Tika Itye Ka Nyuto Deyo Pa Jehovah?
Tika Itye Ka Nyuto Deyo Pa Jehovah?
“Wan . . . watye macalo kiyo ma miyo deyo pa Rwot [Jehovah] nen macalo ryeny ceng.”—2 KOR. 3:18.
IN IROMO GAMONE NINGO?
Kadi bed wan lubalo, watwero miyo deyo bot Jehovah nining?
Legawa ki dong bedo tye i cokke twero konyowa nining me nyuto deyo pa Jehovah?
Ngo ma twero konyowa me medde ki miyo deyo bot Jehovah?
1, 2. Pingo kiromo wacone ni watwero poro kit pa Jehovah?
OLO to i yo mo acel nyo makato, wan ducu wacal ki lunyodowa. Pi meno, pe bedo me ur ka iwinyo ngat mo owaco ki latin awobi mo ni, ‘Ka aneni nongo aneno woru.’ Kiromo waco ki latin anyaka ni, ‘Ka aneni wiya po i kom mamani.’ Lutino pol kare gimaro poro gin ma gineno lunyodogi timo. Wan kono? Tika waromo poro Wonwa me polo, Jehovah? Kadi bed pe wanene, watwero niang kite mabeco ka wakwano Lokke, waneno cwecce, walwodo lok i kom Ginacoya tutwalle ma loko i kom tic pa Wode, Yecu Kricito. (Jon 1:18; Rom. 1:20) Watwero miyo deyo pa Jehovah ryeny.
2 Ma peya kicweyo Adam ki Kawa, Lubanga onongo tye ki gen ni dano ducu gibitimo mitine, ginyuto kite,ki dok gimiyo deyo bote. (Kwan Acakki 1:26, 27.) I tutewa me timo miti pa Lubanga, omyero wanyut kit pa Ngat mucweyowa. Ka watimo man, ci nongo watye ki mot me miyo deyo pa Lubanga ryeny i tekwaro mo keken ma kinywalowa iye nyo rwom me kwanwa. Pingo? Pien “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”—Tic. 10:34, 35.
3. Lukricitayo giwinyo nining ka gitye ka tic pi Jehovah?
3 Lukricitayo ma kiwirogi ki cwiny maleng ginyuto deyo pa Jehovah. Lakwena Paulo ma onongo kiwiro ki cwiny maleng-ngi owaco ni: “Wan ducu ma dong gikwanyo laum woko ki i wangwa watye macalo kiyo ma miyo deyo pa Rwot [Jehovah] nen macalo ryeny ceng, mumiyo watye ka lokke me doko calo en, kun deyone medde ameda i kwowa; meno aye tic pa Rwot [Jehovah], ma en cwiny maleng.” (2 Kor. 3:18) I kare ma lanebi Moses olor piny ki i Wi Got Cinai ma omako kidi apada aryo ma kicoyo iye cik apar, tur nyime onongo tye ka ryeny pien obedo ka lok ki Jehovah. (Nia 34:29, 30) Kadi bed gin macalo meno peya otimme i kom Lukricitayo, dok tur nyimgi pe ryeny ma dero kati ki iye, cwinygi yom ka gitye ka tito bot jo mukene lok i kom Jehovah, kite mabeco ki dong yubbe pi dano. Kono watye Lakricitayo ma kiwiro nyo romi mukene-ni, watwero ryeny calo maraya kun nongo wanyuto deyo pa Jehovah i ticwa me pwony. (2 Kor. 4:1) In mono itye ka nyuto deyo pa Jehovah i kwoni ki dok i ticwa me pwony-nyi kare ki kare macalo latit kwena me Ker pa Lubanga?
WATYE KI MITI ME NYUTO DEYO PA JEHOVAH
4, 5. (a) Calo Paulo, atwom ango ma watye kwede? (b) Adwogi ango ma bal okelo i komwa?
4 Macalo lutic pa Jehovah, watye ki miti me miyo woro ki deyo bot Lacwecwa i jami ducu ma watimogi. Ento, tyen mapol, pe watimo jami ma wamito timogi. Paulo oyelle ki kodi atwom man i kwone. (Kwan Jo Roma 7:21-25.) Paulo otito macek gin mumiyo watye ki atwom man ni: “Pien dano ducu gubalo, pe gio i kom deyo pa Lubanga.” (Rom. 3:23) Ada, pi bal ma walako ki bot Adam, dano ducu gudoko opii me bal pien bal tye ka ‘loc i kwo pa dano.’—Rom. 5:12; 6:12.
5 Bal obedo gin ango? Obedo gin mo keken ma pe rwatte ki kit pa Jehovah, yone, rwomme, ki dong mitine. Bal balo wat ma tye i kin dano ki Lubanga. Bal weko wakeng nyuto deyo pa Lubanga, kit macalo ngat moni romo bayo atero ento pe celo i taget. Watwero timo bal akaka nyo ma pe wangeyo. (Wel 15:27-31) Bal omoto calo cilo i kom dano dok balo wat ma tye i kingi ki Lacwecgi. (Jab. 51:5; Ic. 59:2; Kol. 1:21) Pi meno, dano ducu pe gupore dok gikeng mot me nyuto deyo pa Lubanga. Labongo akalakala mo, bal tye atwom madit loyo ma tye ka uno dano.
6. Watwero miyo deyo bot Jehovah nining kadi bed watye lubalo?
6 Kadi bed watye ki bal, Jehovah pud obedo “Lubanga ma miyo dano ducu bedo ki gen.” (Rom. 15:13) En pud omiyo yo me jwayo bal—ginkok pa Yecu Kricito. Ka waketo niyewa i ginkok-ki, nongo pe watye i te “opii me bal,” ento nongo dong waromo miyo deyo pa Lubanga ryeny. (Rom. 5:19; 6:6; Jon 3:16) Gwoko wat man ma tye i kinwa ki Jehovah miniwa kare me nongo motte i kare ni ki dong kwo ma pe tum i anyim. Kadi bed pud watye lubalo, pud dong obedo twon mot madit atika ni Jehovah nenowa ni watwero miyo deyone ryeny!
JAMI MA KONYOWA ME NYUTO DEYO PA LUBANGA
7. Gin ango ma myero waye wek wanyut deyo pa Lubanga i kwowa?
7 Wek wami deyo pa Jehovah oryeny, omyero wabed kun wangeyo ni watye ki bal alaka. (2 Tekwaro 6:36) Omyero waye ni watye ki cwiny me timo bal dok mitte ni wayelle me wekone wek wabed ka medde ki miyo deyo bot Lubanga. Me lapore, ka watimo bal me neno cal ki coc ma tugo miti me buto, myero wange atir ni nongo wamito kony i yo me cwiny dok myero wakwany kare me nongone. (Yak. 5:14, 15) Man aye yo mukwongo me nyuto ni watye ka kwo i yo ma miyo deyo bot Lubanga. Macalo jo ma woro Jehovah, myero wabed ka ngine kekenwa me moko ka ada watye ka kwo ma rwatte ki rwom me kwo matir pa Lubanga. (Car. 28:18; 1 Kor. 10:12) Kadi bed watye ki goro me timo bal, omyero wayelle matek wek wabed ki kare me miyo deyo pa Lubanga onen i kwowa.
8. Ngo ma myero watim kadi bed watye ki roc?
8 Yecu keken aye ma okwo i lobo dok oto labongo timo gin mo marac kun nyuto deyo pa Lubanga. Kadi bed ni wan watye ki roc, ento pud watwero tute me lubo lanen pa Yecu. (1 Pet. 2:21) Jehovah neno tutewa ki kero ma waketo me medde anyim, dok goyo laane i tutewa me mine deyo.
9. Gin ango ma Baibul romo timone i kwo pa Lukricitayo wek gukwo i yo ma Lubanga mito?
9 Lok pa Jehovah romo konyowa me timo alokaloka i kwowa. Kwan matut ki dok lwodo lok i kom Ginacoya nino ki nino pire tek. (Jab. 1:1-3) Kwano Ginacoya nino ducu bikonyowa me kelo alokaloka i kwowa. (Kwan Yakobo 1: 22-25.) Ngec ma wanongo ki i Baibul aye guti me niyewa ki bene me timo gin matir i nyim Jehovah.—Jab. 119:11, 47, 48.
10. Lega twero konyowa nining me tic ki cwinywa ducu pi Jehovah?
10 Me nyuto deyo pa Lubanga, omyero ‘wamine kenwa i lego Lubanga ki cwinywa ducu.’ (Rom. 12:12) Watwero dok myero wabed ka lega wek Jehovah okonywa me tic pire i yo ma rwatte. Pi meno, watwero bene lego pi cwiny mere maleng, pi niye, kero me ciro atematema, ki kero me “tero lok me ada i yo atir.” (2 Tem. 2:15; Mat. 6:13; Luka 11:13; 17:5) Kit macalo latin jenge i kom wonne-ni, myero wan bene wajenge i kom Wonwa me polo, Jehovah. Ka wapenye wek okonywa me tic pire ki cwinywa ducu, myero wabed ki gen ni en bikonyowa. Omyero pe watam ni watye twon abar wic bot Jehovah! Ma ka meno, ka walego bote omyero wamine pwoc, wayeny tira ma romo konyowa ka watye i atematema, dok wakwaye me konyowa me tic pire i yo mupore ma miyo deyo i nyinge.—Jab. 86:12; Yak. 1:5-7.
11. Cokke twero konyowa nining me nyuto deyo pa Jehovah?
11 Lubanga oweko romine ma pigi tego-ni i cing “lagwok ot ma lagen dok maryek.” (Mat. 24:45-47; Jab. 100:3) Lagwok ot ma lagen keto cwinye i kom kit ma luye mukene-ni gitye ka tute kwede me nyuto deyo pa Jehovah. Kibedo ka miniwa tira i cokke i kit ma myero wanen kwede macalo lutit kwena me Ker-ri, calo kit ma lakwo bongo yubo kwede bongo moni wek oromwa maber. (Ibru 10:24, 25) Omyero wao con i cokke, ka onongo dong waloko odoko kitwa me bedo ka galle, ci pe wabinongo adwogi maber ma a ki i cam me cwiny ma kiyubo piwa ma myero okonywa me tic pi Jehovah.
WALUBU LANEN PA LUBANGA
12. Watero lubo lanen pa Lubanga nining?
12 Ka ni wabed ka nyuto deyo pa Jehovah, ci myero ‘walub kit pa Lubanga.’ (Ep. 5:1) Yo acel me lubo kit pa Jehovah aye me bedo ka neno jami kit ma en neno kwede. Timo jami i yo ma megwa pe nyuto deyo pa Jehovah ento kelo peko i komwa. Kit macalo lobo-ni tye i te loc pa Catan Larac-ci, omyero wayelle matek me kwero gin ma Jehovah dagi, kun wamaro gin ma en maro. (Jab. 97:10; 1 Jon 5:19) Myero wabed labongo akalakala mo ni yo matir me tic pi Jehovah aye me timo jami ducu ma keto deyo i kome.—Kwan 1 Jo Korint 10:31.
13. Pingo mitte ni wakwer bal, dok man bimiyo watimo gin ango?
13 Jehovah dag bal, wan bene myero wadag bal. Myero wabed bor ki gin mo keken ma miyo watimo bal labongo neno nyo tamo kit ma waromo genge kwede ki timo bal meno. Me labolle, omyero wagwokke wek pe wadok jo mungak, bal ma weko pe wabedo mupore me nyuto deyo pa Lubanga. (Nwo. 13:6-9) Myero pe waribbe ki jo mungak i yo mo keken nyo ngat mo keken ma lwonge ni en omego ento kit me kwone pe nyuto deyo bot Lubanga. Omyero pe waribbe kwedgi kadi bed gubedo jo me pacowa. (1 Kor. 5:11) Pe wanongo adwogi maber ki i bedo ka pyem ki jo mungak nyo jo ma gicayo dul pa Jehovah. Meno miyo niyewa doko goro dok bene rac adada me kwano gin mo keken ma gucoyo, oromo bedo i buk nyo kabedogi me intanet.—Kwan Icaya 5:20; Matayo 7:6.
14. Ka watute me nyuto deyo pa Lubanga, cwiny ango ma myero wabed kwede dok pingo?
14 Nyuto mar obedo yo acel ma pire tek me lubo lanen pa Wonwa me polo. I ada calo en, myero wabed ki mar. (1 Jon 4:16-19) Ada, mar ma watye kwede i kinwa nyuto ni wan lupwonnye pa Yecu ki dong lutic pa Jehovah. (Jon 13:34, 35) Pienni watye ki roc, omyero watute me dongo cwiny me mar i cawa ducu. Dongo cwiny me mar kacel ki kit pa Lubanga bikonyowa pe me timo jami maraco ki dok poto i bal.—2 Pet. 1:5-7.
15. Mar gudo watwa ki jo mukene nining?
15 Mar weko wabedo ki cwiny me timo jami mabeco bot jo mukene. (Rom. 13:8-10) Me lapore, ka imaro dakoni nyo cwari, ci ibigwoko nyomwu ki i tim me abor. Mar pi luelda, ki dok bedo ki woro pi ticgi, bikonyowa me mine i te telagi. Lutino ma gimaro lunyodogi gimiyo woro dok giwinyo doggi ki bene pe giloko marac i komgi. Ka wamaro luwotwa, ci pe wanenogi calo konygi pe nyo waloko marac i komgi. (Yak. 3:9) Ka luelda gitye ki mar, ci gin gibikwayo romi pa Lubanga i yo me mar.—Tic. 20:28, 29.
16. Mar bikonyowa nining ka watye i ticwa me pwony?
16 Wanyuto mar bene ka watye i ticwa me pwony. Pien watye ki mar madit pi Jehovah, pe wabiye ni cwiny manok ma dano ginyuto nyo cac ma gibedo kwede otur cwinywa. Ma ka meno, wamedde ki ticwa me tito lok me kwena maber-ri. Mar biweko wayubbe maber adada pi ticwa me pwony kun bene wabedo lupwonye mucwiny. Ka ada wamaro Lubanga ki jiraniwa, ci pe wabitero tito kwena me Ker-ri calo gin ma kidiyowa iye adiya. Ma ka meno, watero calo mot madit adada dok wabedo ki yomcwiny ka watye ka timone.—Mat. 10:7.
MEDDE KI MIYO DEYO BOT JEHOVAH
17. Pingo watero nongo adwogi maber ka waye ni wan lubalo?
17 Dano me lobo-ni pe giparo pi adwogi ma bal kelo, ento wan waparo. Man miyo waniang ni omyero walweny ki cwiny me timo bal. Ka waye ni wan lubalo, ci wabipwonyo cwiny ma ngoliwa kop-pi wek pe wapot i bal akaka ka mitine obino i tamwa ki dok cwinywa. (Rom. 7:22, 23) Ada, watwero bedo ki goro, ento Lubanga twero miniwa kero me cung matek wek pe wapot i bal.—2 Kor. 12:10.
18, 19. (a) Ngo ma bikonyowa me cung matek i kom diro pa dul mony maraco me cwiny? (b) Omyero wamoku tamwa me timo gin ango?
18 Ka ni wami deyo bot Lubanga, myero walweny ki dul mony maraco me cwiny. Jami me lweny ma Lubanga ominiwa bikonyowa me timo man. (Ep. 6:11-13) Catan tye ka yelle ki kwok matino wek wamine deyo ma Jehovah keken aye opore me nongone-ni. Larac-ci bene bedo ka yelle wek ebal watwa ki Jehovah. Pud dong cwiny Catan cwer ka en neno co, mon, ki lutino milion mapol ata ma gitye ki roc pud gimedde ki gwoko gennegi dok gimiyo deyo bot Lubanga. Pi meno, wamedde wunu ki pako Jehovah ki cwinywa ducu, calo lumalaika me polo ma guwacci: “Rwotwa ki Lubangawa, in imyero me nongo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.”—Yabo. 4:11.
19 Myero dong wamok tamwa me bedo ka miyo deyo keken bot Jehovah, kadi bed gin ango timme. Pud dong cwiny Jehovah bedo yom ya ka neno dano mapol ma gin lugen gitute me miye deyo kun gilubo lanene. (Car. 27:11) Mitiwa bene myero obed calo pa Daudi ma owero ni: “Amiyo pwoc boti ki cwinya ducu, ai Rwot Lubangana, abibedo ka miyo deyo boti kun atuco nyingi nakanaka.” (Jab. 86:12) Pud dong watye ka kuro nino meno ma wabinyuto iye deyo pa Jehovah i kwowa labongo roc mo keken pi naka kun wapakke. Man bibedo twon yomcwiny madit bot jo ma lugen. Tika itye ka nyuto deyo pa Jehovah i kare-ni, ki miti me timone pi naka?
[Peny me Kwan]
[Cal ma tye i pot karatac 30]
In mono itye ka nyuto deyo pa Jehovah i yo angwen magi?