Kony Dano Wek ‘Guco Woko Ki I Wang Nino’
Kony Dano Wek ‘Guco Woko Ki I Wang Nino’
“Wungeyo kare ma wutye iye, ni, kare dong oromo myero wuco woko ki i wang nino.”—ROM. 13:11.
TIKA IROMO TITONE?
Pingo pire tek ni Lukricitayo myero gubed ma wanggi twolo i yo me cwiny?
Pingo mitte ni Lukricitayo ma wanggi twolo guter itgi dok gubed ma wanggi bit?
Pingo kica kacel ki mwolo pire tek i ticwa me pwony?
1, 2. I yo ango ma mitte ni jo mapol gucoo ki i wang nino?
MWAKA ki mwaka, dano alip ki alip gito pien nino kwalo wanggi nyo ginino woko ka gitye ka dwoyo mutoka. Mukene girwenyo dog ticgi pien pe gico con me cito ka tic nyo ginino ka gitye i gang tic. Ento nino i yo me cwiny tye ki adwogi marac adada. Man aye tyen lok ma pire tek mumiyo Baibul waco ni: “Dano ma bedo ma wange twolo kun kiyo piny tye ki gum [mot].”—Yabo. 16:14-16.
2 Kadi bed ni nino madit pa Jehovah woto ki nyiko cok, pol pa dano gitye ka nino anina i yo me cwiny. Kadi wa lutela dini pa Lukricitayo ata-ni bene giwacci romigi gubedo ‘oteka me nino’ i yo me cwiny. Nino i yo me cwiny obedo gin ango? Pingo mitte ni Lukricitayo me ada myero gubed ma wanggi twolo? Wan waromo konyo jo mukene me coo ki i wang nino nining?
NINO I YO ME CWINY—OBEDO GIN ANGO?
3. Kitung boti, ngat ma onino i yo me cwiny nongo obedo dano ma nining?
3 Jo ma ginino pol kare mogo nongo gipe ki gin me atima. Kitungcel, jo ma ginino i yo me cwiny pol kare nongo gitye ki tic mapol—ento ticgi-ni nongo pe lubbe ki jami me cwiny. Oromo bedo ni nongo gulungo wigi me cobo pekogi me nino ducu nyo yenyo yomcwiny, yweka, ki dong lonyo. Pien gitimo jami magi ducu, pe gitute me cobo mitigi me cwiny. Tye kono ni, jo ma gibedo ma wanggi twolo pol kare gingeyo ni watye ka kwo i “kare me agikki,” pi meno gitute ki kerogi ducu me timo tic mapol i tic pa Lubanga.—2 Pet. 3:3, 4; Luka 21:34-36.
4. Pingo pire tek ni ‘pe myero waninu anina calo jo mukene-ni’?
4 Kwan 1 Jo Tecalonika 5:4-8. Kany lakwena Paulo ocuko cwiny luye luwote ni “pe myero waninu anina calo jo mukene.” Gin ango ma onongo en tye ka wacone? Yo acel ma watwero bedo ka ‘nino anina’ aye ka wacayo yo me kwo ma Jehovah cwako. Yo mukene dok ma watwero bedo ka “nino anina” aye ka wacayo lok ada ma tye ni nino ma Jehovah oyubo me tyeko lobo-ni dong cok oo. Pe myero waye jo magi ma pe gilworo Lubanga-ni gubwolwa wek wan bene wacak lubo kit kwogi-ni.
5. Kit tam ango ma jo ma gitye ka nino anina i yo me cwiny gitye kwede?
5 Jo mogo gitamo ni Lubanga mo pe ma neno gin ma gitimo. (Jab. 53:1) Mukene gitamo ni Lubanga pe keto cwinye i kom wan dano, pi meno pe myero wayelle me keto cwinywa bene i kome. Ento kadi bed kumeno, jo mogo gitamo ni ka ce gitye ki ot lega ma gilego iye nongo dong gitye lurem Lubanga. Jo magi ducu gitye ka nino anina i yo me cwiny. Myero guco woko ki i wang nino. Wan watwero konyogi nining?
WAN KIKOMWA MYERO WANGWA OBED TWOLO
6. Pingo Lakricitayo myero obed ma wange twolo i yo me cwiny?
6 Me konyo jo mukene wek guco ki i wang nino, omyero wan kikomwa wamedde ki bedo ma wangwa twolo. Ngo ma bikonyowa me timone? Lok pa Lubanga kubu nino i yo me cwiny-nyi ki “piny macol”—maro tuko marac me yomcwiny marac, mero, tim abor, tim me tarwang, daa, ki nyeko. (Kwan Jo Roma 13:11-14.) Gengo tam macalo meno pe obedo gin mayot. Bedo ma wakiyo piny pire tek. Ngat ma dwoyo mutoka kun pe paro peko ma nino twero kelone i cawa me dwoyo mutoka keto kwone ka mading. Pire tek adada ni Lakricitayo myero onge ni nino i yo me cwiny kelo to!
7. Bedo labongo neno mupore i kom dano me wang ticwa gudowa nining?
7 Me labolle Lakricitayo moni twero tamo ni dano ducu ma i wang ticgi dong gumoko tamgi woko liking me kwero winyo kwena maber-ri. (Car. 6:10, 11) En twero tamo ni, ‘Ka ngat mo pe ma binyuto miti, ci pingo myero abal kerona ka tute me yenyogi?’ Kadi bedi ni jo mapol dong gitye ka nino, ento cwinygi ki kwogi pud twero lokke. Mukene i kingi gico woko ci ginyuto mitti. Man weko watwero konyogi ka wan kikomwa wabedo ma wangwa twolo, ka watute me tic ki yo mogo manyen me nyuto kwena me Ker-ri i yo ma gudo cwiny dano. Yo mukene ma konyowa bedo ma wangwa twolo aye ka wapoyo wiwa pi gin mumiyo ticwa me tito kwena-ni pire tek.
NGO MA WEKO TICWA ME PWONY PIRE TEK?
8. Pingo ticwa me pwony-nyi mitte dok pire tek?
8 Myero wi opo ni kadi dano giye nyo pe, ticwa me pwony-nyi miyo deyo bot Jehovah dok bene tye ma lubbe ki cobbe pa yub ma mere. Odong kare manok keken ci dong jo ma pe giye kwena maber-ri gibingolo kop i komgi dok ginongo pwod. Kit ma dano gidok kwede i kom tito kwenawa-ni aye bibedo guti me ngolo kop i komgi. (2 Tec. 1:8, 9) Medo i kom meno, bibedo bal ka Lakricitayo mo tamo ni tito kwena ki mit kom pe mitte pien “gibicero woko, jo ma kitgi atir wa ki jo ma kitgi pe atir.” (Tic. 24:15) Lok pa Lubanga konyowa me niang ni jo ma kingolo kop i komgi-ni gin “dyegi” ma kibityekogi woko dok “gibedo pe matwal.” Tito kwena ma watito ni nyuto kica pa Lubanga, minigi kare me lokke wek gunong “kwo ma pe tum.” (Mat. 25:32, 41, 46 NW; Rom. 10:13-15) Ka ce pe watito kwena me Ker-ri bot dano, ci gin biwinyo kwena man ma twero keligi kwo-ni nining?
9. I yo ango ma nywako i ticwa me pwony okonyo kwede in ki dong jo mukene?
9 Tito kwena maber-ri konyowa bene. (Kwan 1 Tem. 4:16.) Tika dong inongo ni tito lok kom Jehovah kacel ki gen me Ker-ri jingo niyeni kacel ki mar-ri i kom Lubanga? Mono peya okonyi me dongo kit mabeco pa Lukricitayo? Mono pe inongo ni nyuto dyere-ni bot Lubanga ki i nywako i ticwa me pwony konyi me nongo yomcwiny? Jo mapol ma gunongo mot man me pwonyo jo mukene ki lok me ada gunongo bene yomcwiny ka gineno kit ma cwiny maleng konyo kwede jo meno me keto alokaloka ma keligi adwogi mabeco.
BED MA WANGI BIT ME NENO JAMI
10, 11. (a) I yo ango ma Yecu ki Paulo gunyuto kwede ni wanggi twolo dok bit? (b) Mi lapor ma nyuto kit ma bedo ma wangwa twolo dok bit twero konyowa kwede me dongo dirowa i ticwa me pwony.
10 Miti pa ngat moni i kwena maber-ri kitwero tugone i yo mapol. Pi meno, lutit kwena myero gubed ma wanggi bit me neno jami. Yecu aye lanen ma walubo. Kit ma Yecu obedo labongo roc-ci, en onongo twero neno keccwiny ma Laparicayo moni onongo tye kwede i cwinye, ningut kikome ma dako mo ma labalo onyuto, ki dong cwiny me jalo jami ma dato onyuto. (Luka 7:37-50; 21:1-4) Yecu onongo cobo mitgi me cwiny pa ngat acel acel i yo mupore. Ento wek latic pa Lubanga obed ma neno neno maber, pe mitte ni en kong obed dano ma pe ki roc. Lanen pa lakwena Paulo nyutiwa man maber. En otiyo ki yo mapat pat wek okonye me cako lok ki jo mapat pat.—Tic. 17:22, 23, 34; 1 Kor. 9:19-23.
11 Ka watute me bedo ma wangwa twolo dok wabedo ki wang ma bit me neno jami kit ma Yecu gin ki lakwena Paulo gineno kwede, ci watwero niang kit ma myero watug kwede miti ki i cwiny jo ma wanongogi. Me lapore ka warwatte ki ngat moni, omyero wanen lanyut ma nyuto tekwarogi, mitigi nyo kit ma otgi tye kwede. Gwok nyo itwero neno gin ma gitye ka timone i wang cawa meno ci ipwoyogi i kare ma itye ka cako lok kwedgi.
12. I kare ma nongo watye i tito kwena, pingo myero wagwokke ki i lok ma waboko?
12 Dano ma wange twolo dok tye ka neno tute pe me weko gin mo mapat dwoyo tamme. Ka watye i ticwa me pwony, boko lok ki luwotwa twero bedo ber. Ento, omyero wiwa opo ni gin mumiyo watye i tic man aye ni wamito tito kwena bot jo mukene. (Latit. 3:1, 7) Pi meno, omyero wanen ni boko lok ma waboko ka wawoto i ot ki ot pe odwo tamwa ki i ticwa me pwony. Nyamo lok i kom kit ma myero wanywak kwede lok ki jo ma ginyuto miti obedo yo acel ma konyowa wek tamwa pe odwone i kom gin mukene. Dok bene kadi bed cim cing kine mukene konyowa i tic me tito kwena, omyero waket tek wek pe obal nywako lokwa ki rwod ot.
NYUT MITI
13, 14. (a) Wan watwero niang gin ma ngat moni maro nining? (b) Gin ango ma twero tugo miti pa dano i kom jami me cwiny?
13 Lutit kwena ma wanggi twolo dok gitye atera gitero itgi ka winyo lok pa jo ma girwatte kwedgi. Lapeny ango ma itwero penyo kwede ngat ma i nongo i ticwa me pwony wek omi tamme? En mono pekone tye ni dini tye mapol, tim gero orumo ka ngetwa, nyo gwok kit ma jami dong tye ka ngayo kwede wang gamente? Tika iromo tugo mitine i kom jami me cwiny kun i loko i kom kit ma Lubanga oyubo kwede jami makwo nyo nyuto bote kit ma tam ma Baibul miyo tiyo kwede maber adada? Cokcok dano me tekwaro ducu gimaro lega, kadi wa jo mogo pe giye i kom Lubanga. Jo mapol gikalo akala ka Lubanga winyo lega. Jo mukene penyo lapeny aye tugo mitigi: Tika Lubanga winyo lega ducu? Ka pe kumeno ci dong gin ango ma myero watim wek Lubanga owiny legawa?
14 Wan watwero pwonyo jami mapol i kom kit me cako lok ki dano ka ce waneno kit ma lutit kwena mucwiny gicako kwede lok. Nen kong kit ma gitemme kwede wek pe ginen calo jo ma giyelo wi dano ki lapeny nyo gimito ni giniang jami ma ngat moni neno ni pe obedo pa lwak. Dwangi ki kit ma wanggi nongo tye ka nen kwede ka gitye ka temme me niang tam pa rwod ot nongo tye nining?—Car. 15:13.
KICA KI DIRO
15. Pingo kica myero obed i kin tutewa me tito kwena?
15 In tika inongo mit-ti ka dano tye ka coni ka itye ka nino matek? Jo mapol pe giwinyo maber ka kicoyogi atura. Ka ce icoyo ngat moni motmot ber makato. Man bene dongo roma aroma ki tutewa me coyo dano i yo me cwiny. Me labolle, ka ngat mo ocako daa i komi pien ibino i pacone, gin ango maber ma myero itim? Gam lokke ki kica, pwoye pi wacci lok atir ka maleng, ci ia giri woko mot. (Car. 15:1; 17:14; 2 Tem. 2:24) Kica ma inyuto twero weko en nyuto cwiny maber i nino mukene ka Lacaden mapat ononge.
16, 17. Omyero wabed ki niango matut i ticwa me pwony nining?
16 I kine mukene itwero loyo cwiny maraco ma jo mukene ginyuto. Ngat mo twero waco ni, “Pe iyela. An atye ki dinina” nyo ni, “cwinya pe i lokki-ni” pien en neno ni man aye yo mayot me juko lok. Ento kadi kumeno, ka itye ki diro dok itute i yo me kica, itwero penyo lapeny ma tugo miti pa rwod ot i kom jami me cwiny.—Kwan Jo Kolocai 4:6.
17 I kine mukene ka warwatte ki jo ma ginongo ni gitye ki tic mapol, twero bedo ber ka wapwoyogi ci waa woko. Ento i kine mogo bene, itwero waco gin mo macek ma pire tek. Utmegiwa mogo giyabo Baibul oyotoyot ci gikwano wang Baibul ma tugo tam pa dano ci giweko rwod ot ki lapeny—man pe romo wa dakika acel. Kit me cako lokgi i yo maber kumeno-ni weko jo mukene ginongo ni kara ticgi-ni pe dok nongo odiyogi tutwal ma pe gitwero winyo lok olo manok nok. Pingo kong pe item timone kit meno ka twere?
18. Gin ango ma watwero timone wek wadong dirowa me miyo caden ma pe wayubbe iye?
18 Ka warwatte ki dano i kare me ticwa me nino ki nino, waromo tugo mitigi i kom jami me cwiny ka ce wayubbe me miyo caden ma pe wayubbe iye. Omege ki lumege mapol giwoto ki bukke mogo i jebagi nyor i gica me cing. Twero bene bedo ni gitye ki wang Baibul ma dong guyubo maber me nywakone ki jo mukene tekki kare onen. Itwero penyo tam ki bot lanen wi tic me pwony nyo painia ma tye i kacokkewu ma lubbe ki kit ma myero iyubbe kwede me timone.
WAKONYU WADIWA KI MWOLO
19. Pingo omyero pe wajuk tute me konyo wadiwa?
19 Miti me konyo wadiwa wek guye lok me kwena maber obedo gin ma bino kene i cwinywa. (Yoc. 2:13; Tic. 10:24, 48; 16:31, 32) Ka ce gukwero tutewa mukwongo woko, man twero weko mitiwa me temone i kare mukene bene kwe woko. Wan watwero tamo ni pe tye gin mo ma waromo timone nyo wacone wek olok tamgi. Ento pud aye jami ma timme i kwo pa wadini twero weko kwogi nyo tamgi lokke. Nyo gwok in kikomi idongo dironi me tito lok me ada ma weko inongo adwogi mapat.
20. Pingo diro mitte ka itye ka lok ki wadini?
20 Myero bene watemme me niang kit ma wadiwa giwinyo kwede. (Rom. 2:4) Omyero bene walok kwedgi ki mwolo kit ma waloko ki jo ma wanongogi i ticwa me pwony-nyi? Lok kwedgi ki mwolo dok ki woro. Pe myero i lok botgi calo in lapwony, minigi gin ma nyuto ni lok me ada oweko kwo-ni tye maber. (Ep. 4:23, 24) Nyutigi ka maleng kit ma Jehovah omini kwede mot dok ‘pwonyi wek ibed maber.’ (Ic. 48:17) Wek wadini gunen ki boti kit ma Lakricitayo myero okwo kwede.
21, 22. Tit kong gin mutimme ma nyuto adwogi maber ma bino ka wadiyo cwinywa me konyo wadiwa i yo me cwiny.
21 Ma cokcok-ki, lamego mo ocoyo ni: “Kare ducu abedo ka temme me miyo caden ki omegina ki lumegina matinone ki maditone i lokka ki dong nyuto kit mabeco. Onongo pe aweko mwaka acel kato ma pe acoyo botgi waraga gin ducu ki acel acel. Ento pi mwaki 30 kulu, an kena aye abedo Lacaden i gangwa.”
22 Lamego ni omedde ki lokke ni: “I nino mo acel, agoyo cim bot lamera maditte ma onongo bedo i bor piny me mairo mia mabor ata. En owacca ni epenyo lakwatte ni okwan Baibul kwede, ento pe otimo. I kare ma awacce ni cwinya bibedo yom me konyo en, Lamera owacci: ‘Ayela pe, ento omyero inge ni: Kadi ningo an pe abidoko Lacaden pa Jehovah.’ I nge kare ma acwalo bote buk me Baibul Mono Ada Pwonyo Gin Ango?, acako bedo ka gone cim inge nino acel,aryo nyo adek. Ento anongo ni en peya oyabo buk meno. Me agikkine dong apenye ki i cim ni okwany bukke, ci pi dakika ma romo 15 wakwano dok wanywako kacel wang Baibul ma kinyutogi. I nge bedo ka gone cim kare ki kare en ocako mito ni myero wakwan pi dakika makato 15. Lacen en dong ocako gona cim en kikome ni wakwan, kine mukene gona ma nongo peya aa ki i kabuto odiko con dok nino mukene gona kiryo i nino acel. Mwaka ma lubo meno en onongo batija, dok inge mwaka acel en odoko painia.”
23. Pingo omyero pe wailu cingwa woko i tutewa me coyo dano ki i nino i yo me cwiny?
23 Konyo jo mukene wek guco woko ki i wang nino i yo me cwiny mito diro ki tutte labongo ilo cing. Ento kadi bed kumeno, jo mamwol pud gitye ka nyuto mitigi i tutewa me coyogi-ni. Ka kitimo curane ci kinongo ni wel dano makato 20,000 kulu ginongo batija dwe ki dwe me doko Lucaden pa Jehovah. Pi meno, omyero waketu cwinya i kom tira pa Paulo bot ominwa Arkipo ma okwo i cencwari mukwongo ni: “Myero inen ni icobo tic ma dong igamo i Rwot.” (Kol. 4:17) Pwony ma lubo man bikonyowa me niang gin mumiyo omyero watit kwena kun wangeyo ni kare dong odic woko.
[Peny me Kwan]
[Bok i pot karatac 13]
KIT ME BEDO MA WANGI TWOLO
▪ Bed ki tic mapol icobo miti pa Lubanga
▪ Kwer timo jami maraco
▪ Gwokke ki adwogi marac ma bino pi nino i yo me cwiny
▪ Bed ki neno mupore i kom jo me wang ticwa
▪ Tem yo manyen me tito kwena bot jo mukene
▪ Wi myero opo ni ticci me tito kwena-ni pire tek
