Nyikke Cok Bot Lubanga

“In . . . Ikule Piny Pira”

MWOLO tye kit mo mamwonya adada. Pol kare wanongo yot tutwal me bedo cok ki ngat mamwol. Ento, tye me cwer cwiny ni nongo ngat mamwol pe yot i kare-ni​—tutwalle jo ma gitye ki twero nyo luloc. Ento mono, Lubanga Jehovah ma obedo Ngat ma dong tye ki twero madit kato dano ducu ma i lobo-ni kono? Tika en mwol? Kong wanenu lok pa lanebi Jeremia ma tye i Koko 3:20, 21, NW.

Jeremia ocoyo buk me Koko i kare ma onongo piny tye marac adada i Icrael. En onongo pud oneno gin mo ma ocwero cwinye adada​—turo boma me Jerucalem ma Lubabilon guturo. Lanebi man ma onongo cwinye tye ka cwer-ri onongo ngeyo ni ngolo kop pa Lubanga i kom jo Icrael-li pore. Ento, Jeremia mono obedo labongo gen mo keken? Tika en obedo ki tam ni Jehovah bor tutwal nyo ni En pe tye ka neno jo ma gungut ma cwinygi tye ka cwer-ri? Winy kit ma Jeremia obedo ka lok kwede calo lalok pa jo Icrael.

Kadi bed dano ducu cwinygi obedo ka cwer, Jeremia onongo tye ki gen. En okok bot Jehovah ni: “In [Jehovah] nino ducu itamo pira, ci ikule piny pira.” (Tyeng 20) Jeremia pe obedo ki akalakala. En onongo ngeyo ni wi Jehovah pe biwil i kome​—nyo jo mogo ma gungut ki i kin Jone. Gin ango ma Lubanga won twer ducu dong bitimone?​—Niyabo 15:3.

Jeremia onongo ngeyo ni Jehovah ‘bikule piny’ pi jo ma gungut ki cwinygi ducu. Baibul mukene waco ni: “Ai po pira, ci ikule piny ka wiya.” Lok magi miyo dano goyo cal mar i wigi. Jehovah, “Ngat Mamalo Twal ma loyo wi lobo-ni,” bikule piny, ci tingo jo ma giwore, ki i can ma gitye iye-ni ci minigi kuc. (Jabuli 83:18) Jeremia obedo ma cwinye okwe mot pi bedo ki gen man. Lanebi ma lagen-ni onongo omoko tamme me kuro ki mwolo awene ma Jehovah bilaro iye Jone ma gungut.​—Tyeng 21.

Lok ma Jeremia ocoyo-ni pwonyowa jami aryo madok i kom Jehovah. Me acel, en mwol. (Jabuli 18:35) Kadi bed “tekone dwong,” Jehovah tye atera me dwogo piny i rwomwa, pi konyowa ka watye ki cwercwiny. (Yubu 37:23; Jabuli 113:5-7) Tika man pe obedo lok me kwe cwiny? Me aryo, Jehovah lakica; en ber ‘dok weko bal’ pa jo ma gungut dok jologi me dwogo cen bote. (Jabuli 86:5) Kit aryo magi​—Mwolo ki kica​—giwoto kacel.

Cwinywa pud dong yom ya ni Jehovah pe tye calo dano ma gitye i loc, ma awaka weko pe gitwero winyo koko pa jo ma tye i te locgi. Tika man lok ma cuko cwinyi me pwonyo lok i kom Lubanga ma lamwolo ma tye atera me ‘kule piny’ pi ilo malo jo ma cwinygi cwer ma giwore me bedo ki gen?

[Boro buk i pot karatac 32]

Jehovah tye atera me dwogo piny i rwomwa, pi konyowa ka watye ki cwercwiny