Lapeny ma Yecu Myero Ogam

Jo mapol ma gilworo Lubanga gitamo ni bal mo pe ka girubo dini ki tim me wibye. Gin giye ni dini obedo gin ma pire tek ma romo cobo peko pa dano. Ento i kingi bene tye jo mukene ma gitamo ni omyero pe kirub dini ki tim me wibye. In kono itamo ningo ka kirubo dini ki tim me wibye? Oteka aryo magi mono myero guti kacel?

DANO mapol guloko i kom Yecu Kricito calo “ngat ma lok me dini ocung i kome pud dong loyo i tekwaro pa dano.” Go kong ni itwero penyo Yecu ki lapeny man, tika pore me rubo dini ki tim me wibye? En mono obiwaco ningo? I kare ma en tye i lobo, en ogamo lapeny man i lokke ki dong ticce. Me labolle, i kare ma tye ka miyo pwonye muywek ma kilwongo ni Pwony me Wi got, Yecu onyuto bot lulub kore gin ma myero gutim me konyo jo ma i kabedogi. Kong dong wanyamu lok mogo ma pigi tego ma kikwanyogi ki i pwony meno.

Kit me Kwowu Myero Ogud Jo Mukene

Yecu otito cwiny ma lulub kore myero gubed kwede i kom lobo man. En owaccigi ni: “Wun wukado me lobo; ento kado ka dong odoko bot, ci gibitimo nining wek dok odok mit? Konnye dong nongo pe, myero giony woko dano onyon. Wun wuceng me lobo. . . . Wun bene wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu ma tye i polo.” (Matayo 5:13-16) Pingo Yecu oporo lulub kore ki kado ki dong tara?

Lok pa Yecu-ni onyuto ni lulub kore gubedo calo kado pe bot jo manok keken, ento bot jo ducu. Gin tye calo tara bot jo ducu ma gimito ngeyo Lubanga. Dong, i ticce ki lok magi ma gikelo cal i wi dano-ni, Yecu onyuto atir ni emito ni lulub kore gubed kacel ki dano. Pingo kono?

Kong inen jami magi: Kado pe kitwero tic kwede me gwoko cam ka pe kirubo kacel ki cam. Tara pe twero menyo piny i rum ka pe kicwinyo. Man dong yot botwa me niang gin mumiyo Yecu pe owaco ki lupwonnyene ni myero gucit i twok lobo ka mo mabor ka gucak kabedo pa jo muye kengi kunnu. En bene pe ocuko cwiny lupwonnyene ni myero gubed kengi ma pe giribbe ki jo me lobo dok ma pe ginywako lok mo keken ki jo ma pe luye luwotgi. Ma ka meno, kit macalo kado myero obed i cam ki bene tara myero omeny col piny-nyi, tye kumeno bene ni kit me kwo pa Lukricitayo myero ogud kwo pa jo mukene.

“Gin pe Jo me Lobo”

Ento kitungcel, lok ma Yecu oloko ni kit me kwo pa lulub kore myero ogud kwo pa luwotgi-ni, kelo lapeny mukene ma pire tek madok i kom cwiny ma Lukricitayo myero gubed kwede i kom tim me wibye. Pingo? I kare ma onongo dong cok to, Yecu olego bot Lubanga ma ka lulub kore ni: “Pe alego ni myero ikwanygi woko ki i lobo, ento ni igwokgi ki i kom gin marac. Gin pe jo me lobo, macalo an pe a dano me lobo.” (Jon 17:15, 16) Ci dong mono, twere nining bot Lukricitayo me bedo calo gin pe jo me lobo-ni, ento kun kitungcel bene myero guribbe ki dano i tic ma mitte i kabedogi? Me niang lagamme, kong dok wanyamu lapeny aryo mukene:

• Yecu kono oneno tim me wibye nining?

• Gin ango ma Lukricitayo myero gutim i kare-ni?