Nyikke Cok Bot Lubanga

“Watye Atera me Dwogo Cen Boti”

Tika kong kare mo itiyo pi Jehovah? Tika ibedo ka lwodone ki i cwinyi ni myero dok iti pire ento itye ki akalakala ka ada en bijoli? Wakwayi ni iket cwinyi ka itye ka kwano pwony man. Pwony man kicoyo tutwalle piri.

“A LEGO bot Jehovah ni oye adwog cen me tic pire kun timma kica pi cwero cwinye.” Lamego mo ma onongo kong ongak woko ki i lubo rwom me kwo matir pa Lukricitayo ma kipwonye kwede ma en pud tidi aye owaco lok meno. Kica tika maki i kome? Tika dong ipenye kekeni ni: ‘Lubanga mono tamo ningo i kom jo ma yam kong gutiyo pire? Wiye tika po i komgi? En tika mito ni gudwog cen me tic pire?’ Me gamo lapeny magi, kong wanyamu lok ma lanebi Jeremia ocoyo. Lagam magi bikweyo cwinyi adada.​—Kwan Jeremia 31:18-20.

Nen kong gin ma obedo ka timme i kare ma Jeremia coyo lok man. I mwaka 740 K.M.P., ma peya kinywalo Jeremia, Jehovah oweko jo Acira gutero kaka apar me ker me Icrael i opii. * Lubanga oye ni man otimme me miyo pwod pien jone onongo gucako timo bal madongo, dok bene gukwero lubo lok me cikogi ma lunebi gubedo ka miyone teretere. (2 Luker 17:5-18) Tika Luicrael guloko cwinygi me tic pi Jehovah kadi bed ni kwo matek otwenyogi i lobo me opii dok bene onongo gibor ki Lubangagi? Wi Jehovah tika owil i komgi? Tika onongo en dok bijologi me tic pire?

“Wangut”

I kare ma gitye i opii, Luicrael wanggi oyabbe ci gungut i kom balgi. Jehovah bene oneno ni ada gin gungut ki cwinygi ducu. Nen kong kit ma Jehovah oloko kwede ma lubbe ki kit ma Luicrael, ma kilwongogi gin ducu lawang acel ni Epraim-mi, guwinyo kwede ki i cwinygi i kare ma gitye i opii.

Jehovah owaco ni: “Awinyo ka jo Epraim tye ka koko ki cwercwiny.” (Tyeng me 18) En owinyo ka jo Icrael gikok pi adwogi marac ma balgi okelo. Onongo gitye calo awobi mo ma tye ka yengo wiye pi cwercwiny ki dong tamo pi tek pa kwo ma ekelo i kome kekene kun paro pi kwo maber ma eweko. (Luka 15:11-17) Jo Icrael mono gubedo ka lok ningo?

“Wan wabedo calo dyang muding ma pe winyo lok, . . . ipwonyowa me lubo gin ma imito.” (Tyeng me 18) Jo Icrael gujolo pwod man ki cinggi apar. Pwod man opore pien gin onongo gitye calo dyang muding ma pe winyo lok. Buk mo acel waco ni, ma lubbe ki lapor man, oromo bedo ni jo Icrael onongo gitye calo twon ma lajemo, ma ka ce dag pur ci “gweyo dim nyo ecipet ma cobbe malit.”

“Kwanywa idwokwa cen, ci wan bene wabidok; pien in i Rwot [Jehovah] Lubangawa.” (Tyeng me 18) Gin gunyuto cwiny me mwolo kun gikok bot Lubanga. Gin onongo gubedo ka timo bal, ento kombeddi dong gitye ka yenyo yo me nongo cwak pa Lubanga.

 “Wangut. . . . Lewic omakowa mada dok alee otwodowa woko.” (Tyeng me 19) Jo Icrael gungut pien gutimo bal. Gin gujolo koko ma kiyimo i wigi ci guye balgi. Gin gulanne dok lewic omakogi adada.​—Luka 15:18, 19, 21.

Luicrael gubedo ki cwiny me ngut. Igi owang adada, mumiyo gudoto balgi bot Lubanga, ci guweko yo marac ma gukwanyo-ni. Ngut i kom balgi-ni mono bimiyo Lubanga dwoko cwinye i komgi? En tika dok onongo biye ni guti pire?

“Abibedo ki Kica i Komi”

Jehovah onongo tye ki mar madit adada i kom jo Icrael. En owaco ni: “Atye macalo wego bot jo Icrael, Epraim aye obedo latin ma akwongo nywalone.” (Jeremia 31:9) Tika tye wego mo ma lamar ma romo kwero jolo wode, ka ce wode ongut ki cwinye ducu pi bal ma otimo? Nen kit ma Jehovah onyuto kwede mar macalo Wego bot jone.

“Epraim, in latinna ma amaro adada, latin ma amaro makato ducu. Pien kare ducu ka alwongo nyingi [aloko i komi], atamo piri ki mar madit.” (Tyeng me 20) Man pud dong lok me mar atika! Calo lanyodo ma lamar ento cung i lokke, Lubanga ‘oloko i kom’ lutinone, kun bedo ka cikogi teretere ni guwek timo bal. Ka gukwero winyo lokke akaka, en onongo weko kiterogi i opii​—ma te lokke ni nongo pe gibitic pire. Ento kadi bed ni en ominigi pwod, en wiye pe owil i komgi. En pe romo timo gin ma kit meno matwal. Wego ma lamar wiye pe wil i kom lutinone. Ci dong, Jehovah mono owinyo nining i kare ma oneno ni jo Icrael gungut ki cwinygi ducu?

“Cwinya kutte akuta i komi; abibedo ki kica i komi bene.” (Tyeng me 20) Kica omako Jehovah tutwal i kom jo Icrael. Ngut ma gungut ki cwinygi ducu-ni ogudo cwinye adada, mumiyo en obedo ka parone tutwal ni myero gudwog cen bote. Calo wego ma tye i carolok lok ma Yecu omiyo i kom latin awobi ma orwenyo-ni, ‘kica omako’ Jehovah dok cwinye obedo ka kutte akuta me jolo jone me dwogo cen bote.​—Luka 15:20.

“Jehovah Wek Adwog Cen Boti!”

Lok ma nonge i Jeremia 31:18-20 miniwa ngec matut i kom cwiny me kica ma Jehovah tye kwede. Lubanga wiye pe biwil i kom jo ma yam kong gutiyo pire. Ento ka jo ma kit meno gimito dwogo cen bote kono? Lubanga tye ‘atera me weko balgi.’ (Jabuli 86:5) En bijolo jo ducu ma gidwogo cen bote ka ce gungut ki cwinygi ducu. (Jabuli 51:17) Cwinye bedo yom me jologi me dwogo cen bote.​—Luka 15:22-24.

Lamego ma kiloko i kome malo-ni okwanyo kare me dwogo cen bot Jehovah kun limo kacokke pa Lucaden pa Jehovah ma i kabedone. Mukwongo, en olwenyo ki cwiny me lworo ma onongo en tye kwede. En owaco ni: “Awinyo ki i cwinya ni konya pe, dok bene pe apore me dwogo cen bot Jehovah.” Ento luelda me kacokke gucuko cwinye dok gukonye me jingo niyene. Ki pwoc madit atika, en owaco ni, “Obedo gin maber atika ni Jehovah oye ni adwog cen bote!”

Ka onongo kong kare mo itiyo pi Jehovah dok itamo ni myero iti pire, wakwayi me limo kacokke pa Lucaden pa Jehovah ma i kabedoni. Wi myero opo ni Jehovah jolo i yo me kica ka ngat mo ma ongut olego bote ni, “Akwayi wek adwog cen boti.”

[Lok ma tye piny]