Lok Me Tekwaro, Ento Pe Ododo

“Angiyo gin ducu nia i acakki, an bene atamo ni bedo ber ka acoyo piri, kun aryeyo kikore.”​—LUKA 1:3.

PINGO BAIBUL DOK PAT? Tye ododo kacel ki lok aboka mamit ma kibokogi ento jo ma giboko-ni pe ginyuto kabedo ma gutimme iye kikome, nino dwene ki nying jo ma lok meno cung i komgi. Pat mada ka iporo ki Baibul pien inongo iye jami mapol ki dok lok matut me tekwaro ma weko ngat ma tye ka kwanone bedo ki gen ni lokke ducu ‘cung i kom ada.’​—Jabuli 119:160.

LABOL: Baibul tittiwa ni “Kabaka Nebukadnejar . . . otero Yekoyakin [Kabaka me Juda] woko i opii wa i Babilon.” Lacen, “Evil-merodak, kabaka me Babilon, otimo kica ki Yekoyakin kabaka me Juda, ogonye woko ki i mabuc, i mwaka ma en ocamo iye ker.” Medo i kom meno, en “obedo ka miye [Yekoyakin] cam i wi meja pa kabaka jwijwi, pi kare me kwone ducu.”​—2 Luker 24:11, 15; 25:27-30.

GIN MA JO MA GIGOLO PINY GUNONGO: I kin jami mudong i wi obur me Babilon, jo ma gigolo piny gunongo coc ma nino dwene nyuto lok i kom loc me Babilon cakke wa i kare pa Kabaka Nebukadnejar me II. Coc man oryeyo kony ma kibedo ka miyone bot lutic kacel ki lumabuc ma onongo gikwo i Babilon. I kin jo ma gubedo ka nongo kony meno tye iye “Yaukin [Yekoyakin],” ma onongo obedo “kabaka me Yahud (Juda),” kacel ki jo me ode. Ento lok i kom Evil-merodak, ngat ma oleyo ka tyen kabaka Nebukadnejar-ni kono? Coc mo ma kicoyo i kor agulu me keto ature ma kinongo inget boma me Cuca kwanne kit man: “Gang kal pa Amil-Marduk [Evil-merodak], Kabaka me Babilon, wod pa Nebukadnejar, Kabaka me Babilon.”

IN ITAMO NINGO? Tika tye coc mo macon me dini ma lokke tye kakare dok rwatte ki lok me tekwaro? Nyo kece Baibul dok pat?

[Boro buk i pot karatac 5]

“Lok madok i kom kwano mwaka kacel ki kabedo ma gin moni otimme iye girwatte litap i wange dok gigene ka iporo ki coc mo keken me kare macon.”​​—KWED MO ME CAYAN I KOM CIK MACON, MA ROBERT D. WILSON AYE OTIMO

[Cal ma tye i pot karatac 5]

coc pa Lubabilon ma nyuto lok i kom tela pa kabaka yekoyakin me juda

[Ka ma cal oa ki iye i pot karatac 5]

© bpk, Berlin/Vorderasiatisches Museum, SMB/Olaf M. Tessmer/Art Resource, NY