Nong Pwony Ki I Lok Pa Lubanga

Pingo Myero Wati ki Nying Lubanga?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Pingo Lubanga tye ki nyinge?

Ngene kene ni imito ni kilwongngi ki nyingngi ento pe ki nying mogo calo ni “laco-ni,” “nyeri/loni,” “madam,” nyo “dako-ni.” Nying konyo mada me poko in ki jo mukene. Lubanga kilwongo ki nying dog tic calo “Rwot Lubanga,” “Lubanga Matwero-ducu,” ki dong “Lacwec.” (Acakki 15:2; 17:1; Latitlok 12:1) Ento en bene tye ki nyinge ma myero walwonge kwede wek wadong wat macok kwede. I leb Acholi, nyinge kikome aye Jehovah.​—Kwan Nia 3:15. *

Kadi kono bed jo mapol ma gugonyo Baibul guleyo nying Lubanga ki nying me dog tic calo “Lubanga” ki “Rwot,” nying Lubanga nonge tyen 7,000 kulu i Ginacoya me leb Ibru. Ada, Lubanga mito ni kinge nyinge.​—Kwan Jabuli 148:13.

2. Pingo pire tek ni wange nying Lubanga?

Ngeyo nying Lubanga pe te lokke ni ngeyo lwongone. Ngeyo nying Lubanga te lokke ni bedo ki wat macok kwede. Nying ni Jehovah-ni te lokke ni “En Miyo Timme.” Man miyo wabedo ki gen ni Lubanga twero timo gin mo keken wek ecob yubbe. Pi meno, ngeyo nying Lubanga bene twero gonye ni bed ki gen ni en twero cob yubbe ducu. (Jabuli 9:10) Niye ma jo ma gingeyo Lubanga dok gitiyo ki nyinge gitye kwede konyogi me bedo ki gen i kome dok giketo en bedo mukwongo i kwogi. Lubanga Jehovah bigwoko jo ma kit meno.​—Kwan Jabuli 91:14.

  3. Pingo Lubanga mito ni kinge nyinge?

Lubanga mito ni dano gunge nyinge pien meno bikeligi adwogi maber. Konyogi me doko lurem Lubanga kun gibedo ki gen me nongo kwo ma pe tum. Man aye gin muweko Jehovah mito ni wami dano gunge nyinge!​—Kwan Jon 17:3; Jo Roma 10:13, 14.

Yecu omiyo nying Lubanga ongene kun pwonyo dano ki lok i kom Lubanga, Cikke ki dong Cikkene. I kare-ni, lulub kor Yecu gimedde ki tic me weko nying Lubanga ongene i rok ducu. Gitimo meno kun gitiyo kacel macalo “lwak ma gilwongo ki nyinge [Lubanga].”​—Kwan Tic pa Lukwena 15:14; Jon 17:26.

4. Lubanga mono biketo deyo i kom nyinge nining?

Lubanga Jehovah mito ni eket deyo i kom nyinge pien kityeko balone matek tutwal. Me labolle, jo mogo gibango lok ni en aye pe ocweyo jami makwo dok ni pe mitte ni wawiny lokke. Jo mukene giwaco ni en pe paro piwa dok bene en aye weko dano deno can. Jo ma kit meno gibalo nying Lubanga. Ento pe gibimedde kwede pi naka. Lubanga bityeko jo ma gicayo nyinge.​—Kwan Jabuli 83:17, 18.

Jehovah biketo deyo i kom nyinge i kare ma Ker-re bituro loc pa dano dok kelo kuc ki piny mupye mot i lobo. (Daniel 2:44) Cokcok-ki, dano ducu gubingeyo ni Jehovah aye Lubanga me ada.​—Kwan Ejekiel 36:23; Matayo 6:9.

Ngo ma myero dong itim? Nyikke cok bot Lubanga kun ibedo ka kwano Lokke dok inywako kacel ki jo ma gimarre. I kare ma Jehovah biketo iye deyo i kom nyinge, wiye bipo i kom luticce.​—Malaki 3:16.

[Lok ma tye piny]

Pi ngec mukene, nen dul me 1 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.

[Cal ma tye i pot karatac 10]

Nying Lubanga i Ginacoya macon me leb Ibru