Wabedu Ki Yomcwiny Pi Gen Ma Watye Kwede

“[Tye] gen me nongo kwo ma pe tum. Lubanga ma pe loko lok goba yam ociko pire i acakki piny.”​—TITO 1:2.

ME POYO WIC

Wangeyo nining ni yomcwiny madit bedo i polo ka ngat acel ma kiwiro otyeko kwone ma kun bedo lagen?

Cobbe pa gen pa romi mukene-ni kubbe ki gen pa jo ma kiwirogi nining?

Wek wanen cobbe pa genwa, “kit kwo maleng ki me woro Lubanga” ango ma omyero wabed kwede?

1. Gen ma Jehovah miyowa konyowa me ciro peko nining?

 JEHOVAH tye “Lubanga ma miyo dano ducu bedo ki gen.” Lakwena Paulo aye owaco lok meno kun medo ni Jehovah twero ‘miyo botwa yomcwiny ducu ki kuc pong i iwa pi niyewa i kome, wek genwa obed ka medde ameda pi tek pa cwiny maleng.’ (Rom. 15:13) Ka watye ki gen matek, ci wabitwero ciro kit peko mo keken ma oromo bino kun nongo cwinywa opong ki yomcwiny ki kuc. Kodi gen ma kit meno bibedo macalo “lajuk me mel,” ma cwiny lukricitayo mukene-ni ‘cung iye matek ma pe wirre atata,’ calo pa Lukricitayo ma kiwirogi. (Ibru 6:18, 19) Genwa obedo gin ma watwero moko iye i kare ma nongo kwo tye matek calo nam ma tye ka tagge, dok bikonyowa pe me mol ata nio wa ibedo ki akalakala nyo bedo labongo niye.​—Kwan Jo Ibru 2:1; 6:11.

2. Gen aryo mene ma Lukricitayo i kare-ni gitye kwede, dok pingo “romi mukene[-ni]” giketo cwinygi i kom gen ma jo ma kiwiro gitye kwede-ni?

² Lukricitayo ma gikwo i kare me agikki-ni gitye ki gen acel i kin aryo magi. Udong “romi manok” pa Lukricitayo ma kiwirogi gitye ki gen me kwo labongo too i polo kun gibedo luker ki lulamdog kacel ki Kricito i Ker-re. (Luka 12:32; Yabo. 5:9, 10) “Lwak dano mapol ata” nyo “romi mukene[-ni]” gitye ki gen me kwo ma pe tum i paradic me lobo ma Ker pa Meciya biloyone. (Yabo. 7:9, 10; Jon 10:16) Romi mukene-ni omyero pe wigi owil ni laregi cung i kom teno kor jo ma kiwirogi ma gubedo ‘utmegi’ Kricito ma pud gitye i lobo kany. (Mat. 25:34-40) Jo ma kiwirogi gibinongo motgi, dok gen pa romi mukene-ni bicobbe labongo tur. (Kwan Jo Ibru 11: 39, 40.) Me acel, kong wanenu gen ma tye pi jo ma kiwiro.

“GEN MAKWO” PA LUKRICITAYO MA KIWIROGI

3, 4. Lukricitayo ma kiwirogi ‘ginywalogi odoco wek gubed ki gen makwo’ nining, dok gen meno obedo ngo?

³ Lakwena Petero ocoyo waraga aryo bot Lukricitayo ma kiwirogi dok en olwongogi ni ‘jo ma kiyerogi’ (1 Pet. 1:1, 2) En omiyo lok mapol matut i kom gen mamwonya ma romi manok gitye kwede. I waragane me acel, Peter ocoyo ni: “Gipwo Lubanga Won Rwotwa Yecu Kricito! Pien pi kicane madit omiyo ginywalowa odoco wek wabed ki gen makwo pi cer pa Yecu Kricito ki i kin jo muto, ki dok wek wanywak ginaleya ma pe top, ma cilo pe ogudo, ma pe balle, ma gikano piwu i polo. Lubanga tye ka gwokowu ki tekke pi niyewu, wek wunong larre ma giyubo, ma binen i kare me agikki piny. Wubed ki yomcwiny pi man.”​—1 Pet. 1:3-6.

⁴ Lukricitayo manok ma Jehovah oyerogi me ribbe kacel ki Kricito i Kerre me polo-ni ‘ginywalogi odoco’ i cwiny macalo litino pa Lubanga. Giwirogi ki cwiny maleng pi doko luker ki lulamdog kacel ki Kricito. (Yabo. 20:6) Petero otito ni ‘nywalle odoco-ni’ miyo gibedo ki “gen makwo,” ma en olwongo ni “ginaleya ma pe top, ma cilo pe ogudo, ma pe balle” ma kikano pigi “i polo.” Gen man mamwonya atika-ni miyo jo ma kiwirogi gibedo ki yomcwiny. Ento gen man bicobbe ka gubedo lugen.

5, 6. Pingo Lukricitayo ma kiwirogi myero guyelle wek gumok matek i lwongogi?

⁵ I waragane me aryo, Petero ocuko cwiny Lukricitayo ma kiwirogi ni omyero ‘gumedde wek gumok i lwongogi matek.’ (2 Pet. 1:10) Omyero guyelle matek pi dongo kit pa Lukricitayo macalo niye, genne, ki dong mar. Petero owaco ni: “Ka wutye ki gin magi ducu, ma wutye kwede bene mabup, ci bimiyo . . . wunyak nyig mabeco.”​—Kwan 2 Petero 1:5-8.

⁶ I lokke ma ocwalo bot luelda ma kiwirogi ki cwiny maleng i cencwari me acel i kacokke me Piladelpia ma tye i Acia, Kricito ma dong ocer owaco ni: “Pien imako lokka me diyo cwiny iciro can, an bene abigwoki maber i kare me omo cwiny, ma tye ka bino i kom wi lobo ducu, me temo jo ma bedo i wi lobo-ni. Abebino oyotoyot. Mak gin ma itye kwede-ni matek liking, wek ngat mo pe oma lalukanani woko.” (Yabo. 3:10, 11) Ka Lakricitayo mo ma kiwiro orwenyo genne, en dong pe binongo “lalukana me deyo ma pe balle” ma kiciko pire bot jo ma kiyerogi ka gubedo lugen nio wa i to.​—1 Pet. 5:4; Yabo. 2:10.

DONYO I KER-RI

7. Gen mamwonya ango ma Juda oloko pire i waragane?

⁷ Maromo kine ka mwaka 65 K.M., Juda ma obedo omin Yecu ocoyo bot Lukricitayo luwote ma kiwirogi dok en oloko i komgi ni jo ma Lubanga “olwongogi.” (Juda 1; por ki Jo Ibru 3:1.) En onongo mito coyo botgi waraga i kom gen mamwonya me larre ma Lukricitayo ducu ma kilwongogi ‘giribbe iye’ i Ker pa Lubanga. (Juda 3) Kadi bed ni en onongo tye ki lok mukene ma pigi tego, i agikki me waragane macek-ki, en oloko i kom gen mamwonya ma Lukricitayo ma kiwirogi gitye kwede, kun coyo ni: “Deyo obed bot Ngat ma twero gwokowu miyo pe wupoto, dok ma twero miyo wucung  labongo roc mo i nyim deyone ki yomcwiny. Deyo, dit, loc ki twer ducu obed bot Lubanga acel keken, ma Lalarwa, pi Yecu Kricito Rwotwa, cakke ma peya giketo lobo, nio koni, ki kare ma pe gik.”​—Juda 24, 25.

8. Ma lubbe ki Juda 24, ngo ma nyuto ni yomcwiny madit bedo i polo ka ngat acel ki i kin jo ma kiwirogi ogwoko genene ?

⁸ Lakricitayo acel acel ma kiwirogi mito ni Lubanga ogwokke wek pe eyokke epot woko ki i niye. Gengi ma jange i Baibul tye ni Yecu bicerogi ki i lyel kun miyo gicung ki yomcwiny i nyim Lubanga macalo litinone kikome me cwiny. Ka ngat acel ma kiwiro oto ma obedo lagen, ci akalakala mo bedo pe ni gibicerre “i kom me cwiny,” kicerre ma “pe dok to . . . , ma nongo deyone tye.” (1 Kor. 15:42-44) Ka yomcwiny ‘madit tutwal bedo tye ka labalo acel ongut,’ ci kong dong itam yomcwiny madit ma bedo i polo ka ngat acel ma kiwiro ma tye i kin utmegi Yecu otyeko kwone ma kun bedo lagen. (Luka 15:7) Jehovah kacel ki lumalaikane ma gin lugen gibibedo ki twon lelo madit i cawa ma nongo ngat ma kiwiro tye ka nongo mot.​—Kwan 1 Jon 3:2.

9. “Yo yabbe” bot jo ma kiwirogi ma lugen me donyo i Ker-ri nining, dok man gudo jo ma kiwirogi ma pud gitye i lobo nining?

⁹ I yo acel-lu, Petero ocoyo bot Lukricitayo ma kiwirogi ni ka gumoko i lwongogi matek, ci “bimiyo yo yabbe [botgi] malac me donyo i ker ma ri nakanaka pa Rwotwa ma en Lalarwa Yecu Kricito.” (2 Pet. 1:10, 11) “Yo yabbe” botgi me Donyogi i motgi me polo, kitgi macalo Lukricitayo biryeny calo dero. Ka kiwaco ni “yo yabbe” romo bene nyuto mot mamwonya tutwal ma jo magi ma guyelle matek i ngwecgi me kwo gibilimone. Gibineno kwo me niye ma gukato ki iye angec ma nongo cwinygi opong ki lelo kacel ki pwoc madit adada. Gen man miyo Lukricitayo ma kiwirogi ma pud gitye i lobo teko me ‘yubbe i tamgi me medde ki tic.’​—1 Pet. 1:13.

 ‘GEN MA TYE’ PI ROMI MUKENE-NI

10, 11. (a) Gen ango ma tye pi romi mukene-ni? (b) Cobbe pa gen me bedo i lobo kubbe ki Kricito kacel ki nyuto “litino pa Lubanga” nining?

¹⁰ Lakwena Paulo ocoyo pi gen mo mamwonya pa “litino pa Lubanga” ma kiwirogi ma gin “lule jami” kacel ki Kricito. I ngeye en oloko i kom gen mamwonya ma Jehovah tye kwede pi romi mukene-ni: “Ginaketa ducu gitye ka kuro nyuto litino pa Lubanga ki miti madwong mukato kare. Ginaketa ducu onongo yam giketogi i te twero me gin ma tere pe, pe pi mitgi kengi, ento pi mit pa Lubanga ma yam oketo i te twero meno; kun gen tye ni, ceng mo gibigonyo ginaketa woko ki i opii me bedo gin ma top, wek gunong kuc ki deyo ma gimiyo ki litino pa Lubanga.”​—Rom. 8:14-21.

¹¹ Jehovah omiyo ‘gen ma tye’ pi dano i kare ma en ocikke me laro dano ki bot “min kulu macon-ni,” Catan Lagoba, kun tiyo ki ‘lakwaro’ ma kiciko pire (Yabo. 12:9; Acak. 3:15) ‘Lakwaro’ meno mukwongo obedo Yecu Kricito. (Gal. 3:16) Pi to ki cerre, Yecu oyabo yo pi gen pa ginaketa me bedo agonya ki i opii me bal ki to. Cobbe pa gen man kubbe ki “nyuto litino pa Lubanga.” Jo ma kiwirogi gitye bute me aryo pa ‘lakwaro’ ca. ‘Kibiynutogi’ ka gibinywako kacel ki Kricito i tyeko lobo pa Catan. (Yabo. 2:26, 27) Man bikelo larre bot romi mukene-ni ma gua ki i can madit atika-ni.​—Yabo. 7:9, 10, 14.

12. Nyuto jo ma kiwirogi bikelo adwogi maber ango bot dano?

¹² Yweyo ango ma bibedo tye pi “ginaketa” i kare me mwaka alip acel me loc pa Kricito! I kare meno, “litino pa Lubanga” ma gitye i deyone ‘gibinyutogi’ ka gibitic kacel ki Kricito macalo lulamdog, kun gitiyo ki ginkok pa Yecu pi kelo adwogi maber bot dano. Macalo jo ma Ker me polo loyogi, “ginaketa” ma obedo dano-ni gibicako limo adwogi maber me larre ki i kom bal ki to. Motmot dano ma luwiny “gibigonyo[gi] . . . woko ki i opii me bedo gin ma top.” Ka gugak luwiny i kare ducu me loc me mwaka alip acel ki dong wa i kare me atemetema me agikki ma bibino i tum pa mwaka meno, ci nyingi kibicoyo dong matwal i “buk me kwo.” Gin gibidonyo i “deyo ma kimiyo ki litino pa Lubanga.” (Yabo. 20:7, 8, 11, 12) Deyo madit atika!

GWOKO GENWA WEK OBED MA KWO

13. Genwa cung i kom ngo dok i kare mene ma Kricito binen iye?

¹³ Waraga aryo ma Petero ocoyogi ki teko pa cwiny maleng-ngi gitye ki lok madwong ma konyo jo ma kiwiro kacel ki romi mukene-ni me gwoko gengi wek obed ma kwo. En onyuto ni gengi-ni pe cung i kom ticgi ento cung i kom kica ma pe waporre pire pa Jehovah. En ocoyo ni: “Wugwokke bene. Wuket genwu ducu i kom kica ma bibino botwu i kare ma Yecu Kricito binen iye.” (1 Pet. 1:13) Kricito binen nyo bingene ka en obino me miyo mot bot lulub kore ma lugen ki dong ngolo kop i kom jo ma pe ngeyo Lubanga.​—Kwan 2 Jo Tecalonika 1:6-10.

14, 15. (a) Me gwoko genwa wek obed ma kwo, omyero waket tamwa i kom gin ango? (b) Tira ango ma Petero omiyo?

¹⁴ Pi gwoko genwa wek obed ma kwo, omyero waket tamwa kacel ki kwowa i kom “nino pa Lubanga” Jehovah. Nino meno bigiko “polo,” nyo loc  pa dano ki “lobo,” ma obedo dano maraco kacel ki “jami ducu ma tye iye.” Petero ocoyo ni: “Myero . . .  wukur nino pa Lubanga, wuket cwinywu iye wek ninone oo oyotoyot. I nino meno polo bilyel, leny woko, ki lakalatwe bene bileny woko i mac!”​—2 Pet. 3:10-12.

¹⁵ “Polo” ki “lobo” me kare-ni kibileyo ka wanggi ki “polo manyen [gamente pa Kricito] ki lobo manyen [jo manyen me lobo].” (2 Pet. 3:13) I ngeye Petero omiyo tira ma cung i kom bedowa me “kuro” nyo gwoko genwa me bedo ma kwo pi lobo manyen ma kiciko pire: “Pi meno, lurema, ka wutye ka kuro man, wuket tek wek Lubanga pe onong roc mo nyo bal mo i komwu, ento onong wutye ki kuc.”​—2 Pet. 3:14.

WOT MA LUBBE KI GENWA

16, 17. (a) “Kit kwo maleng ki me woro Lubanga” ango ma omyero wabed kwede? (b) Genwa bicobbe nining?

¹⁶ Pe omyero wagwok genwa obed ma kwo keken ento omyero bene wakwo ma lubbe ki genwa. Omyero wangine kekenwa me niang kodi dano ango ma wabedo i yo me cwiny. “Kit kwo maleng ki me woro Lubanga” kwako bedo ki “kit maber i kin jo ma pe gingeyo Lubanga.” (2 Pet. 3:11; 1 Pet. 2:12) Omyero wabed ki ‘mar i kinwa kekenwa.’ Man kwako timo jami ducu ma watwero me gwoko note i kin utmegiwa ma kwako wi lobo ducu kadi wa jo me kacokkewa. (Jon 13:35) “Kit kwo maleng ki me woro Lubanga” nyuto wat macok ma watye kwede ki Jehovah. Man tye iye rwom me legawa, kwano Baibulwa nino ki nino, kwan matut piwa kenwa, woro macalo jo me ot, ki dong tic matek i tito “kwena maber me ker.”​—Mat. 24:14.

¹⁷ Wan ducu ki acel acel wamito ni wabed kodi dano ma Jehovah cwako dok bilarone ka “jami magi ducu bitum.” Wabineno cobbe pa genwa, ma obedo “gen me nongo kwo ma pe tum. Lubanga ma pe loko lok goba yam ociko pire i acakki piny.”​—Tito 1:2.

[Peny me Kwan]

[Cal ma tye i pot karatac 22]

Lukricitayo ma kiwirogi ‘kinywalogi odoco wek gubed ki gen’

[Cal ma tye i pot karatac 24]

Wek gen me kwo-ni obed ada bot jo me oti