwor, pe cwinyi oryangnge; pien Rwot Lubanga, ma en aye Lubangana, tye kwedi. En pe bibwoti ata, dok pe bitenyi, nio ka tic ducu ma gitiyo i ot pa Rwot [Jehovah] bitum.” (1 Tekwaro 28:20) Solomon otiyo ticce ki tekcwiny ci ogero ot mamwonya pi Jehovah i Jerucalem.
11. Tekcwiny pa latin anyaka mo matidi me Icrael okelo adwogi ango bot laco mo acel?
11 I cencwari me apar K.M.P., lok ki tekcwiny pa latin anyaka mo me Icrael okonyo ladobo mo acel. Latin anyaka-ni onongo lumony me Ciria gumake ci en odoko latic pa Naaman, ladobo ma tye ladit wi mony pa jo Ciria. Anyaka-ni owaco bot dako pa Naaman ni ka cware ocito i Icrael, lanebi pa Lubanga bicangnge woko pien en onongo ongeyo pi tango mapol ma lanebi Elica otimogi pi teko pa Jehovah. Naaman ocito kunnu, kome ocang dok bene odoko lawor Jehovah. (2 Luker 5:1-3, 10-17) Ka ce itye latin ma pud tidi dok imaro Lubanga calo latin anyaka-ni, ci Lubanga bimini tekcwiny me miyo caden bot lupwonye, lutino kwan luwoti ki dong jo mukene.
12. Lok pa Kabaka Kejekia ogudo lwak nining?
12 Lok maber ma waloko i kare ma kwo tye matek kelo tekcwiny bot dano. I kare ma lumony me Aciria gudonyo i Jerucalem i cencwari me aboro K.M.P., Kabaka Kejekia owaco bot lwak ni: “Wubed tek dok jo macir. Pe wubed lwor, cwinywu bene pe myero oballe i nyim kabaka me Aciria ki lwak ducu ma tye kacel kwede; pien ngat madit makato en tye kwedwa. En tye ki dul mony pa dano ma gigeno tekogi; ento wan watye ki Rwot Lubangawa ma konyowa dok lwenyo piwa.” Lwak gujolo lok man nining? Wakwano ni, “lwak gucako bedo ki gen pi lok pa Kejekia kabaka me Juda.” (2 Tekwaro 32:7, 8) Lok ma kit meno twero keliwa tekcwiny ki dong bot Lukricitayo luwotwa i kare me aunauna.
13. Lanen ango me tekcwiny ma Obadia lagwok jami pa Kabaka Akab oweko?
13 I kine mukene tekcwinywa nen i tic ma watimo ento pe i lok aloka keken. I cencwari me apar K.M.P., Obadia lagwok jami pa Kabaka Akab okano lunebi miya acel pa Jehovah kun “opoko kingi pyerabic pyerabic” wek Jejebel, Daker ma kite rac-ci pe onekgi. (1 Luker 18:4) Calo Obadia ma onongo lworo Lubanga-ni, lutic mapol pa Jehovah i kare-ni bene gikano luye luwotgi ki tekcwiny dok pe gimiyo ngec bot jo ma gikelo aunauna.
ESTA—DAKER MA CWINYE TEK
14, 15. Daker Esta onyutu niye ki tekcwiny nining, dok adwogine obedo ningo?
14 Daker Esta onyuto niye kacel ki tekcwiny i kare ma Aman, ma kite rac-ci, oketo yub me neko lumuku Lujudaya ducu ma onongo gitye i te Ker me Percia i cencwari me abic K M P. Wangeyo ni kadi ningo gin gukok, gurii kec dok bene gulego ki cwinygi ducu. (Esta 4:1-3) Esta cwinye oton matek. Mordekai ocwale kopi me waraga ma nyuto ni kimiyo twero me nek lumuku kun lego Esta ni ocit inyim kabaka wek obak doge pi Lujudaya luwote. Ento ngat mo keken ma onongo cito inyim kabaka labongo lwongo omyero kinek woko.—Esta 4:4-11.
15 Ento Mordekai owaco bot Esta ni: ‘Pien ka iling, kony ki lar bibino ki i kabedo mukene. Anga kono ma ngeyo ka nyo gimiyo idoko daker pi kare macalo man?’ Esta owacci Mordekai ogur Lujudaya ducu ma gitye i Cuca kacel wek gucak rii kec pire. En owaco ni: “An bene ki angecana wabirii kit macalo gin giri-ni. Ci dong abicito bot kabaka kadi bed cik okwero. Ka dong ato ci wek ato.” (Esta 4:12-17) Esta onyuto tekcwiny dok buk ma kicoyo ki nyinge-ni cimo ka maleng ni Lubanga olaro jone. I kare-ni bene, Lukricitayo ma kiwirogi kacel ki romi mukene-ni ginyuto tekcwiny acel-lu i kare me atematema dok ngat ma gamo “lega-gu ducu” pol kare tye kwedgi.—Kwan Jabuli 65:2; 118:6.
“WUDI CWINYWU”
16. Lanen maber ango ma jo matino ginongo ki bot Yecu?
16 I nino mo i cencwari me acel K.M. ma Yecu pud tye ki mwaka 12 keken, kinonge i ot pa Lubanga, “obedo i kin lupwonye, kun winyo pwonygi, dok penyogi.” Dok bene onongo “dano ducu ma yam guwinye guuro niange, ki kit ma en dok kwede i peny.” (Luka 2:41-50) Kadi bed en onongo tidi, Yecu onongo tye ki niye kacel ki tekcwiny me penyo jo madongo ma gin lupwonye i ot pa Lubanga. Lwodo lok i kom lanen pa Yecu bikonyo jo matino ma i kacokke wek guti ki kare ducu ma nen me ‘dok i lok ma dano bipenyogi i kom gen ma gitye kwede.’—1 Pet. 3:15.
17. Pingo Yecu ocuko cwiny lupwonnyene ni ‘gudi cwinygi,’ dok pingo mitte ni wabed ki tekcwiny?
17 Yecu ocuko cwiny jo mukene ni ‘Wudi cwinywu.’ (Mat. 9:2, 22) En owaco bot lupwonnyene ni: “Kare bibino, bene dong oo, ma wubiket woko, ngat acel acel i pacone, wubiweka kena. Ento pe atye kena pien Won tye kweda. Awaco lok man botwu, wek wubed ki kuc i an. I lobo wutye ki can; ento wudi cwinywu, an dong aloyo lobo.” (Jon 16:32, 33) Wan bene calo lupwonnye pa Yecu, lobo dagwa ento omyero pe wabed calo jo me lobo man. Bedo ka lwodo lok i kom kit yo me kwo kacel ki tekcwiny ma Wod pa Lubanga obedo kwede, miniwa tekcwiny me kwo labongo cidde woko ki lobo-ni. Calo Yecu ma oloyo lobo woko-ni, wan bene watwero loyone.—Jon 17:16; Yak. 1:27.
“DI CWINYI!”
18, 19. Lakwena Paulo onyuto ni etye ki niye kacel ki tekcwiny nining?
18 Lakwena Paulo ociro atematema mapol ma pe wacce. I nino mo acel, Lujudaya ma i Jerucalem onongo kono gukido en woko matino tino ka pe lumony pa Luroma aye gular kwone. I dyewor, “Rwot ocung ka nget Paulo, owacce ni, ‘Di cwinyi. Macalo ibedo ka tito lok i koma i Jerucalem, kit meno bene myero ibed cadenna bene wa i Roma.’” (Tic. 23:11) Paulo otimo kumeno kikome.
19 Paulo ojuko “lukwena madongo ma gukato kare ca” labongo lworo mo keken, pien onongo gitye ka balo kacokke me Korint. (2 Jo Korint. 11:5; 12:11) Ka i poro Paulo kwedgi, en onongo pat pien onyuto ka maleng tyen lok mumiyo en waco ni etye lakwena—calo bedo i mabuc, gigoye ki odo, wot mogo matego, jami mukene maraco mapat pat, kec, orwo pii, pe onino i dyewor, ki dong paro pi luye luwote. (Kwan 2 Jo Korint 11:23-28.) Man pud dong tye rekod maber adada me niye—nyutu ka maleng teko ma a ki bot Lubanga!
20, 21. (a) Mi lanen ma nyuto ni myero wamedde ki bedo ki tekcwiny. (b) Kwene i kwowa ma myero wanyut iye tekcwiny, dok wan watwero bedo ki gen ango?
20 Pe Lukricitayo ducu girwatte ki aunauna matego. Ento gin ducu myero gubed ki tekcwiny wek okonygi me lweny ki atematema ma bino i kwo. Me labolle: Bulu mo onongo tye i gurup pa lutim aranyi i lobo Brazil. Inge kwano Baibul, en oniang ni myero elok kwone ento cik pa lutim aranyi-ni onongo tye ni ngat mo keken ma mito weko gurup man myero kinek woko. En olego Jehovah ci otiyo ki ginacoya me tito ki latel wi gurup man gin mumiyo myero ewek gurup-pi. Kiye ni owek gurup-pi labongo kigeng mo keken, ci en odoko latit kwena me Ker-ri.
21 Tekcwiny mitte i tito lok me kwena maber-ri. Bulu ma Lukricitayo gimito tekcwiny wek okonygi me gwoko gennegi i cukul. Tekcwiny mitte me penyo ladit ticci wek ibed tye i gure madit pi nino adek ducu. Tye jami mapol ma tekcwiny konyowa me timogi. Labongo tamo pi atematema ma bino i kwowa, Jehovah biwinyo “lega ma niye tye iye.” (Yak. 5:15) Ki lok ada Jehovah biminiwa cwiny mere maleng wek wabed ‘oteka ma cwinywa nwang.’
[Peny me Kwan]
[Cal ma tye i pot karatac 19]
Enoka otito kwena bot jo ma pe gilworo Lubanga
[Cal ma tye i pot karatac 20]
Yayeri obedo dako ma cwinye tek
