Jehovah Guro Jo Me Otte Kacel
Jehovah Guro Jo Me Otte Kacel
‘Alegowu me gwoko ribbe ma cwiny maleng omiyowu wek wubed acel.’—EP. 4:1, 3.
ITWERO TITONE NINING?
Pingo Lubanga oketo yub ma mege?
Watwero ‘gwoko ribbe ma cwiny maleng omiyowa-ni’ nining?
Gin ango ma bikonyowa wek ‘wabed jo ma lukica’?
1, 2. Yub ango ma Jehovah tye kwede pi lobo ki dong dano?
KWO me ot. Gin ango ma bino i wi ka iwinyo pire? Mono itamo pi mar? yomcwiny? Tic kacel me cobo yub moni macalo jo me ot? Kabedo maber ma dano myero odong, onong pwony, dok gunywak tam iye? Man twere ka itye i paco ma kiparo iye pi dano. Jehovah aye Ocako te yub me kwo me ot. (Ep. 3:14, 15) En oyubo ni cwecce ducu ma i polo nyo lobo myero gunong gwok muromo, gubed ma gigene kun giribbe.
2 I kare ma Adam ki Kawa gubalo, bedo pa dano i kin jo me ot pa Lubanga otugi gik woko, ento man pe obalo yub pa Jehovah. Kadi ningo en binenone ni likwayo pa Adam gin ki Kawa gupongo Paradic i lobo. (Acak. 1:28; Ic. 45:18) En oketo jami ducu dong tye atera me cobo yub man. Buk pa Jo Epeco tito ka maleng yub magi ducu, dok ribbe obedo lok ma pire tek ma kinyamo i buk man. Kong dong wanyamu tyeng mogo ki i buk man kun waneno kit ma waromo weko yub pa Jehovah me ribo cwecce ducu-ni cobbe.
YUB PA LUBANGA KI DONG KIT MA BITIC KWEDE
3. Yub pa Lubanga ma kiloko pire i Jo Epeco 1:10 obedo gin ango, dok dulle me acel ocakke awene?
3 Moses owaco bot jo Icrael ni: “Rwot Lubangawa en Rwot [Jehovah] acel.” (Nwo. 6:4) Yub kacel ki tic pa Jehovah girwatte litap i wange. Pi meno, “ka karene oromo,” Lubanga biketo “yub” ma mege—yub me ribo cwecce ducu ma i polo ki dong i lobo. (Kwan Jo Epeco 1:8-10.) Yub man tye opokke i dul aryo. Dul me acel tye me yubo jo ma kiwirogi me kwo i polo kun nongo Yecu Kricito aye telogi. Yub man ocakke i Pentekote 33 K.M. i kare ma Jehovah ocako guro iye jo ma gibiloc kacel ki Kricito i polo. (Tic. 2:1-4) Kit macalo gikwano jo ma kiwirogi ni kitgi atir pi nongo kwo ma lubbe ki ginkok pa Kricito-ni, gin giye ni gibedo “litino pa Lubanga.”—Rom. 3:23, 24; 5:1; 8:15-17.
4, 5. Dul me aryo pa yub pa Lubanga-ni obedo gin ango?
4 Dul me aryo pa yub man tye me yubo jo ma gibikwo i Paradic i lobo kany i te Ker pa Meciya. ‘Lwak dano mapol ata-ni’ gibibedo bute mukwongo pa dul man me aryo-ni. (Yabo. 7:9, 13-17; 21:1-5) I kare me Loc me Mwaka Alip Acel, dano bilion mapol ata ma kibicerogi gibiribbe ki lwak dano mapol ata-ni. (Yabo. 20:12, 13) Go kong kit ma nicer binyuto ribbe ma watye kwede! Ka mwaka alip acel dong otum, ‘jami ducu ma tye i wi lobo’ kibitemogi. Jo ma gibigwoko gennegi gibidoko “litino pa Lubanga” ento nongo gikwo i lobo kany—Rom. 8:21; Yabo. 20:7, 8.
5 I kare-ni, Jehovah tye ka yubo jo ma kiwirogi me kwo i polo ki dong romi mukene-ni me kwo i Paradic i lobo kany. Ento wan ki acel acel mono waromo weko yub pa Lubanga-ni cobbe nining?
‘WUGWOK RIBBE MA CWINY MALENG OMIYOWU’
6. Ginacoya nyuto nining ni Lukricitayo myero gucokke kacel?
6 Ginacoya nyuto ni Lukricitayo myero gucokke kacel. (1 Kor. 14:23; Ibru 10:24, 25) Man pe obedo mere cokke kacel i kabedo moni calo kit ma timme kwede i cuk nyo bar tuko. Ribbe me ada pe bedo kumeno. Waribbe i yo me ada ka waketo i tic pwony ma wanongo ki bot Jehovah kun waweko cwiny maleng loko kit me kwowa.
7. Te lokke ngo me ‘gwoko ribbe ma cwiny maleng omiyowa-ni’?
7 Kadi bed ni pi ginkok pa Kricito Jehovah okwano jone ma kiwirogi ni kitgi atir me bedo lutinone ki dong romi mukene-ni ni lureme, tele ki pokke pud romo bedo tye ka pud wakwo i lobo pa Catan-ni. (Rom. 5:9; Yak. 2:23) Ka pe kumeno, Baibul onongo pe wacciwa ni myero wamedde ki ‘diyo cwinywa i kom luwotwa.’ Ento wan watwero ribbe kacel nining? Watwero ribbe ka ce ‘waworo jo mukene kun wabedo mwol.’ Kitungcel, Paulo bene ocuko cwinywa ni watute me ‘gwoko ribbe ma cwiny maleng omiyowa wek wabed acel i twec me kuc.’ (Kwan Jo Epeco 4:1-3.) Me keto tira man i tic, omyero waye cwiny maleng odor jami ma watimogi ki dok onyak nyige i kwowa. Nyig man konyo mada me cobo niango manok ma nongo tye i kinwa ka i poro ki tic me kit pa dano ma kelo apokapoka-ni.
8. Tic me kit pa dano kelo apokapoka nining?
8 Nen kit ma “tic me kit pa dano” kelo kwede apokapoka. (Kwan Jo Galatia 5:19-21.) Tim kwele weko ngat moni pokke woko ki Jehovah ki dong kacokke, dok tim me abor kelo arem cwiny bot jo me ot, ma man poko kin lutino ki lunyodogi ki dong laco ki dako ma gunyomme. Tim carocaro balo ribbe ma tye i kin ngat moni ki Lubanga medo ki jo ma en marogi. Ka ce imito mwono gin moni ki odok wek omok matek liking, kong ilwoko nyo idunyo ka ma imito mwonone-ni bedo maleng. Donyo i tim me lewic nyuto cacwa i kom cik matir pa Lubanga. Tic me kit mogo ma gudong ma pe kiloko i komgi-ni bene gimiyo dano pokke woko ki Lubanga. Kodi tim ma kit man Jehovah dag adada.
9. Wan watwero ngine kekenwa nining me moko ka ada watye ka ‘keto tek me gwoko ribbe ma cwiny maleng omiyowa’?
9 Pi meno, ngat acel acel myero openye kekene ni: ‘An tika ada atye ka tute me ‘gwoko ribbe ma cwiny maleng omiyowa wek wabed acel i twec me kuc’? Ka peko tye i kin an ki omego nyo lamego mo, gin ango ma atimo me cobone? Tika acako tito cwercwinya bot jo mukene kun abedo ki gen ni gibikonyo kora? Tika abimoro wanga i kom luelda ni gin aye myero gucob peko man, ma ka an tute matek me yubo wat ma oballe-ni? Ka angeyo ni omego nyo lamego mo tye ki lok i koma, tika abibedo ka wene awena wek pe wacob lokke?’ Tika timo jami magi nyuto ni wamito ni yub pa Jehovah me ribo cwecce ducu i te loc pa Kricito-ni ocobbe?
10, 11. (a) Pingo pire tek ni myero wabed ki kuc i kinwa ki omegiwa? (b) Ngo ma waromo timone wek wabed ki kuc dok wanong mot pa Jehovah?
10 Yecu owaco ni: “Pi meno, ka ikelo motti bot Lubanga, ma itye ka tyerone i kom keno tyer, ka ce ipo ni omeru onongo tye ki lok mo i komi, ci myero iwek motti kunnu i nyim keno tyer, ci idok cen; mukwongo kong wumer wuribbe ki omeru, ka lacen dong idwogi ityer motti. Mak larem woko oyotoyot ki ngat mudoti.” (Mat. 5:23-25) Yakobo ocoyo ni “jo ma kelo kuc gicoyo kodigi i kuc me nyako kit ma atir.” (Yak. 3:17, 18) Pi meno, pe waromo bedo ki kit matir ka kuc pe.
11 Me lapore, i lobbe mogo ma lweny obalo marac adada, kibyeko ni lupwur pe giromo pwuro pacen 35 pa ngomgi pi owic mapol ma kiyiko iye. Ka owic acel omwoc, lupwur pe gipuro potigi, dok bene bedo tek adada bot dano me nongo tic i carogi dok boma madongo gibedo ki peko me ginacama. I yo acel-lu, dongo niyewa macalo Lakricitayo bedo tek ka watye ki kit mogo ma balo kuc i kinwa ki omegiwa. Ento ka watimo kica oyotoyot dok bene watimo jami mabeco bot jo mukene, ci wan ducu wabibedo ki kuc kun wanongo mot pa Jehovah.
12. Luelda giromo konyowa me bedo ma waribbe nining?
12 Medo i kom meno, luelda giromo miyo kony me kelo ribbe i kacokke. Gin gitye me konyowa nio ka wan ducu “wadoko acel i niyewa.” (Ep. 4:13) Ka luelda giribbe kwedwa i tiyo tic pa Jehovah dok giminiwa tira ma jenge i Lok pa Lubanga, ci gibikonyowa me ruko kit manyen. (Ep. 4:22-24) Tika ineno tira ma luelda gimini calo yo ma Jehovah tye ka tute kwede me yubbi pi kwo i lobo manyen i te loc pa Wode? Wun luelda, tika wutute me konyo jo mukene kun wutamo i kom yub pa Jehovah-ni?—Gal. 6:1.
“WUBED JO MA LUKICA”
13. Adwogi ango ma bino ka pe walubo tira ma i Jo Epeco 4:25-32?
13 Buk pa Jo Epeco 4:25-29 nyuto jami ma myero pe watimgi. Jami magi gin aye goba, kiniga nyo wac kom, loko lok marac ma ka loko lok mabeco ma dongo dano. Ka ngat mo pe olubo tira man ci en miyo cwiny pa Lubanga kumo, pien cwiny maleng aye obedo teko ma kelo ribbe. (Ep. 4:30) Me kelo ribbe, mitte bene ni walubu gin ma Paulo ocoyo i tyeng ma gulubo ni: “Wuwek dong keccwiny ducu, ki wang-ic ki kiniga, da i wi dano mukene, yet, kacel ki raccwiny ducu. Wubed jo ma lukica ki cwiny maber; dano acel acel omyero otim ber bot lawote. Wutim kica i kinwu kekenwu ki luwotwu i kom balwu, macalo Lubanga otimowu kica i Kricito.”—Ep. 4:31, 32.
14. (a) Te lokke gonye ningo ka kiwacci “wubed” lukica? (b) Gin ango ma bikonyowa wek wabed lukica?
14 Ka kiwacci ni “wubed” lukica te lokke ni nongo i kare mukato angec pe wabedo jo ma timo kica, ma weko nongo mitte tutwal ni myero walok kitwa wacak timo kica. Pore mada ni myero watam i kom kit ma jo mukene giwinyo kwede ki i cwinygi ma ka tamo pi kit ma wawiny kwede keken! (Pil. 2:4) Oromo bedo ni lok moni ma wamito wacone ni weko dano nyero nyo wanen ni waryek, ento meno tika nyuto cwiny me kica? Ka watamo kiryo ma peya waloko lok mo, ci man bikonyowa me ‘bedo jo ma lukica.’
PWONY KIT ME NYUTO MAR KI WORO I KWO ME OT
15. Jo Epeco 5:28 konyo co me niang kit ma myero gilub kwede lanen pa Kricito nining?
15 Baibul oporo wat ma tye i kin Kricito ki kacokke ki wat ma tye i kin laco ki dakone. Man myero omi waniang atir ni laco myero otir, omar, dok ogwok dakone ki dako bene myero omine i te loc pa cware kun pe weko tunge twi. (Ep. 5:22-33) Paulo ocoyo ni: ‘Kit meno, co bene gumar mongi macalo gimaro komgi kengi.’ Ngo ma onongo en tye ka lok iye i kare ma owacci “kit meno”? (Ep. 5:28) En onongo tye ka dwoko wiwa cen i tyeng mogo ma kiloko iye i kom kit ma “Kricito omaro kwede lwak muye en ci omiyo kwone pigi, . . . ma dong otyeko lwokogi ki pii ki lok.” Ada, wek yub pa Jehovah me ribo cwecce ducu i te loc pa Kricito-ni ocobbe, laco myero obed ma wange twolo me nenone ni jo me ode gitye ki wat matek ki Jehovah.
16. Adwogi ango ma bino ka lunyodo cobo ticgi kit ma Ginacoya mito kwede?
16 Lunyodo myero wigi opo ni gitimo tic ma Jehovah ominigi. Ento tye me ur tutwal ni i kare-ni, dano mapol ‘pe gimaro dano wadigi.’ (2 Tem. 3:1, 3) Wege mapol pe gimiyo jami ma mitte pi jo me odigi, man weko lutinogi deno can dok gibedo ma cwinygi cwer. Ento Paulo omiyo tira bot wege ma gin Lukricitayo ni: “Pe wuket kolo i kom litinowu ma miyo kiniga makogi, ento wupitgi gudong maber kun wupwonyogi dok wunyebogi ki kit mabeco ma Rwot [Jehovah] pwoyo.” (Ep. 6:4) Ka pe dong i paco, ci kakwene ma lutino giromo pwonyo iye kit me nyuto mar ki woro? Lunyodo ma gipwonyo lutinogi kit me nyuto mar ki woro nongo gitye ka cobo yub pa Jehovah me ribo cwecce ducu-ni. Ka pacowa bedo kabedo me mar ka ma kiniga pe mako iye dano, pe kiloko lok goba, dok pe kitiyo iye ki leb marac, ci nongo watye ka pwonyo lutinowa kit me nyuto mar ki woro bot jo ma loyogi. Man biyubogi me kwo i lobo manyen pa Lubanga.
17. Gin ango ma mitte wek walweny ki Larac-ci?
17 Wiwa pe myero owil ni Larac-ci aye okwongo balo kuc i lobo, dok bitute ki kerone ducu me gengowa wek pe wati pi Lubanga. Ada, yub pa Catan tye ka cobbe ka waneno kit ma nyom tye ka ket kwede, dano gibedo kacel labongo nyomme, ki dong kiye ni co nyo mon ma gibuto ki luwotgi myero gunyomme. Wan giwa pe walubo kodi kwo man ma opongo lobo pa Catan-ni. Wan walubo lanen pa Kricito. (Ep. 4:17-21) Pi man, kicuko cwinywa ni myero ‘waruk jami lweny ducu ma Lubanga miyo’ wek walweny ki Larac-ci ki jogine.—Kwan Jo Epeco 6:10-13.
“WUBED KUN WULUBO YO ME MAR”
18. Gin ango ma pire tek mumiyo waribbe macalo Lukricitayo?
18 Mar aye gin ma pire tek ka wamito ni waribbe. Pien watye ki mar pi ‘Rwotwa acel,’ ‘Lubangawa acel,’ ki dong pi luwotwa, wan wamoko i cwinywa me ‘gwoko ribbe ma cwiny maleng omiyowa wek wabed acel i twec me kuc.’ (Ep. 4:3-6) Yecu olego pi mar ma kit meno ni: “Pe alego pi jo man keken, ento pi jo ma biye an pi lokgi, ni gin ducu gubed acel macalo in, Abana, ibedo i an, an bene i in, gin ducu gubed i wan, wek lobo oye ni in iora . . . Amiyo nyingi ongene botgi, dok abimiyo ngene, wek mar ma imara kwede obed i gin, ki an i igi.”—Jon 17:20, 21, 26.
19. Gin ango ma imoko tammi me timone?
19 Ka wanongo ni loko kitwa moni tek tutwal pi roc ma watye kwede, ci mar myero owek waleg calo laco jabuli ma olego ni: “Mi abed ki cwiny acel me lworo in.” (Jab. 86:11) Wan ducu myero wamoku i cwinywa me lweny i kom Larac-ci wek pe opok kinwa ki Wonwa me polo ki dong omegiwa ki lumegiwa. Watiyu wunu matek wek ‘walubu kit pa Lubanga, pien wan litinone ma en maro. Wabedu kun walubo yo me mar’—i kwo me ot, ticwa me pwony, ki dong i kacokke.—Ep. 5:1, 2.
[Peny me Kwan]
[Cal ma tye i pot karatac 29]
Ngat moni myero owek gityere inyim keno tyer ci odok cen oyub kuc i kin en ki ominne
[Cal ma tye i pot karatac 31]
Lunyodo, wupwony lutinowu kit me nyuto woro
