Yecu Kono Oneno Tim me Wibye Nining?

LUCO Jiri gutito jami mapol mutimme i kare ma Yecu tye i ticce me pwony dok man oweko en okemme ki tim me wibye. Me labolle, i nge kare manok keken ma Yecu onongo iye batija, mwakane onongo romo kine ka 30, dok Larac-ci omine dog tic me bedo laloc me lobo-ni. Lacen dok i kare me ticce me pwony, lwak onongo gimito keto en me doko kabakagi. I ngeye, lwak guketo lyeto i kome ni okel alokaloka i lok me wibye. Yecu odok iye ningo? Kong dong wanyamu gin magi mutimme-ni.

Laloc me lobo. Jiri ginyuto ni Larac-ci omiyo bot Yecu “ker ducu ma i wi lobo.” Tam kong jami mapol dok mabeco ma Yecu onongo bitimogi bot dano ma gitye ka deno can ka onongo en tye ki twero me loyo lobo-ni! Tika ngat mo ma tye ki gen i lok me wibye dok bene mito cobo peko pa dano twero kwero mic me bedo laloc me lobo? Ento Yecu okwero gire lajwac.​—Matayo 4:8-11.

Kabaka. Jo mapol i kare pa Yecu ca onongo gimito matek adada laloc mo ma twero cobo pekogi me can lim ki dong lok me wibye. I kare ma guneno jami ma Yecu twero timogi, cwinygi onongo tye ni Yecu odony woko i tim me wibye. En odok iye nining? Jon ma ocoyo Jiri-ni owaco ni: “Ka Yecu oniang ni gimito bino ka make tetek pi kete me bedo kabaka, ci olwi, ocito i wi got kene.” (Jon 6:10-15) Dong nen ka maleng ni Yecu okwero luto wiye i tim me wibye.

Ngat ma twero kelo alokaloka i lok me wibye. Wi myero kong opo i kom gin mutimme ma peya kineko Yecu. Lulub kor Luparicayo, ma onongo gimito nongo loc ken ki bot Luroma, gunote woko kacel ki jo pa Kerode, dano acel ma lamemba me dul pati ma cwako bene Luroma, gubino bot Yecu. Mitigi onongo tye ni myero gidi Yecu wek ocwak pati mo acel. Gin gupenye ka Lujudaya myero gucul mucoro bot Luroma.

Marako ocoyo kit ma Yecu odok kwede botgi ni: “‘Wun mono wubwola pingo kaa? Kong wucikella kom lim ma giculo kwede, anen.’ Gin gucako kelone bote, ci en openyogi ni, ‘Cal ki coc ma kicoyo i kome-ni pa anga?’ Ci gugamo ni, ‘Pa Cecar yo.’ Yecu  ocako wacogi ni, ‘Wudwok jami pa Cecar bot Cecar, ki jami pa Lubanga wudwok bot Lubanga.’” (Marako 12:13-17) Kun loko i kom kit ma Yecu odok kwede, buk me Church and State​—The Story of Two Kingdoms, owaco kuman ni: “En okwero bedo macalo meciya ma lawibye dok bene i yo me diro onyuto wangcor pa Cecar ki pa Lubanga.”

Peko mogo calo can cente, camucana, ki ngolo kop alenga pe gugengo Kricito me paro pi dano. Ki lok ada, Baibul nyuto ni en owiny marac adada pi can ma dano ma i ka ngete onongo gitye iye. (Marako 6:33, 34) Kadi bed kumeno, Yecu gire pe ocako cuko cwiny dano me weko ngolo kop alenga kadi jo mukene gudiye me donyo i tim nywerenywere me karene ca.

Ada, kit ma labol magi ginyuto kwede, Yecu omedo ki kwero royo wiye i tim me wibye. Ento Lukricitayo ma i kare-ni kono? Gin myero gutim gin ango?