Gwok Cwiny Mabeco Ma Tye I Kacokke
Gwok Cwiny Mabeco Ma Tye I Kacokke
“Kica pa Rwotwa Yecu Kricito obed kwedwu [“kacel ki cwiny ma wunyuto,” NW]”—PIL. 4:23.
WAN WATWERO DONGO CWINY MABECO I KACOKKE NINING . . .
ka wacwalo cawa kacel ki omegiwa?
ka wabedo ki arima i ticwa me pwony?
ka watito bot luelda bal madito mutimme?
1. Gin ango ma kacokke me Pilipi ki Tuatira gunongo pwoc pire?
LUKRICITAYO me cencwari me acel i Pilipi onongo gubedo lucan. Ento, kadi bed ni gin lucan, cinggi onongo yot dok gunyuto mar bot Lukricitayo luwotgi. (Pil. 1:3-5, 9; 4:15, 16) I agikki me waragane botgi, lakwena Paulo ocoyo ni: “Kica pa Rwotwa Yecu Kricito obed kwedwu [“kacel ki cwiny ma wunyuto,” NW.]” (Pil. 4:23) Pien kodi cwiny acel-li Lukricitayo me Tuatira bene gunyuto, Yecu Kricito owaco ki kacokke meno ni: “Angeyo ticci ducu, mar ma itye kwede, niye ni ki ticci me konyo dano, ki kit ma idiyo kwede cwinyi. Angeyo ni ticci ma kombeddi itye ka tiyone kato me kare mukwongo.”—Yabo. 2:19.
2. Ngo ma waromo timone me konyo dongo cwiny ma tye i kacokke?
2 Kacokke acel acel pa Lucaden pa Jehovah i kare-ni bene gitye ki cwiny mabeco. Kacokke mukene gingene pi nyuto cwiny me mar. Mogo ngene pi mit komgi imiyo kony ma lubbe ki tito kwena me Ker-ri ki bene jalo karegi i tic pi kare me lac. Ka wan ducu wadongo cwiny mabeco, ci wamiyo kacokke ribbe dok dongo. (1 Kor. 1:10) Kitungcel, ka wabedo ki cwiny maraco, ci wamiyo kacokke bedo mangic dok bene waling woko i wii tim maraco. (1 Kor. 5:1; Yabo. 3:15, 16) Kodi cwiny ango ma tye i kacokkewu? Gin ango ma in iromo timone wek cwiny mabeco obed i kacokke?
WADONGU CWINY MABECO I KACOKKE
3, 4. Watwero ‘miyo Jehovah pwoc madit mada i cokke madit’ nining?
3 Laco jabuli owero ni: “Abimiyi [Jehovah] pwoc madit mada i cokke madit; abipaki ka ma lwak jo mapol gugurre iye.” (Jab. 35:18) Laco Jabuli omedde ki pako Jehovah kun ribbe ki luworo mukene. Cokke ma bedo i cabit ducu, ma bene tye iye Kwano Wi Lubele, miniwa kare me miyo lagam mucwiny dok nyuto niyewa. Wan ki acel acel watwero penye ni: ‘An tika atute me miyo lagam i cokke? Tika ayubbe maber dok amiyo lagam ma dongo dano i cokke? Macalo lawi ot, tika ayubo lutinona con dok apwonyogi me miyo lagam ma nongo pe gikwano akwana?’
4 Daudi ma ocoyo jabuli-ni, oporo kit ma cwinywa moko kwede i kom Lubanga ki wer ma wawero. “Cwinya omoko i komi, ai Lubanga, cwinya omoko i komi ma pe lokke! Abiwero wer kun apakki ki dwan malongo!” (Jab. 57:7) Wer ma wawero i cokke pa Lukricitayo miniwa kare me ‘pako Jehovah ki dwan malongo’ kun cwinywa moko i kome. Ka pe wangeyo wer moni maber, ci pingo pe wapwony wer meno i otyeno me Woro pi Jo me Ot? Myero wamok tamwa me ‘wer bot Jehovah pi kare me kwowa ducu dok myero wapakke ka pud wakwo.’—Jab. 104:33.
5, 6. Wan watwero nyuto cwiny me jolo wele ki miyo mic bot jo mukene nining, dok timo meno dongo cwiny ango i kacokke?
5 Nyuto cwiny me jolo wele bot omegiwa ki lumegiwa tye i kin jami ma tugo cwiny jo me kacokke wek gunyut mar. I dul me agikki i waraga ma Paulo ocoyo bot Luibru, en ocuko cwinygi ni: “wumedde ki mar i kinwu kekenwu macalo omego. Wiwu pe owil ka jolo welo.” (Ibru 13:1, 2) Miyo gin acama ki luneno ma giwoto awota kacel ki mongi nyo jo ma gitye i kacokkewa dok gitiyo pi kare malac, tye yo maber atika me nyuto cwiny me jolo wele. Wutam bene i kom mon to, odi ma tye iye lanyodo acel keken, nyo jo mukene ma gitwero nongo adwogi maber ka ginywako kacel kwedwa i cawa me woro pi jo me ot nyo camo cam kwedwa.
6 Paulo omiyo twero bot Temceo ni ocuk cwiny jo mukene wek “guti tic mabeco, gubed lulonyo i timo ber bot dano, i poko jami, ki i miyo mot ki yomcwiny. Ka gutimo meno, nongo gukano mono [gin agwoka] maber pigi kengi pi kare me anyim, wek gumak kwo ma en aye kwo kikome.” (1 Tem. 6:17-19) Paulo onongo tye ka miyo cwakke ni luworo luwote myero gudong cwiny me miyo mic. Kadi i kare ma cente pe, pud watwero bedo ki cwiny me miyo mic. Yo acel me timone en aye ka wamiyo kony me giwot bot jo mukene i ticwa me pwony, nyo cito ki dwogo ki i cokke. Jo ma ginongo kony ma kit meno kono gitwero timo gin ango? Gin gikonyo jo me kacokke wek gudong cwiny me miyo mic ka ce ginyuto cwiny me pwoc, nyo gwok gin bene gitwero medo cente mo manok pi wilo mo pien welle tye ka ito malo. Pe itamo-ni cwalo cawa kacel ki omegiwa ki lumegiwa me kacokke wek giwinyo ni kimarogi? Ka watimo jami mabeco mapol, tutwalle “bot utmegiwa ma guye Kricito” dok bene watye atera me tic ki cawa kacel ki jamiwa kwedgi, man pe medo marwa keken pigi, ento konyo bene me dongo cwiny maber i kacokke.—Gal. 6:10.
7. Gwoko mung ma jo mukene gutitiwa konyo me dongo kit mabeco i kacokke nining?
7 Tam kong dok i kom gin mukene ma konyo me jingo mar i kinwa ki luye luwotwa: lirem ki dong gwoko mung. (Kwan Carolok 18:24.) Lurem me ada gigwoko mung. Ka omegiwa gutito botwa mung ma i cwinygi kun gitye ki gen ni lok meno pe myero oo i kin lwak, man bijingo mar ma dong tye i kinwa matek adada. Wageno ni wabitimo gin ducu ma watwero wek wabed macalo jo me paco acel i kacokke kun wabedo lurem ma genne dok wagwoko mung ma tye i kinwa.—Car. 20:19.
BED KI ARIMA I TICWA ME PWONY
8. Tira ango ma jo me Laodikia gunongo, dok pingo?
8 I kare ma Yecu tye ka lok ki kacokke me Laodikia, en owaccigi ni: “Angeyo ticci ducu. Pe ingic, dok bene pe ilyet. Onongo twero bedo ber ka nene ibed ngic nyo lyet! Dong kit macalo onongo ibedo mormor, pe ibedo ngic dok bene pe ibedo lyet, abinguli woko ki i doga.” (Yabo. 3:15, 16) Lukricitayo meno onongo gipe ki arima i timo ticwa me pwony. Lakodi cwiny-nyi olo to ogudo wat ma tye i kingi. Pi meno Yecu ominigi tira me mar kun wacci: “Agoyo jo ma an amarogi, apwonyogi dok atirogi; pi meno ket tek ingut woko.”—Yabo. 3:19.
9. Cwiny ma watero kwede ki ticwa me pwony gudo cwiny ma tye i kacokke nining?
9 Wek cwiny mabeco obed i kacokke, mitte ni myero wiwa pe owil bene me bedo ki arima i ticwa me pwony. Kacokke tye ki yub me yenyo romi murwenyo i wang ticwa ka dok konyogi me roco watgi ki Jehovah. Pi meno omyero wanywak i ticwa me loko dano wek gudok lulub kor Yecu ki mit kom, kit macalo Yecu otimo kwede. (Mat. 28:19, 20; Luka 4:43) Ka inen arimawa medde i tito kwena ci note i kinwa bene medde macalo wan “lutic kacel ki Lubanga.” (1 Kor. 3:9) Ka waneno luwotwa gitye ka tito tyen lok me niyegi i ticwa me pwony kun ginyuto pwocgi pi lok madok i kom Lubanga, wawinyo i cwinywa ni myero waworgi dok bene marwa pigi medde. Dok bene ka watiyo “ki cwiny acel” i ticwa me pwony, man bikonyowa me dongo cwiny me ribbe i kacokke.—Kwan Jepania 3:9.
10. Ka watute me dongo dirowa i tic me tito kwena, man bigudo cwiny ma jo mukene gitye kwede i kacokke nining?
10 Tutewa me dongo diro i tic me tito kwena bene kelo adwogi maber bot jo mukene. Mitiwa i ticwa me pwony medde ka watute me miyo pwony ma gudo cwiny jo ma wanongogi i wang ticwa dok bene wanyuto ni waparo pigi. (Mat. 9:36, 37) Ka watye ki mit kom, jo ma wabedo kwedgi bene gibedo ki mit kom. Yecu ocwalo lupwonnye ka tito kwena kun giwoto ki aryo aryo ma ka cwalogi ki acel acel. (Luka 10:1) Man okonyo me jingo cwinygi, opwonygi dok bene omedo mitigi i ticgi me pwony. Wan mono pe wanongo tic kacel ki lutit kwena me Ker-ri ma komgi mit ber botwa? Mit komgi-ni cuko cwinywa dok konyowa me medde ki ticwa me pwony.—Rom. 1:12.
GWOKKE KI CWINY ME NGURU KI TIMO BAL
11. Cwinya ango ma Luicrael mogo gubedo kwede i kare pa Moses, dok adwogine obedo ningo?
11 I nge cabit manok keken ma Icrael odoko kwede rok manyen, gin gucako bedo ki cwiny me koko ange gobagoba kun gibedo ka nguru. Man oweko gujemo woko i kom Jehovah ki jo ma en oketo me bedo luwange. (Nia 16:1, 2) Jo manok keken i kin Luicrael ma gua ki i Ejipt aye gudonyo i Lobo ma Kiciko Pire. Tye me ur ni kadi wa Moses bene pe kiyene me donyo i lobo meno pi kit ma en odok kwede i kom cwiny marac ma Luicrael gunyuto! (Nwo. 32:48-52) Gin ango ma watwero timone i kare-ni wek wagwokke ki i bedo ki cwiny marac?
12. Wan watwero gwokke i cako bedo ki cwiny me nguru nining?
12 Omyero wagwokke wek pe wacak bedo ki cwiny me nguru. Kadi bed ni dongo cwiny me mwolo ki woro twero konyowa, omyero watam i kom kit dano ma wakwo kwedgi. Ka pe wayero galowang mupore nyo wacwalo cawa malac ki lutic luwotwa nyo lutino kwan luwotwa ma pe gitye ki kit matir ci adwogine binen. Omyero pe wacwal cawa malac mukato kare ki jo ma gitye ki cwiny me lone ken.—Car. 13:20.
13. Bedo ki cwiny me nguru weko dano timo jami maraco ango i kacokke?
13 Cwiny me nguru twero tero dano me timo jami mogo maraco. Me laporre, cwiny me nguru twero balo kuc kacel ki ribbe ma i kacokke. Medo i kom meno, koko i kom luye luwotwa pe romo keligi arem me cwiny keken ento kelo kwoto nying ki dong yet. (Levi. 19:16; 1 Kor. 5:11) Jo mogo ma i kacokke i cencwari me acel onongo gitye ki cwiny me nguru, dok bene onongo ‘gicayo wegi twer dok giyeto wegi deyo-gu bene ayeta.’ (Juda 8, 16) Jo ma gitye ki cwiny me nguru ma kit meno i kom luelda pe ginongo cwak pa Lubanga.
14, 15. (a) Ling woko i wi bal madito twero kelo adwogi ango i kacokke? (b) Gin ango ma myero watim ka waniang ni ngat moni otimo bal madit i mung?
14 Gin ango ma myero watim ka ce waniang ni ngat mo tye ka timo bal i mung, calo mato kongo i yo marac, neno calo ki coc ma tugo miti me buto nyo tim tarwang? (Ep. 5:11, 12) Ka waling woko i wi tim ma kit magi, ci watwero gengo tic pa cwiny maleng dok bene wabalo kuc me kacokke. (Gal. 5:19-23) Kit macalo onongo mitte ni Lukricitayo me Korint gujuk tim maraco-ni, i kare-ni bene jo ma timo jami maraco myero kiryemgi woko wek kigwok cwiny mabeco me kacokke. Gin ango ma in itwero timone me kelo kuc i kacokke?
15 Kit ma dong waneno kwede, pire tek mada ni myero wagwok mung ma lubbe ki lok moni, tutwalle ka jo mukene gutito tamgi ki mung me cwinygi botwa. Pud dong rac atika dok turo cwiny ka ce wayaro mung pa ngat moni! Ento kadi bed kit meno, ka ngat mo otimo bal madit, luelda me kacokke myero gunge pien Ginacoya minigi twero me cobo lok man. (Kwan Lulevi 5:1.) Pi meno, ka ce wangeyo ni omego nyo lamego mo otimo bal madit, omyero wacuk cwinye wek otit balle bot luelda dok onong kony ma mitte. (Yak. 5:13-15) Ka ngat meno pe otito balle bot luelda i nge kare mo, omyero watit wan kikomwa.
16. Ka watito pi bal madito bot luelda, meno konyo me gwoko cwiny mabeco i kacokke nining?
16 Kacokke pa Lukricitayo myero obed ka ma dano ginongo kwo yot iye dok omyero wagwok maber kun watito bal madito bot luelda. Lacen, ka luelda gumiyo labal-li oniang rac pa balle, oye kigeng ki tira ma kimine dok ongut, en nongo dong pe tye ngat ma balo cwiny mabeco ma i kacokke. Ento ka latim bal meno madit-ti pe ye tira me mar pa luelda kono? Ryemo en ki i kacokke ‘neko,’ nyo kwanyo tim maraco ki i kinwa dok gwoko cwiny mabeco ma i kacokke. (Kwan 1 Jo Korint 5:5.) Ki lok ada, wek wagwok cwiny mabeco ma i kacokke, wan ki acel acel myero walub tira ma luelda giminiwa wek wagwok ber bedo pa Lukricitayo luwotwa.
WAGWOKU “RIBBE MA CWINY MALENG OMIYO[WA]”
17, 18. Gin ango ma bikonyowa me ‘gwoko ribbe ma cwiny maleng omiyowa’?
17 Lupwonnye pa Yecu i cencwari me acel “gumine kengi ka winyo pwony pa lukwena,” dok bene gukonyo me dongo cwiny me note i kacokke. (Tic. 2:42) Gin onongo gitero tira me Ginacoya ki ma ginongo ki bot ludongo me kacokke calo gin ma pire tek. Pien luelda me kare-ni gilubo tira pa lagwok ot ma lagen dok maryek, jo ducu ma i kacokke kicuko cwinygi me ribbe kacel. (1 Kor. 1:10) Ka wamine me lubo tira ma dul pa Jehovah miniwa kun a ki i Baibul dok bene waye tela pa luelda, wanyuto ni watye ka ‘keto tek me gwoko ribbe ma cwiny maleng omiyowa wek wabed acel i twec me kuc.’—Ep. 4:3.
18 Wageno ni wabitimo jami ducu me gwoko cwiny mabeco ma tye i kacokke. Ka watimo kumeno, wabibedo labongo akalakala ni ‘kica pa Rwotwa Yecu Kricito bibedo kwedwa [kacel ki cwiny ma wanyuto].’—Pil. 4:23.
[Peny me Kwan]
[Cal ma tye i pot karatac 24]
Tika i dongo cwiny mabeco i kacokke kun iyubbe me miyo lagam mucwiny?
[Cal ma tye i pot karatac 25]
Dong cwiny mabeco i kacokke kun ipwonyo werwa
