Buk Ma Tiyo Wa I Kare-ni

“Lokki calo tara ma menyo ka tyena, dok tye calo ceng ma menyo yo ma awoto iye.”​—JABULI 119:105.

PINGO BAIBUL DOK PAT? Bukke mogo kitwero nenogi ni tye me kony adada, ento pe kitwero tic kwedgi me tiro dano. Dok bukke ma ginyuto kit ma myero kitim kwede jami pol kare mitte ni kitim alokaloka iye. Baibul kono kitungcel waco ni “Gin ducu ma yam gicoyo i kare macon ca onongo gicoyo me pwonyowa.”​—Jo Roma 15:4.

LABOL: Kadi bed Baibul pe obedo buk pa ludaktar, ento tye ki tam mogo mabeco dok gitiyo ma lubbe ki kit ma dano giwinyo kwede i cwinygi ki dong yotkomgi. Me labolle, Baibul waco ni “ka dano bedo ma cwinye opye, miyo kome bene bedo yot.” (Carolok 14:30) Baibul dok bene cikowa ni: “Ngat ma pe ribbe ki jo mukene yenyo tyen lok mogo, kun kwero lubo tam pa jo ma ticgi nyuto ryekogi.” (Carolok18:1) Kitungcel bene tittiwa ni “miyo mot kelo gum [yomcwiny] makato gamo agama.”​—Tic pa Lukwena 20:35.

ADWOGI PA LOK MA KIKWEDO: Bedo ma cwinyi opye mot, ki lurem ma gene, ki dong bedo ngat ma cinge lac weko komi bedo yot. The Journal of the American Medical Association waco ni: “Co ma gitye ki kiniga matek dok ma gitugo daa oyotoyot gitye ki kero tyen kiryo kulu me nongo two mogo calo two ma kweyo but kom dano tungcel ka iporo ki jo ma gingeyo kit me juko kinigagi.” Ikweda mo ma kitimo pi mwaka apar i lobo Australia onyuto ni jo muti ma gitye ki “lurem mapol mabeco dok ma gitwero tito tamgi botgi” gitye ki kare me kwo pi mwaki mapol. Dok i mwaka 2008, lukwed lok mogo ma gia ki i Canada ki Amerika guniang ni “ka ngat mo bedo ka tic ki centene me konyo jo mukene, kelo yomcwiny makato ka onongo en aye tiyo kwede.”

IN ITAMO NINGO? Tika itwero bedo ki gen i kom buk mo ma kicoyo cokcok mwaki 2,000 angec, ma loko i kom yotkom? Nyo kece Baibul dok pat?

[Boro buk i pot karatac 8]

“Kwena me Baibul yomo cwinya matek tutwal . . . pien obedo calo yat mo maber adada me cango twona.”​​—HOWARD KELLY, M.D., NGAT ACEL I KIN JO MA GUCAKO DIPATMEN ME JOHNS HOPKINS UNIVERSITY SCHOOL OF MEDICINE