Tit Kwena Ki Cwiny Ni Kare Dong Odic Woko

“Tit lok pa Lubanga, cung iye matek.”​—2 TEM. 4:2.

TIKA IROMO TITONE?

Pingo Lukricitayo me cencwari me acel gutito kwena ki cwiny ni kare dong odic woko?

I yo ango ma watwero bedo kwede ki cwiny ni kare dong odic woko?

Pingo mitte pi oyot tutwal i kare-ni ni watit kwena me Ker-ri?

1, 2. Ngo ma onongo lakwena Paulo tye ka wacone i kare ma en ocuko cwinywa ni myero ‘wacung matek’ i tito kwena dok lapeny ango ma gibino?

 JO MA ticgi tye me laro kwo pa dano pol kare gitiyo kun giparo pi cawa. Me labolle, jo ma gineko mac girune me cito ka ma kimitogi iye pien nongo gingeyo ni kwo tye ka mading.

² Macalo Lucaden pa Jehovah, mitiwa tye me konyo dano wek gular kwogi. Pi meno, watero ticwa me tito kwena maber me Ker-ri calo gin ma pire tek. Ento ngene kene ni pe dong warune ata. Dong, gin ango ma lakwena Paulo onongo tye ka wacone i kare ma en omiyo lok me cuko cwiny ni: “Tit lok pa Lubanga, cung iye matek”? (2 Tem. 4:2) Lok man ma kigonyo ni ‘cung iye matek-ki’ i leb Grik te lokke ni “kare dong odic woko.” Wan watwero tito kwena nining kun wanyuto ni kare dong odic woko? Dok pingo ticwa-ni mitte pi oyot tutwal?

PINGO TICWA ME PWONY-NYI MITTE PI OYOT?

3. Adwogi ango ma bino ka dano guye nyo gukwero kwena me Ker-ri?

³ Ka itamo i kom kit ma ticwa me tito kwena-ni laro kwede kwo pa dano, ci ibiwinyo ni mitte pi oyotoyot ni myero itit kwena maber-ri bot jo mukene. (Rom. 10:13, 14) Lok pa Lubanga waco ni: “Kadi awac ki dano ma latim marac ni, ‘In ibito ada,’ ento ka ce en olokke oweko timo bal, ce otiyo gin ma cik mito dok ma tye atir, . . . en bibedo kwo, pe bito gire. Dok abiweko bal ducu ma yam en otimo pe dong abipo pigi.” (Ejek. 33:14-16) Ki lok ada, Baibul niango jo ma gitito kwena me Ker-ri ni: “Gin kikomgi gibilarre kacel ki jo ma giwinyo lokgi”​—1 Tem. 4:16; Ejek. 3:17-21.

4. Pingo jo mungak gumiyo tito kwena onongo mitte pi oyot tutwal i cencwari me acel?

⁴ Me niang tyen lok mumiyo Paulo ocuko cwiny  Temceo ni opwony ki cwiny ni kare dong odic woko, nen kong lok mogo murumo nget ginacoya me wi pwony man. Wakwano kany ni: “Tit lok pa Lubanga, cung iye matek i kare maber ki i kare marac, mi dano guniang maber, jukgi kun idiyo cwinyi i pwony kare ducu. Pien kare tye ka bino ma dano dong pe biciro pwony me ada, ento itgi bibedo ka yilo ayila, kun gicoko lupwony ma twero pwonyogi ki gin ma gimito winyone. Gibiloko ngegi wek pe giwiny lok ada, kun gingak woko giwirre i lok ma tere pe.” (2 Tem. 4:2-4) Yecu onongo con otito ni jo mungak gibibedo tye. (Mat. 13:24, 25, 38) Ka kare woto ki nyiko cok, onongo mitte tutwal ni Temceo otit ‘lok-ki’ kadi wa i kacokke wek pe jo mungak gubwol Lukricitayo ki pwonygi me gobagoba-ni. Kwogi onongo tye ka mading. Ento i kare-ni kono?

5, 6. Tam ango ma pol pa dano ma warwatte kwedgi i ticwa me pwony gitye kwede?

⁵ Jo ma gungak ki i woro me adada-ni gumedde dok guket i kin piny. (2 Tec. 2:3, 8) Pwony macalo mene ma it dano mito winyone i kare-ni? I kabedo mapol, pwony man ni kwo ocakke pire kene-ni onongo cwak madit ki bot jo me dini. Kadi bed ni pwony man kipwonyo i leb me cayan, ento inongo ni pwony-nyi odoko calo dini kun gudo kit ma dano gineno kwede Lubanga ki dong jo mukene. Pwony mukene ma oywek i kare-ni aye ni Lubanga pe paro piwa; pi meno, pe mitte ni omyero wabed ki miti i kome. Pingo pwony magi mit mada bot dano, ma ginino woko i yo me cwiny? Pwony magi gimiyo dano bedo ki tam ni, ‘Iromo timo gin mo keken ma cwinyi mito pien Lubanga peke dok pe bipenyi.’ Ada, man aye lok ma it dano mapol tye ka mito winyo mada.​—Kwan Jabuli 10:4.

⁶ Ento tye bene pwony mukene ma it dano mito winyone adada. Jo mukene ma gicito i kanica gimaro lupwonye dini ma gipwonyogi ni, ‘Kadi bed itim gin marac Lubanga pud mari.’ Padi nyo lukwat gipwonyo pwony ma it dano maro winyone ki waccigi ni kwero kwer mogo me dini, lega mica, ki dong woro cal kelo laa pa Lubanga. Ento jo magi pe gingeyo rac pa jami magi. (Jab. 115:4-8) Ento, ka onongo watwero coyogi i yo me cwiny wek gunge lok me Baibul, ci onongo gitwero nongo mot me Ker pa Lubanga.

TITO KWENA KI CWINY NI KARE DONG ODIC WOKO TE LOKKE NGO?

7. Watwero nyuto cwiny ni kare dong odic woko nining?

⁷ Daktar ma yango dano myero oket cwinye ducu i tic ma en tye ka timone pien kwo pa latwo moni-ni nongo tye ka mading. I ticwa me pwony, watwero nyuto ni kare dong odic woko ka waketo cwinywa i kom ticwa man kun watamo i kom gin ma wabinyamone, lapeny nyo lok ma twero gudo cwiny jo ma wanongogi. Bedo ma wangeyo ni kare dong odic woko twero konyowa bene me timo alokaloka i yubwa wek wadok cen ka limo jo ma gitye ki cwiny me winyo lokwa.​—Rom. 1:15, 16; 1 Tem. 4:16.

8. Timo jami i yo ma nyuto ni kare dong odic kwako gin ango?

⁸ Bedo ma wangeyo ni kare dong odic weko waketo jami ma pigi tego bedo mukwongo. (Kwan Acakki 19:15.) Me labolle, ket kong ni inge gamo adwogi me pimme ni, daktarni olwongi i opicce ci owacci ni: “Nen ba! Kwo ni tye ka mading. Idong ki dwe acel keken me timo gin mo ma lubbe ki twoni-ni.” Kadi ningo pe ibipute ki ngwec ki i opicce calo ngat mo ma tye karune me cito ka neko mac ka mo ma kilwonge iye. Ento ibitero iti me winyo gin ma en mito ni itim ka idok paco, ci ibitero calo gin me acel ma myero iti iye.

9. Pingo watwero wacone ni Paulo otito kwena i Epeco i yo ma nyuto ni kare dong odic woko?

⁹ Wan watwero niang kit ma Paulo onyuto kwede ni kare dong odic woko ki i lok ma en owaco bot luelda me Epeco ma lubbe  ki tito kwena i distrik me Acia. (Kwan Tic pa Lukwena 20:18-21.) Waniang maber ni i nino ma en oo kwede litap, en ocako mere limo dano i ot ki ot kun tittigi kwena maber. Medo i kom meno, pi mwaka aryo kulu en obedo ka lubo pulanne kun “laro lok nino ducu i cukul pa Tirano.” (Tic. 19:1, 8-10) Labongo akalakala mo, kit ma Paulo onongo neno kwede ni kare dong odic woko-ni oloko kit ma en timo kwede jamine nino ducu. Tira ma kimiyo ni myero ‘wati ticwa me pwony ki cwiny ni kare dong odic woko-ni’ pe tye ni omyero owek wanong ni ticci nurowa tutwal. Ento kadi bed kit meno, omyero wawek tito kwena obed gin ma pire tek loyo i kwowa.

10. Pingo cwinywa yom ni Lukricitayo gubedo ki cwiny ni kare dong odic woko mwaki ma romo 100 angec?

¹⁰ Ma peya mwaka 1914 oromo, gurup pa Lutino kwan mo manok me Baibul gumoko tamgi me tito kwena i wi lobo lung kun lanengi nyutiwa gin ma tito kwena ki cwiny ni kare dong odic obedo. Kadi bed onongo ginok, guniang gin mumiyo onongo pire tek tutwal ni gitit kwena i karegi ca, ci gutito pi Ker-ri ki mit kom. Gin gucoyo pwony i gajeti mapol makato 2,000 kulu dok bene gutiyo ki jami mogo calo cinema me cal ma woto awota ma kilwongo ni “Photo-Drama of Creation.” I yo ma kit magi gin gutito kwena maber-ri bot dano milion mapol ata. Ka onongo Jehovah pe okonygi me bedo ki cwiny ni kare dong odic woko, dano adi i kinwa ma onongo kono guwinyo kwena man me Ker-ri?​—Kwan Jabuli 119:60.

GWOKKE PE WI OWIL NI KARE DONG ODIC WOKO

11. Gin ango ma oweko jo mukene wigi owil ni kare dong odic woko?

¹¹ Jami ma gidwoyo tam pa dano twero weko ngat moni wiye wil woko i kom gin mumiyo tic me tito kwena pire tek. Lobo pa Catan-ni opong ki jami ma gitwero weko walungo wiwa ka cobo mitiwa nyo timo gin mukene. (1 Pet. 5:8; 1 Jon 2:15-17) Jo mogo ma onongo kong con gubedo ki cwiny ni kare dong odic wigi owil woko. Me labolle, lakricitayo mo ma nyinge Dema i cencwari me acel onongo obedo ka ‘tic kacel’ ki Paulo, ento lobo pa Catan-ni odwoyo tamme woko. Ma ka medde ki jingo cwiny omine i kare me peko, Dema oweko Paulo woko.​—Pile. 23, 24; 2 Tem. 4:10.

12. Tic ango ma watye kwede i kare-ni, dok jami ango ma wabibedo ki kare me nongone i anyim?

¹² Ka ni wabed ki cwiny ni kare dong odic, omyero walweny ki cwiny me nongo mit pa jami me lobo-ni. Omyero walweny ki atematema man wek ‘wamak kwo ma en aye kwo kikome-ni.’ (1 Tem. 6:18, 19) Wageno ni iye ni kwo ma pe tum i lobo i te Ker pa Lubanga bibedo ki jami mapol mamit dok ma agikkine pe. Ento i kare-ni bene, tic me konyo jo mukene wek gubwot ki i Armagedon mitte mada.

13. Kit ma dong wan wadoko Lukricitayo-ni, watwero gwoko cwiny ni kare dong odic-ci nining?

¹³ Kadi bed ni pol pa dano me lobo-ni gitye ka nino i yo me cwiny, gin ango ma twero konyowa wek wagwok cwiny ma watye kwede ni kare dong odic woko-ni? Wiwa myero opo ni i kare mo kong wan bene wabedo ka nino i col piny dok wabedo calo jo muto. Ento dong ki coyowa woko, dok Kricito omenyo derone i komwa kit ma Paulo onyuto kwede. Watye dong ki mot me menyo piny bot jo mukene. (Kwan Jo Epeco 5:14.) I nge waco lok meno, Paulo ocoyo ni: “Wugwokke maber i kwo ma wubedo kwede; pe wubed macalo jo ma kwiya piny, ento calo jo maryek. Kare ma tye myero iti kwede i yo maber, pien nino me kare-ni opong ki gin marac.” (Ep. 5:15, 16) En i kare man ma jami maraco pol-li, omyero ‘wati maber ki kare ma tye’ pi jami ma weko wabedo ma wangwa twolo i yo me cwiny.

 WATYE KA KWO I KARE ME AGIKKI

14-16. Gin ango ma weko tito kwena me Ker-ri mitte pi oyot tutwal i kare-ni?

¹⁴ Nicakke wacon, tic me pwony ma Lukricitayo gitye kwede-ni mitte ni kitim oyotoyot, ento dong mitte pi oyot tutwal i kare-ni. Cakke i 1914, lanyut ma kimiyogi i Lok pa Lubanga dong gitye ka cobbe. (Mat. 24:3-51) Kwo pa dano tye ka mading ma lapore pe. Kadi bed lobbe matego cokcok-ki guketo cinggi piny i winye me kuc, lobbe magi pud gitye ki bom nuclear ma romo 2,000 kulu ma giromo bayone i kabedo mo keken i lobo kany. Luloc giwaco ni jami me yubo bomb me nuclear tye ka “rweny” mapol adada. Tika nyo lutim aranyi bene gitye ki jami magi? Jo mogo ma gineno jami ma timme i lobo kany gibyeko ni dano romo tum woko ducu i lweny ma lutim aranyi twero cakone. Ento omyero bene wange ni lweny keken aye pe tye ka myelo kom dano pi kwogi.

¹⁵ Ripot mo acel pa Lancet ki Univaciti College London i 2009 waco ni: “Alokaloka pa jami calo kot ki ryeny pa ceng, lyeto ki ngico-gu bibalo yotkom pa dano i cencwari me 21 kun keto kwo pa dano bilion mapol ka mading adada.” Dok man bene twero kelo pong pa nam madongo, two pa piny, pong pa piny ki pii, two maraco, kot ma cwe ki yam matego ki dong lweny me laro lonyo manok ma tye i lobo. Goba mo pe iye, lweny ki peko ma poto atura gitye ka balo dongo lobo.

¹⁶ Jo mukene gitwero tamo ni lweny me bom me nuclear twero bedo i kin jami ma bibedo ‘lanyut’ me agikki piny. Ento pol pa dano pe giniang kit ma lanyut magi pigi tek kwede. Lanyut magi dong guri pi mwaki mapol dok ginyuto ni Yecu dong odwogo nyo ni tye i loc dok bene ni agikki me lobo man dong cok. (Mat. 24:3) Ma naka yam lanyut magi peya gunen ka maleng calo i kare-ni. Man gire ada obedo kare ma myero dano guco woko ki i nino i yo me cwiny. Ticwa me pwony-nyi twero konyogi me coo woko.

17, 18. (a) Kwo i kare me agikki ni gudowa nining? (b) Gin ango ma twero weko dano giloko neno ma gitye kwede i kom kwena me Ker-ri?

¹⁷ Wadong ki kare manok keken me nyuto marwa pi Jehovah ki dong tyeko tic me pwony ma kiminiwa i kare me agikki-ni. Gin ma Paulo otito bot Lukricitayo me Roma i cencwari me acel pire tek botwa, en owaco ni: “Wungeyo kare ma wutye iye, ni, kare dong oromo myero wuco woko ki i wang nino. Pien larrewa dong onyiko cok tutwal, kato ma i kare ma yam wakwongo ye iye Rwot-ti.”​—Rom. 13:11.

¹⁸ Jami ma kitito ni gibitimme i kare me agikki-ni twero weko dano giniang ni myero gibed ki wat maber ki Lubanga. Jo mukene bene wigi cako tic ka guniang ni dano gimito kony ma lubbe ki pekki mogo calo can cente, bura me bombom nuclear, turo cik nyo balle pa jami murumo ngetwa ma gitye ka ngayo wang gamente me lobo-ni. Medo i kom meno, jami calo two, ket keny nyo to pa dano me amara weko bene wang jo mukene yabbe me neno ni jami me cwiny mitte pi jo me odigi. Ka wacito i ticwa me pwony, man weko wabedo ki kare me konyo jo ma kit meno.

WEK CWINY NI KARE ODIC-CI OKONYI

19, 20. Bedo ki cwiny ni kare dong odic woko-ni okonyo Lukricitayo mogo me loko kwogi nining?

¹⁹ Bedo ki cwiny ni kare dong odic okonyo Lukricitayo mapol me medo cawagi i ticwa me pwony. Me labolle, luot mo munyome nyen dok pud gitye i mwakagi me bulu i lobo Ecuador gudwoko rwom me kwogi piny i nge winyo pwony i gure me nino acel i mwaka 2006 ma onongo wi lokke tye ni, “Bed ki Wang ma Pe Mito Jami me Kom Mapol.” Gin guryeyo jami ma mitte dok i nge dwe adek keken onongo dong gudak woko ki ka ma gibedo iye i ot me rum adek ci gucito i rum acel, gucato jamigi mukene  ci guculo banyagi ducu. I nge kare manok keken gudoko painia, guye tam ma laneno me adwol ominigi ni myero gucit ka miyo kony i kacokke ma can lutit kwena tye iye.

²⁰ Omego mo ma i Kumalo me lobo Amerika ocoyo ni: “I nge nongo batija mwaka 30 mukato angec, an kacel ki dakona wabedo tye i gure mo i 2006. I kare ma watye ka dok paco i nge yub man, wanyamo kit ma waromo keto kwede tira ma kimiyo i tic i kwowa wek wabed ki wang ma pe mito jami mapol. (Mat. 6:19-22) Onongo watye ki odi adek, ngom, mutoka mabeco, yeya, ki dong mutoka ma dano bedo iye calo ot. Wamoko tamwa me donyo i tic pi kare malac pien wanongo ni wabedo ka balo kare ki kerowa me nongo jami me kom. I 2008, wadoko painia marii calo latin anyakawa. Wanongo twon yomcwiny ma pe twere pi bedo ka tic kacel ki utmegiwa! Wabedo ki kare me tito kwena ka ma can lutit kwena tye iye. Dok bene pien watye ka miyo cawa mapol bot Jehovah, man oweko wawinyo ni en tye cok kwedwa. Ento mot madit loyo aye ni waneno jo mukene cwinygi yom pi ngeyo lok ada ma tye i Lok pa Lubanga.”

21. Ngec ango ma konyowa me tito kwena ki cwiny ni kare dong odic woko?

²¹ Wangeyo gin ma cok timme i kom lobo marac me kare-ni​—“nino me ngolo kop ki tyeko dano ma pe gilworo Lubanga.” (2 Pet. 3:7) Ngec ma watye kwede i kom Lok pa Lubanga konyowa me tito ki mit kom bot dano pi twon can madit atika-ni ki dong lobo manyen ma bino i ngeye. Wan wamedde ameda ki bedo ki cwiny ni kare dong odic wek wami dano gubed ki gen. Ka wabedo ka timo tic man ma mitte pi oyot tutwal-li, ci wanyuto ni wamaro Lubanga kacel ki luwotwa.

[Peny me Kwan]