“Wod Oyero Me Nyuto Won”
“Wod Oyero Me Nyuto Won”
“Ngat mo pe ma ngeyo ni Wod en anga, kono Won keken, ki ngat ma Wod oyero me nyuto Won bote.”—LUKA 10:22.
IN IROMO GAMONE NINGO?
Pingo Yecu aye opore me nyuto Wonne?
I yo ango ma Yecu onyuto kwede Wonne bot jo mukene?
I yo ango ma itwero lubo kwede lanen pa Yecu i nyuto Won?
1, 2. Lapeny mene ma dong oyelo wi dano mapol, dok pingo?
‘LUBANGA en anga?’ Lapeny man yelo wi dano mapol. Me labolle, kadi bed ni jo ma gilwonge ni gin Lukricitayo giwacci Lubanga obedo Triniti, polgi pud giwacci pwony man niang iye tek adada. Dano mo acel ma tye lacoc dok bene latela dini oye ni: “Pwony me Triniti-ni tito tere tek dok dano pe giromo niang iye.” Kitungcel, jo mapol ma giye pwony man ni kwo ocakke pire kene-ni giwacci Lubanga pe. Giwaco ni cwec mapol mamwonya ma wanenogi-ni gubino pigi kengi. Kadi bed kit meno, ma ka kwero ni Lubanga peke, Charles Darwin owaco ni: “Kitung bota, gin maber ma waromo wacone aye ni dano pe gitwero niang lok i kom Lubanga matwal.”
2 Pol pa dano pud gipenye ki lapeny mapol ka ce ada Lubanga tye. Ento, ka pe gunongo lagam ma yengogi, polgi pe dong gimedde ki yenyo lagam madok i kom Lubanga. Ada, Catan dong ‘oumo tamgi woko, gin jo ma pe giye-nu.’ (2 Kor. 4:4) Pe tye me ur ni pol pa dano ngecgi nok dok wigi onywene woko pe gingeyo lok ada i kom Won ma en aye Oketo polo ki lobo!—Ic. 45:18.
3. (a) Anga ma onyuto botwa Lacwec? (b) Lapeny mene ma wabinyamogi?
3 Ento, pire tek ni dano myero gupwony lok ada i kom Lubanga. Pingo? Pien jo ma “gilwongo nying Rwot [Jehovah]” keken aye gibilarogi. (Rom. 10:13) Wek walwong nying Lubanga, omyero wange nga kikome ma Jehovah obedo. Yecu Kricito otito ngec man ma pire tek-ki bot lupwonnyene. En onyuto botgi Won. (Kwan Luka 10:22.) Pingo Yecu keken aye opore me nyuto Won? En otimo man nining? Wan waromo lubo lanen pa Yecu nining wek wanyut Won bot jo mukene? Kong dong wanyamu lapeny magi.
YECU KRICITO KEKEN AYE OPORE
4, 5. Pingo Yecu keken aye opore me nyuto Wonne?
4 Yecu keken aye opore me nyuto Wonne. Pingo? Pien ma peya kicweyo jami ducu, Yecu okwo macalo cwec me cwiny i polo. En obedo “Wod acel keken pa Lubanga.” (Jon 1:14; 3:18) Man pud dong obedo rwom madit atika! Yecu keken aye onongo tye gin ki Wonne ma peya kicweyo lumalaika, man omiyo en opwonyo jami mapol i kom Wonne kacel ki kit mabeco. Won ki Wod onongo giloko i kingi matek adada dok man oweko gudongo mar i kingi pi mwaki miya ki miya. (Jon 5:20; 14:31) Tam kong jami mapol ma Wod opwonyogi madok i kom Wonne!—Kwan Jo Kolocai 1:15-17.
5 Won ocimo Wod me bedo Lalok ma mege, man omiyo kilwonge ni “Lok pa Lubanga.” (Yabo. 19:13) Pi meno, Yecu keken aye onongo opore me nyuto Won bot jo mukene. Pore tutwal ni, Jon ma ocoyo Jiri-ni olwongo Yecu ni, “Lok,” ma tye “i kor Won.” (Jon 1:1, 18) Ma lubbe ki lok man, Jon onongo tye ka lok i kom gin ma timme i cawa me cam i karegi ca. Pien i cawa me cam, onongo kiweko welo acel bedo cok ki lawote wek gubok lok i kingi. I yo acel-lu, Wod onongo tye “i kor Won,” man omine kare me boko lok ki Wonne.
6, 7. Wat i kin Won ki Wod obedo ka dongo medde ameda nining?
6 Wat i kin Won ki Wod obedo ka dongo medde ameda. Lubanga “cwinye obedo yom kare ducu pi [Wode].” (Kwan Carolok 8:22, 23, 30, 31.) Man miyo waniang ni wat i kin jo aryo-ni omoko matek i kare ma gubedo ka tic kacel dok Wod opwonye me lubo kit Wonne. I kare ma dong kicweyo ginacweya mukene ma gitye kiryeko, Wod oneno kit ma Jehovah terogi kwede, dok man omiyo marre kacel ki worone i kom Lubanga omedde.
7 Pyem ma Catan okelo i kom twero me loc pa Jehovah-ni omiyo kare bot Wod me pwonyo kit ma Jehovah bitic kwede ki mar, ngolo kop atir, ryeko, ki dong teko me cobo lok man matek-ki. I yo ma kit meno, Wod opwonyo kit me lweny ki pekki mapol ma lacen en orwatte kwede i ticce me pwony i lobo kany.—Jon 5:19.
8. Jami ma kicoyogi i Baibul i kom Yecu-ni gikonyowa me pwonyo kit pa Won nining?
8 Pien en onongo tye ki wat macok ki Jehovah, Wod otito lok i kom Won i yo matut loyo ngat mo keken. Yo maber loyo ma waromo niang kwede lok i kom Won aye me pwonyo gin ma Wode acel keken-ni opwonyo dok otimogi. Me laporre, tam kong kit ma onongo bibedo tek kwede me niang gin ma “mar” obedo ka ni wakwan akwana ki i dikconari. Ento, ka watamo i kom jami mapol ma kicoyogi i Baibul ma lubbe ki tic me pwony pa Yecu kacel ki marre pi jo mukene, ci waniang matut adada lok man ni “Lubanga aye mar.” (1 Jon 4:8, 16) Man rom aromo ki kit mukene ma Lubanga tye kwede ma Yecu onyutogi bot lupwonnyene i kare ma en tye i lobo.
KIT MA YECU ONYUTO KWEDE WONNE
9. (a) I yo aryo mene ma Yecu onyuto kwede Wonne? (b) Mi lapor acel ma cimo kit ma Yecu onyuto kwede Wonne i pwonye.
9 I yo ma nining ma Yecu onyuto kwede Won bot lupwonnyene ki dong jo ma lacen gudoko lupwonnyene? En otimo man i yo aryo mapat pat: i pwonye ki dong kit me kwone. Kong wacak wunu ki pwony pa Yecu. Gin ma Yecu opwonyo ki lulub kore nyuto ngecce matut i kom kit ma Wonne tamo, winyo ki dong timo ki jami. Me labolle, Yecu oporo Wonne ki lakwat ma paro pi romine, ma ka acel orweny ci cito ka yenyone. Yecu owacci ka lakwat-ti onongo romo ma orwenyo-ni, “cwinye bibedo yom pire makato pi romi pyerabongwen wiye abongwen ma pe onongo gurwenyo-ni.” Pingo Yecu omiyo lapor man? Yecu otito ni: “Kit meno Wora ma tye i polo bene pe mito ni ngat mo acel i kin jo magi matino myero oto.” (Mat. 18:12-14) Gin ango ma ipwonyo i kom Jehovah ki i lapor man? Kadi bed ni kine mukene iwinyo ni konyi pe nyo ni pe kiparo piri, omyero inge ni Woru ma i polo paro piri. I wange, in itye ngat acel i kin ‘jo magi matino-ni.’
10. Yecu onyuto Wonne i kit ma en okwo kwede nining?
10 Yo me aryone ma Yecu onyuto kwede Wonne bot lupwonnyene aye i kit me kwone. Pi meno, i kare ma lakwena Pilipo openyo Yecu ni: “Nyuttiwa Won,” Yecu owaco atir ni: “Ngat ma oneno an dong oneno Won.” (Jon 14:8, 9) Nen kong labol mogo ma nyuto yo ma Yecu onyuto kwede kit pa Wonne. I kare ma ladobo mo olego Yecu ni ocange, Yecu ogudo laco ma onongo kome ‘ducu ki dobo-ni’ ci owacce ni: “Amito; komi olony.” Ma dong kicange, ladobo-ni oniang atir ni Jehovah otiyo ki Yecu me cango dobone. (Luka 5:12, 13) Ki bene, lupwonnyene guniang kica pa Jehovah i kare ma Lajaro oto, pien Yecu ‘iye owang matek’ ci “okok ki pig wange.” Kadi bed Yecu onongo ngeyo-ni ebicero Lajaro, en okok ki pig wange pi cwer cwiny ma lupaco pa Lajaro ki lureme bene onongo gitye iye. (Jon 11:32-35, 40-43) Ngene kene ni tye jami mogo ma imarogi ma kicoyogi i Baibul ma gukonyi me niang i kom Won ma lakica kit ma Yecu onyuto kwede i kwone.
11. (a) I kare ma Yecu oryemo dano ki i ot pa Lubanga, en onyuto gin ango madok i kom Wonne? (b) Pingo ryemo dano ma Yecu oryemogi ki i ot pa Lubanga-ni miniwa gen?
11 Ento mono, gin ango ma itwero niang ki i ryemo dano ma Yecu oryemogi ki i ot pa Lubanga-ni? Go kong calle i wi: Yecu okedo anino ogwil ci oryemo jo ma gitye ka cato twoni ki romi. En oketo lim pa lulok cente kun ryebo mejagi woko. (Jon 2:13-17) Ryemo lucat magi omiyo wi lupwonnyene opo i kom lok ma Kabaka Daudi oloko macalo lanebi ni: “Arima pi odi mito neka woko.” (Jab. 69:9) Gin ma Yecu otimo i kom jo magi ma kitgi raco nyuto ni en onongo tye ka cung inge woro me adada. Tika ineno kit mabeco pa Won i gin ma Yecu otimo-ni? Man poyo wiwa ni Lubanga tye ki kero muromo me kwanyo tim maraco ki i lobo dok tye ki miti me timone bene. Kit ma Yecu odok kwede magwar pi tim marac-ci nyuto kit ma Won winyo kwede ka ce en neno tim maraco ma onya tutwal i kare-ni. Man pud dong cuko cwinywa adada ka watye ka deno can!
12, 13. Pwony ango ma itwero nongone madok i kom Jehovah ki i kit ma Yecu otero kwede lupwonnyene?
12 Kong dok wanenu labol mukene—kit ma Yecu otero kwede lupwonnyene. Gin gubedo ka laro lok i kingi ni anga madit loyo. (Mar. 9:33-35; 10:43; Luka 9:46) Pien Yecu okwo pi kare malac gin ki Wonne, Yecu onongo ngeyo kit ma Jehovah winyo kwede ma lubbe ki cwiny me awaka. (2 Cam. 22:28; Jab. 138:6) Medo i kom meno, Yecu oneno kit ma Catan Larac-ci onyuto kwede cwiny me awaka. Lupwonnyene magi ma giparo pigi kengi-ni onongo gitamo mere pi yweka ki dog tic madito. Pi meno, Yecu nen calo cwinye oton adada i kare ma oneno lupwonnyene ma epwonyogi gitye ki cwiny me laro dito! Kodi cwiny man bene onen i kin jo ma en oyerogi me bedo lukwenane! Gin gunyuto cwiny me laro dito kadi wa i nino me agikki ma Yecu okwo kwede i lobo. (Luka 22:24-27) Ento, Yecu obedo ka jukogi i yo me kica, labongo rwenyo gen ni olo motmot gibidongo cwiny me mwolo.—Pil. 2:5-8.
13 Tika ineno kit ma Won okonyo kwede Yecu me tiro lupwonnyene i yo me kica wek pe gubed ki kodi cwiny meno? Tika ipwonyo lok i kom Won ki i tic kacel ki lok pa Yecu, pien en pe bwoto jone kadi bed pe gutimo gin matir? Ngec i kom kit mabeco pa Lubanga konyowa me ngut kun walego bote wek otimiwa kica pi bal ma nongo watimo.
WOD OYERO ME NYUTO WONNE
14. Yecu onyuto nining ni emito nyuto Wonne?
14 Luloc aconya mapol gitemme me gwoko dano i te twerogi kun nongo giumo ngec woko ki botgi. Ka i poro ki Yecu, en oyero me miyo ngec ma etye kwede i kom Won dok onyuto Wonne maber adada bot jo mukene. (Kwan Matayo 11:27.) Medo i kom meno, Yecu omiyo bot lupwonnyene “niang me ngeyo ngat ma en aye ada,” Lubanga Jehovah. (1 Jon 5:20) Man mono te lokke ngo? Yecu okonyo lulub kore me niang pwony madok i kom Won. En pe onyweno wi dano i kom Wonne ki pwony mogo me Triniti ma pe niange.
15. Pingo Yecu pe otito jami ducu liweng madok i kom Wonne?
15 Tika Yecu otito jami ducu ma en ngeyo i kom Wonne? Pe kumeno, en otiyo ki ryeko oweko en oling woko i wi jami mukene ma en onongo ngeyogi. (Kwan Jon 16:12.) Pingo? Pien i kare meno onongo lupwonnyene ‘pe gitwero kanyo’ ngec ma kit meno. Kit ma Yecu owaco kwede, onongo ngec mapol kibiminigi ka dong cwiny maleng, “lacungodwar” ma bitelogi i “ada ducu” obino. (Jon 16:7, 13) Kit ma lunyodo maryek pe gitito jami ducu bot lutinogi wang ma gudongo ma gitwero niang iye maber-ri, Yecu oweko ni lupwonnyene kong gukur kare ma nongo dong gitwero niang iye jami mogo madok i kom Won. Yecu onongo ngeyo ka ma kerogi ki gorogi tye iye.
LUB LANEN PA YECU KUN I KONYO DANO ME NGEYO JEHOVAH
16, 17. Pingo twere boti me nyuto Won bot jo mukene?
16 Ka ingeyo ngat moni maber dok inongo ni kite ber, mono pe i winyo i cwinyi ni myero iwek jo mukene gunge lok kome? I kare ma Yecu tye i lobo, en oloko i kom Wonne. (Jon 17:25, 26) Mono twere botwa me lubo lanene ni kun wanyuto Jehovah bot jo mukene?
17 Kit ma dong watyeko nenone kwede, Yecu onongo tye ki ngec matut ma lapore pe i kom Wonne. Ento, man pe ogenge me nywako ngecce mogo dok bene okelo wi lupwonnyene i niang jami matut madok i kom kit pa Lubanga. Pi pwony pa Yecu-ni, pe inongo ni waniang jami mapol madok i kom Wonwa makato pol pa dano i kare-ni? Pud dong cwinywa yom tutwal pienni i kwone ki pwony ma mege, Yecu onyutiwa Wonne! Dok bene ki lok ada, watwero wakke pienni wangeyo Won. (Jer. 9:24; 1 Kor. 1:31) Jehovah onyikke cok kwedwa pien watute ki tekowa ducu me nyiko cok bote. (Yak. 4:8) Pi meno, wan dong watwero nywako ngec ma watye kwede ki jo mukene. Wan watwero timone nining?
18, 19. I yo ango ma itwero nyuto kwede Won bot jo mukene? Tit kong.
18 Mitte mada ni myero walub lanen pa Yecu kun wanyuto Won i lokwa ki tic ma watimogi. Omyero bene wi pe owil ni pol pa dano ma wanongogi i ticwa me pwony-nyi pe gingeyo nga ma Lubanga obedo. Tamgi i kom Lubanga onywene woko pi pwony gobagoba. Watwero tito bot jo magi gin ma wangeyo i kom nying Lubanga, yubbe pi dano kacel ki kite kit ma Baibul nyutiwa kwede. Dok bene kadi wa Lukricitayo luwotwa pud watwero nywako kacel kwedgi wang Baibul mogo ma giminiwa niango manyen i kom kit pa Lubanga. Man miyo gin bene ginongo adwogi maber.
19 Ka odok i lok me nyuto Won i kit me kwowa kun nongo watute me lubo lanen pa Yecu kono? Ka dano gineno mar pa Kricito i jami ma watimogi, man konyogi me nyikke cok bot Won kacel ki Yecu. (Ep. 5:1, 2) Lakwena Paulo ocuko cwinywa ni: “Wulub kita, macalo an bene alubo kit pa Kricito.” (1 Kor. 11:1) Man pud dong tye twon mot madit atika ka wakonyo dano me ngeyo Jehovah pi kit mabeco ma wanyutigi! Eyo, wageno ni wan ducu wabilubo lanen pa Yecu kun wanyuto Won bot jo mukene.
[Peny me Kwan]
